51 BARNABAS
A Yuun Soŋeri La Nɛreba
PAUL n yuun ta dɛna Kristabia la, yuuma atã pooren ti a yuun keŋɛ Yerusalem ta kaɛ mabiisi la bisɛ. (Ga. 1:15-19) Paul yuun geele mabiisi wa ti ba nyaa dela a suurɔ ge ba yuun zoti en mɛ. Ba yuun tɛ̃ri eŋa n yuun mɛleseri Kristakɔma la se’em. La ani wuu ba zo’e zo’e yuun ka sakɛ ti Paul sirum tee ya. Ge buraa ayima n boi ba poan yuun ka zoti dabeem. Eŋa yuun tuɣum lɛm la Paul ge me soŋɛ en. Buraa wa yu’urɛ dela Barnabas.
Kristakɔma n yuun boi Yerusalem yuun zoti la dabeem ti ba soŋɛ Paul ge Barnabas yuun nyɛ sukpe’ene mɛ soŋɛ en
Baabule la yeti Barnabas yu’urɛ deyima dela Yosef. Ge mabiisi la yuun yi’iri en la Barnabas, ti la vuurɛ dɛna “se’em n soŋore nɛreba.” Sɛla n sɔi ti ba yuun yi’ira en bala dela, a yuun nɔŋɛ la a buɣela nɛreba suure ge me soŋera ba. Makerɛ, Pentekost 33 Y.B. pooren la, Barnabas yuun koose la a samanɛ ge dekɛ ligeri la soŋɛ mabisɛba n naseri. Leyɛ’ɛsa, se’em ma’a ti Paul yuun keŋɛ Yerusalem yuun 36 Y.B. bɔba la, Barnabas yuun seke en mɛ ge soŋɛ en. Baabule la yeti, “Barnabas nya soŋɛ tare en . . . [keŋɛ] Yesu tontoneba la” zɛ’an. Kɔ’ɔn pɔsɛ sankaŋa yɛ’ɛsa, Paul la Barnabas yuun nyaa dela zɔsonɔ.
Se’em ma’a ti Paul yuun bɔna Yerusalem la, a yuun kɔ’ɔn mɔɔla la Yezu yɛla la sukpe’ene ge Yudadoma la basɛba yuun boti la ba ku en. Bala la, mabiisi la yuun tari en keŋɛ la Tarsus, n de zɛ’an ti ba dɔɣɛ en la. Ge Barnabas yuun yee la Yerusalem ta paɛ wuu yuuma awɛi. Bala pooren ti ba yuun tum en ti a keŋɛ Antiok n boi Siria. A yuun keŋɛ bim ti a ta kpemese la sɛba n nan pɔsɛ dɔla Yezu la giila. Sɛla n sɔi ti a yuun nyaŋɛ kpemese ba giila dela a yuun dela nɛresonkɔ ge “te Yenɛ [vo’osum] la bɔna la en.” Antiok tiŋa nɛreba zo’e zo’e n yuun keleseri yelesoma la zuo, Barnabas yuun eeri la soŋerɛ. Bala zuo la, a yuun keŋɛ la Tarsus ta ɛ a zɔ Paul. Eŋa la Paul yuun lebe la Antiok ti ba ta naɛ taaba mɔɔla yelesoma la. Mabiisi n boi Antiok yuun laɣesɛ la ligeri, la lɔɣɔrɔ bo Barnabas la Paul ti ba tari keŋɛ Yudea ta bo mabisɛba n naseri la.
