May

Se’em ma’a ti Yehowa yuun faaɛ Israeldoma la ti ba ka le dɛna yamesi bɔna Egypt tiŋa la, a yuun loe la malemadoma ti ba tuna suɣerɛ la poan. A yuun basɛ ti Levidoma n tuna zilam suɣerɛ la poan. Yehowa yuun biseri sɛba n tuni suɣerɛ la poan, la sɛba n yuun kɛ̃’ɛri lɛm suɣerɛ la gana sɛba n gee la mɛ? Aayi! Yehowa ka gaseri nɛreba. Sɛba woo n yuun boi tiiseŋɔ la poan la yuun laɣum tara la yɔ’ɔ ti ba dɛna Yehowa zɔdoma. Makerɛ, Yehowa yuun basɛ ti Israel nɛreba la za’a ta’an nyɛta sangbanɛ la, la bugum la n yuun ni yula suɣerɛ la zuin la. (Yɛh. 40:38) Sangbanɛ la yuun san pɔsɛ kena, hali sɛba n yuun ka kɛ̃’ɛri lɛm suɣerɛ la yuun ni nyɛ mɛ nyaa pɔsɛ vaara ba lɔɣɔrɔ. Ba yuun ni fukɛ la ba tɛntidoma ge ti ba za’a naɛ taaba dɔla sangbanɛ la. (Kan. 9:15-23) Bala mea, la ka pakɛ la ton boi zɛsɛka tingɔŋɔ wa zuo, Yehowa nɔŋɛ to mɛ ge wan bisa tɔ ge me tɛ’ɛla tɔ. w24.06 4 ¶10-12

David vom yuun boi la dɛŋa poan. David dayɔa Absalom yuun boti a ku en mɛ ge tee dɛna naba. (2 Sa. 15:12, 13) La yuun nari ti David basɛ Yerusalem kalam! A yamesi la n yuun keni la, David yuun bisɛ ti la nari ti nɛra yee Yerusalem ta’an baŋɛ Absalom n iti sɛla ge ni bo en lasebaarɛ. Bala la, David yuun tum la Zadok la malemadoma basɛba ti ba lebe tiŋa la poan ta bisera sɛla n iti ge ni bo en lasebaarɛ. (2 Sa. 15:27-29) La yuun nari ti ba bisera bamesi soŋa paa. David yuun yele la a zɔ Husai la Zadok ti ba eŋɛ sɛla ta’an soŋɛ en. (2 Sa. 15:32-37) Husai yuun nari ti a parum eŋɛ wuu a pa la Absalom poore ge ta’an pa’alɛ Absalom sansɛka n nari ti a zabɛ. Husai n yuun eŋɛ bala la, yuun bo David yɔ’ɔ mɛ ti a ta’an nyɛ saŋa maasum amea soŋa. Absalom n yuun kelese Husai ka’aŋɔ la, Husai yuun yele Zadok la Abiatar sɛla n eŋɛ la mɛ. (2 Sa. 17:8-16) Zadok la Abiatar me yuun yele David, Absalom n maasum ti a eŋɛ sɛla. Bala n yuun te’ele David ti daaŋɔ ka paɛ en.—2 Sa. 17:21, 22. w24.07 4-5 ¶9-10

La kelum daana Yehowa yamesi basɛba mɛ la be’em sebo ti ba eŋɛ ti la tole la. Ge la nari ti to tɛ̃ra ti, la dela Yehowa n nɔŋɛ to la zuo ti a dekɛ lua bunɔ la bo to. Nɔkpe’ene kai ti a boti la to nyɛ nyuurɔ lua bunɔ la poan. Yehowa yeti, to san nyaŋɛ ‘maalɛ’ yelese’a n boi tomam la eŋa tiŋasuka la, a me wan di sugeri bo to. To puurɛ pee mɛ la Yehowa n ni di sugeri bo to la! A me kan malum tamɛ yelesoma se’a ti to eŋɛ la. (Ym. 103:9, 12; Heb. 6:10) Ho san tum la be’em kurum ti la kelum daana hɔ, ti’isa yelese’a ti ho ta’an ita nananawa, la hon wan ta eŋɛ sɛla beere sa’am. Ho kan ta’an tee yelese’a ti ho eŋɛ ti la tole la. Ge nananawa, ho ta’an pɛ̃ɣera Yehowa ge ita sɛla n wan basɛ ti a puurɛ pee. Ho me ta’an ti’isa yelese’a ti a biŋe nɔɔrɛ ti a wan eŋɛ bo ho la yele. w24.10 8 ¶8-9

Ho san kaala Baabule la ge baŋɛ ti la nari ti ho eŋɛ teere zo’e zo’e, bala ta’an basɛ ti ho giila kɔ’ɔsɛ. Makerɛ: Ho kaalɛ la Baabule la zina ti la ka’am hɔ ti ho da wɛlesa. (Yam. 2:1-8) Ti ho nyaa baŋɛ ti la nari ti ho eŋɛ teere la hon geele nɛreba se’em la. Yimbeere ti ho le kaalɛ zɛ’an kayima ti la pa’alɛ hɔ, hon nari ti ho bisera ho yetɔɣum se’em. (Yam. 3:1-12) Ho baŋɛ ti saŋa ase’a ho yetɔɣum ni ka kpɛmesa giila. Ti ho nyaa kɔ’ɛ ho puti’irɛ ti ho wan basɛ ti ho yetɔɣum kpɛmesa giila. Daarɛ deyima ti ho kaalɛ Baabule la ti la ka’am hɔ ti la ka nari ti ho nɔŋɛ tingɔŋɔ wa yɛla. (Yam. 4:4-12) Ho nyaa baŋɛ ti la nari ti ho bisɛ homea soŋa la hon loore de’eŋo seto. Ta paɛ kalam, ho ta’an ti’isa ti la kpe’em mɛ ti ho dekɛ yele ana za’a tum tuuma. Da basɛ ti ho giila kɔ’ɔsɛ. Tɛ̃ra ti, hon wan dekɛ halɛ paalega la yɛ la daɣɛ daanyinɛ tuunɛ. w24.09 5-6 ¶11-12

