49 PETER
A Yuun Eŋɛ Pa’alɛ Ti A Dela Taŋa
YEZU n yuun seke Simon la, a yuun bo en la yu’urɛ pa’asɛ. A yuun yele en yeti: “Ho dela Simon, Yon dayɔa. Ho yu’urɛ wan de’a la Kepas.” Greek poan, “Kepas” dela “Peter,” ti la vuurɛ dɛna “Taŋa.” Beni n sɔi ti Yezu yuun siɣɛ en bala? Taŋa kpe’em mɛ. Ba me ta’an wɔ̃rɛ tãsi dekɛ pa’asɛ mɛ yire. La ani wuu Yezu yuun boti a yeti Peter wan ana wuu taŋa la. A wan tara sukpe’ene ge me wan kpɛmesa mabiisi giila.
Peter yuun sirum eŋɛ pa’alɛ ti a dela taŋa yoi? Wuu gɔŋɔ wa Zuo 45 n pa’alɛ se’em la, saŋa ase’a, Peter n yuun ni zɔta dabeem la zuo, a yuun ni tara la puti’ira ayi ayi ge me ni ka kɔ’ɛ a puti’irɛ soŋa. Hali la bala za’a, Yezu yuun kelum tara sakerɛ ti Peter wan ta’an tara sukpe’ene.
Yezu kum isigere pooren, a yuun bo a tuntuneba la ninmu’urɛ tuunɛ n de ba mɔɔla yelesoma la. Peter yuun yese la a suure za’a tum tuunɛ wa. A yuun eŋɛ pa’alɛ ti a tari la sukpe’ene paa. Makerɛ, se’em ma’a ti ba yuun tara de’eŋo kãtɛ Yerusalem la, a yuun ze’ele la Yudadoma zo’e zo’e nɛŋan yele ba yeti bamam n ta’asɛ ti ba ku Mɛzaaya la. Se’em ma’a ti ba yuun wum a yetɔɣum la, ba zo’e zo’e suure yuun sa’am mɛ la ban eŋɛ sɛla la. Bala yuun soŋɛ ba mɛ ti ba basɛ ba be’em. Wana wa zuo, nɛreba n paɛ wuu 3,000 n yuun muse ko’om, dɛna Yezu podɔleba.
Bem n yuun soŋɛ Peter ti a tara sakerɛ, la sukpe’ene wuu Yezu n yuun yele se’em la?
Peter yuun basɛ ti na’am mɔɔlegɔ tuuma la n de yia a vom poan. Yezu yuun dekɛ la “saazuo sɔ’ɔlom la” saafidoma bo en. Wana pa’alɛ ti Peter yuun tari la yɔ’ɔ ti a yu’ɛ sore bo nɛreba sugumnɔɔrɛ butã ti ba zamesɛ yelesoma la ge me ta’an ta naɛ la Yezu di na’am saazuo. A yuun deŋɛ nɛŋa mɔɔlɛ bo la Yudadoma, taɣelɛ Samariadoma ge nyaa loŋe satima la, bii sɛba n daɣɛ Yudadoma la. Peter yuun keŋɛ la zɛse’esi n zaaɛ ta mɔɔlɛ yelesoma la ge kpemese mabiisi la giila. Saŋa ase’a, a pɔɣa yuun ni doose en mɛ. Hali a yuun keŋɛ ta kɛ̃’ɛra la Babilon, lan wan eŋɛ se’em ti a ta’an mɔɔlɛ bo sɛba n boi bim la.
Peter n yuun mɔɔli yelesoma la, yeledaaŋɔ zo’e zo’e n yuun paɛ en ge ti nɛreba me yaɛ en. Makerɛ, ba yuun nyɔkɛ eŋa, la tuntuneba basɛba la paɣɛ mɛ. La me yuun daɣɛ buyina ma’a. Yuda pu’usegɔ nɛŋadoma la yuun bo ba la nɔɔrɛ ti ba da le mɔɔla ge Peter yuun lebese ba yeti: “To wa nam la Yenɛ nɔɔrɛ ge dagɛ la nɛreba nɔya.” La boi bim ti ba yuun ŋmɛ ba mɛ ge ba yuun kelum mɔɔla la Yezu Krista yɛla, la Naayinɛ Na’am la yɛla.
Sɛba n yaɛ Kristakɔma la yuun lu la ba suure ti ba wan gu ba ti ba kan le mɔɔla. Wuu ton zamesɛ se’em zuo sɛka n tole la, ba yuun ku la Steven. Yuun pia bɔba pooren, ba yuun ku la Peter zɔ n de tuntuna Yames. Herod n yuun baŋɛ ti nɛreba la puurɛ pee mɛ la eŋa n basɛ ti ba ku Yames la, a yuun basɛ ti ba nyɔkɛ la Peter. Ba yuun ba la Peter nu’usi, paɣɛ en ge pigera en ti a da zɔ. Yezu yuun puɣum yele Peter yeti ba wan paɣɛ en ge ku en. Peter yuun ta’an ti’isa ti Yezu n yele sɛla la n yeti la tum.
