April

To nari ti to tara sakerɛ lua bunɔ la poan ta’an ta vɔna daarewoo. (Ep. 1:7) “Pisena” la ka nari ti ba obe boroboro la ge nyu daam la, Daana Zaanɔɔrɛ Dia la poan. (Yon 10:16) Ge ba kelum nyɛta nyuurɔ Yezu Krista inya, la a ziim la poan mɛ. Ba iti bala la, ban tari sakerɛ lua bunɔ la poan, la lua bunɔ la n wan basɛ ti to ta nyɛ kã’a se’em. (Yon 6:53) Sɛba n wan di la pa’alɛ ti ba wan ta naɛ la Yezu di Na’am saazuo. Bala la, to pa’asɛ la loore Kristakɔma la bii pisena la poan woo, la nari ti to tara sakerɛ n kpe’em lua bunɔ la poan ta’an ta vɔna daarewoo. w24.12 13 ¶14, 16

Daana Zaanɔɔrɛ Dia la poan, Yezu yuun dekɛ la boroboro n ka tari mi’isum bo a tuntuneba la ge yeti la ze’ele bo la eŋa inya. Bala pooren, a bo ba la daam ge yeti la ze’ele bo la “nɔbiŋere ziim.” (Mr. 14:22-25; Lu. 22:20; 1 Ko. 11:24) A yuun yeti bu dela nɔbiŋere paalɛ. Sɛba n wan ta naɛ la Yezu di na’am la ma’a n pa’asɛ nɔbiŋere wa poan. (Heb. 8:6, 10; 9:15) To Daana Zaanɔɔrɛ Dia la poan, Yezu yuun kɔ’ɔn basɛ ti a puti’irɛ bɔna la ‘pigile pika’ la poan. Tuntuneba sɛba n yuun boi la en bɔ’ɔ la poan la ti Naayinɛ loe yia ti ba pa’asɛ pigile pika la poan. Bamam n wan ta naɛ la Yezu bɔna saazuo. w24.12 11 ¶9-10

Yezu zɔdoma la ayima n yuun dɔ̃rɛ en ti a dindoma nyɔkɛ en. Ba yuun tu en mɛ ge parum yɛla bo en. Ba yuun mɛlesɛ en mɛ, gãkɛ en ge nyaa ku en. Sogɛpa la yuun tari en keŋɛ la zɛsɛka ti ba wan ku en ge nyaa kpa en dɔɔ zuo. Yezu yuun ŋmibe mɛ wuŋerɛ wa woo poan. Ge la yuun ba’ɛ wuŋɛ Yehowa mɛ la eŋa n yuun nyɛ ti a Dayua la namesa se’em la. Yehowa yuun tari pansɛka n wan gu ti a Dayua la da namesɛ ge a yuun ka eŋɛ bala. Se’ere n sɔi la Yehowa nɔŋɛ to mɛ. Yezu lua bunɔ la dela sɛla n gani za’a n pa’alɛ ti Yehowa nɔŋɛ ho mɛ ti la ka tara makerɛ. Yehowa yuun basɛ ti a Dayɔba’arɛ wa’ana ki bo to ti to ta’an nyɛ faarɛ be’em la kum poan. (1 Yo. 4:9, 10) A boti la a soŋɛ to za’a waabi ti to ta’an pu’usa en nananawa, hali la ton de be’emdoma la. A me wan ta yese be’em la kum beere sa’am. w24.08 6 ¶13-14

To san ti’isɛ bisɛ lan yuun wuŋɛ Yehowa se’em ti a nyɛta ti a Dayua namesɛ ta ki la, to wan baŋɛ eŋa n nɔŋɛ to se’em. Sitaana yuun yeti nɛra ka boi n wan ta’an tara yelemɛŋɛrɛ bɔ’ɔra Naayinɛ la san wuna en. Yehowa n yuun bo yɔ’ɔ ti Yezu namesɛ ta ki la pa’alɛ ti Sitaana dela pumpɔrema. (Yob 2:1-5) Yehowa yuun nyɛ nɛreba n ɛ̃regeri Yezu, ti soogɛpa ŋmɛ̃’ɛra en ge nyaa kpa en dɔɔ zuo. Yehowa yuun boi la saazuo ge bisa ti a Dayɔba’arɛ wa yaɣa dɔɔ la zuo namesɛ bala ta ki. (Mt. 27:28-31, 39) Yehowa yuun tari pansɛka n wan gu yele ana wa. (Mt. 27:42, 43) Ge Naayinɛ yuun san eŋɛ ni bala, lua bunɔ kan bɔna. Tomam me kan tari ni beere sa’am puti’irɛ. Bala la, Yehowa yuun bo yɔ’ɔ mɛ ti a Dayua la namesɛ ta ki. w25.01 22 ¶7

