Tiregɛ La Ho Muse Ko’om

1. (a) To san muse ko’om to wan nyɛ la bem nyuurɔ? (b) To wan sɔsɛ la bem zaseŋɔ wa poan?

HON kã homea bo Yehowa ge muse ko’om? La san dɛna bala, la pa’alɛ ti ho zusɛ la Naayinɛ ti a basɛ ti ho tara putɛ̃keeŋa n ani fa’a. (1 Pe. 3:21) Ho san muse ko’om, la dela makesonɛ bɔ’ɔra sɛba n nan ka muse ko’om ya tansugere la poan la. Ho me san muse ko’om, ho loe la loesonɛ! Ge ho san nan ka muse ko’om? Nɔkpe’ene kai ti ho nɔŋɛ Yehowa ge me bɔta ti ho tum eŋa n boti sɛla. Ho mi ti ho san muse ko’om Yehowa wan di ho yelebe’ero sugeri bo ho ge ti ho me tara bɔnsoŋa la en. (Tm. 2:​38-40) Ge ho ta’an kelum gu’una ti ho muse ko’om. Bem n wan soŋɛ hɔ? Zaseŋɔ wa poan, to wan zamesɛ baŋɛ (1) sɛla n sɔi ti basɛba gu’una ti ba muse ko’om, (2) sɛla n sɔi ti la ana soŋa ti ho tɛ̃ra ba’asegɔ daarɛ la yele, la (3) hon wan nyɛ nyuurɔ se’em ho san tiregera ti ho muse ko’om ge ka gu’una.

BENI N SƆI TI BASƐBA GU’UNA TI BA MUSE KO’OM?

2. Beni n sɔi ti basɛba gu’una ti ba muse ko’om?

² Dabeem zuo, ti basɛba gu’una ti ba muse ko’om. La boi bim ti, ba boti ba pu’usɛ Yehowa ge dabeem n tari ba ti, ba kan nyaŋɛ pu’usɛ en soŋa. Ho san ti’isa bala, kaalɛ Baabule zɛse’esi n wan basɛ ti ho tara suure lua ti Yehowa ka eeri ti ho ana kasi ge nyaa ta’an pu’usa en. Ge a puurɛ wan pee, ho san pu’usa en la ho suure za’a. (Ym. 103:​13, 14; Kol. 3:23) Dabeem san tara hɔ ti ho san muse ko’om nɛreba wan yaɛ hɔ, zusɛ Yehowa ti a soŋɛ hɔ ti ho tara sukpe’ene wuu Yuumadaana la. Yuumadaana la yuun yeti: “Na’ayenɛ boe la mam mɛ, mam kan zɔta dabeem. Asaala ete mam la bene?”—Ym. 118:6.

3. Basɛba ti’isɛ la bem ka bɔta ti ba muse ko’om? (Bisɛ foote.)

³ Basɛba gu’uni mɛ ti ba muse ko’om sɛla n sɔi la ba ti’isɛ ti ba ka ba’ɛ mina Baabule la soŋa. Ge la nari ti ho mina sɛla woo ge nyaa muse ko’om? Geele yele wa n eŋɛ Baabule la poan bisɛ. Ba yuun nyɔkɛ la tuntuna Paul la Silas paɣɛ ti Yehowa yuun basɛ ti sarega la miim. Bala yuun basɛ ti ba nyɛ la yɔ’ɔ tɔɣɛ Naayinɛ yɛla bo se’em n biseri sarega la, la a yidoma. Buraa la, la a yidoma la yuun bɔkɛ ti la dela Naayinɛ n basɛ ti sarega la miim. Tuntuna Paul la Silas me yuun pa’alɛ ba la yɛla zo’e zo’e dadendaarɛ. Bala zuo la, ba yuun ‘ka gu’um ge muse ko’om.’ (Tm. 16:​25-33) Ho wan ta’an muse ko’om, ho san zamesɛ baŋɛ Yehowa ge nɔŋɛ en la ho suure za’a, mina Baabule yelekpina la, basɛ ho be’em ge lu ho suure ti ho wan dɔla a pa’alegɔ la.—Mr. 12:30.

