Mosasime Yehova More amo Buna Enka

Ebibilia nigo ebwate ebirengo ebinge biragokonye, aye amo n’enka yao, buna kwegeire ase eburoshua eye. Yehova nigo atagete obe n’omogoko. Nigo akoria eira ng’a oise komotang’ania ‘ebinto ebio bionsi nakomentere’ (Matayo 6:33) Nigo atagete obe omosani oye. Tumia kera ribaga okonyora gokong’ia obosani bwao na Nyasae. Aya n’amasikani amanene omonto aranyore.​—Matayo 22:37, 38.

1 KONG’IA OBOAMATE BWAO NA YEHOVA

EBIBILIA NIGO EGOTEBA IGA: “Nimbe Iso oino, na inwe mobe abana baane, abamura na abaiseke. Nabo Omonene Omobui otebire” (2 Abakorinto 6:18) Nyasae nigo atagete obe omosani oye. Ogosaba n’enchera eyemo eragokonye obe omosani oye. Yehova nigo agokoarigania, ‘osabe otari gotiga!’ (1 Abatesaloniki 5:17) Ere nigo are omwango gotegerera igoro y’emechando yonsi ekobaa eng’ai. (Abafilipi 4:6) Ekero ogosaba amo n’enka yao, nigo bakorora buna omwanchete Nyasae.

Motegerere Nyasae buna nere akogotegerera. Nigo okomotegerera, ekero ogosoma Ebibilia na ebitabu binde bikorokereria ekeene igoro y’Ebibilia. (Zaburi 1:1, 2) Kabe gokoiranerera aya kwegeire. (Zaburi 77:11, 12) Enchera ende y’okomotegerera Nyasae, n’ogoika ase emesangererekano y’Egekristo botaambe.​—Zaburi 122:1-4.

Kobatebia abanto bande igoro ya Yehova, n’enchera ende y’engencho mono y’ogokong’ia oboamate bwao nere. Buna okogenderera gokora boigo nario okomoika ang’e.​—Matayo 28:19, 20.

EKI ORANYARE GOKORA:

• Kera rituko rigia chingaki chiogosoma Ebibilia na gosaba

• Buna enka, tang’ania amang’ana a Nyasae kobua chingaki chiokwegokia na gotimoka

2 GOKERA OGOSASIMA KWAINO GW’ENKA

EBIBILIA NIGO EGOTEBA IGA: “Moike Nyasae ang’e na ere nabaike ang’e inwe.” (Yakobo 4:8) Kabe n’omoroberio bw’ogosasima gw’enka na koyobwatia botaambe. (Omochakano 18:19) Korende amange naganeirie. Nyasae goika abe ase obogima bwaino bwa kera rituko. Ekero ogokwana igoro ya Nyasae nigo ogokong’ia oboamate bw’enka yao na Nyasae “ekero moikaransete ase chinyomba chiaino, ekero more ase orogendo inchera na ekero mogochia korara, na ekero mokoboka.” (Okoiranerera 6:6, 7) Mwegie Yoshua, otebete iga: “Korende inche amo nabanto b’enyomba yane ntomokorere Omonene.”​—Yoshua 24:15.

EKI ORANYARE GOKORA:

• Kabe n’omoroberio bw’okweorokereria botaambe orengete gokonya kera oyomo ase enka yao