Dekɛ Homea Delum Sɔ’ɔlum Za’adaana La

1. Bem yeletooro n yuun paɛ Yob?

YOB yuun dela buraa n tari sakerɛ ti yeletooro zo’e zo’e yuun paɛ en. A kɔma za’a n yuun ki, ti ba zũ a dusi ge ku basɛba. A yamesi zo’e zo’e me n yuun ki. Pooren ti bãyaalega nyɔkɛ Yob. Leyɛ’ɛsa, yele ana n yuun paɛ Yob la zuo nɛreba yuun ka le bɔ’ɔra en gilema. Nɛresɛba n parum ti bamam dela a zɔdoma la yuun tɔɣɛ la yɛla kɔ’ɔsɛ a giila. Hali amea pɔɣa suure n yuun sa’am ti a yele Yob yeti, “zɛrɛgɛ Yenɛ ge ki.” (Yob 2:9; 15:​4, 5; 19:​1-3) Yeletooro se’a n yuun paɛ Yob la yuun ta’an basɛ ti a ti’isa ti Naayinɛ ka nɔŋɛ en bii a ka te’eli en.

2-3. Yele san paɛ tɔ, to ta’an ti’isa la bem ge to wan zamesɛ la bem Yob gɔŋɔ la poan?

² Saŋa ase’a yeletooro ta’an paɛ tɔ ti la kpe’em bo to ti to dekɛ tomea delum Yehowa soŋa. To boi la sansɛka n “kpe’em bo nɛreba.” (2 Tim. 3:1) Yeletooro zo’e zo’e san paara tɔ, la ta’an basɛ ti putɛyiila tara tɔ ti to ti’isa ti to kan nyaŋɛ ŋmibe. Yele ana ta’an basɛ ti basɛba ti’isa ti Yehowa ka nɔŋɛ ba ge me ka bɔta ti a soŋɛ ba.

³ Da basɛ ti ho giila kɔ’ɔsɛ yele aŋa taaba san paɛ hɔ ti ho ti’isa bala. Yob yuun baŋɛ ti sɛba n tari yelemɛŋɛrɛ bɔ’ɔra Yehowa la, A kan malum basɛ ba. Tomam me wan ta’an tara sakerɛ bɔ’ɔra Yehowa ge me tara puti’irɛ ti to saazuo Sɔ la wan soŋɛ tɔ ge me kã bo to. To geele ya Yob gɔŋɔ la n wan soŋɛ to se’em ti to ta’an nyɛ kã’a wa. To wan sɔsɛ la yɛla ayi: Yia, Yehowa n de Sɔ’ɔlum Za’adaana. Nyi’i, to wan baŋɛ ti Yehowa tari paŋa n wan basɛ ti sɛla woo ti a yele la tum tuuma. A me bo’ori to la yelese’a n pakɛ tɔ ti la tɛ’ɛla tɔ ti to ta’an tara bɔnsoŋa la en.

SITAANA LAƔUM WA’AN BIM ME NA

4. Malesi la n yuun laɣesɛ Yehowa nɛŋan la, bem n yuun eŋɛ?

⁴ Baabule la yeti “Daarɛ deyema te Yenɛ dayɔɔhe lagahɛ te ba dekɛ ba mɛhe pa’alɛ Na’ayenɛ. Te [Sitaana] lagom wa’an bini na.” (Yob 1:6) Kala n de pɔsega ti Baabule la yi Sitaana yu’urɛ. Sitaana yu’urɛ la vuurɛ dela nɛra n iti kpenkpasi la Yehowa. La boi bim ti Sitaana yuun ka tari yelemɛŋɛrɛ bɔ’ɔra Naayinɛ ge a yuun bo en yɔ’ɔ ti a laɣum wa’ana pa’asɛ ba poan. Sitaana dela Yehowa, la malesi, la asaala dima. Yehowa n yuun tɔɣɛ Sitaana yele se’em Pin’ileŋɔ 3:15 la pa’alɛ ti Sitaana yuun ka le pa’asɛ Yehowa yizuo la poan. Sitaana ka laɣum pa’asɛ “pɔka” la n de Yehowa malesi la n yuun wan dɔɣɛ “yaaŋa” la.