4. Basɛba ti’iseri la bem ti la gu’ura ba ti ba ka bɔta ti ba muse ko’om? (Bisɛ foote la.)

⁴ Basɛba boti ba eŋɛ sɛla n wan pee Naayinɛ puurɛ ta’an muse ko’om ge ba ti’isɛ ti la kpe’em mɛ bo ba. La ani soŋa ti ho ti’isa hon wan kɔ’ɛ ho puti’irɛ ti la ana ho se’em beere sa’am. (Lu. 14:​27-30) Basɛba me ni ti’isa la ba wan dekɛ yelese’a basɛ ge pu’usa Naayinɛ. Geele Candace yele la bisɛ. Eŋa n yuun de bia la, ba yuun pa’alɛ en la Yehowa yɛla ge a yuun ka dekɛ tum tuuma. A yeti: “Mam yuun mi sɛla n nari ti n ita ti Yehowa puurɛ pee ge mam yuun nɔŋɛ la tingɔŋɔ wa zuo yɛla. Mam yuun ti’isɛ ti la wan kpe’em bo mam ti n basɛ yele aŋa.” Basɛba me ti’isɛ ti ba san muse ko’om, la ta’an kpe’em bo ba ti ba tara sarum soŋɔ. Ti sɛba me fabela ti ba san muse ko’om ge ta tum be’em ba wan yese ba tansugere la poan. Yele aŋa san gu’ura ho ti ho ka bɔta ti ho muse ko’om, ho wan eŋɛ la wani?

5. To san gu’una ti to muse ko’om, bem yele n nari ti to tɛ̃ra? (Matu 13:​44-46)

⁵ To san bɔta ti to da lɔkɔ, to ni ka bisɛ la lɔkɔ la laɣehɔ n zuni se’em yele ma’a ge to me ni bisɛ la lɔkɔ la n tari tuulum se’em. Lɔkɔ la san puɣum eŋɛ laɣehɔ ge ti to mina ti to wan nyɛ nyuurɔ lɔkɔ la poan, to wan da ku. Bala mea, ho san bɔta ti ho muse ko’om da ti’isa la wan kpe’em bo ho ti ho eŋɛ teere se’a ma’a yele ge tuɣum ti’isa nyuurɔ se’a ti ho wan nyɛ. Yezu yuun dekɛ la maɣesa ayi pa’alɛ yele wa soŋa. (Kaalɛ Matu 13:​44-46.) Yezu maɣesa la poan, a pa’alɛ ti buraasi la ka gu’um ti ba koose sɛla woo ti ba tara ta’an da tuulum lɔkɔ ti ba nyɛ la. Yelese’a ti ho zamesɛ Baabule la poan la dela tuulum lɔkɔ ti ho nyɛ. Bala la, ho san gu’una ti ho eŋɛ teere ta’an muse ko’om, ti’isɛ Yezu maɣesa wa yele soŋa. Ho ta’an soke homea yeti: ‘Mam sirum sakɛ ti yelemɛŋɛrɛ la ti n nyɛ Baabule la poan la dela tuulum bo mam? Mam bisɛ ti mam la Yehowa zɔtɔ nyɔka la, la beere sa’am puti’irɛ la, la mabinɔɔrɛ la dela tuulum bo mam?’ Hon wan lebese soke ana wa se’em la ta’an soŋɛ hɔ ti ho baŋɛ sɛla n nari ti ho eŋɛ ge ta’an kɔ’ɛ ho puti’irɛ muse ko’om.

6. Bem n wan soŋɛ tɔ ti to ta’an tara sɛla ti to zamesa la tuna tuuma?

⁶ Yezu yuun bo la makerɛ pa’alɛ kaara n yese ta burɛ bumbuura. Yezu yuun pa’alɛ ti nɛreba basɛba wan wum yelesoma la ge kan dekɛ tum tuuma. Ge Yezu yuun pa’alɛ ti basɛba wan wum yelesoma la ge “gorɛ dɛ kaŋkaŋɛ ba sunya poan.” (Lu. 8:​5-15) Ho san ti’isa ti la kpe’em bo ho mɛ ti ho dekɛ sɛla ti ho zamesa la tuna tuuma, da gɛ̃ basɛ. Naayinɛ wan soŋɛ hɔ ti ho giila kpeŋe ti ho bɔta ti ho dɔla a pa’alegɔ la. Zusɛ Yehowa ti a soŋɛ hɔ ti ho nɔŋɛ sɛla ti ho zamesa la ge ta’an tara tuna tuuma.—Eze. 18:31; 36:26.

