Bɔkɛ Ko’om Musega Vuurɛ N De Sɛla

1. To eŋɛ la wani baŋɛ ti ko’om musega dela Baabule yelekpine n pakɛ?

SƐBA ti to zamesa ba Baabule la san muse ko’om, to puurɛ ni pee mɛ. La me yuun ani yuun kɔbesɛka n deŋɛ nɛŋa Kristakɔma la bala se’em ma’a ti nɛreba zo’e zo’e yuun muse ko’om Pentekost, yuun 33 yɔɔma beere la. Daandindaarɛ, tuntuna Peter yuun bo la yetɔɣum pa’alɛ ko’om musega n de ninmu’urɛ se’em. (Tm. 2:​38, 40, 41) Pooren, tuntuna Paul yuun yeti “paaleseko n tɔgɔre . . . ko’om [musega] yɛla la” pa’asɛ la ‘Krista pa’alegɔ seto n de yelekpina la’ poan. (Heb. 6:​1, 2) Bala la, ko’om musega dela Baabule yelekpina la ayima ti la nara ti to zamesɛ ge bɔkɛ dɛ soŋa. Beni n sɔi?

2. Beni n sɔi ti la nara ti to bɔkɛ ko’om musega yele n pakɛ se’em?

² Nɛra san bɔta ti a mɛ yire n tari paŋa, la nari ti yire la ɛ̃berɛ la kpe’em. Bala mea nɔɔ ti nɛra san bɔta ti a sakerɛ kpe’em, la nari ti a bɔkɛ Baabule yelekpina la. Yele ana wa ayima dela ko’om musega. Bala la, to san nan yeti to muse ko’om bii to puɣum muse ko’om mɛ ti la yue, la nari ti to bɔkɛ ko’om musega yele n pakɛ se’em. Wana wa zuo, to wan nyɛ soke ana wa lebesego zaseŋɔ wa poan: Ko’om musega vuurɛ? Kristakɔma museri ko’om la wani? Beni n sɔi ti la nara ti to muse ko’om Sɔ la, la Dayua la, la zilam vo’osum la yu’urɛ poan?

KO’OM MUSEGA VUURƐ?

3. Ho san muse ko’om, la pa’alɛ la bem?

³ Ho san muse ko’om, la pa’alɛ la bem? La pa’alɛ ti ho sakɛ Yehowa Naayinɛ la Yezu Krista yɛla ti ho zamesɛ la mɛ. La me pa’alɛ ti ho basɛ ho be’em mɛ ge me eŋɛ teere ho vom poan ti ho ta’an pu’usa Yehowa. La le pa’alɛ ti ho bɔkɛ ti Naayinɛ wan doose la Yezu poan faaɛ hɔ be’em la kum poan basɛ. Ho me san muse ko’om, la le pa’alɛ ti ho yele Yehowa zusega poan ti ho wan tum a puti’irɛ n de sɛla wuu a tigere la n pa’alɛ se’em la. Ho san kã homea ge muse ko’om, ho ni lu la ho suure ti ho wan pu’usa Yehowa wuusa.

4. La vuurɛ dela bem ho san muse ko’om la poan? La vuurɛ dela bem ti ba yaɛ ho ko’om la poan? (Bisɛ foote la.)

⁴ Ba san yeti ba muse ho ko’om, ba ni dekɛ ho muse la ko’om poan ge nyaa le yaɛ hɔ. To wan ta’an dekɛ bala makɛ wuu nɛra n ki ti ba laɛ en ge nyaa isige en leyɛ’ɛsa. (Dekɛ makɛ Kolose 2:12.) Beni n sɔi ti to wan ta’an dekɛ ko’om musega makɛ bala? Ba san muse ho ko’om la poan, la pa’alɛ ti ho ka le vɔi ho vom wuu hon daa vɔi ho vom se’em la. Ba san yaɛ ho ko’om la poan, la pa’alɛ ti ho nyaa yeti ho vɔna la ho vom ti la makɛ la Naayinɛ puti’irɛ n de se’em.