Nisan 16, 33 Y.B. poan ti Yezu podɔleba la suure yuun sa’am ti dabeem me tara ba. A podɔleba bayi n yuun ze’ele Yerusalem yɛ’ɛsa Emmaus. Buraa ayima n yuun paɛ ba zɛ’an naɛ la ba kena. Podɔleba la yuun yele buraa wa la sɛla n yuun paɛ Yezu. Ge buraa la yuun pɔsɛ yɛta ba la yelese’a ti ba kan makɛ tamɛ. “A pɔhɛ la gɔŋseto te Moses golehɛ la tara tara la nɔtɔgɔheba n me golehɛ gɔŋseto la” pa’ala ba sɛla n sɔi ti la yuun nara ti Mɛzaaya la namesɛ ge ki. Ban ta paɛ Emmaus la ti ba nyaa baŋɛ ti buraa wa dela Yezu n yuun isige kum poan la! (Lu. 24:13-35) Yezu yuun niɛ amea pa’alɛ a podɔleba la sugumnɔɔrɛ zo’e zo’e, a ki’i dabesa pinaasi la poan. Yezu yuun kpemese a podɔleba la giila mɛ ti ba le tara pupeelum. Bala yuun soŋɛ podɔleba la mɛ ti ba tara pupeelum pa’ala nɛreba na’am yelesoma la, la sukpe’ene. w24.10 12 ¶1-3

Ho san dɔɣɛ bia a ni kɔ’ɔn zɔ’ɔra mɛ ge ho san wan ta’an bi kãsegɛ vo’osum poan la nari ti ho tiregɛ eŋɛ sɛla. Makerɛ, Korint mabiisi la yuun sakɛ yelesoma la mɛ, muse ko’om, nyɛ zilam vo’osum la ge me yuun zamesɛ yɛla zo’e zo’e tuuntuna Paul zɛ’an. (Tm. 18:8-11) Ge yuuma pooren ba zo’e zo’e yuun kelum ka bi vo’osum poan. (1 Ko. 3:2) To san wan ta’an bi kãsegɛ, la nari ti tomam mea eŋɛ pa’alɛ ti to boti la to bi kãsegɛ. ‘Yɛmpɔ’ɔredoma’ n ka boti ba bi kãsegɛ vo’osum poan la kan nyɛ nɛŋa tɔlega. (Mag. 1:22) To ka boti to ana wuu sɛba n ni dɛna bunkureba ge bɔta ti ba dɔɣereba kɔ’ɔn pa’ala ba sɛla woo n nari ti ba ita la. Ton tuɣum bɔta ti to eŋɛ sɛla dela to basɛ ti tomam la Yehowa zɔtɔ nyɔka la kpe’em. Ho san kelum tiregera ti ho bi kãsegɛ vo’osum poan, zusɛ Yehowa ti a bo ho ‘paŋa la konkoma’asum’ ti ho ta’an eŋɛ bala.—Flp. 2:13. w24.04 4 ¶9-10

Yehowa basɛ ti to baŋɛ lan ni ana en se’em a san gãkera nɛreba. (Ezek. 33:11) Yehowa kan sa’am nɛra, san daɣena la a bisɛ ti la nari mɛ ti a eŋɛ bala. A nimbɔzore la ka tari makerɛ. La me san nara a ni zɔ nɛreba nimbũ’ɔ mɛ. To mi la bem la nɛresɛba ti ba kan isige ba kum poan la? Baabule la tɔɣɛ la ba poan fii yele. Yezu yuun yeti, Yudas Iskariot kan isige kum poan. (Mr. 14:21; le bisɛ Yon 17:12 la zaseŋɔ yelesum la.) Yudas yuun kɔ’ɔn mina la fii ge zaɣesɛ Yehowa Naayinɛ, la A Dayɔa la. (Bisɛ Mr. 3:29 la zaseŋɔ yelesum la.) Bala mea nɔɔ ti Yezu yuun yele pu’usegɔ nɛŋadoma sɛba n yuun giiseri en la ti, ba san ki ba kan isige kum poan. (Mt. 23:33; bisɛ Yon 19:11 la “the man” zaseŋɔ yelesum la.) Tuuntuna Paul me yuun kaɣɛ a yelege n meadoma sɛba n yuun ka tee la ti ba kan isige kum poan.—Heb. 6:4-8; 10:29. w24.05 4 ¶10-11

To san ana du’a du’a la Yehowa, Sitaana kan ta’an eŋɛ to sɛla n wan pɔɣelum tɔ wuusa. (1 Yo. 3:8) Tinpaalega la poan, Yehowa wan kelum tɛ’ɛla a nɛreba ti daaŋɔ kan paara ba vo’osum poan, ba me kan ki. (Lil. 21:4) La dela yɔ’ɔ kãtɛ bɔ’ɔra tɔ ti to dɛna saama bɔna Yehowa tɛnti deo la poan. To wan ta’an tara bɔnsoŋa la Yehowa wuusa. (Eze. 37:27) To san bɔta ti to kɔ’ɔn dɛna Yehowa saama, la nari ti to eŋɛ la bem? Nɛra san beem ho ti ho wa’an a yire na, ho wan bɔta ti ho eŋɛ sɛla n wan pee nɛra la puurɛ. Ho me wan pee puurɛ doose eŋa n boti sɛla la. Bala mea nɔɔ ti to bɔta ti to baŋɛ Yehowa n boti a saama ana se’em, la wan eŋɛ se’em ti to ta’an dɛna a saama wuusa. Tomam n nɔŋɛ Yehowa la zuo, to ni kɔ’ɔn tiregera la to paŋa za’a ti to ita yɛla ti a ‘puurɛ pee soŋa soŋa.’ (Kol. 1:10) La dela to kɔ’ɔn bɔ’ɔra en gilema. To san ita bala, la wan soŋɛ tɔ ti to kan eŋɛ sɛla n wan daam Yehowa. To boti la to ‘sirege tomea dɔla’ to Naayinɛ la.—Mik. 6:8. w24.06 4 ¶8-9