Yezu yuun mi ti Yehowa nyɛti ban iti en sɛla la mɛ. A yuun sakɛ ti Yehowa wan maalɛ yele ana sansɛka n nari poan. Nɛra san eŋɛ to sɛla n ka ani soŋa, to wan tɔɣesa Yezu ge me bisɛ tomea soŋa to yetɔɣum poan. Yɛla ase’a daɣɛ yelekãra. Bala la, to ta’an tamɛ de yele bii to sina, lan wan eŋɛ se’em ti to kan tɔɣɛ sɛla n wan basɛ ti yele la gaam be’ero. (Pa. 3:7; Yam. 1:19, 20) Saŋa ase’a, la ta’an nara ti to tɔɣɛ po’e nɛra ti ba eŋɛ en sɛla n ka ani soŋa bii to tɔɣɛ po’e to sakerɛ yɛla. (Tm. 6:1, 2) Bala la, to san tɔɣera, la nari ti to tiregɛ tɔɣera mama sore poan ti gilema me bɔna bim. To me ta’an tɔɣesa Yezu ge dekɛ tomea delum Naayinɛ n de “tontɔɔ gankera la.—1 Pet. 2:23. w24.11 5-6 ¶10-12

Mabia san basɛ a be’em, la ni dɛna la pupeelum! (Lu. 15:7) To ni pɛ̃ɣɛ la ani? Keendoma la? Tɛ̃ra ti tuntuna Paul yuun tɔɣɛ sɛba n tum be’em la yele ti: “Daanse’ere [Naayinɛ] wan bahɛ te ba tee.” (2 Tim. 2:25) Ba san tee ba puti’irɛ bii basɛ ba halɛ la, to ni ka pɛ̃ɣɛ nɛresɛka n ka’am ba la ge to ni pɛ̃ɣɛ la Yehowa n soŋɛ mabiisi wa ti ba ta’an tee la. Paul nyaa pa’alɛ ti mabia san basɛ a be’em, nyuurɔ zo’e zo’e boi bim mɛ. La ni soŋɛ se’em n tum be’em la ti a baŋɛ yelemɛŋɛrɛ la soŋa soŋa, nyɔɣɛ yɛm ge me soŋɛ en ti a ta’an pĩɛ Sitaana bɛ̃tɔ la poan.—2 Tim. 2:26. Mabia san basɛ a be’em, keendoma la wan maasum kena kaara en ge soŋera en, lan wan eŋɛ se’em ti a ta’an zaɣesɛ Sitaana bɛ̃tɔ la ge tiresum ze’ele soŋa.—Heb. 12:12, 13. w24.08 23 ¶14-15

Nɛrekuuŋɔ la ti Yezu yuun bo ba dia la yuun eŋɛ pa’alɛ ti ba puti’irɛ kɔ’ɔn bɔna la dia ma’a poan. Sore kani poan? Beere n yilegɛ la, ba yuun nyɛ ti Yezu la a tuntuneba la keŋɛ mɛ. Ɔɔrenɔ basɛba n yuun ze’ele Tiberias wa’ana, bala zuo la nɛrekuuŋɔ la yuun zom mɛ ye’a Kapernaum ti ba ta ɛ Yezu. (Yon 6:22-24) Ban yuun boti ba wum Na’am la yɛla la n sɔi ti ba ɛɛra Yezu? Aayi. Ba yuun kɔ’ɔn ti’isa la dia yele. To eŋɛ la wani baŋɛ bala? Bisɛ sɛla n yuun eŋɛ, se’em ma’a ti nɛrekuuŋɔ la yuun nyɛ Yezu Kapernaum bɔba la. Yezu yuun kɔ’ɔn yele ba mɛ vɛki ti, ‘la dela dia zuo ti ya ɛɛra mam.’ La boi bim ti ba yuun “di dia la ge nyɛ sɛla woo te [ba] bɔta” ge Yezu yuun yele ba ti disɛka ti ba di la dela ‘dia n sa’ani.’ A yuun yele ba ti ba tuɣum ɛɛra disɛka n bo’ori “vom sebo n ka tare ba’ahegɔ.” (Yon 6:26, 27) Yezu yuun yeti a Sɔ la wan bo ba dikaŋa taaba. w24.12 5 ¶8-9

Ho san bɔta ti ho pa’ala soŋa soŋa, hon pa’ali bii ka’ana nɛreba sɛla la nari ti la ze’ele Baabule la poan. Zamesa Baabule la, la tansugere gɔnɔ soŋa soŋa. (Mag. 15:28) Ho san zamesa, ni bisa to tansugere gɔnɔ la n pa’alɛ Baabule kaalegɔ zɛ’ɛsi la vuurɛ se’em, lan wan eŋɛ se’em ti ho mina hon wan dekɛ a tum tuuma se’em. Ho san pa’ala nɛreba, ni tiregɛ ti ho kpemese ba giila ti yele la ta’an kɛ̃ ba suure. Ho san bɔta ti ho pa’ala soŋa soŋa, ni soke keendoma sɛba n mi pa’alegɔ ti ba soŋɛ hɔ. (1 Tim. 5:17) Keendoma nari ti ba ta’an kpemese ba mabiisi giila. Ge saŋa ase’a, keendoma nari ti ba kaɛ ba mabiisi la bii ba soŋɛ ba ti ba baŋɛ sɛla ti ba tue. Lan yeen dɛna se’em, la nari ti keendoma tɔɣera la gilema. Ho san dɛna nɛra n ani mama, tara nɔŋerɛ ge basɛ ti ho pa’alegɔ ze’ele Baabule la poan, ho wan ta’an pa’ala soŋa soŋa. Ho san ita bala, la pa’ali ti ho tɔɣeseri la Yezu n de Pa’alegɔ Kãtɛdaana la.—Mt. 11:28-30; 2 Tim. 2:24. w24.11 24 ¶16

