ERESENI 55
Siira Omosangererekano Oino
Ase ense goeta chimillioni chia abanto nigo bakogokera komosasima Yehova ase chilifu chi’emesangererekano. Nigo bakoiraneria mbuya mono ase amachiko na oborai bakonyora, na berua abanyene gosiira omosangererekano ase chinchera chinyinge. Inee aye, nabo okoigwa igo, igoro y’omosangererekano oino?
1. Nchera ki chinde oranyare gotumea chingaki chiao nechinguru gosiira omosangererekano?
Twensi nabo togokoonya ase omosangererekano. Ase omobwekano, inee, mbareo bare abagotu gose abarwarete ase omosangererekano oino? Inee, nonyare kobakoonya erio goika ase emesangererekano? Gose nonyare kobakoonya ase chinchera chinde? Ase omobwekano, goetera kobarentera endagera gose ebinto binde baganetie gose gochena chinyomba chiabo. (Soma Yakobo 1:27.) Boigo nabo tokwerua gokoonya gochena na korenda e Kingdom Hall yaito. Onde taiyo oratobetererie gokora ebinto ebi. Obwanchani bwaito ase Nyasae na bamura baminto nigo bogotosegeta ‘twerue nogwancha gwaito.’—Zaburi 110:3.
Birori babatisire nabo bagosiira omosangererekano ase chinchera chinde chinyinge. Bamura baminto abwo bagoikerania amaganio y’Ebibilia nabo bagokoonya omosangererekano buna abasomba b’obokoreri, gose abagaaka. Bamura na basubati baminto bonsi nigo bagosiira ase omokia emeremo y’okorandia goetera gokorera buna abapainia. Birori bande nabo bagokoonya koagacha chinsemo chi’ogosasima gose kong’anya gochia ase omosangererekano oganetie obokoonyi ase chinchera chinde.
2. Inaki toratumie chibesa na ebinto biaito tobwate gosiira omosangererekano?
Nabo ‘togosika Omonene [“Yehova,” NWT] ne chinibo chiaito chionsi.’ (Emereng’anio 3:9) Nigo tokogoka korua chibesa nebinto biaito gosiira omosangererekano oito na emeremo y’okorandia ense engima. (Soma 2 Abakorinto 9:7.) Emechango yaito boigo nigo egotumeka gokoonya baria banyorirwe n’emechando y’emebasokano. Abange bachorire kogacha “ensemo ase eki anyorire” botambe buna omochango (Soma 1 Abakorinto 16:2.) Nabo tokorua emechango yaito goetera koyebeka ase chisanduku chi’omochango chigotoka chinsemo chiaito chi’ogosasima, gose goetera enchera y’omotandao ase donate.jw.org/sw. Yehova nigo agotoa ribaga ri’okworokia obwanchani bwaito gochia asare goetera enchera togochora gotumea chibesa nechinibo chiaito.
EGERA AMANGE
Rora chinchera chinde oranyare gosiira omosangererekano.
3. Nabo togotumea chinibo chiaito
Yehova na Yeso nigo banchete baria bakorua ase omogoko. Ase omobwekano, Yeso akamotogia omoboraka orenge omotaka igoro y’omokia oye bw’okorua omochango oye gochia ase Yehova. Soma Luka 21:1-4, na mokwanere amaborio aya:
Inee, nigo tobwenerete korua chibesa chinyinge erio tomogokie Yehova?
Inaki Yehova na Yeso bakoigwa ekero tokorua ase ogwancha?
Erio kwegera buna emechango yaito egotumeka, orokia EVIDIO. Na mokwanere riborio rikobwatia.
Inaki emechango egotumeka gokoonya emesangererekano ense goeta?
4. Nabo tokwerua gokoonya
Ase chingaki chi’Ebibilia, abasasimi ba Yehova bagakora emeremo ase omokia erio korenda chinsemo chiabo chi’ogosasima. Komenta na korua chibesa bakerua gokoonya emeremo. Soma 2 Amang’ana ’Ebiro 34:9-11, na mokwanere riborio eri:
Inaki kera Omoisraeli akoonyete enyomba ya Yehova gose enyomba y’ogosasima?
Erio korora buna Birori ba Yehova bakobwatia ekeorokererio ekio ki’Ebibilia, orokia EVIDIO. Na mokwanere amaborio akobwatia.
Naseki ere buya koenekia ng’a e Kingdom Hall yaito nenchenu na nigo ere ase enchera engiya?
Nase nchera ki oranyare gokoonya?
5. Bamura baminto nabo bagokora omokia erio babwenere gokora amange ase omosangererekano
Amariko nigo akobasegeta abasacha Abakristo gokora omokia erio konyara gokoonya omosangererekano. Erio korora omobwekano, orokia EVIDIO. Na oiranerie riborio rikobwatia.
Ase evidio, naki Ryan akorete omokia erio goikera gosiira omosangererekano boikeranu?
Ebibilia nkoeresa ere ebirengo ebio bamura baminto abwo bagotumeka buna abasomba b’obokoreri na abagaaka baganeirie. Soma 1 Timotheo 3:1-13, na mokwanere amaborio aya:
Ninki keganeirie korwa ase bamura baminto abwo bagokora omokia gokorera buna abasomba b’obokoreri na abagaaka?
Ninki keganeirie korwa ase chinka chiabo?—Rora ebibungo 4 na 11.
Ekero bamura baminto bagotema goikera ebirengo ebi, naki kera oyomo ase omosangererekano agokoonywa?
NABO OMONTO ARABORIE: “Ng’ai Birori ba Yehova bakonyora chibesa chi’okogendia emeremo yabo?”
Inaki orairanerie?
ASE OBWENG’E
Yehova nigo akogokigwa anene mono nomokia oito bw’ogosiira omosangererekano goetera engaki yaito, chinguru, na chinibo chiaito.
Einyorie
Inaki toratumie chingaki chiaito nechinguru erio gosiira omosangererekano?
Inaki toratumie chinibo chiaito erio gosiira omosangererekano?
Nase nchera ki oraganie gosiira omosangererekano?
TUKA MONO
Rora naseki Nyasae ataganetie rero abasasimi baye korua ensemo ya ikomi.
“Ebibilia Ninki Egoteba Igoro y’Okorua Ensemo ya Ikomi?” (Erikire ase omotandao)
Egera ninki engencho y’omonto “origetie koba” ase omosangererekano.
“Inee, Aye n’Omonto ‘Origetie Koba’?” (Mnara wa Mlinzi, Septemba 15, 2014)
Omerana na bake ba Birori abaremu abwo betiganire ase omokia omonene koira ebitabu ase abasasimi bamwabo.
Manya buna chibesa chikogendia emeremo yaito chigotoka ase enchera etabwekaini nechidini chinde.
“Chibesa Chikogendia Emeremo ya Birori ba Yehova Naki Chigotoka?” (Erikire ase omotandao)