Inaki Enka Yao Erabe n’Omogoko?—Ensemo 2

Abana n’ekeegwa korwa ase Yehova. Nigo aganetie abaibori barende ekeegwa ekio. Yehova obaire obosemia bw’obong’aini obwo borabakoonye abaibori gokora bo. Boigo obosemia bwaye nigo bokworokia ekio abana babwenerete gokora erio korenta omogoko ase enka yabo.

1. Mbosemia ki Yehova akoa abaibori?

Yehova nigo aganetie abaibori babanche abana babo na gotumea chingaki amo na barobwo buna ekonyarekana. Boigo nigo aganetie abaibori barende abana babo korwa ase gokorerwa bobe na gotumea ebirengo bi’Ebibilia buna oboroso bw’okobaorokereria. (Emereng’anio 1:8) Nigo akobatebia abaise: “Mobarere [abana baino] . . . ase okworokereria kw’Omonene [“Yehova,” NWT].” (Soma Abaefeso 6:4.) Yehova nigo akogokigwa ekero abaibori bakobwatia oborai bwaye ekero bakorera abana babo, na tibaa onde bwensi ribaga ri’ogokora bo.

2. Mbosemia ki Yehova akoa abana?

Yehova nigo agochika abana: “Moigwere abaibori baino.” (Soma Abakolosai 3:20.) Ekero abana bakobasika na koigwera abaibori babo, nigo bakomorentera Yehova omogoko na abaibori babo boigo. (Emereng’anio 23:22-25) Yeso nabegete omobwekano omuya ekero arenge omwana. Nonya orenge omoikeranu, nabaigwerete na kobasika abaibori baye.—Luka 2:51, 52.

3. Inaki moramoike Nyasae ang’e buna enka?

Onye kore omoibori, n’ekeene nigo oganetie abana bao bamwanche Yehova buna omwanchete. Inaki oranyare goikerania ekerenga eke? Goetera gokora aria Ebibilia egoteba ng’a goika: “Moyorokererie [amang’ana a Yehova] abana baino mono, mobe mokona-koyairanerera botambe; moyakwane ekero moikaransete ase chinyomba chiaino, na ekero more ase orogendo inchera.” (Okoiranerera kw’Amachiko 6:7) ‘Kona-koyairanerera’ engencho yaye nokworokereria ase okona-koirora-irora egento. Boigo, nomanyete ng’a goika onyakoirora-irora ring’ana ase abana erinde nario barainyore. Engencho yeririko eri neri ng’a nobwenerete korigia chingaki botambe erio gokwana na abana bao igoro ya Yehova. Nere buya ase enka yonsi koroberia chingaki kera egwiki erio komosasima Yehova na kwegera Ebibilia amo. Onye tobwati abana nabo ogokoonywa ase okoroberia chingaki kera egwiki erio kwegera Ring’ana ria Nyasae.

EGERA AMANGE

4. Orokereria abana bao ase obwanchani

Nabo ere emeremo emekong’u kobaorokereria abana. Inaki Ebibilia erakoonye? Soma Yakobo 1:19, 20, na mokwanere amaborio aya:

• Inaki abaibori baraorokie obwanchani ekero bagokwana nabana babo?

• Naseki omoibori atabwenereti kworokereria abana baye ekero are n’obororo?a

5. Renda abana bao

Erio korenda abana bao, negento ki’engencho mono gokwana na kera omwana igoro y’okororana kemobere. Gokora bo nabo ekororekana koba egento ki’obosooku. Orokia EVIDIO, na mokwanere amaborio akobwatia.

EVIDIO: Renda Abana Bao Korwa Ase Obobe (2:58)

• Naseki ere akong’u ase abaibori bande gokwana na abana babo igoro y’okororana kemobere?

• Nase nchera ki abaibori bande bakwanire nabana babo igoro y’okororana kemobere?

Buna yabanetwe, ense ya Saitani yagendereire koba embe mono. Soma 2 Timotheo 3:1, 13, na mokwanere riborio eri:

• Gati ya abanto ababe bakwaneire ase ekebungo gia 13 nigo bagotibonga na gosaria abana. Ase igo, naseki kere egento ki’engencho abaibori kworokereria abana babo igoro y’okororana kemobere na buna babwenerete kwerenda korwa ase baria bakobakorera bobe?