Ton tɔɣeri a yele se’em la n wan pa’alɛ ti to pɛ̃ɣeri en. Yehowa beem a nɛreba ti “yoon ya bo Na’ayenɛ” ge “pɛngera a yu’urɛ la.” “Mɔɔlɛ ya a faanrɛ la yele beere n yelegere woo” ge me “mɔɔlɛ ya a soŋa la bo teŋhe woo.” (Ps. 96:1-3) Yele ana wa za’a dela sarɔtɔ ase’a ti to wan ta’an doose pɛ̃ɣera to saazuo Sɔ la. (Tm. 4:29) To wan le ta’an dekɛ to nutatum pɛ̃ɣɛ Yehowa. Yehowa nɛreba na’aseri en mɛ sarɔkuna wa poan. (Mag. 3:9) Makerɛ, Israeldoma la yuun laɣum dekɛ la ligeri soŋɛ ti ba mɛ ge me maala pu’usegɔ yire la. (2 Na. 12:4, 5; 1 Yel. 29:3-9) Yezu podɔleba yuun soŋɛ Yezu la a tuntuneba la mɛ ti ba tara “sɛla te ba nara te ba tara.” (Lu. 8:1-3) Yuun kɔbesɛka n deŋɛ nɛŋa Kristakɔma la yuun laɣesɛ la lɔɣɔrɔ soŋɛ ba mabiisi. (Tm. 11:27-29) Zina beere wa, tomam me san yese to suuren bɔ’ɔra bo’olum, to pɛ̃ɣeri la Yehowa. w25.01 4 ¶8; 5 ¶11

Bem n yuun soŋɛ Kornelius ti a ta’an muse ko’om? Baabule la yeti “enŋa la a yire nɛreba woo dole Yenɛ” mɛ. Kornelius me yuun kɔ’ɔn zusera la Naayinɛ saŋa woo. (Tm. 10:2) Peter n yuun mɔɔlɛ yelesoma la bo Kornelius, la a yidoma la, ba yuun sakɛ bo Krista mɛ ge ka gu’um ti ba muse ko’om. (Tm. 10:47, 48) Kornelius yuun kɔ’ɔn maasum mɛ ti a eŋɛ teere a vom poan ta’an naɛ la a yidoma la pu’usa Yehowa. (Yos. 24:15; Tm. 10:24, 33) Kornelius yuun dela nɛrezure wuu Saul la. Bala yuun ta’an gu en ti a kan dɛna Kristabia. Ge a yuun ka basɛ ti sɛla gu en. La wan nara ti ho eŋɛ teere ho vom poan ta’an muse ko’om? La san dɛna bala, Yehowa wan soŋɛ hɔ. Ho san lu ho suure ti ho tara Baabule naresum yɛla tuna tuuma, Yehowa wan kã bo ho. w25.03 5 ¶12-13

Ho san wum ti nɛreba parena yɛla bɔ’ɔra Naayinɛ tigere la bii mabiisi la n biseri tigere la, tɛ̃ra Naayinɛ dindoma n yuun eŋɛ Yezu, la yuun kɔbesɛka n deŋɛ nɛŋa podɔleba la se’em. Wuu Baabule la n yele se’em la, zina beere wa, ba kɔ’ɔn parena ge me mɛlesa Yehowa nɛreba mɛ paa. (Mt. 5:11, 12) To san mina se’em n basɛ ti nɛreba parena yɛla bɔ’ɔra tɔ ge kɔ’ɔn zaɣesɛ ba pumpɔreŋɔ la, to kan buregɛ. La nari ti to eŋɛ la bem? Zaɣesɛ pumpɔreŋɔ yɛla. Tuuntuna Paul yuun pa’alɛ tɔ ton wan eŋɛ se’em to san wum pumpɔreŋɔ yɛla. A yuun yele Timoti ti a yele ba ti ba ‘da kɛlesa sɔlema yɛla’ ge me ‘zaɣesɛ yetɔɣeyooro.’ (1 Tim. 1:3, 4) Ton mi pumpɔreŋɔ yɛla n ze’ele zɛ’an na la zuo, to zaɣesɛ a mɛ. To kɔ’ɔn gurɛ la ‘yelemɛŋɛrɛ yɛla la.’—2 Tim. 1:13. w24.04 11 ¶16; 13 ¶17

