Buna Chidini chi’Oborimo Chigoteba Oborimo Igoro ya Nyasae

Nyasae nobwanchani. Naseki rende chidini chigokwana na gokora ase erieta ria Nyasae chiakorire amabe amange? Chidini echio nigo chire chi’oborimo, ayio chigokwana na gokora nigo akogera abanto begene oborimo igoro ya Nyasae. Inaki chigoteba oborimo igoro ya Nyasae? Inaki akorora chidini echio chigokwana oborimo? Na ngetambokero ki arairere chidini chigokwana oborimo?

1. Inaki chidini chi’oborimo chigoteba oborimo igoro ya Nyasae goetera amaorokererio abo?

Chidini chi’oborimo chiatigire “ekeene kia, Nyasae, [na gochora] oborimo.” (Abarumi 1:25) Ase omobwekano, chidini chinyinge tichirabaorokereria abatunyani babo erieta ria Nyasae. Nonya nabo, Ebibilia nigo egoteba ng’a erieta ria Nyasae goika ribe rigotumeka. (Abarumi 10:13, 14) Abarai bande bechidini nigo bagoteba ng’a ekero egento ekebe kegokoreka okwo nogwancha kwa Nyasae. Korende obwo noborimo. Nyasae tagokora ayare amabe. (Soma Yakobo 1:13.) Ase ogoichania oborimo bwechidini bwagerire ebe akong’u ase abanto komwancha Nyasae.

2. Inaki chidini chi’oborimo chigoteba oborimo igoro ya Nyasae goetera amakora abo?

Chidini chi’oborimo tichirigokorera abanto buna Yehova akobakorera. Ebibilia nigo egoteba ng’a edini y’oborimo “ebibe biaye biaikire igoro.” (Okomaanoka 18:5) Ase emiaka emenge chidini chiesoirie ase siasa, baeire okoboko chisegi, na baitire gose goancherana ogoitwa kw’omoganda omonene bwa abanto. Abarai bande bechidini nigo bakogokera obogima bwa igoro, na kobetereria chibesa korwa ase abatunyani babo erio goakanera obogima obwo. Amakora aya nigo akoenekia ng’a tibamomanyeti Nyasae na boigo tibabwati obosibore bw’okomokorera na kworokereria igoro yaye.—Soma 1 Yohana 4:8.

3. Inaki Nyasae akorora chidini chi’oborimo?

Onye ebinto bigokorwa nechidini chi’oborimo bigokogechia, okorengereria naki Yehova ere akoigwa? Nigo abanchete abanto, korende nigo akogechigwa na abaraai be chidini abwo bagoteba oborimo igoro yaye na kobachanda abatunyani babo. Nigo agotoriera eira ng’a chidini chi’oborimo nchisirigwe naende “[tichikonyara] kororekana nonya ng’ake.” (Okomaanoka 18:21) Nyasae, bwango iga nasirie chidini chionsi chi’oborimo.—Okomaanoka 18:8.

EGERA AMANGE

4. Nyasae tarigwancherana chidini chionsi

Abanto abange nigo begenete ng’a chidini nigo chibwekanirie chinchera ao-ao echio chionsi chikobaira ase Nyasae. Inee, n’ekeene? Soma Matayo 7:13, 14, na mokwanere riborio eri:

• Naki Ebibilia egoteba igoro y’enchera ekogenda ase bogima?

Orokia EVIDIO, na mokwanere riborio rikobwatia.

EVIDIO: Inee Nyasae Ngwancherana Are Chinchera Chionsi chi’Ogosasima?—Ekeng’ese (3:22)

• Inee, Ebibilia ngoteba ere ng’a chidini nechinyinge chireo echio chikomogokia Nyasae?

5. Chidini chi’oborimo tichirikoorokia obwanchani bwa Nyasae

Chidini chiatebire oborimo igoro ya Nyasae ase chinchera chinyinge. Enchera ekumete mono n’okobwaterana kwabo ase chisegi. Erio korora omobwekano oyomo, orokia EVIDIO. Na mokwanere amaborio akobwatia.

EVIDIO: Egetari gie Chikanisa Ase Esegi ya II y’Ense (2:22)

• Insemo ki chikanisa chinyinge chiairete ekero gi’Esegi ya II Yense?

• Inaki oroche igoro y’ensemo bachorete?

Soma Yohana 13:34, 35 na 17:16. Na mokwanere amaborio aya:

• Inaki okorengereria Yehova akoigwa ekero chidini chigwesoanania ase chisegi?

• Edini y’oborimo nero ekomochigwa ase ebinto ebinge ebibe. Nase nchera ki kwarorire chidini chiasinyirwe kwegia obwanchani bwa Nyasae?

6. Nyasae nigo aganetie kobasibora abanto korwa ase chidini chi’oborimo

Soma Okomaanoka 18:4,a na mokwanere riborio eri:

• Inaki okoigwa ekero okomanya ng’a Nyasae naganetie gotooria abanto abwo babeire bakong’ainwa nechidini chi’oborimo?

7. Genderera kwegera igoro ya Nyasae bw’ekeene

Inee, ebinto ebibe chidini chi’oborimo chigokwana na gokora, mbigere bw’onchorerie ebirengererio biao igoro ya Nyasae? Kagera omomura okwanga koigwera ise. Ong’anya korwa sobo na gokora ebinto ebibe mono. Ise tarigwanchera amakora a momura oye. Naseki etari buya komomochia ise ase enchera momura oye amenyete?

• Inee, nere buya komomochia Yehova na gotiga kwegera igoro yaye ase engencho ya amakora yechidini chi’oborimo?

ASE OBWENG’E

Chidini chi’oborimo chiatebire oborimo igoro ya Nyasae goetera amaorokererio y’oborimo na amakora y’okwondokia. Nyasae nasirie chidini chi’oborimo.

Einyorie

• Inaki okorora amaorokererio yechidini chi’oborimo na enchera chikwegendia?

• Inaki Yehova agochirora chidini chi’oborimo?

• Ninki Nyasae arakorere chidini chi’oborimo?

TUKA MONO

Egera igoro ye chinchera ibere echio chidini chinyinge chikomogechia Nyasae.

“Inee, Chidini Chionsi Nchibwekaine? Inee, Chionsi Nkoraa Chire ase Nyasae?” (Erikire ase omotandao)

Naseki Yehova aganetie tomosasime amo na abande?

“Inee Nebetereretie Omonto Abe ase Edini Gete?” (Erikire ase omotandao)

Omosasiroti oyomo akagechigwa na amakora na amaorokererio y’edini yaye. Korende ekio tikiamotangete korwa ase okwegera ekeene igoro ya Nyasae.

“Ekio Kiagerete Omosasiroti Agatiga Edini Yaye” (Amkeni!, Februari 2015)

Ase emiaka emenge, chidini chiorokereirie oborimo obwo bokogera abanto barengererie ng’a Nyasae tari gotwechandera na n’omoiti. Egera ekeene igoro ya amang’ana atato y’oborimo.

“Oborimo Obwo Bokogera Abanto Tibamwancha Nyasae” (Mnara wa Mlinzi, Novemba 1, 2013)