7-8. Beni n sɔi ti bunbilipaalesi basɛba ka ta’an muse ko’om? (Bisɛ foote la.)

⁷ Bunbilipaalesi basɛba nɔŋɛ Yehowa mɛ ge ba ka nyɛ nɛŋa tɔlega ta muse ko’om nɛreba basɛba pã’asegɔ zuo. Makerɛ, sukuu poan tikiyadoma basɛba ta’an pa’ala sukuu kɔma ti ba ‘ita yelese’a’ ti Yehowa ka bɔta. Ge pa’alegɔ aŋa wa ta’an basɛ ti yele paɛ kɔma la. (Ym. 1:​1, 2; Mag 7:​1-5) Ho wan ta’an gu homea yele ana poan, ho san tɔɣesa yuumadaana la. A yuun yele Yehowa yeti: “Mam bɔkere yɛla gana n pa’aleba mɛ, mam tɛn’ɛhere ho kan’aŋɔ la poan la zuo.”—Ym. 119:99.

⁸ La ani wuu mabiisi basɛba iti la yɛla ase’a n basɛ ti la kpe’em bo ba kɔma ti ba muse ko’om. Daanse’ere, dɔɣereba la puti’irɛ kɔ’ɔn bɔna la ba kɔma la sukuu kenɛ poan bii ba ka ta’an soŋɛ ba kɔma la ti ba loe vo’osum poan tuuma. Hon bisɛ ti ho dɔɣereba wan ta’an eŋɛ sɛla soŋɛ hɔ ti ho maasum homea ta muse ko’om? La san dɛna bala, ho ta’an tɔɣɛ de yele bo ba. La ka pakɛ la ho yuuma n zuni se’em, ho wan ta’an tiregɛ tara bɔnsoŋa la Yehowa.—Mag. 20:11.

9. Beni n sɔi ti basɛba ta’an gu’una ti ba muse ko’om?

⁹ Basɛba wan ta’an muse ko’om ge gu’una sɛla n sɔi la, daanse’ere ba guri la ba tadaana ti ba laɣum muse ko’om. Makerɛ, ba ta’an bɔta ti bamam la ba zɔ bii ba yire nɛra laɣum muse ko’om daayinɛ. Daaŋɔ ka boi bim, ho san bɔta ti hon la nɛra laɣum muse ko’om daayinɛ ge la nari ti ho basɛ ti bala gu’ura ho ti ho kan muse ko’om nananawa? Tɛ̃ra ti la dela hon n wan kã homea bo Naayinɛ. La ka nari ti ho gura nɛra ti ya laɣum muse ko’om.—Arom 14:12.

BENI N SƆI TI LA NARA TI TO TƐ̃RA BA’ASEGƆ DABESERƐ LA YELE?

10. Beni n sɔi ti basɛba gu’una ti ba eŋɛ teere ta’an muse ko’om?

¹⁰ Leyɛ’ɛsa, basɛba gu’uni mɛ ti ba muse ko’om sɛla n sɔi la, ba ti’isɛ ti ba’asegɔ dabeserɛ la nan ka pɔ̃ri. Ge ban ti’iseri se’em wa ani soŋa? Yezu yuun ka’am a podɔleba la yeti: “Ya maahom gura soŋa soŋa. Te Asaala Dayɔa ye la danse’ere daarɛ te ya ka tara potɛn’ɛra te n wan wa’ana.”—Lu. 12:40.