Se’em ma’a ti Barnabas la Paul yuun lebe Antiok la, mabiisi la yuun tum ba ti ba keŋɛ tisi sise’esi ta mɔɔlɛ yelesoma la. La yuun dela ba tara sukpe’ene ta’an tum tuunɛ wa. Makerɛ, ban yuun paɛ Ikonium la, Yudadoma basɛba yuun boti la ba ku ba. Bala la, ba yuun basɛ bim mɛ ge keŋɛ Listra tiŋa. Listra nɛreba yuun ti’isɛ ti Paul la Barnabas dela ba baɣa la n lebege nɛreba wa’an ba zɛ’an. Bala la, ba yuun boti la ba kãabɛ ba. Ge Yudadoma basɛba n ze’ele Antiok, la Ikonium n yuun keŋɛ bim ta parum yɛla bo Paul la Barnabas, ti Listra nɛreba la me sakɛ. Ba yuun lobe Paul la kuga ge ve’e en yese ba tiŋa la poan ta basɛ yiŋa sa. Ba yuun ti’isɛ ti a ki mɛ. Mabiisi n boi Listra yuun keŋɛ ta nyɛ la Paul n gã tiŋa ge baŋɛ ti a ka ki. Bilam ti Paul nyaa vaɛ isige ti ba doose taaba le kɛ̃ tiŋa la poan. Bisɛ Barnabas puurɛ n yuun pee se’em la eŋa n yuun baŋɛ ti Paul ka ki la! Pooren ti ba yuun basɛ Listra. Ge la yuun ka yue ti ba le lebe Listra ta buɣelɛ mabiisi la suure. Paul la Barnabas yuun sirum tari la sukpe’ene!
Barnabas la Paul yuun naɛ la taaba tuna soŋa soŋa bɔ’ɔra Yehowa, hali la dɛŋa poan. Ge saŋa kayima, sɛla n yuun eŋɛ ti ba yuun ŋmɛ nɔkpe’ene la taaba. Ba yuun ye la zɛ’an kayima ti ba ta mɔɔlɛ, ti Barnabas yuun bɔta ti a suɔ Mark doose ba keŋɛ. Ge Paul yuun ka sakɛ, se’ere n sɔi la Mark tabelɛ doose ba keŋɛ na’am mɔɔlegɔ mɛ ge basɛ ba. Ba mina yuun ka boti a sakɛ bo a tadaana. “Bilam te Paul la Barnabas ŋmɛ nɔkpe’ene la taaba,” ti nɛra woo tɔ a kenɛ zɛ’an.
Barnabas wan kɔ’ɔn eŋɛ sunsɔa la Paul bala, bii a wan di sugeri bo en? La yuun nari ti a tara sukpe’ene ge ta’an eŋɛ sɛla n ani soŋa. Bala la, a yuun ka le eŋɛ sunsɔa la Paul. Tomam la to mabia san ka bɔkɛ taaba, to san ka bisɛ soŋa, to ta’an eŋɛ sunsɔa la en, tɔɣera a yɛla n ka ani soŋa, bii to kɔ’ɔn basɛ zamesegɔ kenɛ. La wan nara ti to tiregɛ di sugeri bo to mabia la. To me san di sugeri bo en, Yehowa puurɛ wan pee.
La boi bim ti Paul la Barnabas yuun ŋmɛ la nɔkpe’ene la taaba ge ba yuun kelum pu’usa la Yehowa. Barnabas la Mark yuun zom la ɔɔreŋɔ keŋɛ Kiprus ta mɔɔlɛ yelesoma la bim. Ge Paul yuun naɛ la Silas keŋɛ eŋa n yuun maasum ti a keŋɛ zɛ’an la. Yehowa me yuun soŋɛ ba mɛ ti ba ta’an kpemese mabiisi la giila ge me soŋɛ nɛreba zo’e zo’e n boti yelesoma la.
Paul la Barnabas yuun gɛ̃ mɛ la taaba yoi? Aayi. Ton eŋɛ se’em baŋɛ bala dela, Paul n yuun guleseri gɔnɔ bɔ’ɔra tansuga la, a yuun pɛ̃ɣɛ Barnabas mɛ. Makerɛ, Paul n yuun gulesɛ gɔnseko ta bo Korintdoma la, a yuun yeti Barnabas tuni mɛ bisera amea, lan wan eŋɛ se’em ti a ta’an kelum mɔɔla. (1 Ko. 9:6) Paul me yuun ka gɛ̃ la Mark. A gɔŋɔ ayima poan, a yeti Mark dela “Barnabas sɔɔn” ge nyaa yele mabiisi la ti ba to’e Mark soŋa soŋa. (Kol. 4:10, 11) Baabule la ka pa’alɛ nyaa Paul la Barnabas yuun le naɛ taaba tum ge to mi ti ba yuun kelum dɛna la zɔtɔ. Barnabas yuun kelum mɔɔla yelesoma la mɛ ge me buɣela nɛreba suure. Eŋa n yuun naɛ la Mark tuna la, a yuun kumesɛ en mɛ ti a ta’an pu’usa Yehowa soŋa ge me soŋera mabiisi la. Zuo seko n taɣelɛ la poan, to wan zamesɛ baŋɛ Mark n yuun tari sukpe’ene se’em.
