Ning’o Omosomba Omwegenwa Naende Omong’aini?

Ase engaki enke konyora Yeso atarakwa, nakwanete bobisi na aborokigwa baye bane​—Petero, Yakobo, Yohana, na Anderea. Ekero Yeso agendererete kobana igoro y’ekemanyererio ng’a nabeo amatuko y’omoerio, akabori riborio ri’engencho: “Ning’o rende ore omosomba omwegenwa, naende ore omong’aini, obegetwe nomonene oye igoro ase enyomba yaye, ae abanto endagera ase ekero ekeronge?” (Matayo 24:3, 45; Mariko 13:3, 4) Yeso nigo are kobaisanekia aborokigwa baye ng’a, ere buna “omonene” nababeke baria bararue endagera etari koera ya kemoika ase baria baramwegene ekero ki’amatuko y’omoerio. Mbarabi barabe omosomba oyio?

N’ekeombe egeke korwa ase abakristo ba Yeso abaakwa amaguta. “Omosomba” nigo amanyekanete koba, Ekeombe kia Abagaka Bakoraa Birori ba Yehova. Nigo gekorua endagera ya kemoika ase chingaki chigwenerete ase abakristo bamwabo bakomosasima Yehova. Nigo tosemeretie omosomba oy’omwegenwa kogenderera gotoa ‘endagera ekerengo giaito ase ekero kegwenerete.’​—Luka 12:42.

Nigo getenenerete enyomba ya Nyasae. (1 Timotheo 3:15) Yeso nigo aete omosomba emeremo emerito y’ogotenenera egasi y’ensemo y’omoroberio o Yehova ase ense​—korenda obonda, gotenenera egasi y’okorandia, na gotorokereria goetera ebiombe biaito bi’emesangererekano. Ase ogotoa ekio toganetie na ekero tokeganetie, “omosomba omwegenwa naende omong’aini” nigo akobaga endagera ya kemoika goetera ebitabu togotumia ase obokoreri bwaito, naende goetera chiprogramu chikorwegwa ase emesangererekano amo na emesangererekano emenene yaito.

Omosomba n’omwegenwa ase ekeene gi’Ebibilia na ase emeremo yaye y’okorandia amang’ana amaya, naende n’omong’aini ase enchera kegotenenera emonga ya Kristo ase ense. (Ogokora 10:42) Yehova nagendererete koreta abanto abange koba Birori baye, na komokonya omosomba omwegenwa naende omong’aini korua endagera ya kemoika ase obonge.​—Isaya 60:22; 65:13.

• Ning’o obegetwe na Yeso korageria aborokigwa baye kemoika?

• Nase nchera ki omosomba are omwegenwa naende omong’aini?