Inchera ki Engiya Toreariganie ase Emesangererekano?

Onye gokweorokereria Ebibilia na Birori ba Yehova, nabo eranyarekane ng’a aye botambe nigo okwearigania ase ogosoma ensemo mogochia kweorokerereria mabema. Naende onye gotagete onyore amange korwa ase emesangererekano yaito y’Egekristo nara gosoma mabema aria agochia gokwanerwa aroro.

Rigia chingaki na ng’ai ogosomera. Indi orasome buya? Inee, maambia chuni otarachaka emeremo yao y’erituko gose marogoba ekero abana bararire? Nonya aye togosoma ase egeka egetambe, beka chingaki chi’ogosoma, na torua ribaga gento kende gionsi kobangora emebango yao y’ogosoma. Rigia ase agiya egeturi getari, rimia eredio, eterebiseni n’esimi. Saba Nyasae akoe omoika oye otarachaka gosoma, erio onyare kobeka ebirengererio biao ase ogosoma ring’ana riaye.​—Abafilipi 4:6, 7.

Beka ekemanyererio ase aya gwasomire na bweariganie korwa amaereso. Chaka ase ogoetera aria ogochia gosoma. Rengereria igoro y’omotwe omonene gose egesieri, rora oboamate boreo ase emetwe emeke n’omotwe omonene, ringoria chibicha na amaborio arengete omotwe omonene. Korwa abwo bono soma kera ekebungo, na korigia richibu ria amaborio arikire. Igora na gosoma amariko amachenu akwaneire, tema korora buna akogenda naria ogosoma. (Ogokora 17:11) Ekero kwanyorire richibu, atera omositari gose kobeka ekemanyererio, amang’ana amake y’ogokoinyoria richibu. Na ekero ki’emesangererekano imokia okoboko kwao onye gotagete korwa amaereso ameng’e ase amang’ana ao.

Ase ogoetera chinsemo ao ao chigochia gokwanerwa ase emesangererekano kera egwiki, nigo okomenta ebirengererio ebiyia ase “emonga” yao y’obong’aini bw’Ebibilia.​—Matayo 13:51, 52.

• Nkonara ki otagete koba nakwo gw’okwearigania ase emesangererekano?

• Inaki oreariganie korwa amaereso ase emesangererekano?