Ogosasima gw’Enka Ninki?

Korwa abwo kare, Yehova nigo atagete kera enka gotwara chingaki koba amo, erio gokong’ia oboamate bwabo na Nyasae, amo n’obwenyomba yabo. (Okoiranerera 6:6, 7) Eke nakio gekogera, Birori ba Yehova bakorigia chingaki kera egwiki basasime buna enka​—gokwanera igoro y’okogania kwabo gw’Egekristo ase enchera entoereru. Neba komenyete aye bweka, chingaki echio nigo ogochitumia buya na Nyasae ase okwegera Ebibilia.

Echi ne chingaki chi’okomoika Yehova ang’e. “Moike Nyasae ang’e, na ere nabaike ang’e inwe.” (Yakobo 4:8) Nigo tokomomanya Yehova buya ekero tokwegera ase obwagare chimbwa n’ebikoro biaye goetera ase Ebibilia. Enchera eng’ororo y’ogochaka ogosasima gw’enka yao, n’ogosoma Ebibilia ase eriogi more amo. Nabo morabwatie omoroberio bw’omosangererekano bw’obogima na obokoreri o kera egwiki bw’ogosoma Ebibilia. Ensemo y’ogosoma nabo ekobagerwa kera oyomo ase enka, na korwa abwo, bonsi gokwanera ayio begerete korwa ase amariko amachenu.

Enchera eyemo y’ogoikana ang’e buna enka. Abasacha na abakungu babo, naboigo abaibori n’abana babo, nigo bagokong’ia oboamate bwabo ekero bakwegera Ebibilia buna enka. Gaki tiga ebe engaki ere n’omogoko, omorembe na ya beene ase egwiki. Koreng’ana n’emiaka y’abana, abaibori nabo bagochora ereseni engiya y’okweorokereria, nabo erarwe ase Mnara wa Mlinzi gose Amkeni! gose korwa ase egwebusaiti yaito ya jw.org. Nabo morakwanere igoro y’emechando abana baino bakonyora ekero bare esukuru na buna barayebue. Inee, ninki inwe motakorigereria eprogramu ase eterebiseni ya JW Broadcasting (tv.jw.org) na koyekwanera amo ekero mwakoorire? Nabo mokwegera gotera amatera aratumeke ase emesangererekano y’egwiki eye, na konyora endagera y’okwegokia engusu ekero mwakorire ogosasima kwaino gw’enka.

Chingaki echio chia beene mogotumia more amo kera egwiki komosasima Yehova nigo chikobakonya mwensi ase enka kogokera ring’ana ria Nyasae, nere nabasesenie ase omokia oino.​—Zaburi 1:1-3.

• Nase ki torigie chingaki erio tobe n’ogosasima gw’enka?

• Erio chingaki echio chigokerwe na kera oyomo ase enka, ninki abaibori barakore?