Yehowa yuun yele Abraham ti a dekɛ a dayua Isaak kaabɛ. Tuunɛ wa yuun ba’ɛ kpe’em mɛ bo Abraham ti a tum ge a yuun nam Yehowa mɛ. Abraham n yuun yeti a ku a dayua la, ti Naayinɛ gu en. Yele wa basɛ ti to baŋɛ la Yehowa n wan eŋɛ sɛla beere sa’am. Yehowa yuun wan dekɛ la a Dayɔba’arɛ la kaabɛ. Yehowa sirum nɔŋɛ nɛresaaleba mɛ paa. (Pin. 22:1-18) Yehowa yuun bo Israeldoma la nɔɔrɛ ti ba tara dusi kaabera, lan wan eŋɛ se’em ti a di sugeri bo ba. (Mal. 4:27-29; 17:11) Ban yuun iti kaabegɔ se’a la pa’alɛ ti Yehowa wan ta eŋɛ kaabegɔ n gani bala. Naayinɛ nɔdɛ’ɛseba yuun yeti la wan nara ti yaaŋa la ti ba pu’ulum a yele biŋe la, n de Naayinɛ Dayua la, namesɛ ta ki lan wan eŋɛ se’em ti a ta’an faaɛ nɛresaaleba be’em la kum poan basɛ. Yehowa n yuun eŋɛ sɛla wa ka tari makerɛ. A me yuun eŋɛ bala bo la hon!—Isa. 53:1-12. w24.08 4 ¶7-8

Ho san kaala Baabule la, ni ti’isɛ bisɛ hon wan ta’an dekɛ hon kaalɛ sɛla la tum tuuma se’em. Ho san kaala Baabule la, ni sokɛ homea yeti, ‘Mam wan eŋɛ la wani ta’an dekɛ yele wa tum tuuma nananawa bii beere sa’am?’ Makerɛ, to yeti ho kaalɛ la 1 Tesalonika 5:17, 18. Ho san kaalɛ kaalegɔ zɛ’an wa ba’asɛ, ho ta’an su’use ge soke homea yeti, ‘Mam ni zusɛ la sugumnɔɔrɛ bulɛ dabeserɛ la poan ge n zusega la ni ana la wani? Ho ta’an ti’isɛ taɣesɛ Yehowa n eŋɛ sɛla bo ho ti ho puurɛ pee. Ho ta’an le ti’isɛ bisɛ yɛla atã ti Yehowa eŋɛ bo ho dabeserɛ la poan ge pu’usɛ en. Hali to san nyɛ saŋa fii ti’isɛ taɣesɛ ton zamesɛ sɛla Baabule la poan la, la wan soŋɛ tɔ ti to bɔkɛ Naayinɛ Yelesum la ge me dekɛ de tum tuuma. Ho san tara hon zamesɛ sɛla la tuna tuuma daarewoo, ho wan ta’an pu’usa Naayinɛ soŋa! w24.09 4-5 ¶9-10

Yehowa naam tɔ ti to bɔna la to to’ore. La boi bim ti to san ni to’e sɛla, to puurɛ ni pee mɛ ge to puurɛ ni ba’ɛ pee me gaŋɛ to san dekɛ sɛla bo nɛra. La ni ana to la ma ma to san dekɛ sɛla bo to mabiisi. To puurɛ me ni pee mɛ ba san yele to yeti, ba pu’usɛ ya. Ge nɛra san yele to yeti a pu’usɛ ya bii a ka yele to, to puurɛ wan kelum pee se’ere n sɔi la to mi ti to eŋɛ la som. Tɛ̃ra ti, “Na’ayenɛ tare gaŋɛ, a wan bo ho gana bana.” (2 Yel. 25:9) To kan ta’an bo nɛreba gaŋɛ Yehowa n wan bo to se’em la! Pupeelum ka boi gana Yehowa n wan yɔ ho sɛla la. Bala la, basɛ ya ti to kɔ’ɔn lu to suure ti to wan tɔɣesa to saazuo Sɔ la n bo’ori yɛri yɛri la. w24.09 31 ¶20-21

