Yehowa Yetɔɣum Dela Yelemɛŋɛrɛ

1. Wuu Yooma 31:​2-5 n yele se’em la, beni n sɔi ti to wan ta’an dekɛ tomea delum Yehowa?

TO BOI la tinsɛka poan ti nɛreba zo’e zo’e kɔ’ɔn parena. La ni kpe’em mɛ ti ho ta’an dekɛ homea delum nɛra. Leebegodoma zo’e zo’e ka tari yelemɛŋɛrɛ ba tuuma poan. Sɛba n kooseri lɔɣɔrɔ ta’an ni parena ti nɛreba yeen da ba lɔɣɔrɔ la. Nɛreba basɛba me bisɛ ti ba kan ta’an dekɛ bamea delum ba zɔdoma, sɛla n sɔi la ba ni tɔɣɛ mɛ ge ka ita. Ge la dela pupeelum yele la ton wan ta’an dekɛ tomea delum Yehowa saŋa woo la! Eŋa n de “sakerɛ sera Yenɛ” la. (Kaalɛ Yooma 31:​2-5.) Yehowa ka pareni. Sɛla woo ti a tɔɣɛ dela yelemɛŋɛrɛ. To tari sakerɛ ti sɛla ti a yele wan sirum tum.

2. To wan sɔsɛ la bem zaseŋɔ wa poan?

² Zaseŋɔ wa poan, to wan zamesɛ baŋɛ sɛla n sɔi ti to wan ta’an dekɛ tomea delum Yehowa la to suure za’a. To wan le sɔsɛ yelemɛŋɛrɛ Naayinɛ la n wan eŋɛ se’em sa’am Sitaana tingɔnbe’o wa. La Yehowa n iti sɛla nananawa ti a basɛ ti eŋa n tari putɛsɛka bɔ’ɔra asaala la tum tuuma. Zaseŋɔ wa wan soŋɛ tɔ ti to ta’an tara sukpe’ene mɔɔla Yehowa yɛla.

BENI N SƆI TI TO WAN TA’AN DEKƐ TOMEA DELUM YELEMƐŊƐRƐ NAAYINƐ LA?

3. Beni sɔi ti to wan ta’an dekɛ tomea delum Yehowa soŋa soŋa?

³ To wan ta’an dekɛ tomea delum Yehowa sɛla n sɔi la eŋa n de to Naaŋɔdaana. Naayinɛ n naam saazuo la tingɔŋɔ wa, la bunvɔɔsi. (Pin. 1:1; Ym. 36:9; Lil. 4:11) A maalɛ la yɛla ase’a n kɔ’ɔn bɔna saŋa woo la wan eŋɛ se’em ti to ta’an vɔna, maɣesɛ wuu sapebesum ti to vɔ’ɔsa, la ko’om ti to nyuura. Yehowa kɔ’ɔn tara la paŋa gana sɛla woo. Yehowa paŋa, la a yɛm n ka tari makerɛ la zuo, to wan ta’an dekɛ tomea delum en ge tara sakerɛ ti a wan bisa tɔ ge basɛ ti la ta ana to soŋa beere sa’am.

4. To eŋɛ la wani baŋɛ ti Yehowa nɔŋɛ to mɛ?

⁴ To wan ta’an dekɛ tomea delum Yehowa sɛla n sɔi la a nɔŋɛ to mɛ. Yehowa yuun naam nɛreba ti ba vɔna mɛ ge tara pupeelum wuu amea la. A yuun naam nɛreba la a wɔ̃nɛ poan ge me basɛ ti ba tara a hala la, maɣesɛ wuu nɔŋerɛ la itisoŋɔ. (Pin. 1:26) Yehowa bo to la yɔ’ɔ ti to ta’an ni kɔ’ɛ to puti’irɛ. A naam tingɔŋɔ wa n ani soŋa la bo la tomam. (Ym. 115:16) A yuun bo to yia dɔɣereba la tuunsonɛ ti, ba basɛ ti tingɔŋɔ wa lebege paradiisi. (Pin. 1:28; 2:15) A yuun bo ba la dinɔ’ɔma, tiisi, dusi la yɛla zo’e zo’e. Sɛla n sɔi ti Yehowa yuun eŋɛ bala dela, a boti la ba tara pupeelum. Yele ana wa pa’alɛ ti “Na’ayenɛ nɔŋerɛ kantɛ la ka tare ba’ahegɔ.”—Ym. 103:17.