5. Sɛla n yuun eŋɛ saazuo la basɛ ti to zamesɛ la bem?

⁵ Yehowa boti la to baŋɛ malesi la n yuun laɣesɛ a zɛ’an ti sɛla eŋɛ la, bala n sɔi ti a basɛ ti ba gulesɛ yele wa eŋɛ Baabule la poan. Sitaana n yele sɛla la pa’alɛ ti a dela putɔa ge me parena bɔ’ɔra sɛba n pu’useri Yehowa. (Yob 1:9; dekɛ makɛ Liligere 12:10.) Sɛla n yuun eŋɛ saazuo la dela subuɣelegɔ bɔ’ɔra tɔ ge me basɛ ti to mina ti Yehowa tari a paŋa la ita la sɛla n ani soŋa. To me le baŋɛ ti Yehowa ma’a n tari paŋa n wan ta’an pa’alɛ sɛla woo n tari tɛka beene se’em.

YEHOWA YUUN BASƐ TI SITAANA MINA A TƐKA BEENE

6. Yehowa yuun eŋɛ la wani pa’alɛ ti a tari paŋa sɛla woo poan? (Yob 1:​7, 8)

⁶ Kaalɛ Yob 1:​7, 8. Yehowa yuun eŋɛ pa’alɛ ti eŋa n tari paŋa sɛla woo poan. A yuun soke Sitaana yeti: “Ho baŋɛ mam yameŋa Yob la?” Yehowa yuun mi soŋa soŋa ti Sitaana yuun boti la a daam Yob. Basɛ ya ti to bisɛ Yehowa n yuun dekɛ a paŋa la soŋɛ Yob se’em.

7. Wuu Yob 1:​10, 11 n pa’alɛ se’em la, Sitaana yuun boti a yeti nɛreba pu’useri Yehowa la bem zuo?

⁷ Kaalɛ Yob 1:​10, 11. Yehowa n de Sɔ’ɔlum Za’adaana. A me tari a paŋa, la a kpe’eŋo la ita la sɛla n nari. (Yer. 32:17; Da. 4:35) Ge Sitaana yeti Yehowa ka tari a paŋa la tuna sɛla n nari. Sitaana yuun yeti Yehowa dekɛ la lɔɣɔrɔ pã’asɛ nɛreba maɣesɛ wuu Yob ti ba ta’an pu’usa en. Yehowa yuun eŋɛ la wani yele wa poan?

8-9. Yehowa yuun basɛ ti Sitaana mina a tɛka beene la wani ge bem zuo? (Yob 1:12) (Bisɛ foote la.)

⁸ Kaalɛ Yob 1:12. Yehowa yuun bo Kolekpabɛ’a la yɔ’ɔ ti a makɛ Yob bisɛ ge me basɛ ti a mina a tɛka beene. A yuun yele Sitaana yeti: “Behɛ, [Yob] sɛla woo boe la ho nu’uhen, ge da kalom a vom.” Malesi la za’a yuun wum Yehowa n basɛ ti Sitaana baŋɛ a tɛka beene la. Yehowa n yuun pa’alɛ Sitaana a tɛka beene la, Sitaana yuun ka tari pansɛka n wan tum zɔɛ bala. La me ani la bala zina beere wa. Yehowa yuun dekɛ a kpe’eŋo, la a paŋa la te’ele Yob mɛ ge me basɛ ti amea yu’urɛ la ana zilam.

⁹ Sitaana yuun makɛ Yob bisɛ ge a yuun koŋe mɛ. Yob yuun kelum tara la yelemɛŋɛrɛ bɔ’ɔra a saazuo Sɔ la. (Yob 1:22) Ge Sitaana yuun kelum bɔta la a makɛ Yob bisɛ.