Yehowa zoti nɛreba nimbu’ɔ mɛ ge me tara giile. (Ym. 103:13; Isa. 49:15) A suure ni sa’am mɛ sɛla san daana tɔ. (Zek. 2:8) A soŋɛ to mɛ ti to baŋɛ en ge me dɛna a zɔdoma. (Ym. 25:14; Tm. 17:27) A sirege la amea; “Ane n ane wo Yenɛ se’ere n zin a na’am gɔŋɔ zuo zuin zuin ha, ge suuta behera saazuo la teŋparɛ wa na wa?” (Ym. 113:6, 7) Yele ana wa za’a n sɔi ti la nara ti to pɛ̃ɣera en. Ton boti nɛreba baŋɛ Yehowa la n sɔi ti to pɛ̃ɣera en. Nɛreba zo’e zo’e ka mi Yehowa soŋa soŋa. Beni n sɔi? Se’ere n sɔi la Sitaana parum la yɛla bo Naayinɛ ti nɛreba zo’e zo’e me sakɛ dɛ. (2 Ko. 4:4) Sitaana pã’asɛ nɛreba ti Yehowa ka diti sugeri, a ka fabela to yele ge me basɛ ti namesegɔ zo’e zo’e paara tɔ. Ge to mi yelemɛŋɛrɛ la mɛ! To tari la yɔ’ɔ ti to pa’alɛ nɛreba Naayinɛ n de nɛresɛka taaba ge soŋɛ ba ti bamam me pɛ̃ɣera en.—Isa. 43:10. w25.01 3 ¶6-7

La boi bim ti Yezu yuun ani la kasi ge me tum tuunkiresi ge Sitaana yuun basɛ ti nɛreba parum la yɛla bo en. Makerɛ, pu’usegɔ nɛŋadoma la yuun yele nɛreba ti Yezu n tari pansɛka sa’asa kolekpabɛ’ɛsi la ze’ele la ‘kolekpabɛ’ɛsi naba la zɛ’an. (Mr. 3:22) Ban yuun gãkeri Yezu la, pu’usegɔ nɛŋadoma la yuun parum ti a zɛregɛ la Naayinɛ ge yele nɛreba la ti ba basɛ ti ba ku Yezu. (Mt. 27:20) Pooren, Krista podɔleba n yuun mɔɔli la, ba dindoma yuun ‘isige mɛ dekɛ sɛba n daɣɛ Yudadoma la tugule’ Kristakɔma la ti ba mɛlesa ba. (Tm. 14:2, 19) The Watchtower December 1, 1998 tɔɣɛ Tooma 14:2 yele ti: “Naayinɛ dindoma la yuun ka yeen zaɣesɛ la yelemɛŋɛrɛ la ma’a ge ba yuun pã’asɛ nɛreba la mɛ ti ba da kelese Kristakɔma la ge yaɛ ba.” Zina beere wa, Sitaana kelum “pan’aha teŋparɛ wa zuo zan’an” mɛ. w24.04 11 ¶15-16

Nɛra n wan ki sansɛka kan pa’alɛ Naayinɛ n wan gãkɛ en se’em beere sa’am. Yehowa n de Gakerɛ za’adaana n ni kɔ’ɛ a puti’irɛ se’em la n de tontɔɔ. (Ym. 33:4, 5) To tari suure lua ti ‘tiŋa wa za’a Gakerɛdaana la’ wan tum sɛla n de tontɔɔ. Yɛm boi bim ti to yeti, nɛra n kɛ̃’ɛri zɛ’an la kan pa’alɛ Naayinɛ n wan ta gãkɛ en se’em beere sa’am. Nɛreba tusa tusa n kɛ̃’ɛri tinse’esi poan ti ba ka nyɛ yɔ’ɔ wum Na’am yelesoma la, kan basɛ ti Yehowa gãkɛ ba ti ba dela ‘buusi.’ (Mt. 25:46) Tiŋa wa za’a Gãkerɛdaana la fabeli nɛrebana wa yele mɛ hali gana tomam. To ka mi Yehowa n wan ta ita a yɛla se’em mɛlesekãtɛ la poan. Daanse’ere yelese’a n wan ta ita mɛlesekãtɛ la poan la wan basɛ ti nɛreba wa basɛba ta nyɛ yɔ’ɔ ti ba zamesɛ Yehowa yɛla tara sakerɛ a poan, a san ta basɛ ti nɛra woo baŋɛ eŋa n de mina.—Eze. 38:16. w24.05 12 ¶14-15

Yehowa nɛreba nɔŋɛ la ba soŋera taaba. (2 Ko. 8:4) Ge saŋa ase’a la ni nara ti ba tara sukpe’ene ta’an eŋɛ bala. Makerɛ, zaberɛ san kɔ, keendoma la mi ti mabiisi la eeri la giilekpeŋere la soŋerɛ. Keendoma la kelum mina ti mabiisi la eeri la vo’osum poan la innaanɛ soŋerɛ. Keendoma la n nɔŋɛ mabiisi la zuo, ba ni pɔ̃sɛ la ba nyuurɛ soŋɛ ba mabiisi la. Dɛŋa san ta paɛ tɔ, la yele pakɛ mɛ ti to nana bɔ’ɔra la wan eŋɛ se’em ti to ta’an tara nɔyinɛ. Dɔla pa’alegɔ la ti ya tigere yile la tara bɔ’ɔra ya la. (Heb. 13:17) Saŋa woo keendoma nari ti ba ni te’ele kaalɛ Yehowa tigere la n pa’alɛ tɔ ton nari ti to eŋɛ sɛla maasum gura yeledi’ima, la ton nari ti to eŋɛ sɛla yeledi’ima san ta bɔna. (1 Ko. 14:33, 40) Tara sukpe’ene ge ma’ara homea. (Mag. 22:3) Ni ti’isɛ soŋa soŋa ge nyaa tum tuunɛ. Tara homea soŋa. Dekɛ homea delum Yehowa. Yehowa ta’an soŋɛ hɔ ti hon me soŋɛ ho mabiisi la ti daaŋɔ da paɛ ya. w24.07 4 ¶8; 5 ¶11

