To Wan Eŋɛ La Wani Soŋɛ To Yire Nɛreba Sɛba N Ka Pu’useri Yehowa?

1-2. Hon daa zamesɛ yelemɛŋɛrɛ la basɛ ti hon la ho yidoma bɔŋa ana la wani?

YEZU yuun yele buraa ayima n boti a dɛna a podɔla ti: “Kule ta yele ho nɛreba sɛla te ho Daana la eŋɛ bo ho.” (Mr. 5:19) Sɛla n sɔi ti Yezu yuun yele bala dela a mi ti nɛreba san wum yelesoma, ba ni bɔta la ba tɔɣɛ bo ba yire nɛreba.

² Hon tɛri la yuun ani ho se’em ban daa tɔɣɛ yelesoma la bo ho la? Daanse’ere ho inya daa kiti mɛ ti ho bɔta ti ho tɔɣɛ bo ho yire nɛreba za’a! Ge daanse’ere ho yire nɛreba puurɛ daa ka pee la hon zameseri yelese’a la. Bii hon daa tɔɣɛ yelemɛŋɛrɛ la se’em bo ba la basɛ ti ba sunsɔa n nyie la hɔ. La san dɛna bala, zaseŋɔ wa wan soŋɛ hɔ ti ho tara bɔnsoŋa la ho yire nɛreba ge me tara yelemɛŋɛrɛ pu’usa Yehowa.

3. To wan sɔsɛ la bem zaseŋɔ wa poan?

³ Zaseŋɔ wa poan, to wan sɔsɛ yɛla anaasi ti to wan eŋɛ ta’an tara bɔnsoŋa la to yire nɛreba. To wan baŋɛ: (1) To wan tara giile se’em bɔ’ɔra to yire nɛrebaa hali ba san puɣum ka bɔta yelemɛŋɛrɛ la, (2) to wan eŋɛ se’em, ba san tɔɣɛ bii eŋɛ to sɛla ti la daam tɔ, (3) to wan eŋɛ se’em ta’an di’isa suure ge tara putɛsonɛ la to yidoma ti la soŋɛ ba ti ba ta’an baŋɛ yelemɛŋɛrɛ la, la (4) to wan eŋɛ se’em pa’alɛ ti to nɔŋɛ ba.

TARA GIILE BƆ’ƆRA HO YIRE NƐREBA

4. Nɛreba n yuun ka boti ba kelese Yezu la, a yuun eŋɛ la wani?

⁴ Nɛreba basɛba yuun ka boti ba kelese Yezu ge a yuun ka gɛ̃ ba basɛ. Yezu yuun dekɛ amea makɛ la se’em n biseri va’am ge tiregera ti a basɛ ti a kinkaŋa wɔm. (Lu. 13:​6-9) Se’em ma’a ti Yezu yuun bo makerɛ wa la, la yuun puɣum gaŋɛ yuuma atã mɛ ti a bɔta ti a soŋɛ Yudadoma la ti ba tara sakerɛ. Beni n sɔi ti a yuun tiregera ti a soŋɛ ba? Yezu yuun tari la giile bɔ’ɔra nɛreba, bala me n yuun soŋɛ en ti a di’isa suure la ba.

5. Bem n yuun soŋɛ Yezu ti a tara nɛreba giile?

⁵ Nɛreba la bɔŋa yuun tari Yezu la nimbũ’ɔ sɛla n sɔi la, pu’usegɔ nɛŋadoma la yuun ka pa’ali nɛreba la ti ba mina Yehowa soŋa. Yezu yuun nyɛ ti nɛreba la “ane wo piihe n ka tare duŋkeena la.” (Mr. 6:34) Lan yuun ta gee dabesa fii la Yezu ki la, a yuun kele mɛ Yerusalem nɛreba zuo. Sɛla n sɔi la, a yuun mi ti nɛreba la zo’e zo’e wan ki, ban ka tari sakerɛ la zuo. (Lu. 19:​41-44) Wuu Yezu la, to me san fabela to yire nɛreba yele, la wan kpemese to giila ti to bɔta ti to soŋɛ ba.