Kɔ’ɔn ana tapilapi la sɛba n tari yelemɛŋɛrɛ bɔ’ɔra Yehowa la. Naayinɛ boti la to tara nɔyinɛ pu’usa en. To san gurɛ yelemɛŋɛrɛ la kankaŋi, to wan tara nɔyinɛ. Nɛra san tɔɣera sɛla n ka makɛ la yelemɛŋɛrɛ la, la ni tara la yelesego kena tansugere la poan. Bala la, Naayinɛ ka’am tɔ ti to ‘da dekɛ tomea laɣum la ba,’ se’ere n sɔi la bala ta’an basɛ ti to buregɛ yelemɛŋɛrɛ la poan. (Arom 16:17)To san baŋɛ yelemɛŋɛrɛ la ge kɔ’ɔn gurɛ de kankaŋi, to wan tara bɔnsoŋa la Yehowa ge ti to sakerɛ me kpe’em. (Ep. 4:15, 16) To kan basɛ ti Sitaana pumpɔreŋɔ yɛla la pã’asɛ tɔ. To me wan ana du’a du’a la Yehowa, mɛlesekãtɛ la saŋa poan. Kɔ’ɔn gurɛ yelemɛŋɛrɛ la kankaŋi ‘ge suma’asum Naayinɛ la wan bɔna la hɔ.’—Flp. 4:8, 9. w24.07 13 ¶16-17

Yezu yuun wa’ana ti a soŋɛ la nɛresɛba suure n sa’am, la ban tuni be’em la. A yuun yele ba ti ba dɛna a podɔleba. A yuun mi ti la dela be’em zuo ti nɛresaaleba namesa. Bala la, a yuun soŋeri la nɛresɛba n nameseri ba be’em la zuo la. A yuun bo la makerɛ ge yeti: “Nɛresɛba n ka bɛn’ɛre, ka sontii ba nyɛ tebedoma ge sɛba n bɛn’ɛnre ma’an n sontii ba nyɛ tebedoma.” A yuun le yeti: “La dagɛ tontɔɔ nɛreba te mam wa’ana te n yi la ge be’emdoma.” (Mt. 9:12, 13) Yezu yuun eŋɛ la bala. Se’em ma’a ti pɔka ayima yuun kɛla a be’em la zuo la, Yezu yuun tɔɣɛ la bãla bãla buɣelɛ a suure ge di sugeri bo en. (Lu. 7:37-50) La boi bim ti Samaria tiŋa pɔka la yuun kɛ̃’ɛri mɛ la buraa n daɣɛ a sira ge Yezu yuun kelum pa’alɛ en la ninmu’urɛ yɛla. (Yon 4:7, 17-19, 25, 26) Be’em n basɛ ti nɛreba kiira ge Naayinɛ yuun bo Yezu la paŋa ti a isige nɛreba kum poan.—Mt. 11:5. w24.08 4 ¶9-10

Yehowa wan eŋɛ la bem beere sa’am ti nɛra woo baŋɛ ti la nari ti ba pu’usa la eŋa ma’a? A wan gãkɛ nɛreba. La kan yue, Yehowa wan sa’am Babilon Kãtɛ La se’ere n sɔi la, ba parum la yɛla bo Yehowa. (Lil. 17:5, 16; 19:1, 2) Daanse’ere nɛresɛba n wan ta nyɛ ban sa’ani Babilon Kãtɛ La se’em la wan ta naɛ la tɔ pu’usa Yehowa. Armagedon poan, Yehowa wan sa’am Sitaana tingɔŋɔ be’o wa, la nɛresɛba n iti kpenkpasi ge sa’ana Naayinɛ yu’urɛ la. A wan faaɛ nɛresɛba n nɔŋɛ en, nana en ge me bɔta ti ba pɛ̃ɣera en la. (Mr. 8:38; 2 Tes. 1:6-10) Krista Yuun Tusere Na’am Bisega la san ba’asɛ, ki’i gurebisɛ la wan pɔsɛ. Bala pooren, Yehowa wan basɛ ti nɛra woo baŋɛ ti la nari ti ba pu’usa la eŋa ma’a. (Lil. 20:7-10) Sankaŋa la, “teŋa wa yeti ka perɛ mɛ la Na’ayenɛ soŋa, la a yam wo ko’om n perɛ kolega se’em la.” (Hab. 2:14) Bisɛ to puurɛ n wan ta pee se’em nɛra woo san pɛ̃ɣera Yehowa la a yu’urɛ la! w25.01 7 ¶15-16

Bem n yuun soŋɛ Hebru Kristakɔma la ti ba ta’an ŋmibe giisegɔ se’a n paɛ ba la poan? Tuntuna Paul yuun boti a soŋɛ Kristakɔma wa mɛ ti ba baŋɛ ti ba san nyaŋɛ ŋmibe, ba wan nyɛ nyuurɔ. A yuun basɛ ti ba baŋɛ ti ba san nyaŋɛ ŋmibe yeledaaŋɔ la poan, bala wan kumesɛ ba. La wan basɛ ti ba tara halese’a n wan pee Yehowa puurɛ. Ba san baŋɛ ban wan nyɛ nyuurɔ se’em, bala wan soŋɛ ba ti ba ta’an ŋmibe. (Heb. 12:11) Paul yuun kpemese Hebru Kristakɔma la giila ti ba tara sukpe’ene ta’an ŋmibe yaarɛ poan. Yelese’a n yuun paɛ Paul la n yuun basɛ ti a ta’an ka’am Kristakɔma la bala. Amea yuun giisɛ Kristakɔma wa mɛ ge nyɛ ban yuun ŋmibe se’em. Leyɛ’ɛsa, amea yuun ŋmibe mɛ giisegɔ poan.—2 Ko. 11:23-25. w24.09 12-13 ¶16-17

