ERESENI 11

Nase ki Tokoumerana ase Emesangererekano Emenene?

Omosangererekano omonene bw’orogongo o Birori ba Yehova ase ense ya Mexico — Mexico

Egetabu kegosokigwa ase omosangererekano omonene bw’orogongo ase ense ya Germany — Germany

Birori ba Yehova ase omosangererekano omenene bw’orogongo ase ense ya Botswana — Botswana

Omomura omosae okobatiswa ase ense ya Nicaragua — Nicaragua

Edrama ase omosangererekano omonene bw’orogongo ase ense ya Italy — Italy

Ninki gekogera abanto aba bare n’omogoko iga? Nase engencho bare ase oyomo bw’emesangererekano emenene. Buna abasomba ba Nyasae ba kare bachigetwe koumerana amo mara gatato ase omwaka, nigo tokoganyerera koumerana amo ase emesangererekano. (Okoiranerera 16:16) Kera omwaka nigo tore n’emesangerekano emenene etato: ebere n’emesangererekano y’omoetanano y’erituko erimo na omosangererekano omonene bw’orogongo bwa amatuko atato. Inaki emesangererekano eye egotokonya?

Gokong’ia Obokristo bwaito. Buna Abaisraeli bare gochenga ekero barekomotogia Yehova “ase emesangererekano emenene,” naintwe nabo igo ekero tokomosasima ase emesangererekano yaito ya beene. (Zaburi 26:12; footnote; 111:1) Emesangererekano eye emenene nigo egotoa ribaga rigiya riokoumerana na Abakristo bande korwa ebiombe bi’emesangererekano ao ao gose chinse chinde. Chinsa chia ranchi, (gose endagera ya mobaso) nigo tokogokera gosanga chindagera amo ase emesangererekano yaito emenene, na komenta koorokia obosani na obomo ase abaminto. (Ogokora 2:42) Ase emesangererekano yaito emenene nigo tokorora buna tokobwatanigwa ase ‘okobancha abaminto’ ense engima.—1 Petero 2:17.

Nigo egotokonya gokora amagenderero y’Egekristo. Abaisraeli nigo barenge n’omogoko ekiagera “konya bamanyire buya engencho y’amang’ana” y’Amariko amachenu ekero are koereswa. (Nehemia 8:8, 12) Naintwe boigo nigo tokogokera amorokererio tokonyora ase emesangererekano yaito emenene. Kera ensemo ya amorokererio nigo ekorwa ase Amariko amachenu. Goetera chinkwana chikong’usa, echinde chikobwatia eyemo ase eyende, n’ebiorokererio, nigo tokwegera gokora ogwancha kwa Nyasae ase obogima bwaito. Nigo tokobekwa omoyo, ekero tokoigwa ayarorirwe korwa ase baria bamenyire buna Abakristo ase chingaki echi chire chinkong’u. Ase emesangererekano emenene y’orogongo, chidrama nigo chigokora emegano y’Ebibilia koba ey’ekeene, na gototigera ekiorokererio toratumie ase obogima bwaito. Ase kera emesangererekano emenene, okobatiswa nigo kogokorwa ase baria batagete koorokia okwerua kwabo gochia ase Nyasae.

Nase ki emesangererekano emenene ere chingaki chi’omogoko?
Mbuya ki oranyore ase okogenda ase emesangererekano emenene?