52 MARK
‘A Wan Ta’an Soŋɛ Mam Na’am Mɔɔlegɔ Tuuma La Poan’
NƐREBA n yuun keŋɛ ta nyɔkɛ Yezu, bobe en ge tari en keŋɛ. Tuntuneba la za’a yuun zɔ mɛ ge basɛ ba Pa’ala la. Ge Baabule la basɛ ti to baŋɛ ti budibila ayima n yuun eŋɛ pa’alɛ ti a tari sukpe’ene. A yuun doose la nɛrekuuŋɔ la poore. Nɛreba la n yuun nyɛ en ge bɔta ti ba nyɔkɛ en la, ba yuun nyaŋɛ gurɛ la a fuo. Bala ti a tiregɛ la ba, yɛɛ a fuo la basɛ ba ge gee eŋa n sɛ̃ɣelɛ sɛla poan la ma’a zɔ pĩɛ. Mark Yelesoma Gɔŋɔ la ma’a n tɔɣɛ yele wa. Bala la, nɛreba zo’e zo’e ti’isɛ ti budibila wa dela Mark mea. Mark yu’urɛ ayima dela Yon.
Mark yuun kɛ̃’ɛri la Yerusalem. La ani wuu eŋa la a ma Mary n yuun kɛ̃’ɛri. Daanse’ere ba yuun dela buntateba. Yezu kum pooren, mabiisi la yuun ni laɣesɛ la ba yire ita zamesegɔ. Bala n sɔi ti tuntuna Peter yuun keŋɛ ba yire yu’uŋɔ seko ti maleka la yuun yese en sarega la. Nɔkpe’ene kai ti Mark yuun mi Yezu tuntuneba, la a podɔleba la zo’e zo’e mɛ. Bala la, eŋa n yuun wum yelese’a nɛreba wa zɛ’an la n yuun soŋɛ en ti a baŋɛ eŋa n wan tara sukpe’ene se’em.
Yuun 46 Y.B. bɔba, Mark suɔ Barnabas, la tuntuna Paul yuun keŋɛ la Yerusalem. Ba yuun bisɛ ti la wan ana soŋa ti ba kumesɛ Mark. Bala la, ban yuun leberi Antiok tiŋa la, ba yuun tari Mark keŋɛ mɛ. Yuunɛ pooren, Paul la Barnabas yuun yele Mark ti a doose ba keŋɛ zɛse’esi n zaaɛ ta mɔɔlɛ. A yuun sakɛ ti a wan doose tuntuneba wa keŋɛ ta “soŋora ba.”
Mark yuun nari ti a tara sukpe’ene, se’ere n sɔi la sore kenɛ yuun daɣɛ naana ge ti dɛŋa me bɔna bim. Pooren, Paul yuun yeti a sore kenɛ la poan, a yuun ni “pɔnhɔra [la a] vom kolaahe ko’om poan, nayigehe nu’uhen, . . . nɛrekooŋɔ poan, mɔen dunhe, [la] ko’kantɛ poan.” (2 Ko. 11:26) Mark yuun kɔ’ɔn maasum mɛ ti a soŋɛ Paul la Barnabas sɛla woo poan. Ge se’em ma’a ti ba yuun paɛ Pamfilia la, a yuun basɛ Paul la Barnabas mɛ ge lebe Yerusalem. Tuunɛ la yuun ba’ɛ kpe’em bo en me yoi? Baabule la ka pa’alɛ. Ge Baabule la pa’alɛ ti buraasi wa suure yuun sa’am mɛ la eŋa n basɛ ba ge keŋɛ la. Ge lan yuun daam mina paa dela Paul.
Pooren, Paul la Barnabas yuun maasum ti ba keŋɛ la tisi sise’esi ta mɔɔlɛ. Barnabas yuun boti la Mark le doose ba keŋɛ ge Paul yuun ka sakɛ. Daanse’ere Paul yuun ti’isɛ ti Mark ta’an le basɛ ba ge lebe. Bala zuo la, Paul la Barnabas yuun ka bɔkɛ taaba ge “ŋmɛ nɔkpe’ene la taaba.” Barnabas yuun basɛ ti Mark doose en mɛ ti ba keŋɛ Kiprus ta mɔɔlɛ yelesoma la. Ge Paul yuun ee la nɛra ti ba me keŋɛ zɛ’ɛsi ase’a ta mɔɔlɛ.
Yele wa yuun ta’an daam Mark paa, se’ere n sɔi la a yuun sa’am Paul suure mɛ. A me yuun mi ti eŋa n ta’asɛ ti Paul la Barnabas n de zɔtɔ la ŋmɛ nɔkpe’ene ge ka le dɔla taaba tuna. Mark suure yuun ta’an sa’am la eŋa n eŋɛ sɛla la, bii a sunsɔa nyie ti a ti’isa ti Paul n eŋɛ sɛla la ka ani soŋa. La yeen dɛna se’em, Mark yuun ka pisegɛ Yehowa pu’usegɔ basɛ.
