48 STEVEN
Buraa N Tari Sakerɛ N Kpe’em Ge Me Kɔ’ɔn Pirɛ La Zilam Vo’osum
STEVEN vom yuun boi la dɛŋa poan. Ba yuun parum bo Steven ti a tɔɣɛ la sɛla n ka nari ti a tɔɣɛ. Bala la, ba yuun tari en keŋɛ la Sanhedrin la ti a ta’an tɔɣɛ po’e amea. Sanhedrin la n yuun de Yudadoma kootin kãtɛ. Kootin kaŋa mea n yuun basɛ ti ba ku Yezu. Ŋmaresi fii pooren ti ba nyɔkɛ Steven. La boi bim ti Steven yuun mi ti ba me ta’an ku en ge dabeem yuun ka tari en. Baabule la yeti, “a nɛŋa kɔ’ɔn nɛɛ wo Yenɛ soŋoreba nɛŋa la.” Beni n sɔi ti Steven n ka di mi’a wuu tomam la ta’an bɔna bɔnkaŋa poan ge ti dabeem ka tara en? Sɛla n sɔi la, a yuun tari la sukpe’ene.
Baabule la yeti, Steven yuun “ka de’ene la Yenɛ sohoga ge te Yenɛ [vo’osum] la me daa bɔna la en.” Tuntuneba la n boi Yerusalem la yuun dekɛ bamea delum la Steven ge loe en ti a pa’asɛ sɛba n wan tɔ̃ta dia bɔ’ɔra nasedoma n boi tansugere la poan. Daarɛ deyima, Yudadoma basɛba sunsɔa n yuun nyie la Steven ti ba pɔsɛ ŋmɛ’ɛra nɔkpe’ene la en. Steven yuun pa’alɛ la gulesegɔ la vuurɛ soŋa soŋa, ti sɛba n yuun ŋmɛ’ɛri nɔkpe’ene la en la ka ta’an tɔɣɛ nyaŋɛ en. Bala yuun basɛ ti ba sunsɔa nyie mɛ ti ba basɛ ti nɛreba basɛba parum yɛla bo en Sanhedrin la poan. Sanhedrin la n wan gãkɛ nyaa ba ku Steven bii ba basɛ en.
Yezu yuun puɣum yele a podɔleba la yeti: “Ba han nyɔkɛ ya tare keŋɛ zen’an te ba gankera nɛreba la, da fabele ya te ya wan ta yeti bo. La han ta eŋɛ bala yele ya yelese’ere woo [ti Naayinɛ vo’osum] la dekɛ bo ya la.” (Mr. 13:11) Steven yuun ta’an mina Yezu n yele sɛla wa. La san dɛna bala, nɔkpe’ene kai ti la yuun soŋɛ en mɛ ti a tara sukpe’ene. Steven n yuun ze gãkereba la nɛŋan la, Yehowa vo’osum la n yuun soŋɛ en ti a paleŋa ka ɛ̃ɣera, ti nɛreba ti’isɛ ti a wɔ̃ni la maleka.
Kootin la yuun tari la gãkereba 71. Ba za’a me yuun dela pu’usegɔ nɛŋadoma n tari kpe’eŋo ge me pa’ala nɛreba Lɔɔ la. Ba yuun ni zĩ’a la deo kãtɛ poan. Ba yuun maalɛ ba zi’irego zɛ’ɛsi la ze’ele la zuɔ ta paɛ gɔbega, sugumnɔɔrɛ butã. Nɛreba bayi me n yuun ni bɔna bim gulesa sɛla woo n iti. Steven yuun ze la ba za’a nɛŋan. Nɛreba n yuun parum bo en ti a tɔɣɛ la sɛla n ka nari giisɛ Moses Lɔɔ la, la pu’usegɔ yire la. Nɛra yuun san tɔɣɛ yele aŋa taaba, ba ta’an gãkɛ en ti a nari la kum. Bala la, Kaiapas n yuun de malema nɛŋadaana la yuun soke Steven nyaa nɛreba la n tɔɣɛ sɛla la dela yelemɛŋɛrɛ yoi.
Steven yuun pɔsɛ tɔɣera la Israel diimi yɛla ge a yuun tɔɣɛ la Abraham yele yia. A me yuun tɔɣɛ la Yosef yele ge tĩɛ ba yeti Yosef mea suurɔ n yuun yaɛ en. Steven me yuun tɔɣɛ la Moses yele gilema sore poan. Hali Steven yuun tɔɣɛ la yelese’a ti Moses eŋɛ ti la ka gulesɛ bɔna Hebru Gulesegɔ la poan. Steven yuun le tĩɛ ba ti Israeldoma la yuun ka kelese Moses pa’alegɔ.
Yelese’a woo ti Steven yuun tɔɣɛ la pa’alɛ ti a ka tɔɣeri giisa Lɔɔ la ti Yehowa yuun dekɛ bo Moses la, bii suɣerɛ la, bii pu’usegɔ yire la. Ge a yuun basɛ ti ba baŋɛ ti sugumnɔɔrɛ zo’e zo’e ti Naayinɛ nɛreba yuun ni ka nam bo sɛba ti Yehowa ni loe ti ba pa’ala ba la.
Steven yuun tɔɣɛ la Naayinɛ yɛla bo kootin gãkereba n puɣum kɔ’ɛ ba puti’irɛ ti ba ku en
Steven yuun ta’an mina soŋa soŋa ti eŋa n tɔɣeri bɔ’ɔra nɛresɛba la kan basɛ en. Yehowa yuun dekɛ la a vo’osum la soŋɛ Steven ti a nyɛ sukpe’ene ta’an yele nɛreba wa Yehowa n geele ba se’em. A yuun yele ba yeti: “Ya yɛla kpagalom ya. . . . Ge ya me le zagahɛ Yenɛ [vo’osum], wo ya sɔyaabdoma n zagahɛ se’em la.” Sɛla n gaŋɛ bala dela, nɛreba wa n yuun ku se’em ti Moses yuun pu’ulum biŋe ti a wan wa’ana dɛna nɔdɛ’ɛsa gana eŋa la. Steven yuun yeti bamam n “parom bo” Yezu n de Mɛzaaya la “ge ko en.”
