Inaki Abateneneri Bomoetanano Bagotokonya?

Amariko y’Ekegiriki nigo agokwana mara aange igoro ya Baranaba na omotomwa Paulo. Ensemo y’obokoreri bw’abasacha aba nigo bwarenge oboteneneri bw’ogwetanana, ase ogotaarera ebiombe bi’emesangererekano ye ritang’ani. Aseki? Nigo bechanderete gotaka komanya inaki abamwabo bagendererete kemoika. Paulo nigo atebete ng’a tiga “toirane, tochie korora abaminto” torore buna bagendererete. Nigo arenge kogenda ase chikiromita chinyinge mono erio aike na kobabeka chinguru abamwabo. (Ogokora 15:36) Eye nero eganga ya abateneneri b’omoetanano rero.

Nigo bagocha erio batoremie. Kera omoteneneri bw’omoetanano nigo agotaarera ang’e ebiombe bi’emesangererekano 20 gose goetania na koba nabwo ase egwiki eyemo kabere ase omwaka. Nabo tokwegera amange korwa ase abaminto abwo, na korwa ase abakungu babo onye banyuomete. Nigo bakobeka omokia komanya abasae na abagotu boigo, na nigo bare n’okogania okonene gosanga naintwe ase obokoreri bwaito bw’okorandia na koegeria abande Ebibilia. Abateneneri aba nigo bagokora emeremo y’oborisia amo na abagaka, na gotokong’ia, nigo bakorua chinkwana chikoremia ase emesangererekano nase emesangererekano emenene.​—Ogokora 15:35.

Nigo bakogokigwa na kera oyomo oito. Eganga y’abateneneri b’omoetanano nigo bakogania korora ng’a kera ekeombe ki’omosangererekano nigo kere egeting’u kemoika. Nigo bakoumerana n’abagaka amo na abasomba b’obokoreri na goetera amagenderero akorirwe na kobaa obosemia obuya buna barakore emeremo yabo ase ekeombe ki’omosangererekano. Nigo bagokonya abapainia gokora buya ase obokoreri bwabo, na kogokera koumerana na abayia na kobamanya na koigwa igoro ya amagenderero abo akemoika. Kera oyomo bwa abateneneri aba baminto, nigo akwerwa buna ‘omokori emeremo amo naintwe.’ (2 Abakorinto 8:23) Nigo tokwegia okwegena kwabo na okwerua kwabo ase Nyasae.​—Abaibirania 13:7.

• Nase ki abateneneri b’omoetanano bagotaarera ebiombe bi’emesangererekano?

• Inaki aye orakonywe n’ogotaarerwa kwabo?