Inee, nomanyete?

Birori ba Yehova nkorua bare chividio na ebitabu ebinge ebio bikobakoonya abaibori kwegeria abana babo igoro y’okororana kemobere na erio kwerenda korwa ase gokorerwa bobe. Ase omobwekano, rora:

• Renda Abana Bao (Evidio)

• Jifunze Kutoka kwa Mwalimu Mkuu, sura 10 na 32

• “Kworokereria Omwana oo Igoro y’Okororana Kemobere” (Amkeni! Na. 5 2016)

6. Sika abaibori baino

EVIDIO: Inaki Ndakwane n’Abaibori Bane? (2:19)

• Naseki ere buya omwana gose omosae gokwana ase amasikani amo na abaibori baye?

• Inaki omwana gose omosae arakwane na abaibori baye ase enchera ekworokia amasikani?

Soma Emereng’anio 1:8, na mokwanere riborio eri:

• Inaki omosae abwenerete gokora ekero abaibori baye bakomochika ekio abwenerete gokora?

7. Mosasime Yehova buna enka

Chinka chia Birori ba Yehova nigo bakoroberia chinsa beene kera egwiki erio gosasima amo.Ogosasima oko gw’enka naki gokororekana? Orokia EVIDIO, na mokwanere amaborio akobwatia.

EVIDIO: Ogosasima gw’Enka—Amakong’u n’Amasesenio (8:04)

• Inaki enka erabe n’omoroberio o botambe bw’ogokora ogosasima gw’enka?

• Ninki abaibori barakore erio ogosasima gw’enka kobe kw’ogosemia na gw’okogokia?—Rora ebicha y’okoigora ase ereseni eye.

• Ngento ki keragere ebe akong’u ase enka yao kwegera amo?

Ase Israeli ya kare, Yehova nigo aganetie chinka chikwanere botambe igoro ya Amariko. Soma Okoiranerera kw’Amachiko 6:6, 7, na mokwanere riborio eri:

• Inaki oratumie ririko eri?

Obosemia bw’ogosasima gw’enka:

• Arigania emesangererekano.

• Soma na gokwanera emegano y’Ebibilia eyio enka yao eragokere.

• Onye kobwate abana abake, taoria gose oake echaba ensemo eyemo ya abana korwa ase jw.org.

• Onye kobwate abana abasae, kwanera ebitabu nechividio igoro ya abasae ase jw.org.

• Egia omogano bw’Ebibilia amo na abana bao.

• Rigereria na mokwanere evidio ase jw.org.

ASE OBWENG’E

Yehova nigo aganetie abaibori babanche, babegerie na korenda abana babo; na nigo aganetie abana babasike na kobaigwera abaibori babo; naende nigo aganetie chinka chimosasime amo.

Einyorie

• Inaki abaibori barabaorokererie na kobarenda abana babo?

• Inaki abana baraorokie amasikani ase abaibori babo?

• Naseki ere buya koroberia chingaki kera egwiki erio gosasima amo buna enka?

TUKA MONO

Masomo ki omwana abwenerete kwegera ayio aramokoonye ekero arabe omonto omonene?

“Amasomo Atano na Rimo Abana Babwenerete Kwegera” (Amkeni! Na. 2 2019)

Egera obosemia Ebibilia ekobaa baria bakobarenda abaibori bagotire.

“Ninki Ebibilia Egoteba Igoro y’Okorenda Abaibori Bagotire?” (Erikire ase omotandao)

Rora omosacha otamanyete korera abana buna achete koba omoibori omuya.

Yehova Agatwegeria Buna Torarere Abana Baito (5:58)

Egera buna abaise barating’ie oboamate bwabo na abana babo abamura.

“Inaki Abaise Baranyare Koba n’Oboamate Bwang’e Mono na Abana Babo Abamura?” (Mnara wa Mlinzi, Novemba 1, 2011)