Dabeserɛ woo, to na’am mɔɔlegɔ tuuma la kɔ’ɔn dɛna la atɔtɔ yele. Beni n sɔi? Se’ere n sɔi la sansɛka n gee la pɔ’ɛ mɛ. Bisɛ Yezu n yuun tɔɣɛ na’am mɔɔlegɔ tuuma la n wan ta ana se’em ba’asegɔ dabesa la poan, ti la bɔna Mark 13:10. Matu gɔŋɔ la poan, Yezu yuun yeti ba wan ta mɔɔlɛ yelesoma la tiŋa wa za’a poan ge ti ‘ba’asegɔ’ la nyaa wa’ana. (Mt. 24:14) Wana wa pa’alɛ ti Sitaana tingɔŋɔ wa kɔ’ɔn pɔ̃ra la sa’aŋɔ n bala. Yehowa puɣum mina dabese’ere bii se’em ma’a ti yele ana wa wan eŋɛ. (Mt. 24:36; Tm. 1:7) Beere n yelegeri woo to kɔ’ɔn vuta du’ura dabeserɛ la mɛ. (Arom 13:11) Ge la nari ti to kelum mɔɔla ge ti dabeserɛ la nyaa paɛ. To san ti’isa to na’am mɔɔlegɔ tuuma la yele, to nari ti to geele sokere wa: Beni n sɔi ti to mɔɔla yelesoma la? La dela nɔŋerɛ n basɛ ti to mɔɔla. To san mɔɔla to iti pa’ala ti to nɔŋɛ yelesoma la, nɔŋɛ nɛreba ge ti sɛla n gaŋɛ za’a dela to nɔŋɛ la Yehowa la a yu’urɛ la. w24.05 14-15 ¶2-3

Dɔɣereba, kpemese ya ya kɔma giila ti ba ti’isa Yehowa naaŋɔ lɔɣɔrɔ yɛla. Hon la ho kɔma san bɔna va’amen bii gaadin poan, soŋɛ ba ti ba nyɛ naaŋɔ lɔɣɔrɔ naanɛ n wɔ̃ni taaba se’em. Soŋɛ ba ti ba baŋɛ ti se’emdaana n naam lɔɣɔrɔ wa tari la yɛm. Makerɛ, naaŋɔ lɔɣɔrɔ zo’e zo’e naanɛ ani la kilega. Naaŋɔ lɔɣɔrɔ zamesegɔdoma zamesɛ lɔɣe-ana wa yele mɛ. Naaŋɔ lɔɣɔrɔ zamesegɔdaana ayima yu’urɛ n de Nicola Fameli yeti ho san kɛkɛ naaŋɔ lɔkɔ n vileŋe ana kilega se’em la, ho wan nyɛ ti lɔkɔ la n vileŋe sugumnɔɔrɛ se’em la kãlɛ dela buyina. Ba yi’iri de la Fibonacci kãlɛ. Naaŋɔ lɔɣɔrɔ zo’e zo’e vileŋe mɛ ana kilega, maɣesɛ wuu ŋmarebɛa tuɣurɔ, kanzi’iŋa, tiisi vuurɔ, la sunflower puo. w24.12 16 ¶7

Moses, David la Yon n yuun boi sansɛka, la ba bɔŋa yuun boi la de tɔka la tomam saŋa wa. Ge tomam la bamam yɛla zo’e zo’e kelum wɔ̃na mɛ. Ba yuun pu’useri la yelemɛŋɛrɛ Naayinɛ la, tomam me pu’useri la yelemɛŋɛrɛ Naayinɛ la. Tomam zuseri la Yehowa ge ni dekɛ tomea delum en ti a soŋɛ tɔ wuu bamam me n yuun iti se’em la. Tomam me tari sakerɛ ti Yehowa kã’ari bɔ’ɔra la sɛba n nani en, wuu bamam me n yuun tari sakerɛ se’em la. Basɛ ya ti to kɔ’ɔn dɔla diimi nɛreba wa ka’aŋɔ la ge me nana Yehowa nɔya. To san nana Yehowa, a wan kã bo to ge soŋɛ tɔ. To wan “tara vom yuuma zo’e zo’e.” To wan vɔna daarewoo! To san ita yelese’a ti to saazuo Sɔ la bɔta, to wan tara pupeelum. A wan kã bo to ti la gaŋɛ ton ti’iseri se’em la.—Ep. 3:20. w24.11 13 ¶20-21

Yuun kɔbesɛka n deŋɛ nɛŋa la, ba yuun loe la buraasi basɛba ti ba dɛna keendoma soŋeredoma. (1 Tim. 3:8) La ani wuu bamam ti tuntuna Paul yuun tɔɣɛ ba yele ti ba “soŋeri la nɛreba” la. La niɛ peelumi ti keendoma soŋeredoma yuun tuni la yɛla ase’a n pakɛ paa tansugere la poan, la wan eŋɛ se’em ti keendoma la nyɛta nɛŋa pa’ala ge kaara mabiisi la bisa. Makerɛ, keendoma soŋeredoma yuun ta’an soŋɛ mɛ ti ba malum gulesɛ Naayinɛ Yelesum la bɔba ase’a bo nɛreba bii ba ɛ lɔɣɔse’a ti ba wan dekɛ gulesɛ. Ti’isɛ bisɛ keendoma soŋeredoma n soŋeri nɛreba se’em ho tansugere la poan. (1 Pe. 4:10) Ba ta’an ni basɛ ti ba bisera ligeri yɛla bii zɛse’esi ti ba wan mɔɔla, bisera gɔnɔ, bisera kɔ̃a la vidiyo yɛla, tɔ’ɔsa nɛreba zamesegɔ poan bii ba soŋera maala Na’am Pu’usegɔ Deo la. Tuun ana za’a soŋeri mɛ ti yɛla kena ma’a ma’a tansugere la poan.—1 Ko. 14:40. w24.10 19 ¶4-5