Naba David yuun mi Yehowa mɛ ge dekɛ amea delum En. Naba Saul la nɛreba basɛba n yuun boti ba ku David la, a yuun zusɛ la Yehowa ti a soŋɛ en. Yehowa n yuun kelese David zusega ge faaɛ en basɛ la, a yuun yeti: ‘Yehowa boi mɛ!’ (Ym. 18:46) David n yuun yele bala la vuurɛ? A yuun basɛ ti la niɛ peelumi ti Yehowa n de yelemɛŋɛrɛ Naayinɛ la ge me ‘ni kɔ’ɔn bɔta ti a soŋɛ a yamesi.’ David yuun baŋɛ ti Yehowa mi yelese’a n paari en mɛ ge me kɔ’ɔn maasum ti a soŋɛ en. Bala n yuun kpemese David giila ti a kɔ’ɔn bɔta ti a pɛ̃ɣera en la. (Ym. 18:28, 29, 49) Ton tari suure lua ti Yehowa boi mɛ la wan soŋɛ tɔ ti to kɔ’ɔn mu’ɛ nini pu’usa en. To wan tara paŋa ŋmibera yeledaaŋɔ poan ge me kɔ’ɔn pu’usa en wuusa. To me wan lu to suure ti to kelum ana du’a du’a la Yehowa. w24.06 20-21 ¶3-4

To wan zamesɛ la bem tuntuna Paul n yuun gulesɛ sɛla bo Tesalonikadoma la? To san wum sɛla n ka makɛ la sɛla ti to zamesɛ Baabule la poan, bii to wum la yele n digeni inya, la nari ti to dekɛ yɛm tum tuuma. Soviet Union saŋa la, to dindoma la yuun gulesɛ la gɔŋɔ bo mabiisi la ge parum ti la ze’ele la tigere zuo la na. Gɔŋɔ la yuun yele mabiisi la basɛba ti ba yelege tara bamea tigere. La yuun ani wuu gɔŋɔ la sirum ze’ele la tigere zuo la na ge mabiisi la yuun ka basɛ ti gɔŋɔ wa pã’asɛ ba. Mabiisi la yuun baŋɛ ti gɔŋɔ la n tɔɣeri sɛla la ka makɛ la sɛla ti ba zamesɛ Baabule la poan la. Zina beere wa me, to dindoma doli la intanɛt poan bii social media poan ti ba burum to puti’irɛ, la wan eŋɛ se’em ti to da tara nɔyinɛ. La ka nari ti to tara ‘puti’ira ayi ayi.’ Ge sɛla n wan soŋɛ to dela, to ni soke tomea nyaa ton wum bii kaalɛ sɛla la makɛ la yelemɛŋɛrɛ la ti to zamesɛ la?—2 Tes. 2:2; 1 Yo. 4:1. w24.07 12 ¶14-15

Yelese’ere n de ninmu’urɛ dela nɛra kɔ’ɛ a puti’irɛ ti a wan kã amea bo Yehowa ge naɛ la Yehowa nɛreba pu’usa en. Yehowa boti la nɛra woo ita bala. Beni n sɔi? A boti la ba dɛna a zɔdoma ge ta vɔna daarewoo. (Tɛɛ. 30:19, 20; Gal. 6:7, 8) Yehowa ka pɛ̃regeri tɔ ti to pu’usa en. A boti la nɛra woo loe eŋa n wan eŋɛ se’em. Ge keendoma la wan eŋɛ la wani Kristabia san tum be’em? A san ka basɛ a be’em la, ba wan yese en tansugere la poan. (1 Ko. 5:13) Hali ba san puɣum yese en tansugere la poan, Yehowa kɔ’ɔn bɔta la se’em n tum be’em la tee ge lebe a zɛ’an na. Bala n sɔi ti a yuun basɛ ti Yezu wa’ana ki bo to, ti a ta’an dita sugeri bɔ’ɔra sɛba n basɛ ba be’em la. Yehowa tari la nɔŋerɛ. Bala n sɔi ti a kɔ’ɔn yɛta sɛba n tum be’em la ti ba basɛ ba be’em.—Zek. 1:3; Arom 2:4; Yam. 4:8. w24.08 14 ¶1-2

Sansɛka ti Yon yuun gulesɛ n tã’a Yon gɔŋɔ la, nɛreba basɛba yuun pa’ali la pumpɔreŋɔ yɛla. Wana wa yuun basɛ ti welesego n bɔna tansugere la poan. Ge la bala za’a, nɛreba “basɛba dole yelemɛŋɛrɛ la” mɛ. Ba yuun nani Yehowa mɛ ge dɔla a “nɔɔrɛ.” (2 Yo. 4, 6) Kristakɔma wa yuun basɛ ti Yon, la Yehowa puurɛ pee mɛ. (Mag. 27:11). To wan ta’an zamesɛ la bem yele wa poan? To san tara yelemɛŋɛrɛ bɔ’ɔra Yehowa, tomam la nɛreba puurɛ wan pee. (1 Yo. 5:3) To san basɛ ti Yehowa puurɛ pee, tomam me puurɛ wan pee. Yehowa puurɛ ni pee mɛ a san nyɛ ti to ni zaɣesɛ la be’em ge nana a nɔya la. Malesi n boi saazuo la me puurɛ ni pee mɛ. (Lu. 15:10) Tomam me wan tara pupeelum to san baŋɛ ti tomam ayima ayima woo kelum tara la yelemɛŋɛrɛ bɔ’ɔra Yehowa. (2 Tes. 1:4) Naayinɛ san ta sa’am Sitaana tingɔŋɔ wa, to puurɛ wan pee se’ere n sɔi la to yuun kɔ’ɔn tara la yelemɛŋɛrɛ bɔ’ɔra Yehowa. w24.11 12 ¶17-18