5. (a) Adam la Eve n yuun eŋɛ kpenkpasi la, Yehowa yuun eŋɛ la wani? (b) Naayinɛ yetɔɣebiŋ’a ase’a n tum tuuma dela bem? (Bisɛ daka la zuo n de “Naayinɛ San Tɔɣɛ Sɛla, La Ni Tum Mɛ.”)

⁵ To wan ta’an dekɛ tomea delum Yehowa sɛla sɔi la a san tɔɣɛ sɛla, a ni tum mɛ. Yehowa yuun maalɛ tingɔŋɔ la ti “nɛreba ta’an bɔna ka poan. A ka maalɛ ka te ka dɛna pɔgɔtia.” (Isa. 45:​18, 19) Adam la Eve n yuun eŋɛ kpenkpasi la Yehowa la, ba yuun ki mɛ. Bala la, la yuun ta’an ana wuu Yehowa n tari putɛsɛka bɔ’ɔra asaala la kan ta’an tum me la. Ge Yehowa san yele sɛla, a ni basɛ ti la tum mɛ. (Isa. 46:​10, 11) A yuun kelum bɔta la nɛreba vɔna daarewoo tingɔŋɔ wa zuo. Bala n sɔi ti a yuun basɛ ti Adam la Eve dɔɣɛ kɔma. Yehowa yuun basɛ ti a dayua wa’ana ki bo to, la wan eŋɛ se’em ti to ta’an nyɛ yɔ’ɔ ta vɔna daarewoo.—Yon 3:16.

YELEMƐŊƐRƐ NAAYINƐ LA BASƐ TI A PUTI’IRƐ LA TUM LA TUUMA

6. Adam la Eve n yuun zaɣesɛ Yehowa nɔɔrɛ la, Yehowa yuun yeti a wan eŋɛ la bem?

⁶ Se’em n yuun pã’asɛ Adam la Eve ti ba eŋɛ kpenkpasi la Naayinɛ la dela “deeme deeme ha bonsɛla la te ba yi’ira en [Sitaana]a la sagona la.” (Lil. 12:9; Pin. 3:​4, 5; Yon 8:44) Sitaana n yuun eŋɛ bala la zuo, Yehowa yuun yeti a wan sa’am en beere sa’am. (Pin. 3:15) Ge ti Naayinɛ nyaa sa’am Sitaana la, nɛreba zo’e zo’e wan tɔɣesa Sitaana ge me tuna tunbe’ero. Ge nɛreba basɛba me wan tara yelemɛŋɛrɛ bɔ’ɔra Yehowa.

7. Bani n doli Sitaana ge bem n wan paɛ ba?

⁷ Sɛba n doli Sitaana poore la dela kolekpabɛ’ɛsi ti basɛba me dɛna nɛreba. Bamam n giiseri Yehowa la zuo, la pa’alɛ ti ba doli la Sitaana. Naayinɛ saŋa la san paɛ, a wan sa’am Sitaana la sɛba n doli en la za’a.—Da. 2:44; Arom 16:20.

8. Yezu yuun eŋɛ la bem yuun 1914? (Bisɛ fɔɔra la.)

⁸ Bem n basɛ ti to sakɛ ti Naayinɛ n pu’ulum biŋe ti a sa’am Sitaana, la sɛba n doli en la wan sirum tum tuuma? Yuun 1914 ti Yezu yuun zabɛ sa’ɛ Sitaana la a kolekpabɛ’ɛsi basɛ tiŋa wa zuo na. (Lil. 12:​7-9) La boi bim ti ba yuun zabɛ la saazuo ge daaŋɔ la paɛ sɛba n boi tingɔŋɔ zuo mɛ. Baabule la yeti: “Behɛ ya namehe seko te teŋa wa zuo la ko’kantɛ la yeti ba nyɛ. Se’ere n sɔe la sagona la wa’an ya zen’en na. A sunsunya nyii mɛ. Se’ere n sɔe la, a mi te a dabaherɛ la ka le gee zo’e te a tom a tooma.” (Lil. 12:12) Kɔ’ɔn pɔsɛ yuun 1914, Sitaana kɔ’ɔn bɔta la a nyɛ nɛreba zo’e zo’e ti ba dɔla en. Bala basɛ ti yɛla kɔ’ɔn gaam la be’ero tiŋa wa zuo. La kan yue, Yezu wan sa’am Sitaana la sɛba n doli en la. (Lil. 6:2) Yezu wan basɛ ti la niɛ peelumi ti Sitaana dela putɔa ge me parum yɛla bo Yehowa. (Ym. 45:​4-6) Nɛra woo wan baŋɛ ti Yehowa n de yelemɛŋɛrɛ Naayinɛ la!—Eze. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