Yu’unsunsua ti maleka keŋɛ Peter zɛ’an sarega la poan. Sankaŋa ti Peter giseri mɛ. Bala ti maleka la niɛ Peter, kɔ bãsi la basɛ ge tari en yese. Ba yuun doose la soogɛpa la nɛŋan, ta doose nayaŋa la n kãregɛ la yese ta bɔna yiŋa. Peter yuun nyaa eŋɛ la bem? A yuun ka zɔ yese Yerusalem, la wan eŋɛ se’em ti soogɛpa la da nyɛ en. A yuun tuɣum keŋɛ la zɛsɛka ti mabiisi la ni bɔna pu’usa ge zusa Yehowa la. Yeen makɛ bisɛ mabiisi la giila n yuun kpeŋe se’em, ban yuun nyɛ Peter la!
Peter yuun ka makɛ tamɛ Yezu n tabelɛ yele en sɛla la. Yezu yuun yele en yeti: ‘Kpemese ho suurɔ la giila’; “gura n piihe wa.” (Lu. 22:32; Yon 21:17) Peter yuun tari la sukpe’ene mɔɔla ge me kpɛmesa Naayinɛ nɛreba giila, zɛ’an woo ti a yuun keŋɛ. Ge a yuun ka di mi’a. Saŋa kayima a yuun ka naɛ la a mabiisi di, se’ere n sɔi la a yuun zoti la dabeem la nɛreba n wan yele sɛla. Tuntuna ayima yuun ka’am en mɛ bala zuo. Ge Peter yuun sirege la amea sakɛ ka’aŋɔ la ge dekɛ tum tuuma. A yuun kɔ’ɔn kpɛmesa la a mabiisi la giila. A yuun gulesɛ la gɔnɔ toyi Baabule la poan. Peter yuun tari la yelemɛŋɛrɛ pu’usa Yehowa ta paɛ se’em ma’a ti ba yuun ta paɣɛ en ge ku en la. Peter yuun eŋɛ pa’alɛ ti a tari la sukpe’ene. Wuu Yezu n yuun yele se’em la, a yuun eŋɛ pa’alɛ ti a sirum dela ‘taŋa’!
Kaalɛ Baabule zɛ’ɛsi wa:
Sɔsɛ ya sokere wa:
Peter yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Yezu yuun dekɛ la “saazuo sɔ’ɔlom la” saafidoma bo Peter. Peter yuun dekɛ saafidoma wa tum tuuma la wani? (Mt. 16:18, 19; ijwbq-E zaseŋɔ 124 ¶1-5) Bisɛ foote A
Foote A: Peter yuun mɔɔlɛ Na’am yelesoma la bo la Yudadoma n boi Yerusalem, Samariadoma n boi Samaria tiŋa, la satima n boi Kaesarea tiŋa
2. To eŋɛ la wani baŋɛ ti Peter yuun ka gãseri nɛreba, hali eŋa n yuun nan ka seke Kornelius la? (Tm. 10:5-7, 23; bt-E 69 ¶1, tiŋanɔɔrɛ yelesum) Bisɛ foote B
Foote B: Diimi Yopa yuun boi la kala
3. To eŋɛ la wani baŋɛ ti Paul n yuun ka’am Peter la, Peter yuun sakɛ mɛ ge tee? (w17.04-E 26-27 ¶15-17)
4. Bem zuo ti Peter yuun keŋɛ ta kɛ̃’ɛra Babilon? (it-E “Captivity” ¶24)
Ti’isɛ Hon Wan Dekɛ Tum Tuuma Se’em
Peter n yuun tɔɣeri la sukpe’ene bɔ’ɔra nɛrekuuŋɔ n boi Yerusalem la, a yuun bo ba la gilema. Bɔnkani poan ti la nara ti to tara sukpe’ene ge me bɔ’ɔra gilema?
La boi bim ti Peter yuun dela nɛrezure tansugere la poan ge Paul n yuun ka’am en la, a yuun sakɛ mɛ. To wan ta’an tɔɣesa Peter la wani? Bisɛ foote D
Foote D
Ho wan eŋɛ la wani ta’an tɔɣesa Peter sukpe’ene la?
Ti’isɛ Taɣesɛ Yehowa Yele
Peter yele wa pa’alɛ mam ti Yehowa ani la wani?
Peter yele wa makɛ la Yehowa puti’irɛ la wani?
Hon zamesɛ la bem Peter yele wa poan ti la basɛ ti hon puurɛ pee la ban loe en pa’asɛ sɛba n wan naɛ la Krista di na’am saazuo la?
Zamesɛ Yɛla Pa’asɛ
Peter yele la wan soŋɛ to la wani ti to dekɛ tomea delum Yehowa ge kan zɔta dabeem?
Bisɛ sɛla n boi Tooma a zuo 10 la n wan ta’an pa’alɛ ho yelese’a.