6. Beni n sɔi ti la nara ti to di’isa suure la to yire nɛreba sɛba n nan ka pu’useri Yehowa la? (Galatia 6:9)

⁶ Kaalɛ Galatia 6:9. Hali to yire nɛreba san puɣum ka bɔta yelemɛŋɛrɛ la, la nari ti to di’isa suure la ba ge me kelum ita “etesoŋɔ” bɔ’ɔra ba. La ni kpe’em mɛ ti nɛra basɛ eŋa n sakɛ bo yelese’a la ge tee tara sakerɛ bɔ’ɔra Yehowa. Daanse’ere, hon me daa ani wuu sɛba n ‘daa ka mi Yinɛ ge me ka tara beere sa’am puti’irɛ la.’ (Ep. 2:12) Nɔkpe’ene kai ti hon daa boi bɔnkaŋa taaba la zuo, nɛra n daa wa’ana soŋɛ hɔ ti ho baŋɛ Yehowa. Hon me kan bɔta ti ho soŋɛ ho yire nɛreba ti ba baŋɛ Yehowa?

TIREGƐ BƆKƐ SƐLA N SƆI TI BA TƆƔERA GE ITA BALA

7. Bem n yuun ta’an basɛ ti Yezu suurɔ la ka tara sakerɛ bɔ’ɔra en?

⁷ Daanse’ere, Yezu suurɔ la yuun wum tuunkirisi se’a ti Yezu yuun tum Galilee tiŋa la. (Lu. 4:​14, 22-24) Ge ba daa nan ka tari sakerɛ bɔ’ɔra en. (Yon 7:5) Beni n sɔi? Baabule la ka pa’alɛ. Ge Baabule la pa’alɛ sɛla n sɔi ti Yudadoma la basɛba yuun ka bɔta ti ba dɔla Yezu. Basɛba yuun zoti la dabeem ti ba san tara sakerɛ bɔ’ɔra Yezu, nɛreba wan yaɛ ba. (Yon 9:​18-22) Basɛba me yuun mi Yezu la a bunbilimen, bala la ba yuun ka ti’isɛ ti a wan ta’an dɛna Naayinɛ Dayua. (Mr. 6:​1-4) Yezu suurɔ la me yuun ta’an ti’isa bala. Daanse’ere, ho yire nɛreba me ta’an tara putɛ̃-aŋa mea nɔɔ ka bɔta ti ba kelese ho.

8. Bem n ta’an basɛ ti to yire nɛreba tɔɣɛ tɔ bii eŋɛ to sɛla n ka nari?

⁸ Ti’isɛ bisɛ sɛla n sɔi ti ba tɔɣera ge ita bala. Daanse’ere, Yezu suurɔ la yuun laɣum pa’asɛ a yire nɛreba sɛba n yuun yeti, “a yirihe mɛ” la. (Mr. 3:21) Beni n sɔi ti ba yuun ti’isa bala? La niɛ peelumi ti sankaŋa la, Yezu yuun mu’ɛ la nini mɔɔla ge tibera nɛreba. Bala yuun basɛ ti a ka tara nɛŋa n wan di dia. (Mr. 3:20) Daanse’ere, Yezu yire nɛreba la yuun ti’isɛ ti Yezu ba’ɛ dekɛ a pu’usegɔ tuuma la tu la zuo. To yire nɛreba me ta’an ti’isa ti to ba’ɛ dekɛ to pu’usegɔ tuuma la tu la zuo. Ba san ti’isa bala, la nari ti to basɛ ti to yetɔɣum, la to itigɔ pa’alɛ ti to iti yɛla makera.

