ERESENI 22
Inaki Oranyare Koranderia Abande Amang’ana Amaya?
Buna okwegera ekeene gi’Ebibilia, nabo orarengererie, ‘Kera omonto naganeirie komanya amang’ana aya!’ Ekeene, kera omonto naganeirie koyamanya! Korende, nabo oroboe kobatebia abande aria kwegeire. Bono tiga tokwanere buna orasirie obwoba na gochaka nomogoko gotebia abande amang’ana amaya y’Ebibilia.
1. Inaki orachake gotebia abande aria kweorokereirie?
Abaorokigwa ba Yeso bagateba: “Titokonyara gotiga gokwana ayatwaroche na koyaigwa.” (Ogokora kw’abatomwa 4:20) Bagancha mono keria begerete korwa ase Yeso goika bakagania gotebia kera omonto igoro yaye. Inee, aye nkoigwa ore bo? Onye kere bo rigia ribaga ri’ogokwana ase amasikani nabanto b’enka yao n’abasani amang’ana kweorokereirie.—Soma Abakolosai 4:6.
Obosemia buna orachake
Ekero ogokwana n’abanto b’enka yao, chakia etobiki y’Ebibilia ase ogoteba: “Egwiki eye naegerete ring’ana ri’okogokia.”
Kwanera ririko ri’okoremia amo n’omosani oo omorwaire gose ore nebirengererio.
Kwana na baria mogokora nabwo emeremo abwo baraborie buna ogendererete ekio kwegerete korwa ase okwegera kwao gw’Ebibilia gose ase omosangererekano.
Baorokie abasani bao egwebusaiti ya jw.org.
Baariganie abande ase okwegera kwao gw’Ebibilia, gose oborokie enchera babwenerete gosaba okwegera gw’Ebibilia ase egwebusaiti ya jw.org.
2. Naseki kere egento ki’engencho kwebekera ekerenga gi’okorandia n’omosangererekano?
Aborokigwa ba Yeso bagakora amange goetania kobaranderia amang’ana amaya abanto baria baamanyete. Yeso “akabatoma babere babere bamotang’anere kogenda kera omochie” korandia. (Luka 10:1) Omoroberio oyio bw’ogokora emeremo y’okorandia okabaa abanto abange mono ribaga ri’ogotegerera amang’ana amaya. Boigo okorandia amo gokabarentera abaorokigwa omogoko omonene. (Luka 10:17) Inee, aye mbwebekere ekerenga gi’okorandia amo n’omosangererekano?
EGERA AMANGE
Egera buna oranyare gokoora obwoba na konyora omogoko ase okorandia amang’ana amaya.
3. Yehova nabe amo naye
Abande ase baria baganetie korandia nabo bakoba n’obwoba buna abanto barabarore gose enchera barategerere amang’ana ayio.
Inee, aye nore nobwoba kobatebia abande amang’ana aria kwegeire? Naseki?
Orokia EVIDIO, na mokwanere riborio rikobwatia.
Birori aba abasae naki babuete obwoba?
Soma Isaya 41:10, na mokwanere riborio eri:
Ekero okwoboa korandia, naseki obwenerete gosaba?
Inee nomanyete?
Abange ba Birori ba Yehova tibarengereretie ng’a mbabe noboremu bw’okoranderia abande amang’ana amaya. Ase omobwekano Sergey, tabwate oboremu naende nigo arenge omosooku gokwana n’abanto. Korende bono akeorokereria Ebibilia. Nigo agoteba: “Nonya narenge nobwoba, nigo nachagete gokwana n’abande igoro yaria narenge kwegera. Egento ki’ogokumia gokwana na abande igoro y’Ebibilia gokagera nkaba n’oboremu. Boigo kogating’ia okwegena kwane mono.”
4. Kabe namasikani
Ekero okobatebia abande igoro y’amang’ana amaya, rengereria ring’ana ogokwana naboigo enchera orarikwane. Soma 2 Timotheo 2:24 na 1 Petero 3:15, na mokwanere amaborio aya:
Inaki oratumie ebibungo ebi ekero ogokwana nabanto bande igoro y’Ebibilia?
Abanto bande b’enka yao gose abasani nabo bataancherane namang’ana aria okobatebia. Ninki obwenerete gokora? Ninki otabwenereti gokora?
Naseki ere buya koboria amaborio ase enchera y’obong’aini kobua gotebia abanto ekio babwenerete kwegena?
5. Korandia amang’ana amaya nigo gokorenta omogoko
Yehova akamoa Yeso emeremo y’okorandia amang’ana amaya. Inaki Yeso ayeroche emeremo eyio? Soma Yohana 4:34, na mokwanere amaborio aya:
Koria endagera engiya nigo ekogendereria obogima na gotorentera omogoko. Naseki Yeso abwekanetie gokora ogwancha kwa Nyasae—komenta n’okorandia amang’ana amaya—na koria endagera?
Mogoko ki okorengereria oranyore korwa ase okorandia amang’ana amaya?
Obosemia
Ekero ki’omosangererekano o gati y’egwiki, rora ninki oraegere igoro y’ogochakia chinkwano.
Kwana n’omworokia oo buna orabe omworokigwa oy’okoegwa chinsemo ase omosangererekano o gati yegwiki. Chinsemo chi’omworokigwa nabo chikogokoonya kwearigania gokwana n’abande aria kwegeire.
Tumia ensemo “Abanto Bande Nigo Bagoteba” gose “Nabo Omonto Araborie” ase egetabu eke erio konyora amaorokererio buna oranyare koiraneria amaborio akoborigwa mono na ekero okwamererigwa.
NABO OMONTO ARABORIE: “Amageni obwate narari?”
Inaki oratumie ribaga eri erio komotebia omonto aria kwegeire ase okwegera kwao gw’Ebibilia?
ASE OBWENG’E
Gotebia abande amang’ana amaya nigo gokorenta omogoko, na gochaka korandia nigo kere egento ekiororo goetania buna okagerete.
Einyorie
Naseki otebie abanto bande amang’ana amaya
Inaki orakore bo ase amasikani?
Inaki orakoore obwoba bonde bwensi obwate igoro y’okorandia?
TUKA MONO
Rora chinchera chinyororo inye orarandie amang’ana amaya kogotumia ekadi ya jw.org
Egera igoro yechimbwa inye chiragokoonye korandia amang’ana amaya.
“Inee Kweariganirie Koba Omorubi bwa Abanto?” (Mnara wa Mlinzi, Septemba 2020)
Rigereria buna omobwekano bw’Ebibilia oratoe oboremu erio korandia amang’ana amaya, nonya tore n’emiaka emeke.
Egera buna orakwane igoro y’Ebibilia amo n’abanto b’enka yao abwo bataraegera igoro ya Yehova.
“Goikeera Enkoro y’Abaamate Baito Abwo Batari Abegeni” (Mnara wa Mlinzi, Machi 15, 2014)