10. Beni n sɔi ti Yehowa yuun bo yɔ’ɔ ti Sitaana le makɛ Yob bisɛ? (Yob 2:​2-6)

¹⁰ Kaalɛ Yob 2:​2-6. Sitaana yuun kelum tiregera mɛ ti a sa’am Yob birikinte la. Sitaana yuun yeti la san wuŋɛ Yob gaŋɛ, a wan basɛ Naayinɛ pu’usegɔ, a vom la zuo. Yehowa n yuun boti yele la niɛ peelumi la, a yuun bo yɔ’ɔ ti Kolekpabɛ’a la dekɛ bã’a kɛ̃’ɛsɛ Yob. Leyɛ’ɛsa, Yehowa yuun basɛ ti Sitaana baŋɛ la a tɛka beene. A yuun yele Sitaana ti: “Da kalom a vom!” Sitaana yuun ka tari paŋa n wan eŋɛ zɔɛ Yehowa n bo en nɔɔrɛ se’em la. Bala pa’alɛ ti Yehowa n de Kpe’eŋo Za’adaana sɛla n sɔi la, Sitaana kan ta’an makɛ Yob ti la zɔɛ Yehowa n bo en nɔɔrɛ se’em la.

YEHOWA YUUN BASƐ TI YOB NAMESEGƆ LA BA’ASƐ MƐ

11. Yehowa n yuun basɛ ti Yob namesegɔ la ba’asɛ la, a yuun eŋɛ la bem bo en? (Yob 42:​10-13)

¹¹ Kaalɛ Yob 42:​10-13. La yuun niɛ peelumi ti Yob yuun kɔ’ɔn ze’a la kankaŋi, bala n sɔi ti Yehowa yuun ka le bo Sitaana yɔ’ɔ ti a makɛ Yob bisɛ. Yehowa n yuun eŋɛ sɛla la, yuun basɛ ti Yob namesegɔ la ba’asɛ mɛ. Sitaana yuun ka tari paŋa n wan ta’an gu Yehowa ti a kan te’ele Yob bii a kã bo en.

12. Bo makerɛ pa’alɛ Yehowa n tari a paŋa la soŋera a yamesi se’em.

¹² Yehowa dekɛ la a paŋa la soŋɛ a yamesi zo’e zo’e ba’asegɔ dabesa wa poan. Makerɛ, yuun 1945 ti soogɛpa yuun pɛregɛ Yehowa Sɛɛradoma 230 ti ba keŋɛ sarɔɔ woko n tari dɛŋa paa ta paɛ ateko nɔɔren. Ba yuun eŋɛ bala ti ba ku ba mɛ ge Yehowa yuun faaɛ ba basɛ mɛ. Mabiisi la yuun gulesɛ pa’alɛ la yelese’a n paɛ ba ge yeti, Yehowa yuun faaɛ ba basɛ wuu eŋa n yuun faaɛ Hebrudoma batã la bugum poan basɛ ge ti sɛsɛla yuun ka eŋɛ ba la. Mabiisi wa yuun nyaŋɛ pĩɛ yeletooro se’a n paɛ ba la. Bala yuun basɛ ti ba sakerɛ la malum kpe’em pa’asɛ mɛ. Yehowa n yuun dekɛ a paŋa la soŋɛ ba. Mabiisi wa le bisɛ ti, Yehowa faaɛ ba mɛ wuu eŋa n yuun faaɛ Daniel gbeɣema boko poan la. Kɔ’ɔn ze’ele sankaŋa, ba yuun kɔ’ɔn lu la ba suure ti ba wan pu’usa la Yehowa ta paɛ ba’asegɔ. Ba me yuun le yeti bamam n kelum vɔna ge ta’an pu’usa Yehowa la dela yɔ’ɔ n gani za’a.—Dekɛ makɛ Daniel 3:27; 6:22.

13. Yeletooro san paɛ tɔ, la nari ti to tara suure lua la bem poan? (Bisɛ fɔɔra la.)

¹³ Saŋa ase’a yeletooro me ta’an paɛ tɔ ti la ana to wuu to boi la gbeɣema boko poan. (1 Pe. 5:​8-10) Yele ta’an paɛ tɔ ti to giila kɔ’ɔsɛ ti la ana wuu yele la kan malum tole. Yeletooro san paɛ hɔ, tɛ̃ra Yob yele la ti la soŋɛ hɔ. To tari suure lua ti Naayinɛ wan basɛ ti to namesegɔ la tole nananawa bii tinpaalega la poan. Yehowa n loe sansɛka ti a sa’am tingɔnbe’o wa la san paɛ, a kan basɛ ti la zɔɛ sankaŋa!