9. Bem n wan ta’an soŋɛ to yidoma ti ba tara putɛsonɛ la Yehowa Sɛɛradoma? (1 Peter 3:​1, 2) (Bisɛ fɔɔra la.)

⁹ Kɔ’ɔn tara itisoŋɔ ge me ita yɛla makera. To san mina guŋerɛ to yetɔɣum poan ge me tara itisoŋɔ, la ta’an basɛ ti to yire nɛreba tara putɛsonɛ la Yehowa Sɛɛradoma. (Kaalɛ 1 Peter 3:​1, 2.) Makerɛ, mabipɔka ta’an tara sira n ka pu’useri Yehowa. A sira la san bɔna yire ti a yese keŋɛ na’am mɔɔlegɔ bii zamesegɔ, a sira la sunsɔa ta’an nyie ti a ti’isa ti a pɔɣa la ka ti’iseri a yele. Mabipɔka la san ka bɔta ti la ana a sira la bala, a ta’an te’ele bisɛ eŋa n wan ŋmɛresɛ amea se’em ta’an nyɛta nɛŋa bɔ’ɔra a sira la. Makerɛ, a ta’an keŋɛ na’am mɔɔlegɔ se’em ma’a ti a sira la bɔna tuuma poan bii ka bɔna yire. Mabipɔka la san nyaŋɛ eŋɛ teere ti a sira puurɛ pee, la ta’an soŋɛ a sira la ti a tara putɛsonɛ la Yehowa Sɛɛradoma.

10. To wan eŋɛ la wani ta’an tɔɣesa Yezu ba san zɛregera tɔ?

¹⁰ Ba san zɛregera hɔ daɣɛ saŋa woo n de ho lebese. Se’em ma’a ti ba yuun zɛregɛ Yezu ti a dela diisa la danyuura la, a yuun ka tiregɛ tɔɣɛ po’e amea. Ge a yuun boti la nɛreba bisɛ a itigɔ ge baŋɛ eŋa n sirum ani se’em. (Mt. 11:19) A me yuun eŋɛ pa’alɛ ti a dela mina n iti sɛla woo ma’a ma’a. (Dekɛ makɛ Yon 2:​2, 6-10.) Bala mea nɔɔ, ba san zɛregera hɔ, daɣɛ saŋa woo ti la nara ti ho lebese. Ge basɛ ti ho yidoma la baŋɛ ti ho iti sɛla woo la ma’a ma’a ge me tara pupeelum. Ho yire nɛreba la san nyɛ bala, ba wan baŋɛ ti ban tɔɣeri Yehowa Sɛɛradoma yele se’em la daɣɛ yelemɛŋɛrɛ.

DI’ISA SUURE GE TARA PUTƐ̃SONƐ

11. Yezu suurɔ la n yuun ka tari sakerɛ bɔ’ɔra en la, a yuun eŋɛ la wani?

¹¹ Baabule la pa’alɛ ti Yezu yuun kɔ’ɔn di’isa la suure la a suurɔ la. Makerɛ, Yezu n yuun tum a tunkirega sɛka n deŋɛ nɛŋa Kana tiŋa la, a suurɔ la yuun ta’an bɔna bim. (Yon 2:​11, 12) Wuu ton puɣum baŋɛ se’em la, Yezu suurɔ la yuun ka tari sakerɛ bɔ’ɔra en. Ge Yezu yuun ka gɛ̃ ba basɛ. Baabule la pa’alɛ ti, Yezu n yuun tum a yia tunkirega Kana tiŋa la, la yuun paɛ wuu yuuma atã ge ti a suurɔ la kelum ka tara sakerɛ bɔ’ɔra en. Ge Yezu yuun kelum tɔɣera bɔ’ɔra ba mɛ la gilema.—Yon 7:​5-8.

12. Bem n wan soŋɛ tɔ ti to tara puti’irɛ ti to yire nɛreba ta’an pu’usɛ Yehowa?

¹² Ton zamesɛ baŋɛ Yehowa n tari nimbɔ̃zore se’em la, soŋeri to mɛ ti to tara puti’irɛ ti to yire nɛreba ta’an nyɛ yɔ’ɔ pu’usɛ Yehowa. Ba san ta sa’am pumpɔreŋɔ pu’usegɔ, to yire nɛreba ta’an tĩɛ ti to yuun tɔɣɛ yele wa bo ba.b (Lil. 17:16) Hali mɛlesekãtɛ la san ta pɔsɛ, ba ta’an naɛ la tɔ pu’usa Yehowa. Yeledaaŋɔ me san paara to yire nɛreba nananawa, to wan tiregɛ soŋɛ ba. Ba san baŋɛ ti to nɔŋɛ ba, daanse’ere ba wan bɔta ti ba zamesɛ yelemɛŋɛrɛ la.