5. Beni n sɔi ti to wan ta’an dekɛ hon nari ti ho eŋɛ teere se’em ge muse ko’om la, makɛ la Noah n yuun nari ti a tum se’em ta’an kpa daka la? (1 Peter 3:​18-21)

⁵ Kaalɛ 1 Peter 3:​18-21. To wan ta’an dekɛ hon nari ti ho eŋɛ teere se’em ge muse ko’om la, makɛ la Noah n yuun nari ti a tum se’em ta’an kpa daka la. Ho san nan pɔsɛ zamesa Yehowa yɛla, la ta’an ana ho wuu hon nari ti ho eŋɛ teere se’a ge muse ko’om la ba’ɛ kpe’em mɛ. Hali la ta’an ana ho wuu lan yuun kpe’em bo Noah se’em la. Ge la yele pakɛ mɛ ti ho eŋɛ teere wa yoi? Ɛɛ. Beni n sɔi ti la yele pakɛ? Geele Noah yele la bisɛ. Naayinɛ yuun pa’alɛ Noah n nari ti a kpa daka la se’em. Noah yuun nari ti a doose Naayinɛ n yele se’em la ti eŋa la nɛreba la ta’an nyɛ faarɛ. Noah yuun tari la sakerɛ ge nam Yehowa, bala zuo Yehowa yuun soŋɛ en mɛ ti a ta’an kpa daka la. Wuu Noah la, ho me ta’an ita yɛla wuu “Yenɛ n bo nɔɔrɛ se’em la.”—Pin. 6:22.

6. Sore kani poan ti ko’om musega fãara to basa?

⁶ 1 Peter 3:21 poan, tuntuna Peter yuun yeti ko’om musega “n faanre ya baha.” Ge daɣɛ ko’om musega ma’a n wan basɛ ti ho nyɛ sugeri dia. La dela Yezu lua bunɔ la ma’a n wan ta’an basɛ ti ho nyɛ sugeri dia. (1 Yo. 1:7) Ge la yele kelum pakɛ mɛ ti to muse ko’om se’ere n sɔi la Naayinɛ n bo to nɔɔrɛ ti to eŋɛ bala. To me san muse ko’om, to boti to yele Naayinɛ ti, a basɛ ti to ‘tara putɛkeeŋa n ani soŋa.’ Yehowa puurɛ pee mɛ ti a di sugeri bo to doose la Yezu lua bunɔ la poan. Yehowa n iti bala la zuo, ko’om musega “faanre [to] baha” mɛ, ti la pa’alɛ ti ko’om musega n wan basɛ ti to ta vɔna daarewoo.

KRISTAKƆMA MUSERI KO’OM LA WANI?

7. La nari ti to eŋɛ la bem ti la makɛ ma’a ko’om musega poan?

⁷ Baabule la yeti Kristabia san yeti a muse ko’om, la nari ti a inya za’a muse ko’om la poan ge la ka le tɔɣɛ pa’alɛ lan wan ana se’em. Baabule la soŋɛ tɔ ti to baŋɛ lan nari ti to eŋɛ se’em ko’om musega saŋa. Makerɛ, Baabule naresum yɛla ni soŋɛ sɛba n yeti ba muse ko’om la ti ba mina ban wan yɛ ba lɔɣɔrɔ se’em. La me ni soŋɛ sɛba n biseri ko’om musega la ti ba mina ban wan tara bamea se’em. (1 Ko. 14:40; 1 Tim. 2:9) Zina beere wa, keendoma n ni muse nɛreba ko’om. To ni ka eŋɛ sɛla ti la pa’alɛ ti to na’aseri ba mɛ. (1 Ko. 1:​14, 15) Ho san yeti ho muse ko’om, nɛreba zo’e bisera ho woo, ba ka zo’e woo, la yele ka pakɛ.—Tm. 8:36.

8. Ba ni soke sɛba n yeti ba muse ko’om la bem sokere ge beni n sɔi? (Tooma 2:​38-42) (Bisɛ foote la.)

⁸ Baabule la pa’alɛ ti la nari ti to ‘tɔɣɛ to sakerɛ la yele ta’an nyɛ fãarɛ.’ (Arom 10:​9, 10) La daɣɛ ton mɔɔli yelesoma la ma’a n pa’alɛ ti to tɔɣeri to sakerɛ yɛla ge to ko’om musega daarɛ me pa’alɛ bala mɛ. Bala zuo, ba ni soke sɛba n yeti ba muse ko’om la sokere ayi. Sokere sɛka n deŋɛ nɛŋa la dela, “Hon basɛ ho be’em, kã homea bo Yehowa ge sirum sakɛ ti, a doose la Yezu Krista poan ti a faaɛ ho basɛ?” Sokere wa basɛ ti to baŋɛ la nɛra n ni puɣum eŋɛ yelese’a lan wan eŋɛ se’em ti a ta’an muse ko’om. Peter yuun yele la sɛla n ani bala Pentekost daarɛ la. A yuun yele nɛreba la ti ba basɛ ba be’em ti ba muse ba ko’om. Sokere sɛka n pa’asɛ buyi la dela, “Hon bɔkɛ soŋa soŋa ti ho ko’om musega wa niɛ la peelumi pa’alɛ ti ho dela Yehowa Sɛɛradaana ge laɣum pa’asɛ Yehowa tigere la poan?” Sokere wa pa’alɛ la nɛra n wan eŋɛ sɛla. A ni biŋe nɔɔrɛ ti a wan dɔla Yehowa tigere la n pa’alɛ sɛla ge me naɛ la mabiisi la pu’usa Yehowa. Nɛresɛba n yuun boi Pentekost daarɛ la me yuun eŋɛ la sɛla n ani bala se’em ma’a ti ba muse ko’om ba’asɛ la. (Kaalɛ Tooma 2:​38-42.) Sɛba n yese ba suure sakɛ ɛɛ la wan ta’an muse ko’om.