YEHOWA NƆŊƐ SƐBA N TARI YELEMƐŊƐRƐ BƆ’ƆRA EN LA MƐ

14-15. Yehowa boti a eŋɛ la bem bo a yamesi ge bem zuo? (Yob 14:15) (Bisɛ foote.)

¹⁴ Kaalɛ Yob 14:15. To saazuo Sɔ la kɔ’ɔn ana la tapilapi la sɛba n tari yelemɛŋɛrɛ bɔ’ɔra en la. Ban de tuulum bo en la zuo, ba san puɣum ki, a wan le isige ba. A san eŋɛ bala, kum n ta’aseri yelese’a la kan le bɔna.—Isa. 65:17.

¹⁵ La boi bim ti Yob namesegɔ la yuun ba’asɛ ya ge a yuun kelum bɔna la tingɔnbe’o wa poan. Baabule la yeti Yehowa yuun kã bo Yob mɛ zo’e zo’e. A yuun tibɛ en mɛ ge le bo en lɔɣɔrɔ gana eŋa n yuun tari se’em la. Wana yeen pa’alɛ la Yehowa n wan ta eŋɛ sɛla bo en tinpaalega la poan. Yehowa n eŋɛ se’em la pa’alɛ ti a boti la sɛba n tari yelemɛŋɛrɛ bɔ’ɔra en la tara vom somɔ. Yelemɛŋɛrɛ, Yehowa wan bo sɛba woo n tari yelemɛŋɛrɛ bɔ’ɔra en la yɔ’ɔ ti ba tara vom somɔ paradiisi poan tingɔŋɔ wa zuo. (Lil. 21:​3, 4) Yehowa n de Sɔ’ɔlum Za’adaana la kɔ’ɔn bɔta la a eŋɛ bala. To san ti’isɛ taɣesɛ Yehowa n wan kã bo to se’em la, bala wan buɣelɛ to suure ge soŋɛ tɔ ti to nyaŋɛ ŋmibe yeledaaŋɔ woo poan!

16. Bem zuo ti to wan ta’an dekɛ tomea delum Yehowa?

¹⁶ Yob yuun vɔi yue mɛ ge nyaa ki. Ge Yehowa tari paŋa n wan isige en sɛla n sɔi la, Eŋa n de Sɔ’ɔlum Za’adaana la Paŋa Za’adaana. (Tɛɛ. 32:39) Bala la, nɛra ka boi n wan ta’an gu Yehowa ti a kan isige eŋa n nɔŋɛ nɛresɛba la. A wan isige ba sansɛka ti a bɔta.—Arom 8:​38, 39.

KƆ’ƆN DEKƐ HOMEA DELUM YEHOWA

17. Bem n pa’alɛ ti Sitaana kan nyaŋɛ eŋɛ Yehowa yamesi sɛsɛla?

¹⁷ Baabule la n tɔɣɛ Yob yele se’em la, basɛ ti to kɔ’ɔn bɔta la to dekɛ tomea delum Yehowa soŋa. Bisɛ to puurɛ n pee se’em la Yehowa n ka bo yɔ’ɔ ti Sitaana nyaŋɛ ku A yamesi za’a la! Nɛreba tusetusa awɛi n tari yelemɛŋɛrɛ pu’usa Yehowa zina beere wa la pa’alɛ ti, eŋa n sirum de Gaŋɛ Za’adaana la. Gɔmɛtdoma la pu’usegɔ nɛŋadoma zo’e zo’e tiregɛ mɛ ti ba gu Yehowa nɛreba ti ba da mɔɔla yelesoma la ge me da pu’usa Yehowa. Ge ba ka nyaŋɛ gu to se’ere n sɔi la, Yehowa n soŋeri tɔ. (Isa. 54:17) Sɛsɛla ka boi n wan ta’an gu to ti to kan mɔɔla Yehowa yɛla bɔ’ɔra nɛreba ge me basɛ ti ba baŋɛ ti Sitaana dela pumpɔrema la nɛrekuura. Hali kum kan nyaŋɛ gu to se’ere n sɔi la, to san tara yelemɛŋɛrɛ bɔ’ɔra Yehowa ge puɣum ki, to tari suure lua ti Yehowa wan isige to.—Ho. 13:14.