11. Wuu Yooma 119:60 n pa’alɛ se’em la, to san zamesɛ baŋɛ Yehowa soŋa, to wan eŋɛ la bem?

¹¹ Ton nɔŋɛ Yehowa la zuo ti to bɔta ti to kã tomea bo en ge muse ko’om. To san zamesɛ baŋɛ Naayinɛ soŋa, bala wan basɛ ti to nana a nɔya la ge me ni eŋɛ kalam dekɛ sɛla ti a pa’ala to la tuna tuuma. (Kaalɛ Yooma 119:60.) Yezu podɔla Yames yuun le pa’alɛ la sɛla n sɔi ti la yele pakɛ ti to ni eŋɛ kalam doose Yehowa pa’alegɔ la. A yuun yeti, to se’em sa’am ka mi sɛla n wan eŋɛ beere. Bala la, nananawa n nari ti to dekɛ sɛla ti to mina la tum tuuma. Daanse’ere, to beere kan bɔna ti to eŋɛ “sɛla n nare.”—Yam. 4:​13-17.

12. Yezu va’am tuuma makerɛ la pa’alɛ to la bem?

¹² Ti’isɛ bisɛ Yezu va’am tuuma makerɛ la. Yezu yuun pa’alɛ ti basɛba tum la awa ayina ma’a ge ti ba yɔɔrɛ kelum zuna la sɛba n tum dabeserɛ la za’a. Ge sɛba n tum awa ayina la pa’alɛ sɛla n sɔi ti ba ka pɔsɛ tuuma la kalam. Ba yeti: “Nɛra . . . ka yi to.” La daɣɛ ti ba ka boti la tuuma ge nɛra n ka yi ba. Ge ban daa yi ba la, ba daa eŋɛ la kalam keŋɛ ta naɛ la tuntuneba la tuna. (Mt. 20:​1-16) Zina beere wa, Yezu me yi to mɛ ti to dɛna a podɔleba ge me laɣum mɔɔla Na’am yelesoma la. Bala la, to san baŋɛ Yezu n boti to eŋɛ sɛla la, la nari ti to eŋɛ kalam tum dɛ.

13. To wan ta’an zamesɛ la bem Lot pɔɣa yele la poan?

¹³ Basɛba ta’an gu’una ti ba eŋɛ teere pu’usɛ Yehowa sɛla n sɔi la ba ti’isɛ ti ba wan ta eŋɛ teere pooren ge ti ba’asegɔ dabeserɛ la nyaa paɛ. Ge ho san gu’una, la wan kpe’em bo ho ti ho eŋɛ teere ta’an pu’usɛ Yehowa. Yezu yuun mi ti nɛreba ta’an eŋɛ bala, bala n sɔi ti a yuun kaɣɛ a podɔleba yeti: “Tɛnra ya sɛla n yuun eŋɛ Lot pɔga la.” (Lu. 17:​31-35) Lot pɔɣa la yuun mi ti la kan yue Naayinɛ wan sa’am Sodom la Gomora tisi la ge a suure yuun kelum bɔna la lɔɣɔse’a ti a basɛ la poan. (Pin. 19:​23-26) Lot pɔɣa yele la basɛ ti to baŋɛ ti Yehowa bo la saŋa, la wan eŋɛ se’em ti nɛreba ta’an eŋɛ teere ge pu’usɛ en ge a saŋa la tari la tɛka. Naayinɛ saŋa la san paɛ, nɛra kan ta’an le nyɛ yɔ’ɔ eŋɛ teere sɛla n sɔi la, la deŋɛ tole mɛ.—Lu. 13:​24, 25.

14. Baabule yetɔɣebiŋ’a n pa’alɛ ba’asegɔ dabesa la se’em la nari ti la basɛ ti ho eŋɛ la bem?

¹⁴ Yelese’a n iti dabeserɛ woo poan la pa’alɛ ti Baabule yetɔɣebiŋ’a sirum tuni la tuuma ba’asegɔ dabesa wa poan. Hali yele aŋa san ka paɛ hɔ, hon nyɛti yɛla wa n iti zɛ’an woo la pa’alɛ ti la nari ti ho eŋɛ kalam eŋɛ teere ta’an muse ko’om. Geele tuntuna Peter n yuun yele Kristakɔma sɛla. A yuun yeti ba “maahom [ba] mɛhe,” sɛla n sɔi la “sɛla woo pɔnre ba’ahegɔ mɛ n bala.” (1 Pe. 4:7.) Sankaŋa la, “ba’ahegɔ” la yuun ta’an dɛna la Yerusalem tiŋa la n wan nyɛ sa’aŋɔ la. Peter n yuun gulesɛ bo Kristakɔma sɛba la, yuun ka kɛ̃’ɛri Yerusalem. Bala la, sa’aŋɔ la yuun kan paɛ ba. (1 Pe. 1:1) Ge ban nyɛ yetɔɣebiŋere wa n tum tuuma la, la basɛ ti ba tara suure lua ti yetɔɣebiŋ’a se’a n gee la wan tum. Bala mea, ho san nyɛta yetɔɣebiŋ’a n tuni tuuma se’em ba’asegɔ dabesa wa poan la, la wan basɛ ti ho bɔta ti ho eŋɛ sɛla n nari ta’an muse ko’om.