9. To za’a nari ti to eŋɛ la bem ti Yehowa puurɛ pee?

⁹ Hali hon yuun nan ka pɔsɛ zamesa Baabule la, daanse’ere ho yuun iti la sɛla n ani soŋa ge me ka bɔta ti ho tuna be’em. Bii daanse’ere ho dɔɣereba yuun puɣum pu’usa la Yehowa ge soŋɛ hɔ ti ho me nɔŋɛ en. Ge la kelum nara ti ho basɛ ho be’em ge muse ko’om ti Yehowa puurɛ ta’an pee la hɔ yoi? Ɛɛ. To za’a dela be’emdoma, bala zuo to zaaɛ mɛ la Naayinɛ. (Ym. 51:5) To san zamesa Yehowa yɛla zo’e zo’e, to ni kɔ’ɛ la to puti’irɛ ti to ita eŋa n boti sɛla ge daɣɛ tomam mea n boti sɛla. Bala zuo, to ni basɛ to be’em mɛ ge me lu to suure ti to kan le tum sɛla n wan sa’am Yehowa suure. To san eŋɛ bala, to nyaa wan ta’an muse ko’om.—Tm. 3:19.

10. Ho daa san puɣum muse ko’om pu’usegɔ kayima poan, bem n nari ti ho kelum eŋɛ?

¹⁰ Ho daa san puɣum muse ko’om pu’usegɔ kayima poan, la kelum nara ti ho muse ko’om ta’an dɛna Yehowa Sɛɛradaana. Beni n sɔi? Se’ere n sɔi la ho daa ka bɔkɛ Yehowa Naayinɛ la Yezu yɛla soŋa soŋa. Ho daa san puɣum zusɛ Naayinɛ ti ho wan ita la eŋa n boti sɛla, hon daa ka bɔkɛ a puti’irɛ n de se’em soŋa soŋa la zuo, ho zusega la daa ka makɛ la a puti’irɛ n boti sɛla la. Epesus nɛreba la daa puɣum muse ko’om mɛ ge ka bɔkɛ Yezu pa’alegɔ la soŋa soŋa. Bala zuo, Paul yuun eŋɛ la maaseŋɔ ti ba le muse ko’om. a (Tm. 19:​1-5) Bala mea nɔɔ ti sɛba n zamesɛ Naayinɛ yɛla ge bɔkɛ a puti’irɛ n de se’em la ma’a n wan ta’an muse ko’om ti Naayinɛ nam ba.

‘SƆ LA, LA DAYUA LA, LA ZILAM VO’OSUM LA YU’URƐ POAN’

11. La vuurɛ dela bem ti to muse ko’om ‘Sɔ la, la Dayua la, la zilam vo’osum la yu’urɛ poan’? (Matu 28:​18-20)

¹¹ Yezu yuun yele a podɔleba la ti ba muse ko’om ‘Sɔ la, la Dayua la, la zilam vo’osum la yu’urɛ poan.’ (Kaalɛ Matu 28:​18-20.) A yuun boti a pa’alɛ la bem? Baabule la poan, yelebire la n de “yu’urɛ” la pa’alɛ la nɛreba n geele nɛra se’em. La me pa’alɛ la nɛra n tari paŋa bii kpe’eŋo se’em. Bala la, to san muse ko’om Yehowa la Yezu yu’urɛ poan, la pa’alɛ ti to mi ti bamam n tari paŋa ge me nara ti ba pa’ala tɔ. To me san muse ko’om zilam vo’osum la yu’urɛ poan, la pa’alɛ ti to wan dɔla zilam vo’osum la n pa’alɛ sɛla la. (Dekɛ makɛ Matu 10:41) Basɛ ya ti to bisɛ ton wan eŋɛ bala se’em.