Sanhedrin nɛreba la n yuun wum bala la, ba sunsɔa n yuun ba’ɛ nyie la Steven. Ge Yehowa yuun lilige la sɛla n iti saazuo bo Steven ti la kpeŋe a giila. Steven yuun nyɛ la bem? A yeti: “Behɛ ya, mam nyɛ te yenɛ saazuo ha yu’ɛ, te Yezu, Asaala Dayɔa la ze’a Yenɛ zuɔ nu’o.” Steven n yuun tɔɣɛ bala ba’asɛ la, Sanhedrin nɛreba la yuun vaɛ isige mɛ la sunsɔa! Bem zuo? Daanse’ere ba yuun tĩɛ la sɛla n yuun eŋɛ ŋmaresi fii n tole, se’em ma’a ti ba yuun gãkera Yezu la. Yezu yuun yele ba yeti: “Ya wan ta nyɛ te Asaala Dayɔa zin’an se’em n gane zan’an la zuɔ.” (Mt. 26:64) Steven yuun basɛ ti la niɛ peelumi ti Yezu n tɔɣɛ sɛla la tum tuuma mɛ. Yezu nyaa boi la Yehowa zɛ’an saazuo sa!
Nɛreba la sunsɔa n yuun nyie ti ba gilege Steven ge tari en yese tiŋa la poan ti ba ta lobe en la kuga ku. Se’em ma’a ti ba yuun lɔbera Steven la, daanse’ere a yuun kelum nyɛta Yezu mɛ liligere poan. Bala la, a yuun yele Yezu yeti a to’e a vom la. A yuun nyaa zusɛ la Yehowa ti a eŋɛ sɛla bo en. A yuun yeti: “Bahɛ ba yelebeseto te ba eŋɛ wa.” Steven yuun dela Yezu yelemɛŋɛrɛ podɔla ge nyaa ki. Eŋa n de Kristabia n deŋɛ nɛŋa ti Baabule la pa’alɛ ti ba ku en mɛ a sakerɛ zuo. Dadendaarɛ la, buraa ayima n yuun boi bim ge nyɛ sɛla woo n eŋɛ la. Eŋa me yuun boti la ba ku Steven. Ge buraa wa yuun ka tamɛ sɛla ti Steven yuun yele ge nyaa ki la. To wan zamesɛ buraa wa yɛla zo’e zo’e gɔŋɔ wa zuo 50, 51, la 53 poan.
Kaalɛ Baabule zɛ’ɛsi wa:
Sɔsɛ ya sokere wa:
Steven yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Beni n sɔi ti tuntuneba la yuun loe Steven, la buraasi basɛba n “tare yamsomɔ ge te Yenɛ [vo’osum] la me bɔna la ba” ti ba tɔ̃ta dia? (Tm. 6:3-5; bt-E 41-42 ¶17-18) Bisɛ foote A
Foote A
2. Steven yuun tɔɣɛ Moses yele la wani ti la ka bɔna Baabule la zɛsɛka me poan? (bt-E 48 ¶13, tiŋanɔɔrɛ yelesum)
3. Bem n yuun basɛ ti dabeem ka tara Steven, se’em ma’a ti ba yuun mɛlesera en la? (w18.10-E 32)
4. Tooma 7:59 n yele sɛla la pa’alɛ ti Steven yuun zusɛ la Yezu yoi? (w05-E 1/1 31)
Ti’isɛ Hon Wan Dekɛ Tum Tuuma Se’em
Steven dela “se’em n daa ka de’ene la Yenɛ sohoga ge te Yenɛ [vo’osum] la me daa bɔna la en.” Naayinɛ me yuun iti la “som bɔ’ɔra en ge bɔ’ɔra en paŋa.” Ge Steven yuun sakɛ mɛ tɔ̃ta dia. (Tm. 6:2, 5, 8) Mabiisi san mina yɛla itigɔ, bii ba tari la yɔ’ɔ tuna tuuma tansugere la poan, ba wan eŋɛ la wani ta’an tɔɣesa Steven? Bisɛ foote B
Foote B
Steven yuun zusɛ bo sɛba n yuun mɛleseri en la mɛ. Zina beere wa, nɛreba san mɛlesa tɔ bii ba giiseri to mɛ, to wan eŋɛ la wani pa’alɛ ti to nɔŋɛ ba? (Mt. 5:44-48)
Ho wan eŋɛ la wani ta’an tɔɣesa Steven sukpe’ene la?
Ti’isɛ Taɣesɛ Yehowa Yele
Steven yele wa pa’alɛ mam ti Yehowa ani la wani?
Steven yele wa makɛ la Yehowa puti’irɛ la wani?
Beni n sɔi ti hon puurɛ pee la ban loe Steven pa’asɛ sɛba n wan naɛ la Krista di na’am saazuo la?
Zamesɛ Yɛla Pa’asɛ
Zamesɛ baŋɛ to wan eŋɛ se’em ta’an dekɛ sukpe’ene tɔɣɛ to sakerɛ yɛla ti gilema bɔna bim wuu Steven la.
“Stephen—‘Full of Divine Favor and Power’” (bt-E 47-50 ¶9-19)
Zina beere wa, ba san mɛlesa Yehowa nɛreba, ba wan eŋɛ la wani ta’an tara sukpe’ene wuu Steven?