To san baŋɛ ti Yehowa boi mɛ ge me wan ta’an soŋɛ tɔ, la wan basɛ ti to ta’an ŋmibera yeledaaŋɔ woo poan. A wan ta’an soŋɛ tɔ yeledaaŋɔ poan se’ere n sɔi la, a dela Paŋa Za’adaana, a wan bo to paŋa ti to ta’an ŋmibe. Bala basɛ ti to tara la sukpe’ene to daaŋɔ woo poan. Yehowa san tabelɛ soŋɛ tɔ yeledaaŋɔ poan, to ni tara la suure lua ti a wan le soŋɛ tɔ yeledaaŋɔ ase’a me poan. Basɛ ya ti to geele yɛla ayi Naba David vom poan n yuun basɛ ti a kɔ’ɔn dekɛ amea delum Yehowa saŋa woo. David n yuun de bia la, saseŋa la gbeɣenɛ n yuun tiregɛ ti ba nyɔkɛ a piisi. David yuun dekɛ la sukpe’ene tabegɛ ba ta faaɛ a piisi la basɛ. David yuun ka ti’isɛ ti eŋa mea paŋa ti a yuun dekɛ tum tuunɛ wa. A yuun baŋɛ ti la dela Yehowa n yuun soŋɛ en. (1 Sa. 17:34-37) David n yuun ti’isɛ taɣesa yele ana wa la, yuun basɛ ti a tara suure lua ti Yehowa wan bo en paŋa beere sa’am. w24.06 21 ¶5-6

Makerɛ, ti’isɛ bisɛ ti nɛra n beem ho ti ho wa’an de’eŋo na. La nari ti ho keŋɛ? Ho san ka ba’ɛ mina nɛra la bii ho ka mi ban wan ta ita sɛla bim, la nari ti ho soke en yeti: “De’eŋo la wan bɔna la bɛ? La wan pɔsɛ la sankani? Nɛreba zo’e zo’e n wan wa’ana? Ani n wan bisa de’eŋo la? Nɛrebani n wan wa’ana? Ba wan ita la bem de’eŋo la poan? Dãkpe’eŋo wan bɔna bim?” Lebesego la wan soŋɛ hɔ ti ho ta’an kɔ’ɛ ho puti’irɛ soŋa. Ho san baŋɛ yɛla la za’a ba’asɛ, ti’isɛ sɛla za’a n wan ta ita bim. Makerɛ, ho wan eŋɛ la wani ho san baŋɛ ti nɛresɛba n ka doli Baabule naresum yɛla n wan ta bɔna bim bii nɛreba wan nyuura dãkpe’eŋo bura bura? Hon ka ti’isɛ ti yelegaasa ma’a n wan ta ita de’eŋo wa poan? (1 Pe. 4:3) Ho san baŋɛ yɛla la za’a, ho nyaa wan ta’an kɔ’ɛ ho puti’irɛ soŋa. w25.01 15 ¶4-5

Yehowa doose la lua bunɔ la poan di sugeri bo sɛba n basɛ ba be’em. To geele ya Baabule la n pa’alɛ Yehowa n ni di sugeri bo to se’em. Fuo san mu’ɛ sobege la ni kpe’em mɛ ti ho pee ti la yese. Yehowa dekɛ la makerɛ wa pa’alɛ ti a san pee to be’em la, la ni ana la filam. Be’em ani wuu sanɛ. (Mt. 6:12; Lu. 11:4) Bala la, to san tuna be’em, to sanɛ la me kɔ’ɔn zɔ’ɔra mɛ. To tari la sanɛ kãtɛ Yehowa zɛ’an. Ge Yehowa san di sugeri bo to, a ni basɛ to sanɛ la bo to mɛ. Yehowa san di sugeri bo to, a ka le viira to be’em la sanɛ. Nɛra san basɛ to sanɛ bo to, to puurɛ ni pee mɛ. Bala mea nɔɔ ti Yehowa ni san di sugeri bo to, to puurɛ ni pee! w25.02 10 ¶9-10

Dɔɣereba san kuregɛ, ba ta’an bɔta ti ba kɔma soŋera ba yɛla ase’a poan, kɔma me puurɛ ni pee mɛ ti ba soŋɛ ba. (1 Tim. 5:4) Ge dɔɣereba n de Kristakɔma bɔkɛ ti sɛla n bo’ori ba pupeelum paa dela ba uge ba kɔma ti ba pu’usa Yehowa ge daɣɛ ba beere ta tara ligeri zo’e zo’e bisera ba. (3 Yo. 4). Tara ho makesonɛ pa’ala ho kɔma ti ba ta’an dekɛ bamea delum Yehowa ge me soŋɛ ba ti ba ta’an ta bisa bamea beere sa’am. Ba bunbilimen poan, pa’alɛ ba ti tunkpe’eŋo tari la nyuurɔ. (Mag. 29:21; Ep. 4:28) Ban zo’ori la, soŋɛ ba ti ba muura sukuu poan. Dɔɣereba ta’an viisɛ bisɛ Baabule naresum yɛla dekɛ soŋɛ ba kɔma ti ba kɔ’ɛ ba puti’irɛ soŋa sukuu kenɛ poan. Wana wan soŋɛ ba kɔma la ti ba ta’an bisa bamea ge nyɛta saŋa mɔɔla zɔ’ɔra bii hali ta’an tum sore ŋmɛ’a tuuma la. w25.03 31 ¶15-16