YELEMƐŊƐRƐ NAAYINƐ LA LAƔESERI LA SƐBA WOO N BOTI YELEMƐŊƐRƐ LA

9. Yehowa laɣeseri la nɛrebani zina beere wa?

⁹ Yehowa laɣeseri la ‘sɛla ti a naam saazuo, la tiŋa wa zuo wa’an bɔberɛ yenɛ na ge ti Krista dɛna zuodaana’ (Ep. 1:10) “Sɛla ti a naam saazuo la,” ze’ele bo la loore Kristakɔma ti Yehowa loe ti ba naɛ la Yezu di na’am saazuo la. ‘Sɛla ti a naam tiŋa wa zuo la,’ ze’ele bo la sɛba n wan ta vɔna daarewoo Paradiisi tiŋa wa zuo. Yehowa yamesi kɔ’ɔn mu’ɛ la nini pa’ala nɛreba yelemɛŋɛrɛ la ge me ni basɛ ti ba baŋɛ ti Sitaana dela pumpɔrema.

10. Yehowa iti la wani soŋera sɛba ti pumpɔreŋɔ pu’usegɔ pã’asa ba la? (Liligere 14:​6, 7)

¹⁰ Yehowa basɛ ti a nɛreba la mɔɔla la a yɛla bɔ’ɔra nɛreba tiŋa wa zuo, la wan eŋɛ se’em ti a ta’an nyɛ nɛresɛba n boti ba pu’usa en la. Na’am mɔɔlegɔ tuunɛ wa yiregɛ paɛ la zɛ’an woo tiŋa wa zuo ti la ka tara makerɛ. (Kaalɛ Liligere 14:​6, 7.) La boi bim ti Yehowa basɛ ti nɛreba n mɔɔla yelesoma la ge malesi la laɣum soŋera mɛ ti ba nyɛta susonɛdoma la. Yehowa nɛreba san mɔɔla, ba ni basɛ ti nɛreba baŋɛ la Yehowa n sirum ani se’em. Ba me ni soŋɛ nɛreba ti ba baŋɛ ti Sitaana doli la pumpɔreŋɔ pu’usegɔ poan sa’ana Yehowa yu’urɛ. (Lil. 18:​2, 4) La kan yue, Yehowa wan sa’am pumpɔreŋɔ pu’usegɔ za’a. Ge sɛba woo n pu’useri yelemɛŋɛrɛ Naayinɛ la wan bo en pɛ̃ka sɛka n nari en.—Lil. 17:16.

11. To wan eŋɛ la wani ta’an baŋɛ sɛba n pu’useri Yehowa la yelemɛŋɛrɛ?

¹¹ Yehowa laɣeseri la nɛreba buuri buuri ti ba pa’asɛ a tansugere la poan. (Lil. 7:​9, 10) Nɛreba san pɔsɛ wum Yehowa yɛla, ba ta’an ni bɔkɛ ti sɛla ti to pa’ala ba la dela yelemɛŋɛrɛ. Bala ni basɛ ti ba bɔta ti ba naɛ la tɔ ti to laɣum pu’usa Yehowa. (Mr. 13:10) Zina beere wa, la kɔ’ɔn niɛ la peelumi ti to mina sɛba n pu’useri Yehowa la yelemɛŋɛrɛ, la sɛba n ka pu’useri en la yelemɛŋɛrɛ. Nɔdɛ’ɛsa Malaki yuun pu’ulum biŋe ti: “Ya wan nyɛ tontɔɔdoma la toonfɛn’ɛhadoma la n boe yema yema se’em. Sɛba n dole Yenɛ la sɛba n ka dole Yenɛ n boe yema yema seem.” (Ma. 3:18) Yehowa Sɛɛradoma halɛ, la ba na’am mɔɔlegɔ tuuma la pa’alɛ ti bamam n pu’useri Naayinɛ la yelemɛŋɛrɛ.

12. Sodeni poan ti na’am mɔɔlegɔ tuuma la laɣum soŋɛ ti Yehowa puti’irɛ la tuna tuuma?

¹² Ton mɔɔli “[Na’am] yelesoma” la pa’alɛ ti to nani la Yezu ge me basɛ ti Baabule yetɔɣebiŋ’a tuna tuuma. (Mt. 24:14; 28:​18-20) Ton mɔɔli la zuo, nɛreba zo’e zo’e tingɔŋɔ wa poan nyaa dela Yezu podɔleba ge bɔta ti ba pu’usa Yehowa wuusa. Bisɛ Yehowa n bo to yɔ’ɔ katɛ se’em ti to laɣum soŋɛ basɛ ti a puti’irɛ la tum tuuma!

