Enka Yao Nabo Ekoba N’omogoko

1, 2. Ninki Yehova atakerete chinka?

YEHOVA NYASAE nere obwatanetie enyuomo entang’ani. Ebibilia nigo egototebia ng’a Nyasae akamotonga omokungu omotang’ani na “akamoirera omonto oria.” Adamu akagoka mono agateba iga: “Bono oyo neriuga korwa ase amauga aane, ne chinyama korwa ase chinyama chiane.” (Omochakano 2:22, 23) Igaa, nigo twokwegera ng’a Yehova natagete abanto bare ase enyuomo babe n’omogoko.

² Korende ase omoichano, abanto abange tibanya konyora omogoko ase obogima bwabo bw’enka. Nonya nigo, Ebibilia nigo ere nebirengo ebinge bigokoonya bonsi ase enka koba nobogima bw’enka yabo obuya na kogokera koba amo.​—Luka 11:28.

EKI NYASAE AGANETIE KORWA ASE ABASACHA

3, 4. (a) Inaki omosacha agwenerete komokorera mokaye? (b) Nase ki ere buya omosacha na mokaye baberane?

³ Ebibilia nigo egoteba ng’a omosacha omuya goika amokorere mokaye ase obwanchani na amasikani. Gaki soma Abaefeso 5:25-29. Botambe omosacha goika amokorere mokaye ase enchera y’obwanchani. Goika naende amorende, amorigerie, na tamokorera bobe.

⁴ Ninki omosacha agwenerete gokora ekero mokaye amochire? Abasacha nigo bagotebigwa iga: “Mwanche abakungu baino, timoba nobororo asebare.” (Abakolosai 3:19) Abasacha, nainwe inyora ng’a nkomocha more. Na onye gotagete Nyasae akwabere, goika omwabere mokao. (Matayo 6:12, 14, 15) Ekero omosacha na mokaye bare n’omoyo bw’okwaberana, nigo okobakoonya koba n’enyuomo ere n’omogoko.

5. Nase ki omosacha amosike mokaye?

⁵ Yehova nigo aganetie omosacha amosike mokaye. Omosacha goika arengererie mono igoro yokogania kwa mokaye. Eke n’egento getari gia cheche. Onye omosacha tari komokorera mokaye buya, Yehova takoigwa ogosaba kwaye. (1 Petero 3:7) Eki gekogera abanto babe ab’engencho ase Yehova, nkeria ng’a bamwanche. Ere tabwati obwanchereria ase abasacha gose abakungu.

6. Omosacha na mokaye koba “omobere oyomo” ninki eminetie?

⁶ Yeso nigo atebete ng’a omosacha na mokaye “tibakoba babere naende, korende omobere oyomo.” (Matayo 19:6) Nigo begenaine na ngaki teri batari kwegenana. (Emereng’anio 5:15-21; Abaibirania 13:4) Abasacha na abakungu babo, tibarinana eng’eria y’enyangi. (1 Abakorinto 7:3-5) Omosacha goika ainyore ng’a “monto tari ogechete omobere oye omonyene, korende nigo akoyorageria na koyorenda.” Ase igo goika amwanche na komorenda mokaye. Goetania kende gionsi, omokungu nigo atagete omosacha oye koba omwororo naende obwate obwanchani asare.​—Abaefeso 5:29.

EKI NYASAE AGANETIE KORWA ASE ABAKUNGU

7. Nase ki enka eganetie omotwe bw’enka?

⁷ Kera enka neganetie omotwe, omonto okoraa enka erio bakore ebinto ase oboamo. Ebibilia nigo egoteba iga ase 1 Abakorinto 11:3: “Kristo nere omotwe o kera omosacha; na omosacha nere omotwe bw’omokungu; na Nyasae nere omotwe o Kristo.”

8. Inaki omokungu arorokie amasikani amanene ase omosacha oye?

⁸ Kera omosacha nkomocha are. Korende ekero mokaye akomobwatesia ase ogochora kwaye na koba n’omoyo bw’okobwaterana, enka engima nigo ekonyora obuya. (1 Petero 3:1-6) Ebibilia nigo egoteba iga: “Omokungu tamocha gosika omosacha oye.” (Abaefeso 5:33) Eraba rende ng’a omosacha nigo are edini eng’ao? Goika omokungu amosike omosacha oye mono. Ebibilia nigo egoteba iga: “Inwe abakungu moigwere abasacha baino, erinde onye abande bare aroro, abategeneti ring’ana, bang’uswe ase orogendo rw’abakungu babo, batatebiri ring’ana, kobakorora orogendo rwaino oruya rore nokoiroka.” (1 Petero 3:1, 2) Omobwekano omuya bw’omokungu nabo okomokoonya omosacha oye komanya na gosika okwegena kwa mokaye.

9. (a) Ninki omokungu agwenerete gokora ekero atari gwancherana n’omosacha oye? (b) Mbosemi ki ase abakungu bore ase Tito 2:4, 5?

⁹ Ninki omokungu agwenerete gokora ekero atari gwancherana n’omosacha oye? Negwenerete akwane ebirengererio biaye ase enchera y’amasikani. Ase omobwekano, Sara agakwana egento gete getamogogetie Ibrahimu, korende Yehova akamotebia iga: “Riigwere” ring’ana ria mokao. (Omochakano 21:9-12) Naake mono, omosacha Omokristo gochora ayare mamincha yaria Ebibilia egoteba, ase igo negwenerete mokaye amobwatesie. (Ogokora 5:29; Abaefeso 5:24) Omokungu omuya nigo akorenda enka buya. (Soma Tito 2:4, 5.) Ekero omosacha amo na abana bakorora buna akobeka omokia kobarenda, nigo bakomwancha mono goetania.​—Emereng’anio 31:10, 28.