Yehowa yuun basɛ ti nɔdɛ’ɛsa Isaiah tɔɣɛ ti la bɔna Isaiah a zuo 65 pa’alɛ vom n wan ana se’em bɔ’ɔra sɛba n wan bɔna vo’osum paradiisi la poan la. Yetɔɣebiŋere wa yuun puɣum tum tuuma la yuun 537 G.Y.B poan. Sankaŋa la, ba yuun basɛ Yudadoma sɛba n yuun de yamesi bɔna Babilon ge eŋɛ teere la, ti ba le lebe ba tiŋa. Yehowa yuun kã bo a nɛreba mɛ ge soŋɛ ba ti ba malum mɛ Yerusalem tiŋa ti ba yuun sa’am ka la ti la ana soŋa. Ba me yuun le mɛ pu’usegɔ yire la mɛ ti la dɛna yelemɛŋɛrɛ pu’usegɔ zɛ’an Israel tiŋa. (Isa. 51:11; Zek. 8:3) Isaiah yetɔɣebiŋ’a la yuun le tum tuuma buyi poan la yuun 1919 Y.B. sansɛka ti Yehowa yamesi n boi zina beere wa ze’ele Babilon Kãtɛ la poan yese na la. Pooren ti vo’osum paradiisi la nyaa yeregera zɛ’an woo tingɔŋɔ wa poan. Mabiisi la yuun kɔ’ɔn tuulegera mɔɔla na’am yelesoma la mɛ. Ba me yuun eŋɛ pa’alɛ ti ba tari la zilam vo’osum la wɔla la ge me yuun yu’ɛ tansuga zo’e zo’e. Buraasi la pɔɣesi n yuun nɔŋɛ gbiregere tuuma nyaa ‘yɛ la halepaalega la ti ba naam ka doose Naayinɛ puti’irɛ n boti sɛla.’ w24.04 20-21 ¶3-4

Tisi sise’esi poan, dɔɣereba bii bunkureba n ni ɛ luɣerɛ kpɛ’a bo ba yidoma. Tisi sise’esi poan me, deodoma bii zɔdoma n ni ɛ luɣerɛ kpɛ’a bo nɛreyone ti a bisɛ nyaa a wan ta’an di bii ele en. Ba san yele ho ti ho ɛ luɣerɛ kpɛ’a bo nɛra, mina bamam bayi la n boti sɛla. Ho san nyɛ nɛra n makɛ, tiregɛ viisɛ baŋɛ nɛra la n ani se’em, yele yele wuu eŋa n bi vo’osum poan se’em. Nɛra san tara bɔnsoŋa la Yehowa bala gani ligeri, mi’ilum bii yu’urɛ. Tɛ̃ra ti, sɛba n boti ba di taaba la ma’a n wan kɔ’ɛ ba puti’irɛ nyaa ba wan di taaba. w24.05 23 ¶11

To me ta’an basɛ ti to yetɔɣum la to itigɔ soŋɛ sɛba n lɛɣeri taaba. Saŋa ase’a, la yele ni pakɛ mɛ ti to nyɔkera tomea. (Mag. 12:18) Makerɛ, to inya ta’an kita ti to yele nɛreba ti to zɔdoma la pɔsɛ lɛɣera la taaba ge daanse’ere sɛba n lɛɣeri taaba la nan ka boti ba yele nɛreba. To ka nari ti to tara sɛba n lɛɣeri taaba la yɛla tɔɣera bɔ’ɔra nɛreba bii to zɛregera ba. (Mag. 20:19; Arom 14:10; 1 Tes. 4:11) Leyɛ’ɛsa, la ka nari ti to sɔsera bii sɔkera ba yɛla ti la ana wuu la dela ba di bii ele taaba. To wan eŋɛ la wani sɛba n lɛɣeri taaba san kɔ’ɛ ba puti’irɛ ti ba basɛ taaba? La ka nari ti to dekɛ to nɛŋa kɛ̃’ɛsa ba yɛla poan bii to nyɔ̃na ayima ti eŋa n ta’asɛ. (1 Pe. 4:15) Wuu ton puɣum tɔɣɛ sɛla yia la, sɛba n lɛɣeri taaba san ka nyaŋɛ di bii ele taaba, la ka pa’alɛ ti ba lɛka la ka tari vuurɛ. Ge la tuɣum soŋɛ ba ti bamam bayi la ta’an kɔ’ɛ ba puti’irɛ soŋa. Ba san basɛ taaba, ba suure n ni sa’am. Bala la, to ta’an bisɛ ton wan eŋɛ se’em soŋɛ. w24.05 31 ¶15-16

Tɛ̃ra ti, yelese’ere n wan ta’an daam to paa dela to yire nɛra bii to zɔ san basɛ Yehowa pu’usegɔ. (Ym. 78:40) To san nɔŋɛ nɛra la, la ni kpe’em mɛ ti to ta’an ŋmibe. Yele kana taaba san paɛ hɔ, Zadok yele la wan ta’an kpemese ho giila. Zadok yuun tari yelemɛŋɛrɛ bɔ’ɔra Yehowa mɛ se’em ma’a ti a zɔ Abiatar yuun ka le tara yelemɛŋɛrɛ la. Yele wa yuun eŋɛ la se’em ma’a ti David yuun pɔ̃ra kum la. A dɔyɔa Adoniya yuun pɛ̃regɛ mɛ bɔta ti a dɛna naba ge Yehowa yuun boti la Solomon dɛna naba. (1 Yel. 22:9, 10) Abiatar yuun pa la Adoniya poore. (1 Na. 1:5-8) Abiatar n yuun eŋɛ bala la pa’alɛ ti a yuun ka tari yelemɛŋɛrɛ bɔ’ɔra David, Zadok la Yehowa! Zadok la Abiatar yuun naɛ taaba tum malema tuuma la mɛ paɛ yuun pinaasi. (2 Sa. 8:17; 15:29; 19:11-14. w24.07 6 ¶14-15