18. Beni n sɔi ti la ka nara ti dabeem tara tɔ la sɛla n wan ta eŋɛ beere sa’am?

¹⁸ To san kaala Yob yele la ge ti’isa taɣesa, la wan basɛ ti to sakerɛ kpe’em ti to mina ti Yehowa boi mɛ la tɔ, la ka pakɛ la sɛla n wan paɛ to beere sa’am. Mɛlesegɔ kãtɛ la poan, Sitaana la a kolekpabɛ’ɛsi la wan ti’isa ti Naayinɛ nɛreba bãlɛ mɛ ka tara paŋa. Wuu Yehowa n yuun soŋɛ Yob se’em la, a kan makɛ basɛ ti Sitaana eŋɛ to sɛla n wan daam to wuusa, hali to san puɣum ki a wan isige to. La kan yue, Yehowa wan basɛ ti Sitaana n ta’asɛ yeledaaŋɔ se’a la za’a tole. Yezu me wan dekɛ Sitaana kparɛ boko kãtɛ poan yuun 1,000. (Lu. 8:31; Lil. 20:​1-3) Yuun 1,000 la pooren, Sitaana la sɛba woo n iti kpenkpasi la Yehowa la wan nyɛ sa’aŋɔ, wuu Yehowa n yele se’em la.—Pin. 3:15; Arom 16:20; Lil. 20:10.

19. Sɛba n dekɛ bamea delum Yehowa la, wan nyɛ la bem kã’a? (Bisɛ foote la.)

¹⁹ Yehowa yamesi kɔ’ɔn ana la lɛɛ gura sansɛka ti ba wan ta ana kasi ge me tara pupeelum tinpaalega la poan. Vom wan ta ana soŋa gana ton puɣum ti’isa se’em la. Yehowa yeti: “N ete sɛla woo te la de’a paalega.” (Lil. 21:5) Bala vuurɛ? Sankaŋa la, Sitaana la a kolekpabɛ’ɛsi la kan le ta’an daam nɛreba bii ba basɛ ti ba tuna putotuuma. To nyaa wan bɔna la fai! Putɛ̃yiila kan le bɔna, bala wan basɛ ti to gĩsera la soŋa. Sɛba n pĩɛ Armagedon la za’a wan nyɛ tibegɔ ge me tara imma’asum tingɔŋɔ wa zuo. Yehowa nyaa wan isige nɛresɛba n ki la. To nyaa wan ta tara vom somɔ wuu to saazuo Sɔ la n yuun boti se’em la!

20. Hon kɔ’ɛ ho puti’irɛ ti ho eŋɛ la bem?

²⁰ La nari ti to tara sukpe’ene ta’an ŋmibe yeletooro se’a n wan paɛ tɔ ba’asegɔ dabesa wa poan. Bala la, basɛ ya ti to kɔ’ɔn dekɛ tomea delum Yehowa ge me nana en. Basɛ ya ti to eŋɛ pa’alɛ ti to nɔŋɛ to saazuo Sɔ la ge me basɛ ti la niɛ peelumi ti Sitaana dela pumpɔrema. Bala la, to san kelum tara yelemɛŋɛrɛ bɔ’ɔra Yehowa n de Kpe’eŋo Za’adaana la, to wan ta’an tara suure lua ti la wan ta ana soŋa bɔ’ɔra tɔ beere sa’am. Yehowa kɔ’ɔn bɔta la a kã bo a yamesi, a me wan sirum eŋɛ bala!