Mark yuun ka nyɛ yɔ’ɔ doose Paul ta mɔɔlɛ yelesoma la ge a yuun ka basɛ ti a giila kɔ’ɔsɛ
Mark yuun kɔ’ɔn soŋera la a mabiisi. Yuun 60-61 Y.B. bɔba la, ba yuun paɣɛ Paul la yire poan Arom tiŋa. Sankaŋa ti Paul yuun gulesɛ gɔŋɔ ta bo Kolose mabiisi la ge yi Mark yu’urɛ. Mark yuun boi mɛ la Paul. Paul yuun yeti Mark “soŋɛ” eŋa mɛ paa. Yuun 62 ta paɛ 64 Y.B. bɔba me, tuntuna Peter yuun gulesɛ la gɔŋɔ ge yi Mark yu’urɛ. La ani wuu Mark yuun keŋɛ la Babilon ta kpemese Peter n yuun kuregɛ la giila. Peter yuun yeti Mark dela a “dayɔa.” Wana pa’alɛ ti Mark yuun soŋeri Peter mɛ. Nɔkpe’ene kai ti tuntuna Peter yuun tɔɣɛ Yezu Krista yɛla zo’e zo’e bo Mark mɛ. Se’em ma’a ti Mark gulesɛ a Yelesoma Gɔŋɔ la, daanse’ere a yuun boi la Arom tiŋa. A yuun gulesɛ la yɛla zo’e zo’e ti Peter mea yuun nyɛ. Daanse’ere Peter n yuun tɔɣɛ yɛla wa bo Mark.
Tuntuna Paul n yuun gulesɛ gɔŋɔ ta bo Timoti la, a yuun yi Mark yu’urɛ mɛ. Ban yuun le paɣɛ Paul la, a yuun yele Timoti ti a doose Mark wa’ana bisɛ en. Bem zuo? Paul yuun yeti: “A dela se’em n wan ta’an soŋɛ mam.” Paul yuun mi ti la kan yue, ba wan ku en. Bala la, Timoti la Mark inya n yuun kiti ti ba keŋɛ ta nyɛ Paul ge kpemese a giila. La ka pakɛ la daaŋɔ se’a woo n yuun paɛ Mark la, a yuun kelum soŋera la nɛreba. Bala zuo la, Yehowa yuun nɔŋɛ en mɛ.
Kaalɛ Baabule zɛ’ɛsi wa:
Sɔsɛ ya sokere wa:
Mark yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Bem n pa’alɛ ti Mark yizuo nɛreba la yuun dela buntateba? (w10-E 3/15 6 ¶6–7 ¶1)
2. Daanse’ere Mark yuun ni ita la bem ‘soŋera’ Barnabas la Paul? (Tm. 13:5; w10-E 3/15 7 ¶5)
3. Zɛ-ani ti Mark yuun keŋɛ? (w10-E 3/15 8 ¶6-8) Bisɛ foote A
Foote A: Zɛ’ɛsi sise’esi ti daanse’ere Mark yuun keŋɛ
4. Bo makerɛ n pa’alɛ ti yɛla ase’a ti Mark yuun gulesɛ a gɔŋɔ la poan ta’an dɛna yelese’a ti Peter yuun yele en. (w08-E 2/1 26 ¶1)
Ti’isɛ Hon Wan Dekɛ Tum Tuuma Se’em
Baabule la ka yeti Mark yuun dela tuntuna bii nɔdɛ’ɛsa. Ge a yuun siregeri la amea soŋera nɛreba. Tomam me wan ta’an soŋera nɛreba la wani?
La boi bim ti Paul yuun ka bo Mark yɔ’ɔ ti a doose en ta mɔɔlɛ ge Mark yuun kelum pu’usa la Yehowa. To wan ta’an tɔɣesa Mark la wani to san ka le tara yɔ’ɔ tansugere la poan? Bisɛ foote B
Foote B
Ho wan eŋɛ la wani ta’an tɔɣesa Mark sukpe’ene la?
Ti’isɛ Taɣesɛ Yehowa Yele
Mark yele wa pa’alɛ mam ti Yehowa ani la wani?
Mark yele wa makɛ la Yehowa puti’irɛ la wani?
Beni n sɔi ti hon puurɛ pee la ban loe Mark pa’asɛ sɛba n wan naɛ la Krista di na’am saazuo la?
Zamesɛ Yɛla Pa’asɛ
Bem n basɛ ti Mark Yelesoma Gɔŋɔ la bɔna de to’ore?
Dekɛ Mark yele la pa’alɛ ho kɔma ŋmibega n tari nyuurɔ se’em.