Menene Jibin Maraice Na Ƙarshe?

ME YAKE faɗowa zuciyarka sa’ad da ka ji wannan furcin “jibin maraice na ƙarshe”? Mutane da yawa za su tuna wani zane a Milan ta Italiya, wanda mai zane Leonardo da Vinci suka zana (1452-1519). Hakika, wannan jibin maraice na ƙarshe abin da masu zane, marubuta, da mawaƙa a dukan ƙarnuka suke magana a kai ne.

Amma, menene ne Jibin Maraice na Ƙarshe, kuma menene ma’anar sa ga mutane da suke raye a wannan ƙarni na 21? Kundin sani da ƙamus za su gaya maka cewa Jibin Maraice na Ƙarshe, ana kiransa Jibin Maraice na Ubangiji ma, abinci ne da Yesu Kristi ya ci da manzanninsa da yamma kafin mutuwarsa ta hadaya. Tun da yake wannan jibi na ƙarshe ne da Yesu ya ci da mabiyansa masu aminci ana kiransa Jibin Maraice na Ƙarshe. Kuma tun da Ubangiji Yesu Kristi ne da kansa ya kafa shi, Jibin Maraice na Ubangiji daidai ne.

A cikin dukan ƙarnuka, mutane da yawa sun sadaukar da rayukansu domin abin da suka gaskata ya cancanta. Wasu cikin waɗannan mutuwa ta amfani wasu mutane na ɗan lokaci. Amma, idan aka gwada, babu ko ɗaya cikin waɗannan da ta yi kusa wajen muhimmanci da mutuwar Yesu Kristi. Bugu da ƙari, babu mutuwa a dukan tarihin ’yan Adam da ta shafi dukan duniya kamar wannan. Me ya sa?

Domin a amsa wannan tambayar kuma a taimaka maka ka fahimci abin da Jibin Maraice na Ubangiji yake nufi a gare ka, muna masu gayyatarka ka karanta talifi na gaba.