EŊƐ PA’ALƐ TI HO NƆŊƐ BA

13. La boi bim ti to mu’ɛ la nini pu’usa Yehowa ge la nari ti to bisɛ tomea soŋa la bem poan?

¹³ La boi bim ti to kɔ’ɔn mu’ɛ la nini pu’usa Yehowa ge to ka boti to eŋɛ sɛla n wan basɛ ti to yire nɛreba ti’isa ti to ka tari nɛŋa bɔ’ɔra ba bii to ka nɔŋɛ ba. (Mt. 7:12) Basɛ ya ti to bisɛ ton wan ta’an eŋɛ se’em pa’alɛ ti to ti’iseri ba yele.

14-15. To wan eŋɛ la bem pa’alɛ ti to nɔŋɛ to yire nɛreba sɛba n ka pu’useri Yehowa la? Bo makerɛ.

¹⁴ Sɔsa la ba saŋa woo ge eŋɛ pa’alɛ ti ho nɔŋɛ ba. Ton wan eŋɛ se’em pa’alɛ ti to nɔŋɛ to yire nɛreba dela to sɔsa la ba saŋa woo. Makerɛ, to ta’an yi ba bii to tɛɣesɛ yele ba yelese’a ti to ita ti la bɔ’ɔra tɔ pupeelum. To me ta’an dekɛ yelese’a ti to ita la fɔɔra pa’alɛ ba. To san dekɛ sɛla bo ba bii to gulesɛ la gɔŋɔ bo ba, bala ta’an basɛ ti to suure kɛ̃ taaba. To san ita som bɔ’ɔra to yire nɛreba, la wan basɛ ti ba baŋɛ ti to sirum nɔŋɛ ba.

¹⁵ To geele ya mabipɔka Anna n ze’ele Armenia yele la bisɛ. A yire nɛreba ni naɛ la taaba dɛ’ɛna dɔɣum daarɛ de’eŋo, la de’eŋo ase’a n ka makɛ la Baabule pa’alegɔ. Anna n yuun nyaa de Yehowa Sɛɛradaana la, a yidoma yuun fabeli ti a kan le nyɛta nɛŋa bɔ’ɔra ba. Ba me yuun fabeli la, lan wan ana en se’em beere sa’am. Anna tɔɣɛ pa’alɛ eŋa n yuun eŋɛ sɛla ta’an tara bɔnsoŋa la a yire nɛreba la. A yeti, “mam ni keŋɛ ta kaɛ n yire nɛreba la mɛ ge basɛ ti ba baŋɛ mam n ni ita yelese’a. Mam me ni beem la n yire nɛreba, la n zɔdoma ti ba wa’an mam zɛ’an na. Bala basɛ ti mam yire nɛreba mina la n zɔdoma ge ti ba puurɛ me ni pee ti ba naɛ la ba sɔsa. Mam yire nɛreba zo’e zo’e yeti, ba nyɛ ti mam tari la pupeelum. Ba me ka fabeli ti sɛla wan eŋɛ mam.”

16. Yezu yuun eŋɛ la bem pa’alɛ ti a suɔ Yames yele pakɛ en mɛ? (Bisɛ tiŋanɔɔrɛ yelesum la.)

¹⁶ Basɛ ti ba baŋɛ ti ba yele pakɛ hɔ. Yezu n yuun isige kum poan la, a yuun keŋɛ la a suɔ Yames zɛ’an ta sɔsɛ la en. Bala pa’alɛ ti Yezu yuun boti la Yames baŋɛ ti a yele pakɛ en mɛ. (1 Ko. 15:7) Ti’isɛ bisɛ Yames puurɛ n yuun pee se’em la eŋa n yuun baŋɛ ti Yezu kelum ti’isa a yele me la? Yezu n yuun niɛ amea pa’alɛ Yames la, daanse’ere sankaŋa ti Yames yuun sakɛ ti Yezu n de Mɛzaaya la. Yezu n yuun sɔsɛ la Yames la, daanse’ere Yames me yuun sɔsɛ bo la a yire nɛreba ti ba sakɛ ti Yezu n de Mɛzaaya la.c—Tm. 1:14.