TO TARI SAKERƐ TI YEHOWA WAN BASƐ TI A PU’ULUMBIŊ’A LA TUM TUUMA

13. Bani ti Sitaana ba’ɛ yaɛ ba ge beni zuo?

¹³ Sitaana n de Sa’ana la sunsɔa n nyie paa sɛla n sɔi la “a mi te a dabaherɛ la ka le gee zo’e te a tom a tooma” ge ti ba sa’am tingɔŋɔ wa. (Lil. 12:​12, 13) A ba’ɛ yaɛ la loore Kristakɔma la n yeti ba naɛ la Krista di na’am saazuo la. Bamam n de “birikindoma bo Yenɛ pa’alegɔ la ge gurɛ yelemɛŋɛrɛ la kaŋkaŋɛ te Yesu pa’alɛ la.” (Lil. 12:17; 14:12) Sitaana me yaɛ sɛba woo n laɣum soŋera loore Kristakɔma la mɛ.

14. Sitaana san isige ti a zabɛ la Yehowa nɛreba, bem n wan eŋɛ? (Bisɛ foote.)

¹⁴ Ba san sa’am Babilon Katɛ la ba’asɛ, sɛba n pa Sitaana poore la wan isige ti ba zabɛ la Yehowa nɛreba. Bilam ti Armagedon zaberɛ la wan pɔsɛ. (Lil. 16:​13, 14, 16) Yezu la malesi la wan zabɛ faaɛ Yehowa yamesi ge sa’am Sitaana tingɔŋɔ wa. (Lil. 19:​19-21) Tuunfɛ’ɛsadoma, la pumpɔreŋɔdoma kan le bɔna. (Lil. 21:8) Nɛra woo wan ta baŋɛ ti Yehowa kɔ’ɔn dɛna la tontɔɔdaana la yelemɛŋɛrɛdaana.

15. Beni n sɔi ti to tara sakerɛ ti sɛla woo ti Naayinɛ pu’ulum biŋe la wan tum tuuma? (Isaiah 65:​16, 17) (Bisɛ foote la.)

¹⁵ Zina beere wa, zaberɛ la yelesego n kɔ’ɔn bɔna nɛreba tiŋasuka. Ge Yehowa soŋɛ a yamesi mɛ ti ba tara nɔyinɛ. Yehowa kɔ’ɔn laɣesa la nɛresɛba woo n boti yelemɛŋɛrɛ la pa’asa a tansugere la poan. Sɛla ka boi n wan ta’an gu Yehowa ti a kan kã bo a nɛreba la, la tuunse’ere ti ba tuna bɔ’ɔra en la. (Kaalɛ Isaiah 65:​16, 17.) To tari sakerɛ ti sɛla woo ti Naayinɛ pu’ulum biŋe la wan tum tuuma. Tuntuna Paul n tɔɣɛ sɛla ti la bɔna Arom 8:​38, 39 kpemeseri la to giila. Bilam yeti: “La kan de’a kum bii vom, bii Yenɛ soŋoreba bii sɛba n de zuodoma saazuo ha, bii zina wa bii sɛla n wan wa’an pooren na la, bii paŋadoma bii saazuo bii teŋa teŋa ha. Sɛsɛla ka boe teŋa wa zuo wan ta’an bahɛ te Yenɛ kan nɔŋɛ tɔ to Daana Yesu Krista zuo.”

16. Beni n sɔi ti hon dekɛ ho suure za’a delum Yehowa?

¹⁶ La kɔ’ɔn nara mɛ ti to dekɛ tomea delum Yehowa n de yelemɛŋɛrɛ Naayinɛ la. Eŋa n de to Naaŋɔdaana. Yehowa nɔŋɛ to mɛ paa. A me kɔ’ɔn laɣesa la nɛreba zo’e zo’e tiŋa wa zɛ’an woo ti ba wa’ana pu’usa en. (Isa. 60:22; Zek. 8:23) To mi ti Yehowa san tɔɣɛ sɛla, la ni tum mɛ. Bala la, la kan yue a wan sa’am Sitaana ti pumpɔreŋɔ kan le bɔna. To kɔ’ɔn bɔta la David n yuun zusɛ sɛla la tum tuuma. A yeti: “Na’ayenɛ . . . dela kan’an ma’an, Enŋa ma’an n tone nyalema. Kan’an wan bɔna a yu’urɛ la poan ka tara ba’ahegɔ, te a soŋa to’e teŋparɛ wa poan woo.”—Ym. 72:​18, 19.