ERESENI 49
Inaki Enka Yao Erabe n’Omogoko?—Ensemo 1
Abare abayia ase enyuomo nigo bagosemeria ng’a omogoko oria baigwete rituko riabo ri’enyangi nogenderere kare na kare. Ekeene nabo ekonyarekana. Abakristo abwo banyuomanire engaki entambe yaetire na baria bagotema ase omokia gotumea obosemia bw’Ebibilia bamanyire ng’a nabo ekonyarekana.
1. Mbosemia ki Ebibilia ekobaa abasacha?
Yehova omobekire omosacha koba omotwe bw’enka. (Soma Abaefeso 5:23.) Yehova nigo aganetie omosacha akore okonacha okwo kogokoonya enka yaye. Ebibilia nigo egosemia abasacha: “Mwanche abakungu baino.” (Abaefeso 5:25) Ninki engencho y’amang’ana ayio? Omosacha bwanchete mokaye nigo akomokorera ase obwororo, ekero bare inka na ekero bare ase abanto bande. Nigo agotema komorenda na komorentera omogoko mokaye, boigo komoa ayaganetie. (1 Timotheo 5:8) Kobua mono, nigo akoraa ase okorenda okogania kwaye gwa kemoika. (Matayo 4:4) Ase omobwekano, nabo agosaba na gosoma Ebibilia amo na mokaye. Ekero omosacha akomokorera mokaye ase obwanchani, nigo agoting’ia obosani bwaye amo na Yehova.—Soma 1 Petero 3:7.
2. Mbosemia ki Ebibilia ekobaa abakungu?
Ring’ana ria Nyasae nigo rigoteba ng’a “omokungu tamocha gosika omosacha oye.” (Abaefeso 5:33) Inaki arakore bo? Goetera korengereria igoro ye chimbwa chingiya chi’omosacha oye na omokia agokora erio komorenda ere amo na abana babo. Boigo nigo akworokia ogosika omosacha oye goetera komosiira ekero agokora okonacha na goetera komokwana buya, na gokwana buya asare nonya nekero atari omosasimi o Yehova.
3. Abanyuomaine naki barating’ie enyuomo yabo?
Ebibilia nigo egoteba igoro ya omosacha na omokungu banyuomaine: “Abwo babere nigo barabe omobere oyomo.” (Matayo 19:5) Engencho yaye, goika barwanie gento kende gionsi keragere obwanchani bwabo bokende. Nigo bagokora bo ase botambe bagotumea chingaki amo nase obwasioku na obwanchani nigo bagosanga ebirengererio biabo na enchera bakoigwa. Tibaeti ribaga gento kende gionsi gose monto onde bwensi koba bw’engencho kobua omwanchi obo bw’enyangi—otatiga Yehova. Nigo bakorenda mono tibaisa gochakia obosani bwa ime mono na onde bwensi otari omwanchi obo bw’enyuomo.
EGERA AMANGE
Rora ebirengo bi’Ebibilia ebio birating’ie enyuomo yao.
4. Abasacha—mwanche na komorenda buya mokao
Ebibilia nigo egoteba ng’a nigo “egwenerete abasacha banche abakungu babo buna emebere yabo abanyene.” (Abaefeso 5:28, 29) Ninki engencho y’amang’ana ayio? Orokia EVIDIO, na mokwanere riborio rikobwatia.
Nase nchera ki chinde omosacha araorokie ng’a namwanchete na komorenda mokaye?
Soma Abakolosai 3:12, na mokwanere riborio eri:
Inaki abasacha baraorokie chimbwa echi ase enyuomo yabo?
5. Abakungu—mwanche na komosika omosacha oo
Ebibilia nigo ekomosegeta omokungu amosike omosacha oye neba gakomokorera Yehova gose atari komokorera. Soma 1 Petero 3:1, 2, na mokwanere amaborio aya:
Onye omosacha oo tari omwegeni, ekeene noganetie achake komosasima Yehova. Inee, okorengereria nchera ki erabe engiya? Nkogenderera komoranderia gose ngotwara orogendo oruya na komworokia ogosika? Naseki?
Abasacha na abakungu nabo bagokora okonacha okuya amo. Neba nabo ngaki chinde nabo omokungu arabe taancherana na omosacha oye. Ekero atarigwancherana nabo agokwana ebirengererio biaye ase obwororo na amasikani, korende goika amanye ng’a Yehova omoire omosacha okobua kw’ogochora keria kere ekiya ase enka yaye. Nigo ere buya ase omokungu gotema gosiira okonacha kw’omosacha oye. Goetera gokora bo, nigo akorenta omogoko ase enka. Soma 1 Petero 3:3-5, na mokwanere riborio eri:
Inaki Yehova akoigwa ekero omokungu akomosika omosacha oye?
6. Nabo okobua emechando ase enyuomo yao
Nyuomo teiyo eikeranete. Igo bono, omosacha na omokungu banyuomaine goika babwaterane erio gokoora amakong’u. Orokia EVIDIO, na mokwanere amaborio akobwatia.
Ase evidio, ninki gekworokia ng’a obwanchani bwabo konyora bwachakire gokenda?
Mbitambokero ki baimogetie erio goting’ia enyuomo yabo?
Soma 1 Abakorinto 10:24 na Abakolosai 3:13. Nyuma y’ogosoma kera ririko, mokwanere riborio eri:
Gotumea obosemia obo naki borating’ie enyuomo?
Ebibilia nigo egoteba ng’a nigo tobwenerete gosikana. Kworokia ogosika eye n’enchera y’ogokorera omonto ase obwororo na amasikani. Soma Abarumi 12:10, na mokwanere amaborio aya:
Inee, abasacha gose abakungu goika baganye omwanchi obo abaorokie amasikani ritang’ani? Naseki?
ABANTO BANDE NIGO BAGOTEBA: “Nche amo na omwanchi one titori na obomo buna kare.”
Inaki orabaorokoie ng’a Ebibilia nabo ekobakoonya?
ASE OBWENG’E
Omosacha na omokungu nabo bakoba nomogoko ekero banchaine, basikaine, na gotumea ebirengo bi’Ebibilia.
Einyorie
Inaki omosacha arasegete omogoko ase enyuomo?
Inaki omokungu arasegete omogoko ase enyuomo?
Onye kore ase enyuomo, nkerengo ki ki’Ebibilia oratumie erio kegokoonye goting’ia enyuomo yao?
TUKA MONO
Egera obosemia obwo boragokoonye obe n’enka ere nomogoko.
Rigereria evidio y’ogotera eyio ekwanerete amasesenio y’ogotumea obosemia bwa Nyasae ase enyuomo yao.
Rora ninki engencho y’ogwekeyia inse y’omotwe bw’omosacha.
“Abakungu, Naseki Bekeyie Inse y’Omotwe?” (Mnara wa Mlinzi, Mei 15, 2010)
Rora nase ekerengo ki obosemia bw’Ebibilia igoro y’enyuomo borakoonye abanyuomaine.