17. To wan ta’an dekɛ naresum yele la n boi Arom 12:15 tum tuuma la wani? (Bisɛ foote la.)

¹⁷ Kaalɛ Arom 12:15. To yire nɛreba san nyɛ yelesonɛ bii yeledaaŋɔ n paɛ ba, to ta’an eŋɛ pa’alɛ ti ba yele pakɛ tɔ. Bala wan soŋɛ ba ti ba tee bamam n ti’isɛ to yele se’em la.d Makerɛ, ba san dɔɣɛ bia ho ta’an dekɛ sɛla bo ba ti la pa’alɛ ti ho me puurɛ pee ya. To yire nɛra zɔ bii a nɛresɛka san ki, to ta’an tɔɣɛ bii gulesɛ sɛla buɣelɛ a suure bii to eŋɛ sɛla soŋɛ en. La me nari ti to nyɛta nɛŋa sɔsera la ba, yele yele wuu yele san paɛ ba.

18. To wan ta’an tɔɣesɛ Andrew la wani?

¹⁸ Basɛ ti ba baŋɛ mabiisi la. Andrew n yuun ta baŋɛ ti Yezu n de Mɛzaaya la, a yuun eŋɛ la kalam basɛ ti Peter baŋɛ Yezu. (Yon 1:​40-42) Tomam me wan ta’an basɛ ti to suurɔ la baŋɛ to mabiisi la? Makerɛ, to ta’an ni yibegɛ beem to yire nɛra ti a wa’an zamesegɔ na bii a naɛ la tomam la to mabiisi ti to zi’ire di. To san dekɛ en pa’alɛ to mabiisi, a wan baŋɛ ti Yehowa Sɛɛradoma dela nɛresondoma.

19. Hali to yire nɛreba san ka bɔkɛ sɛla n sɔi ti to ka ita yɛla ase’a, la nari ti to ita ba la wani? (1 Peter 3:15)

¹⁹ Kaalɛ 1 Pe. 3:15. To yire nɛreba ta’an kan bɔkɛ sɛla n sɔi ti to ita yɛla ase’a ge ba wan tɛ̃ra ton bo’ori gilema ge ita itisoŋɔ se’em la. La boi bim ti to kan naɛ la ba de’em de’eŋo se’a n ka nari ge ba puurɛ wan pee, to san nyɛta nɛŋa sɔsa la ba saŋa ase’a. Makerɛ, to ta’an keŋɛ ta bisɛ ba bii naɛ la ba di bii to dekɛ sɛla bo ba.

DA GƐ̃ HO YIREDOMA BASƐ

20. Beni n sɔi ti Yames yele la dɛna giilekpeŋere bɔ’ɔra tɔ?

²⁰ Pɔsega la, Yames yuun daɣɛ Yezu podɔla ge Yezu kum pooren ti a yuun dɛna Yezu podɔla. (Ga. 1:​18, 19; 2:9) Yames yuun nan ka pɔsɛ dɔla Yezu ge pooren a yuun nɔŋɛ Yezu pa’alegɔ la mɛ. Makerɛ, Naayinɛ yuun basɛ ti a gulesɛ la gɔŋɔ n tɔɣɛ yɛla zo’e zo’e ti la wɔ̃na la sɛla ti Yezu yuun pa’alɛ a zoore zuo yetɔɣum la poan.e

21. To yire nɛreba san ka pu’usa Yehowa, beni n sɔi ti la ka nara ti to gɛ̃ ba basɛ?

²¹ To ta’an ita som bɔ’ɔra to yire nɛreba bii fabela ba yele ge ba puurɛ ta’an kan pee la tɔ. Ba me ta’an puɣum ka bɔta ti ba zamesɛ baŋɛ Yehowa. Beni n sɔi ti la ka nara ti to gɛ̃ ba basɛ? Sɛla n sɔi la, to san ita som bɔ’ɔra to yire nɛreba, la pa’alɛ ti to tɔɣeseri la Yehowa la a Dayua Yezu. (Lu. 6:​33, 36) To san kelum ita pa’ala ti to nɔŋɛ ba, bala ta’an basɛ ti ba tee bamam n ti’isɛ to yele se’em la. La me ta’an basɛ ti ba tɛ̃ra ton tabelɛ tɔɣɛ Yehowa yele se’em bo ba. To san ka gɛ̃ to yire nɛreba la basɛ, bala ta’an basɛ ti ba kɔ’ɛ ba puti’irɛ ti ba pu’usɛ Yehowa. Bala me wan basɛ ti to puurɛ pee!