Inaki Ogosasima Gwaito Koramogokie Nyasae?

Buna ereseni yaera yakwanerete, tari dini chionsi chikomogokia Nyasae. Korende, nabo tokomosasima Omotongi oito ase enchera ekomogokia. “Okomokorera” gose okomosasima oko gokomogokia nkoroki? (Yakobo 1:27) Rora ayio Ebibilia ekworokereria.

1. Ninki kebwenerete koba oboroso bw’ogosasima gwaito?

Ebibilia nero ebwenerete koba oboroso bw’ogosasima gwaito. Yeso akamotebia Nyasae: “Ring’ana riao nario ekeene.” (Yohana 17:17) Chidini chinde tichiri gokorera ekeene kegotoka ase Ring’ana ria Nyasae riutire, Ebibilia. Ribaga riaye, nigo chikworokereria amaorokererio a mwanyabanto na egekoro. Korende Yehova tari kogokigwa na baria “[baangire] richiko ria Nyasae.” (Soma Mariko 7:9.) Ase enchera ende, nigo tokomogokia Yehova ekero tokobwatana n’Ebibilia na kobwatia obosemia bwaye.

2. Inaki tobwenerete komosasima Yehova?

Nigo tobwenerete komosasima Yehova bweka ekiagera nere Omotongi oito. (Okomaanoka 4:11) Engencho yaye, goika tomwanche na komosasima ere bweka, totari gotumea emegwekano.—Soma Isaya 42:8.

Ogosasima gwaito goika kobe “[ogochenu, okoranyare] gwanchwa” na Yehova. (Abarumi 12:1) Engencho yaye nigo tobwenerete koigwera amachiko aye. Ase omobwekano, baria bamwanchete Yehova nigo banchete na koigwera ebirengo biaye bi’enyuomo. Na goetanga na amakora amabe, buna gotumea etumbato, amariogo ase enchera etabwenereti gose ebinyugwa bi’ogotindia.a

3. Naseki tobwenerete komosasima Yehova n’abegenwa baminto?

Emesangererekano tobwate kera egwiki nigo egotoa ribaga ri’okomotogia Yehova “ase omosangererekano.” (Zaburi 111:1, 2) Enchera eyemo togokora bo, ngoetera gotera amatera y’okomotogia Nyasae. (Soma Zaburi 104:33.) Yehova nigo agotoboria toikerane ase emesangererekano ase engencho nigo atwanchete, naende nigo amanyete ng’a nabo egotokoonya togokere obogima goika kare na kare. Ase emesangererekano nigo tokoremia abande na barobwo batoremia.

EGERA AMANGE

4. Titobwenereti gotumea emegwekano ase ogosasima gwaito

EVIDIO: Inee, Nyasae Ngwanchera are Ogotumea Emegwekano ase Ogosasima? (3:26)

• Ninki kiabete ase chingaki chi’Ebibilia, ekero abanto bande ba Nyasae batemete komosasima goetera emegwekano?

Abanto bande nigo bagotema komoika Nyasae ang’e goetera gotumea emegwekano ase ogosasima kwabo. Inee, gokora bo nigo gokobarenta ang’e nere gose nigo gokobaatanana? Soma Okong’anya 20:4-6 na Zaburi 106:35, 36, na mokwanere amaborio aya:

• Mbinto ki gose megwekano ki aye okorora abanto bagotumea ase ogosasima kwabo?

• Inaki Yehova akoigwa igoro y’ogotumea emegwekano?

• Aye, naki oroche igoro y’ogotumea emegwekano?

5. Komosasima Yehova bweka nigo kogotoa obosibore korwa ase amaorokererio y’oborimo

EVIDIO: Obosibore Goetera Ekeene (5:16)

Soma Zaburi 91:14, na mokwanere riborio eri:

• Eira ki Yehova agotoriera gotokorera ekero tokworokia ng’a ntomwanchete goetera komosasima ere bweka?

6. Nigo tokomosasima Yehova ase emesangererekano

Nigo tokomotogia Yehova na koagacha abande ekero togotera na korua amaereso ase emesangererekano. Soma Zaburi 22:22, na mokwanere amaborio aya:

• Aye kwanya kogokera koigwa amaereso ya abande ase emesangererekano?

• Aye noganie kwearigania erio orue amaereso ao?

7. Yehova nigo akogokigwa ekero togosanga n’abande aria tokwegera

Chinchera ne chinyinge chireo chi’ogosanga ekeene gi’Ebibilia amo n’abande. Soma Zaburi 9:1 na 34:1, na mokwanere riborio eri:

• Ng’ento ki kwegeire korwa ase Ebibilia ekio oraganie komotebia omonto onde?

ASE OBWENG’E

Nigo tokomogokia Omotongi oito ekero tokomosasima ere bweka, komotogia ase emesangererekano na gosanga n’abande aria twegeire.

Einyorie

• Ng’ai Yehova agototebia enchera tobwenerete komosasima?

• Naseki tobwenerete komosasima Yehova bweka?

• Naseki tobwenerete gosasima amo nabaria batagete komogokia Nyasae?

TUKA MONO

Ase omogano “Bono Tindi Omosomba bw’Emegwekano,” soma buna omokungu oyomo atigete gosasima emegwekano.

“Ebibilia Nigo Egoonchoreria Obogima” (Mnara wa Mlinzi, Julai 1, 2011)

Egera ekio keragokoonye orue amaereso ase emesangererekano.

“Motogie Yehova ase Omosangererekano” (Mnara wa Mlinzi, Januari 2019)

Rora buna emesangererekano yakoonyete omosae oyomo nonya yarenge akong’u goikerana.

Yehova Akandenda (3:07)

Abanto abange nigo begenete ng’a omosaraba noro ekemanyererio ki’Obokristo, inee, ntobwenerete koyotumea ase ogosasima gwaito?

“Naseki Birori ba Yehova Batari Gotumea Omosaraba ase Ogosasima Kwabo?” (Erikire ase omotandao)