ERESENI 23

Inaki Ebitabu Biaito Bikorikwa na Kobasirigwa?

Oyomo ogokora ase Edipatimenti y’Okorika ase ense ya U.S.A. — Edipatimenti y’Okorika, U.S.A.

Ekeombe ki’ababasiria ase ense ya South Korea — South Korea

Omonto ase ense ya Armenia obwate egetabu kebasiririe na Birori ba Yehova — Armenia

Omoiseke ase ense ya Burundi obwate egetabu kebasiririe na Birori ba Yehova — Burundi

Omokungu ase ense ya Sri Lanka obwate amangaseti abasiririe na Birori ba Yehova — Sri Lanka

Erio toikeranie ase okobua gwaito gwensi korandia “enchili” ase “kera egesaku na eamate na omonwa na abanto,” nigo tokorosia ebitabu ase emenwa goetania 750. (Okomaanoka 14:6) Inaki togoikerania emeremo eyio emekong’u? Nigo tokoyeikerania goetera obokonyi bw’abariki bakorwa ense engima amo n’ekeombe ki’ababasiria beruete—bonsi bare Birori ba Yehova.

Amang’ana amatang’ani nigo are ase egesongo. Ekeombe kia Abagaka Bakoraa Birori ba Yehova nigo batenenerete Edipatimenti y’Okorika ere ase obisi enene. Obisi eyio nigo etenenerete emeremo y’abariki bagokora egasi ase obisi enene na abande mbare ase chi’obisi chi’orosagia. Koba n’abariki barwete chinsemo ao ao nigo egotokonya korika igoro ye chitopiki chikobakuna abanto korwa chinsemo chionsi chi’ense.

Amariko ayio atomwa gochia ase ababasiria. Ekero amang’ana ayio arikirwe na goeterwa na gwancherwa, nigo agotomwa ase enchera y’ekeletroniki gochia ase ababasiria ase ense yonsi, bayabasiria, baetera, na koyasoma. Nigo bakobeka omokia gochora amang’ana “ekeene ase oboronge” aria akobwata ekerenga kia amariko y’egesongo ase omwana obo.—Omorandia 12:10.

Chikombiuta nigo chigokora emeremo bwango. Ekombiuta tegokora emeremo y’okobasiria egokorwa na mwanyabanto abariki na ababasiria. Korende ekombiuta nabo ekobakonya gokora bwango. Birori ba Yehova nigo beroseretie eprogramu y’ekombiuta egokora emeremo ase enchera ya Multilanguage Electronic Publishing System (MEPS) ekobakonya korika na korosia ebitabu ase emenwa emenge bwango.

Ninki gekogera twabeka omokia oyio omokong’u, nonya nase emenwa egokwanwa na abanto abake? Nase engencho ere okogania kwa Yehova ng’a “abanto bonsi batoorigwe banyare komanya onsi ay’ekeene.”—1 Timotheo 2:3, 4.

Inaki okorikwa kw’ebitabu biaito kogokorwa?
Ninki gekogera tokobasiri ebitabu biaito ase emenwa emenge?