12. Sore kani poan ti to ni muse ko’om Sɔ la yu’urɛ poan? (Liligere 4:11) (Bisɛ fɔɔra la.)

¹² Sɔ la yu’urɛ poan. Wana wa pa’alɛ ti to mi ti Yehowa n de to saazuo Sɔ ge me bo to vom. A me dela paŋa za’adaana n naam sɛla woo. (Kaalɛ Liligere 4:11.) To mi ti a keleseri to zusega mɛ. To yi’iri a yu’urɛ mɛ to san zusa ge me tɔɣera a yɛla bɔ’ɔra nɛreba. (Ym. 65:2) Ge la daɣɛ bala ma’a zuo ti la nara ti to muse ko’om Sɔ la yu’urɛ poan. Peter n yuun tɔɣɛ bo nɛresɛba Pentekost daarɛ la yuun puɣum mina Yehowa mɛ ge ba yuun nari ti ba sakɛ ti Yehowa wan doose la Yezu Krista poan bo ba vom n ka tari ba’asegɔ. Tomam me nari ti to sakɛ bala.—Arom 5:8.

13. Sore kani poan ti to ni muse ko’om Dayua la yu’urɛ poan? (Bisɛ fɔɔra la.)

¹³ Dayua la yu’urɛ poan. Wana wa pa’alɛ ti to mi ti Yezu n de Naayinɛ Dayɔba’arɛ. Yezu n de “sore la,” ti la pa’alɛ ti eŋa ma’a poan ti to wan ta’an doose tara bɔnsoŋa la Yehowa. (Yon 14:6) Yezu n de to Fãara, se’ere n sɔi la a ki bo to mɛ ti to ta’an nyɛ vom. Bala zuo, la nari ti to kɔ’ɔn tɔɣesa en saŋa woo. (1 Yo. 2:6) Wuu Yezu la, to kɔ’ɔn mu’ɛ la nini mɔɔla yelesoma la ge kan basɛ ti sɛla gu to. (Lu. 4:43) Ton pu’useri Naayinɛ la zuo, To ŋmiberi mɛ mɛlesegɔ poan. (2 Tim. 3:12) To sakɛ ti Yezu n de ‘tansugere la zuodaana,’ bala la sɛba ti a loe ti ba bɔna nɛŋa ge bisa to la san bo to pa’alegɔ, to ni doose mɛ.—Ep. 4:​8, 11, 12; 5:23.

14. (a) Sore kani poan ti to ni muse ko’om zilam vo’osum la yu’urɛ poan? (Bisɛ foote la.) (b)  Sore kani poan leyɛ’ɛsa ti looredoma la ni muse ko’om? (Bisɛ daka la zuo n de “Looredoma La N Ni Le Muse Ko’om Se’em.”)

¹⁴ Zilam vo’osum la yu’urɛ poan. Wana wa pa’alɛ ti to mi Baabule la n pa’alɛ zilam vo’osum la yele se’em mɛ. Zilam vo’osum la daɣɛ nɛra, ku me ka pa’asɛ Naayinɛ la a Dayua la poan dɛna yina atã wuu nɛreba basɛba n pa’alɛ se’em la. Ge zilam vo’osum la dela Naayinɛ pansɛka ti a tara tuna tuuma. To mi ti Yehowa yuun dekɛ la zilam vo’osum la soŋɛ a nɔdɛ’ɛseba la ti ba mina ban wan tɔɣɛ sɛla ge me soŋɛ sɛba n gulesɛ Baabule la ti ba mina ban wan gulesɛ sɛla. (2 Pe. 1:​20, 21) To me ka boti ti to tuna be’em, se’ere n sɔi la to mi ti wana ta’an gu zilam vo’osum la ti la da bɔna to zuo bii tansugere la poan.—Ep. 4:30.

15. To nari ti to lu to suure eŋɛ la bem?

¹⁵ Ho san puɣum muse ko’om dɛna Yehowa Sɛɛradaana, tiregɛ bɔkɛ “paaleseko n tɔgɔre . . . ko’om [musega] yɛla la”b ge doose hon kã homea ge muse ko’om ti ho eŋɛ sɛla la. Ge ho san nan ka muse ko’om? Sɛla n gu’uri ho ti ho nan ka muse ko’om? Zaseŋɔ seko n taɣelɛ la poan, to wan zamesɛ baŋɛ ton wan kelum tiregera se’em ta’an muse ko’om.