10. Ninki Ebibilia egoteba igoro y’ogosasana na gotigana miisi?

¹⁰ Chingaki chinde abanto banyuomaine nigo bakonacha bwango gosasana gose gotigana miisi. Korende, Ebibilia nigo egoteba ng’a “omokungu tatiga omosacha oye” naende ng’a “omosacha tatiga mokaye.” (1 Abakorinto 7:10, 11) Chingaki nchireo ekero omosacha na mokaye baratigane, korende goikera ogochora okwo, tikeri gento gia cheche. Gotigana miisi rende? Ebibilia nigo ekorokia ng’a esababu yoka y’ogotigana miisi, nekero omosacha gose mokaye atomanire n’omonto onde otari omwanchi oye.​—Matayo 19:9.

EKI NYASAE AGANETIE KORWA ASE ABAIBORI

11. Ninki abana baganetie kobua kende gionsi?

¹¹ Inwe abaibori, kabe ne chingaki chinyinge na abana baino buna ekonyarekana. Abana baino mbabaganetie, na kobua kende gionsi, nigo baganetie moborokererie igoro ya Yehova.​—Okoiranerera 6:4-9.

12. Ninki abaibori barakore erio kobarenda abana babo?

¹² Ense eye ya Saitani yagendereire koba embe, na abanto bande mbareo batagete kobakorera bobe abana baito, nonya nokobakorera obonyaka. Abaibori abange nigo bakorora ng’a nakong’u gokwanera amang’ana ayio. Korende goika abaibori babakurere abana babo igoro ya abanto buna abwo na koborokereria buna baretange na abanto abwo. Abaibori, goika mobarende abana baino.a​—1 Petero 5:8.

13. Inaki abaibori barorokererie abana babo?

¹³ Nemeremo ya abaibori koborokereria abana babo buna bagwenerete gwechoka. Inee, inaki oraborokererie abana bao? Abana bao mbatakeire kwegerigwa, korende tobagorora abana otari na mabera gose ase obotindi. (Yeremia 30:11) Ase igo tobaisa komorongeyia omwana o ekero ore n’obororo. Ase engencho totageti amang’ana ao abe buna “omoro ogokeba” na kobamochera abana bao. (Emereng’anio 12:18) Borokererie abana bao bamanye eki gekogera ere buya koigwera.​—Abaefeso 6:4; Abaibirania 12:9-11; rora Amaereso Y’omoerio 30.

EKI NYASAE AGANETIE KORWA ASE ABANA

14, 15. Nase ki abana baigwere abaibori babo?

¹⁴ Botambe Yeso nigo amoigwerete Ise, nonya nekero etarenge raisi. (Luka 22:42; Yohana 8:28, 29) Boigo Yehova nabatagete abana babaigwere abaibori babo.​—Abaefeso 6:1-3.

¹⁵ Abana, inwe namorora ng’a nakong’u koigwera abaibori baino, inyora ng’a ekero mokoigwera, Yehova na abaibori baino nigo bakogokigwa nainwe.b​—Emereng’anio 1:8; 6:20; 23:22-25.

16. (a) Inaki Saitani agotaka kobatema abasae gokora ekere ekebe? (b) Nase ki ere egento ki’engencho gochora abasani baria bamwanchete Yehova?

¹⁶ Nyachieni nabo arabatumie abasani bao na abasae bande kogotema gokora ekere ekebe. Nyachieni namanyete ng’a okogaswa buna okwo nogokong’u gokana. Ase omobwekano, Dina omoiseke o Yakobo nabwate abasani batamwanchete Yehova. Ekio gekagera akanyorwa nemechando emenge amo nenka yaye. (Omochakano 34:1, 2) Onye kore na abasani batamwanchetie Yehova, nabo baragoteme gokora egento keria Yehova agechete, na gokoreterera aye obororo obonge, amo n’enka yao, na Nyasae. (Emereng’anio 17:21, 25) Ekio nakio gekogera ere egento ki’engencho korigia abasani baria bamwanchete Yehova.​—1 Abakorinto 15:33.

ENKA YAO NABO EKOBA N’OMOGOKO

17. Meremo ki kera oyomo abwate ase enka?

¹⁷ Obokong’u n’emechando emenge nabo ekobogererwa, ekero kera oyomo ase enka akobwatia amachiko a Nyasae. Ase igo onye aye kore omosacha, mwanche mokao na komokorera ase obwanchani. Onye kore omokungu, kabe na amasikani na komoigwera omosacha oo na kwega omobwekano bw’omokungu okwaneire ase Emereng’anio 31:10-31. Onye kore omoibori, aye borokererie abana bao komwancha Nyasae. (Emereng’anio 22:6) Onye kore ise monto, raa enka yao “buya.” (1 Timotheo 3:4, 5; 5:8) Nainwe abana, baigwere abaibori baino. (Abakolosai 3:20) Inyora ng’a kera omonto ase enka nabo akomocha, ase igo ekeyie na gosabana okwabera. Ebibilia nigo ebwate oborai bwa Yehova ase kera oyomo bw’enka.