Ho wan ma’ɛ homea bisɛ nɛra la paɛ la wani ge nyaa lɛɣɛ en? Ho san kɔ’ɔn nyɛ nɛra zina zina ge lɛɣɛ en, a wan baŋɛ ti ho ni ka ti’isɛ soŋa ge kɔ’ɛ ho puti’irɛ. (Mag. 29:20) Ge nɛra la me san baŋɛ ti ho boti en mɛ ge ti ho kelum yuura, a ta’an ti’isa ti ho ka mi hon eeri sɛla. (Pa. 11:4) Tɛ̃ra ti, la ka nari ti ho sakɛ ho suuren ti ho wan di bii ele nɛrekaŋa ge nyaa lɛɣɛ en. Ge la nari ti ho sakɛ ho suuren ti hon maasum ya ti ho di pɔɣa bii ele sira, ti se’em ti ho bɔta ti ho lɛɣɛ la me nari hɔ. Ho wan eŋɛ la bem ho san baŋɛ ti nɛra n boti ho? Ho san ka bɔta en, basɛ ti a baŋɛ kalam. La kan ana soŋa ti ho basɛ ti nɛra la ti’isa ti ho boti en ge ti homea mina fii ti ho ka boti en.—Ep. 4:25. w24.05 22-23 ¶9-10

Loore Kristakɔma sɛba n tari yelemɛŋɛrɛ la ma’a ti Yezu wan to’e ba a saazuo Na’am la poan. Loore Kristakɔma sɛba n ka pigeri la kan pa’asɛ “sɛba te a loe la” poan. (Mt. 24:31) Sɛba n tari puti’irɛ ti ba wan zi’ire tiŋa wa zuo la me nari ti ba pigera ge me tara yelemɛŋɛrɛ. To mi soŋa soŋa ti Yehowa gãkerɛ dela tontɔɔ. La ka nari ti to fabela la Yehowa n loori nɛresɛba zina beere wa la. To tɛ̃ri Yezu n yuun tɔɣɛ sɛla doose la kpɛ’ɛma la n tari nɛresɛba wa’an a va’amen zaanɔɔrɛ la. (Mt. 20:1-16) Bamam la sɛba n pɔsɛ bulika la yɔɔrɛ yuun zuni mɛ. La ka pakɛ la se’em ma’a ti ba loe loore Kristakɔma la, ba za’a waabi san tara sakerɛ la yelemɛŋɛrɛ, ba wan nyɛ yɔɔrɛ yinɛ. w24.09 24 ¶15-17

Yezu eŋɛ la makesonɛ pa’alɛ tɔ ton nari ti to eŋɛ sɛla, nɛra san eŋɛ to sɛla n ka ani soŋa. Nɛreba zo’e zo’e, hali la a yidoma yuun eŋɛ en la sɛla n ka ani soŋa. A yidoma sɛba n yuun nan ka sakɛ bo en la yuun yeti a zalɛ mɛ. Pu’usegɔ nɛŋadoma la yuun yeti a tari la kolekpabɛ’ɛsi paŋa tibera nɛreba. Arom sogɛpa la yuun eŋɛ en la sia sia, ŋmɛ en ge nyaa ta ku en. (Mr. 3:21, 22; 14:55; 15:16-20, 35-37) Ge Yezu yuun ŋmibe mɛ. A me yuun ka lerege sanɛ. To wan ta’an tɔɣesa en la wani? (1 Pe. 2:21-23) Nɛra san eŋɛ to sɛla n ka ani soŋa, Yezu eŋɛ la makesonɛ bo to. A yuun mi se’em ma’a ti la nara ti a sina bii tɔɣɛ. (Mt. 26:62-64) Saŋa ase’a, nɛreba yuun ni san parena yɛla bɔ’ɔra en, a ni sina mɛ. (Mt. 11:19) A yuun ni san tɔɣera, a ka tuuri sɛba n yaɛ en la bii a vuusa ba. w24.11 4-5 ¶9-10