To mi ti to san bisera tomea soŋa ti to da tum be’em to wan nyɛ nyuurɔ. To san tum be’em to ta’an nyɛ ‘nyɛlum fii wa’ de poan ge to san dɔla Yehowa pa’alegɔ, to wan tara pupeelum zo’e zo’e. (Heb. 11:25; Ym. 19:8) Sɛla n sɔi ti la ana bala dela, Yehowa naam to mɛ ti to dɔla a pa’alegɔ. (Pin. 1:27) To san dɔla Yehowa n boti sɛla, to wan tara putɛkeeŋa n ani fa’a ge me wan ta vɔna daarewoo. (1 Tim. 6:12; 2 Tim. 1:3; Yude 20, 21) Yelemɛŋɛrɛ la dela, to ‘iisi la ka tari paŋa’ (Matt. 26:41) ge bala ka pa’alɛ ti to kan ta’an eŋɛ sɛsɛla nyaŋɛ to inbũulegɔ la. Yehowa kɔ’ɔn maasum mɛ ti a soŋɛ tɔ. (2 Ko. 4:7) Tɛ̃ra ti Naayinɛ n bo’ori to pansɛka n gaŋɛ asaala paŋa. To tari puti’irɛ ti Yehowa me wan lebese to zusega la ge bo to pansɛka ti to ɛɛra la. (1 Ko. 10:13) Yelemɛŋɛrɛ la dela, Yehowa wan soŋɛ tɔ ti to kɔ’ɔn bisera tomea soŋa ge da tum be’em. w24.07 19 ¶19-21

Tuntuna Paul yuun gulesɛ bo a keema tadaana Timoti ti a ka’ana ‘sɛba n tum be’em la.’ A yuun boti a yeti bem? Eŋa n yuun yeti “sɛba woo n dole Yesu la” ka pa’alɛ ti mabiisi la za’a. Ge a yuun boti a yeti, sɛba fii n puɣum mina yele la. La ta’an dɛna la sɛba nini n nyɛ bii sɛba ti mabia la mea tɔɣɛ yele la bo ba. Keendoma la wan doose yɛm sore poan basɛ ti ba baŋɛ ti ba maalɛ yele la. Saŋa ase’a, mabiisi zo’e zo’e n boi tansugere la poan ta’an puɣum mina be’em sebo ti nɛra la tum bii ba ta’an ta baŋɛ mɛ. Bɔnkana poan, “sɛba woo n dole Yesu la” ta’an dɛna tansugere la za’a. Bala la, keema wan mɔɔlɛ bo tansugere la za’a ti, ba dɔlegɛ mabia la tuberɛ mɛ. Beni n sɔi? Paul yeti, ‘ti la dɛna kaka bɔ’ɔra basɛba’ ti ba da tum be’em. w24.08 23-24 ¶16-17

La pa’alɛ ti la nari ti to kɔ’ɔn tiregera Yehowa pu’usegɔ poan ta paɛ ba’asegɔ. Loore Kristakɔma la me nari ti ba kɔ’ɔn pigera la wan eŋɛ se’em ti Yezu “dekɛ” ba keŋɛ a na’am la poan. (Mt. 24:40) Ba kɔ’ɔn ana la lɛɛ gura se’em ma’a ti ba wan ta naɛ la Yezu bɔna saazuo. Armagedon pooren, ba nyaa wan naɛ la Yezu bɔna. (2 Tes. 2:1) La kan yue, Yezu wan gãkɛ nɛreba ge la ka nari ti to basɛ ti dabeem tara tɔ. To san tara yelemɛŋɛrɛ ta paɛ ba’asegɔ, to saazuo Sɔ la wan bo to “paŋa la n gane zan’an” ti to “ta’an ze’ele Asaala Dayɔa nɛŋa te a gankɛ.” (2 Ko. 4:7; Lu. 21:36) To ye la saazuo bii to wan bɔna la tingɔŋɔ wa zuo woo, to san kelese ka ka la n boi Yezu makerɛ la poan la, la wan basɛ ti to saazuo Sɔ la puurɛ pee. Yehowa n tari itisoŋɔ la zuo, a wan ‘gulesɛ to yu’ura eŋɛ vom gɔŋɔ la poan.’—Da. 12:1; Lil. 3:5. w24.09 24-25 ¶19-20

Ho me san ti’isa sɛla ti la kɔ’ɔsa ho giila, ho ta’an tɔɣesɛ yuumadaana la n yuun eŋɛ sɛla la. Ho wan eŋɛ la bem? Tɛ̃ra tuunsoma la woo ti ho tum kurum la, la Yehowa n kã bo ho se’em. Kelum tɛ̃ra ti Yehowa ka soŋeri sɛba n ka pu’useri en la. Nɛresɛba n ka pu’useri Yehowa la zo’e zo’e kɔ’ɔn ti’isa la ba basɛ ti ba vom ana lumta se’ere n sɔi la, ba ka tari beere sa’am puti’irɛ. Ge ho nyɛ Yehowa n eŋɛ yelese’a bo ho nananawa mɛ. Kelum mina ti a wan eŋɛ yelesoma n gani bala bo ho beere sa’am. (Ym. 145:16) Le ti’isɛ yele wa bisɛ. Ho kan ta’an baŋɛ ho vom n wan ana ni se’em ho san ka pu’usa Yehowa. Ge ton mi sɛla dela: To san nɔŋɛ Yehowa, la nɛreba, ti bala basɛ ti to kɔ’ɛ to puti’irɛ eŋɛ sɛla, to wan tara pupeelum. w24.10 27 ¶12-13