Kaalɛ Baabule zɛ’ɛsi wa:
Sɔsɛ ya sokere wa:
Barnabas yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Barnabas yuun dela Levi nɛra. Levidoma me yuun ka tari samanɛ ti la dɛna ba tɔ̃tɛ Israel tiŋa. Bala la, Barnabas yuun eŋɛ la wani tara samanɛ? (Kan. 18:20; Tm. 4:36, 37; w98-E 4/15 20 ¶4, tiŋanɔɔrɛ yelesum)
2. Beni n sɔi ti ba yuun yi’ira Barnabas tuntuna? (Tm. 14:14; it-E “Barnabas” ¶3)
3. Kiprus tiŋa poan ti Barnabas la Paul yuun mɔɔlɛ bo buraa ayima yu’urɛ n de Sergius Paulus. Luke tɔɣɛ buraa wa yele Tooma gɔŋɔ la poan yeti, a dela “zuodaana sɔna Kiprus teŋa behera.” Buraa wa yuun sirum dela zuodaana yoi? (Tm. 13:7, 12; it-E “Cyprus” ¶7) Bisɛ foote A
Bank of Cyprus Cultural Foundation Collection
Foote A: Ba nyɛ la coin Kiprus tiŋa ti Klaudius nɛŋa bɔna bim. Eŋa n yuun biseri Arom sɔ’ɔlum la se’em ma’a ti Barnabas la Paul yuun keŋɛ bim la. Coin la me pa’alɛ la se’em n yuun de “zuodaana” sɔna Kiprus bisera.
4. Beni n sɔi ti la ka eŋɛ to pakerɛ la Listra nɛreba la n yuun boti ba kãabɛ lɔɣɔrɔ bo Barnabas la Paul la? (bt-E 97, daka)
Ti’isɛ Hon Wan Dekɛ Tum Tuuma Se’em
To wan eŋɛ la wani ta’an tɔɣesa Barnabas n yuun bo’ori yɛri yɛri se’em la?
La ani wuu pɔsega la, Barnabas n yuun ni maasum eŋa la Paul n wan tum ba na’am mɔɔlegɔ tuuma la se’em. Ge pooren, Paul n yuun nyɛ yɔ’ɔ zo’e zo’e gana Barnabas. Hali la bala za’a, Barnabas nini yuun ka tɛ̃ti la Paul. To wan ta’an tɔɣesa Barnabas la wani? Bisɛ foote B
Foote B
Ho wan eŋɛ la wani ta’an tɔɣesa Barnabas sukpe’ene la?
Ti’isɛ Taɣesɛ Yehowa Yele
Barnabas yele wa pa’alɛ mam ti Yehowa ani la wani?
Barnabas yele wa makɛ la Yehowa puti’irɛ la wani?
Beni n sɔi ti hon puurɛ pee la ban loe Barnabas pa’asɛ sɛba n wan naɛ la Krista di na’am saazuo la?
Zamesɛ Yɛla Pa’asɛ
Sodeni poan ti Barnabas la Paul zɔtɔ nyɔka la pa’alɛ ti nɛreba n tari hala to’ore to’ore wan ta’an naɛ taaba tum?
“Will You Resolve Conflicts and Promote Peace?” (w17.06-E 16-20)
Vidiyo wa poan, keendoma bayi n ka bɔkɛ taaba. Bisɛ ban tɔɣesɛ Barnabas la Paul se’em ta’an maalɛ yele la.