Makɛ bisɛ ti ho dekɛ la sɛla bo ho zɔ ge mina ti la wan soŋɛ en paa. Ho suure wan sa’am ho san ta baŋɛ ti ho zɔ la dekɛ ku biŋe la zɛ’an ti a puti’irɛ puɣum ka lɛbera bim! Ge ho san ta baŋɛ ti a puurɛ pee mɛ la ku ge tara ku tuna soŋa, hon me puurɛ wan pee. Makerɛ wa vuurɛ? Yehowa basɛ ti a Dayua la wa’ana ki bo la tomam. Yehowa suure wan sukɛ paa a san baŋɛ ti to puurɛ pee mɛ la eŋa n doose nɔŋerɛ sore poan bo to lua bunɔ la! (Yon 3:16; Arom 5:7, 8.) Saŋa ase’a, to ta’an ni ti’isa ti lua bunɔ la yele ka le pakɛ. To puurɛ san ka le pee la lua bunɔ la, la wan ana wuu to dekɛ Naayinɛ bo’olum la biŋe la zɛ’an ti to puti’irɛ puɣum ka le lɛbera bim. Ton wan eŋɛ se’em ti bala kan eŋɛ dela, saŋa woo to ti’isa Naayinɛ la Krista n eŋɛ sɛla bo to la yele. w25.01 26 ¶1-2

Mabiburaa san nyɛ yɔ’ɔ ti a ta dɛna keema, a da dɛna se’em n nan doohe Yesu sore te la ka yue. La ka pa’alɛ ti ho nari ti ho muse ko’om ti la ba’ɛ yue. Ge la nari ti la yue fii wa, lan wan eŋɛ se’em ti hon la Yehowa bɔŋa la ta’an kpe’em ge ti ho me kãsegɛ vo’osum poan. Ge ti ba nyaa loe ho ti ho dɛna keema la, la nari ti ho tɔɣesa Yezu, siregera homea ge gura Yehowa ti a bo ho tuuma sansɛka n nari poan. (Mt. 20:23; Flp. 2:5-8) Eŋɛ pa’alɛ ti ho dela se’em n wan bɔna bo Yenɛ ma’an. Bala pa’alɛ ti ho ana tapi lapi la Yehowa, ita sɛla ti a bɔta ge me dɔla a tigere la n pa’ali to sɛla la. Baabule la basɛ ti la niɛ peelumi ti keendoma nari ti ba “pa’ala nɛreba soŋa.” Bala pa’alɛ ti la nari ti ho ba’ɛ mina yetɔɣum bɔ’a? Aayi. La boi bim bim ti la daɣɛ keendoma za’a n ba’ɛ mina yetɔɣum bɔ’a. Ge ba san mɔɔla bɔ’ɔra nɛreba, bii ba keŋɛ ti ba ta kaɛ la mabia bisɛ, ba ni dekɛ la Baabule la pa’alɛ ba ti la kɛ̃’ɛra suure. w24.11 23-24 ¶14-15

Ho san kaalɛ sɛla Baabule la poan ge ka bɔkɛ, eŋɛ viisegɔ. Dabeserɛ la poan, ti’isɛ taɣesɛ hon zamesɛ sɛla, la bala n pa’alɛ ho Yehowa la a Dayua la n nɔŋɛ ho se’em. (Ym. 119:97) Da basɛ ti ho giila kɔ’ɔsɛ ho san ka nyɛta yelepaala saŋa woo. Makɛ bisɛ ti ho eeri la salema. Sɛba n eeri salema ni dekɛ la saŋa zo’e zo’e ɛ. Ge ba ni ka basɛ se’ere n sɔi la, ba mi ti ba san puɣum nyɛ salema fii, la dela tuulum. Nyaa dekɛ bala makɛ la sɛla ti to zamesa Baabule la poan n tari tuulum se’em! (Mag. 8:10) Bala la, kɔ’ɔn zamesa Baabule la ge me ita viisegɔ ta’an nyɛta yelepaala.—Ym. 1:2. w25.01 25 ¶14-15

Yehowa boti la to ni kɔ’ɔn maasum ti to di sugeri bo sɛba n tum to be’em la. (Ym. 86:5; Lu. 17:4; Ep. 4:32) Nɛra san eŋɛ sɛla ti la daam tɔ, la ni basɛ ti to suure sa’am mɛ yele yele wuu la san dɛna to zɔ bii to yire nɛra. (Ym. 55:12-14) Saŋa ase’a, yele la ta’an daana tɔ ti la ana wuu ba dekɛ la su’a lu to la. (Mag. 12:18) La nari ti to tiregɛ maalɛ yele la. To san ka eŋɛ bala, la wan ana wuu ba dekɛ la su’a lu hɔ ge ti ho ka foe su’a la. Bala me wan dɛna dɛŋa paa. Nɛra san eŋɛ sɛla ti la daam tɔ, la ta’an basɛ ti to sunsɔa nyie. Baabule la yeti to sunsɔa ta’an nyie ge to da tum be’em. (Ym. 4:4; Ep. 4:26) Beni n sɔi? Se’ere n sɔi la, lan ni ana ho se’em la ta’an basɛ ti ho tum som bii be’em. Saŋa zo’e zo’e la, sunsɔa nyiisum ni basɛ ti ho tum la be’em. (Yam. 1:20) Tɛ̃ra ti ho sunsɔa ta’an nyie ge homea n wan loe hon nyaa wan eŋɛ sɛla. w25.02 15 ¶4-6