15. To wan eŋɛ la wani ta’an maasum gura Yehowa dabeserɛ la? (2 Peter 3:​10-13)

¹⁵ Peter n yuun gulesɛ gɔnseko n pa’asɛ buyi la, a yuun tɔɣɛ pa’alɛ to wan eŋɛ se’em ta’an maasum gura Yehowa dabeserɛ la ti a wan ta sa’am tingɔŋɔ wa la. Se’em ma’a ti Peter yuun gulesɛ gɔŋɔ la bo Kristakɔma la, ti dabeserɛ la kelum zaɛ mɛ. Ge a yuun yele ba yeti ‘ba maasum gura Yenɛ dabaherɛ’ la. (Kaalɛ 2 Peter 3:​10-13.) To san maasum gura Yehowa dabeserɛ la, bala pa’alɛ ti to mi ti la kan yue dabeserɛ la wan paɛ. To me san tiregɛ tara ‘sarum soŋɔ la yelemɛŋɛrɛ pu’usa Naayinɛ,’ la pa’alɛ ti to maasum ya. Yehowa puurɛ me wan pee, ho san kã homea bo en ge muse ko’om.

HO SAN MUSE KO’OM NANANAWA HO WAN NYƐ NYUURƆ

16. Sankani n nari ti to tiregɛ muse ko’om? (2 Korint 6:​1, 2) (Bisɛ fɔɔra la.)

¹⁶ Nananawa n nari ti to tiregɛ muse ko’om. (Kaalɛ 2 Korint 6:​1, 2.) Etiopia buraa la ti Filip yuun seke en la, yuun baŋɛ ti la nari ti a muse ko’om kalam. Eŋa n yuun bɔkɛ yelesoma la ge me nyɛ yɔ’ɔ ti a muse ko’om la, a yuun ka yeti: ‘eŋa wan bɔta ti a zamesɛ yɛla pa’asɛ ge nyaa muse ko’om. A me yuun ka yeti, ko’om busebo ta’an bɔna nɛŋa sa ti n san ta paɛ bilam ti n muse.’ Ge a soke Filip yeti, “Sore boe bo mam te n to’e ko’om soa?” (Tm. 8:​26, 27, 35-39) Bisɛ eŋa n eŋɛ makesonɛ se’em! Etiopia buraa la n yuun muse ko’om ba’asɛ la, a yuun boi la sore zuo “kena la popeelom.”

17. To tari suure lua la bem poan?

¹⁷ Ho san gu’una ti ho muse ko’om, tara suure lua ti Yehowa kɔ’ɔn maasum mɛ ti a soŋɛ hɔ ti ho ta’an tara bɔnsoŋa la en. (Arom 2:4) Dabeem san tara hɔ ti ho muse ko’om bii ho bisɛ ti la kpe’em mɛ ti ho eŋɛ bala bii la ani wuu nɛreba ka soŋeri hɔ ti ho ta’an muse ko’om, tɛ̃ra ti Yehowa wan soŋɛ hɔ. Ho san muse ko’om, la wan basɛ ti ho tara pupeelum la hon pu’useri Yehowa la. Daanse’ere, ho kan le tɛ̃ra yelese’a ti ho basɛ “pooren” la. (Flp. 3:​8, 13) Ge ho wan bisa la “sɛla n boe . . .nɛŋa” la. Bala dela hon wan ti’isa Yehowa n pu’ulum biŋe ti a eŋɛ sɛla bo sɛba n kã bamea bo en ge muse ko’om la.—Tm. 3:19.