Inaki Tokobakonya Abaminto Ekero ki’Obokong’u?

Ekero obokong’u bwabeire, Birori ba Yehova ase obwango nigo bakoroberia korwa ogokonya erio kogusui amakong’u anyorire abamwabo. Omokia oyio nigo okoorokia obwanchani tore nabwo. (Yohana 13:34, 35; 1 Yohana 3:17, 18) Inaki intwe togokonya?

Nigo tokorua chibesa. Ekero enchara enene yachete Boyahudi, Abakristo be ritang’ani korwa Antiokia nigo batomete emechango erio ebakonye abamwabo. (Ogokora 11:27-30) Nonya ndero, ekero twamanyire ng’a abaminto ase ensemo gete y’ense, banyorirwe n’obokong’u, nigo togotoma ogokonya gwaito goetera ekeombe ki’omosangererekano oito gochia ase baria bare n’okogania.​—2 Abakorinto 8:13-15.

Nigo tokorua ogokonya gotakeire. Abagaka bare aria ase obokong’u bwabeire nigo bakorigia kera oyomo ase are erio korora ng’a kera oyomo mbuya are. Ekomiti y’okogusui emechando nabo ekorwa oborai bw’okobaga endagera, amache amaya y’okonywa, chianga, oboraro, na amariogo. Abange ba Birori ba Yehova bare n’obomanyi gete aria ase botakeire nigo bakwerua ase chibesa chiabo abanyene kogenda gokonya emeremo y’okogusuyia obokong’u gose korosia chinka ne Chinyomba chi’Oboruoti chiasarigwe. Obomo tore nabwo buna ekeombe gi’ense engima ne chisemi twanyorire ase ogokora emeremo amo yatonaririe korua ogokonya bwango ekero gotakeire. Nonya tokobakonya baria “bare ab’okwegena” naintwe, ekero ekonyarekana nkobakonya tore abanto bande, titori korigereria edini yabo.​—Abagalatia 6:10.

Nigo tokoremia korwa ase amariko n’ebirengererio. Abanyorirwe n’obokong’u nigo bakogania koremigwa. Ekero gie chingaki echio nigo tokonyora chinguru korwa ase Yehova, “Nyasae bw’okoremia gwonsi.” (2 Abakorinto 1:3, 4) Nigo togosanga chiira chi’Ebibilia amo nabaria bakure omoyo, ase okobaisanekeria ng’a bwango iga Oboruoti bwa Nyasae mborete omoerio bw’amakong’u onsi akoreta obororo n’emechando.​—Okomaanoka 21:4.

• Ninki gekogera Birori ba Yehova bakorua ogokonya bwango ekero ki’obokong’u?

• Nkoremia ki kw’amariko togosanga na baria batigaire bare moyo?