Yezu bo la makerɛ pa’alɛ lan de gberentuuma se’em ti to bɔta ligeri biŋera ge me ka dɛna “bontateba Na’ayenɛ [nɛŋan].” (Lu. 12:16-21) Nɛra ka boi n mi beere sa’am n wan ana se’em. (Mag. 23:4, 5; Yam. 4:13-15) Leyɛ’ɛsa, Yezu yeti sɛba woo n boti ba dɛna a podɔleba la nari ti ba dekɛ lɔɣese’a woo ti ba tara la basɛ ge ta’an dɔla eŋa. (Lu. 14:33.) Yuun kɔbesɛka n deŋɛ nɛŋa Kristakɔma n boi Yudea puurɛ yuun pee mɛ ti ba dekɛ lɔɣɔse’a woo ti ba tara la basɛ. (Heb. 10:34) Zina beere wa mabiisi zo’e zo’e dekɛ bɔnsɛka n wan basɛ ti ba tara ligeri la basɛ mɛ ban ka dekɛ bamea pa’asɛ nalɛɣerɛ yɛla poan la zuo. (Lil. 13:16, 17) Bem n soŋɛ ba ti ba ta’an eŋɛ bala? Ba tari la suure lua la Yehowa n pu’ulum biŋe ti: “N kan malom bahɛ ho, bii n zagahɛ ho.” (Heb. 13:5) Bala to tiregeri mɛ maasena sɛla biŋera beere sa’am ge yeledi’ire san paɛ tɔ, to tari puti’irɛ ti Yehowa wan soŋɛ tɔ. w25.03 29-30 ¶13-14

Yehowa ka eeri ti tomea bi vo’osum poan. Yehowa kumesɛ la keendoma ti ba bɔna Kristakɔma tansugere la poan soŋera tɔ ti to ta’an ‘bi kãsegɛ vo’osum poan ta paɛ Krista naanɛ n ani se’em la.’ (Ep. 4:11-13) Yehowa le bo to la zilam vo’osum la ti la soŋɛ tɔ ti to ta’an tara ‘Krista puti’irɛ.’ (1 Ko. 2:14-16) Leyɛ’ɛsa, Yelesoma Gɔnɔ tunaasi la pa’alɛ to la Yezu n yuun ni ti’isa, tɔɣera ge ita se’em na’am mɔɔlegɔ tuuma la poan. Ho san tɔɣesa Yezu hala ana wa, la wan soŋɛ hɔ ti ho ta’an dɛna Kristabia n bi kãsegɛ vo’osum poan. To san bɔta ti to bi kãsegɛ vo’osum poan, la nari ti to mina yɛla ‘gana Krista pa’alegɔ seto n de pi’ileŋo yɛla la’ n de Baabule yelepiɣisi ti to yuun pɔsɛ zamesɛ la. w24.04 4-5 ¶11-12

La nari ti to kɔ’ɛ to puti’irɛ dabeserɛ woo poan. Yɛla ase’a ka kpe’em ti to kɔ’ɛ to puti’irɛ de poan, maɣesɛ wuu ton wan di sɛla bii ton wan gã’arɛ tɛm sebo. Yɛla ase’a kpe’em mɛ. Ton wan kɔ’ɛ to puti’irɛ se’em la ta’an basɛ ti to tara pupeelum la imma’asum, tomam la to yidoma bɔŋa ana soŋa bii to ta’an pu’usa Yehowa soŋa. To ni bɔta la to kɔ’ɛ to puti’irɛ ti la soŋɛ tomam la to yidoma. Sɛla n gani za’a dela, la ni basɛ ti Yehowa puurɛ pee mɛ. (Arom 12:1, 2) Sɛla n deŋɛ nɛŋa n wan soŋɛ hɔ ti ho ta’an kɔ’ɛ ho puti’irɛ soŋa dela ho baŋɛ yɛla la za’a. Beni n sɔi ti la yele pakɛ ti ho eŋɛ bala? Ti’isɛ bisɛ ti bã’ara n keŋɛ asibitin. Dɔgeta la wan bo en tiim ge nan ka soke baŋɛ sɛla n daani en? A kan eŋɛ bala. Bala mea nɔɔ ti ho san wan ta’an kɔ’ɛ ho puti’irɛ soŋa, la nari ti ho viisɛ baŋɛ yɛla la za’a. w25.01 14 ¶1-3

To baŋɛ ti Yehowa tari la nimbɔzore ti la ka tara makerɛ. A me ‘ka boti nɛreba nyɛ sa’aŋɔ.’ Yehowa yuun zɔ nɛresɛba n yuun tum be’em la nimbũ’ɔ la wani? (2 Pet. 3:9) Naba David yuun sa’am la pɔɣedire ge me ku nɛra. Ge David n yuun tee la, Yehowa yuun zɔ la a nimbũ’ɔ ge di sugeri bo en. (2 Sa. 12:1-12) Naba Manase yuun tum la yelegaasa zo’e zo’e. Hali la bala za’a, Yehowa yuun zɔ buraa wa n tee la nimbũ’ɔ mɛ ge di sugeri bo en. (2 Yel. 33:9-16) Yele ana wa basɛ ti to baŋɛ ti Yehowa san bisɛ ti la nari, a ni zɔ nɛra nimbũ’ɔ mɛ. Nɛrebana wa n yuun baŋɛ ti ba tum la be’em ge tee la zuo, a wan isige ba kum poan. w24.05 4 ¶12