Inaki Emeremo Yaito y’Ense Engima Egochangerwa?

Ekeombe giaito gi’ense engima nkorosia kere na kobaga amagana ye chimilioni chi’Ebibilia n’ebitabu binde kera omwaka bitari koonigwa. Nigo tokwagacha na korenda Chinyomba chi’Oboruoti. Nigo tokobakonya Ababeteli na abamisonari, naende twarua obokonyi ekero kia obokong’u. Ase igo aye nabo oreborie iga, ‘inaki egasi eyio yonsi egochangerwa?’

Titori korua etaisi, goakania -eng’eria gose gosangereria esadaka. Nonya chibesa chitakeire ase egasi yaito y’okorandia chire chinyinge, titori gosaberera besa. Goetania emiaka emia eyemo yaetire, engaseti ya Mnara wa Mlinzi ya kabere nigo yarigete ng’a, nigo twegenete ng’a Yehova nere ogotokonya. Ase igo, “titogosaberera gose koboria mwanyabanto gotoa ogokonya”​—na titwana gokora bo!​—Matayo 10:8.

Emeremo yaito nigo ekogendigwa n’emechango yokwerua. Abanto abange nigo bagoaka ng’a mbuya mono ase egasi yaito y’okorokereria Ebibilia na gochangera. Birori ba Yehova abanyene ase omogoko nigo bakorwa chingaki chiabo, chinguru, chibesa, n’obonda bwabo bonde gokora ogwancha kwa Nyasae ase ense yonsi. (1 Amang’ana ’Ebiro 29:9) Ase Chinyomba chi’Oboruoti nase emesangererekano emenene, ntobwate chisanduki chi’emechango ase baria baraganie korwa omochango. Gose emechango nabo eraruegwe goetera ase egwebusaiti yaito jw.org. Chibesa chinyinge nigo chikorua ase baria batabwati obonda, buna omoboraka oria orenge nokogania Yeso akwanete igoro yaye buya, oruete ebisabwa bibere bie chitaai ase esanduki y’emechango ye hekalu. (Luka 21:1-4) Ase igo botambe omonto nabo arabe “okogacha mwaye ensemo” erio arue “buna arengereretie ase enkoro yaye.”​—1 Abakorinto 16:2; 2 Abakorinto 9:7.

Nigo tore n’okwegena ng’a Yehova nagenderere gosukia chinkoro chiabaria batagete ‘komosika nechinibo chiabo’ ase ogokonya emeremo y’Oboruoti, erio ogwancha kwaye goikeranigwe.​— Emereng’anio 3:9.

• Inaki Birori ba Yehova batari buna chidini chinde?

• Nase nchera ki emechango y’okwerwa egotumeka?