40 NEHEMIA
A Yuun Le Mɛ Lalesi La Mɛ
NEHEMIA yuun kɛ̃’ɛri la Susa n boi Persia tiŋa ge eŋa n yuun kɔ’ɔn bɔta ti a bɔna zɛsɛka paa dela Yerusalem. A yuun nɔŋɛ Yerusalem mɛ se’ere n sɔi la, Yehowa pu’usegɔ yire la yuun boi la bilam. Naayinɛ nɛreba yuun boi la yamenɛ poan ti la yue ge nyaa ta nyɛ yɔ’ɔ lebe Yerusalem. Ge yelemɛŋɛrɛ pu’usegɔ yuun nan ka nyɛti nɛŋa tɔlega. Yerusalem lalesi la yuun lui la za’a. Sankaŋa la, ba san ka mɛ lalega kaɛ tiŋa, la ni dɛna la naana ti ba dindoma zabɛ nyaŋɛ ba. Bala zuo la, nɛreba yuun ni ka bɔta ti ba kɛ̃’ɛra tiŋa n ka tari lalesi poan.
Nehemia yuun dela nɛrezure Persia tiŋa poan. A yuun tari la yelemɛŋɛrɛ tuna bɔ’ɔra Persia Naba Artasaset. Sɛla n gani za’a dela, Nehemia yuun tari la yelemɛŋɛrɛ pu’usa Yehowa. Daarɛ deyima, Nehemia suɔ n yuun keŋɛ ta kaɛ en bisɛ ge yele en Yerusalem n boi “sunsagaŋɔ kantɛ” poan se’em. A yuun yeti ba kelum ka mɛ tiŋa la lalesi la ge ti nɛreba la me giila kɔ’ɔsɛ.
Nehemia suure yuun ba’ɛ sa’am mɛ. A yeti: “Mam zin’ire la teŋa kele, kele dabeha.” A yuun zusɛ la Yehowa ge belum en ti a tĩɛ A nɛreba yele ge soŋɛ ba. Pooren, se’em ma’a ti Nehemia yuun bɔna bim bɔ’ɔra Artasaset daam la, naba la yuun soke en la sɛla n sɔi ti a nɛŋa sa’am bala. Dabeem n yuun tari Nehemia ge a yuun lebese naba la mɛ. A yuun yele naba la sɛla n iti Yerusalem. Artasaset yuun soke en la sɛla ti a bɔta. Nehemia yeti: “[Bilam bilam] te mam sohɛ saazuo Yenɛ wa.” A yuun nyaa yele naba la ti a bo en yɔ’ɔ ti a basɛ Persia ge keŋɛ Yerusalem ta soŋɛ ti ba mɛ lalesi la, la nayasi la. Naba la yuun bo Nehemia la yɔ’ɔ ti a keŋɛ!
Nehemia yuun keŋɛ la Yerusalem. Sore la yuun zaaɛ mɛ ge ti dɛŋa me yuun ta’an paɛ en. Eŋa n yuun paɛ bim la, a yuun isige la yu’uŋɔ kaɛ bisɛ lalesi la n ani se’em. A yuun nyaa laɣesɛ la nɛreba la ge kpemese ba giila ti ba laɣum tum tuunɛ la. Eŋa me yuun laɣum tum tuunɛ la mɛ ti la dɛna makesonɛ bɔ’ɔra nɛreba la. Nɛreba zo’e zo’e yuun laɣum soŋɛ tuunɛ la mɛ maɣesɛ wuu nabiisi, buntateba, la nɛrezureba basɛba. Hali nabiisi la ayima, la a poyɔɔsi yuun laɣum soŋɛ tuunɛ la mɛ.
Yudadoma la yuun tari la dataasi n ka boti Yerusalem tara lalesi n wan gu’ura ka. Yia la, ba yuun ɛ̃regeri Yudadoma la mɛ. Dataasi la ayima yuun yeti hali pĩihɔ ta’an gbi lalesi la ti Nehemia, la a nɛreba la mɛta la. Nehemia yuun ka kelese ba ge a yuun tuɣum kpemese la eŋa la sɛba n tuni la giila.
La boi bim ti Nehemia dataasi la yuun ɛ̃regeri ge vũusa en mɛ ge a yuun kelum mɛ Yerusalem lalesi la
Wana yuun basɛ ti ba dataasi la sunsɔa n nyie. Lalesi la n yuun mɛ paɛ pusuka la, ba dataasi la yuun maasum ti ba zabɛ mɛ la ba! Nehemia yuun tiregɛ mɛ te’ele tiŋa la. Ba dataasi la n yuun baŋɛ wana wa la, ba yuun eŋɛ ba puti’irɛ ti ba kan dekɛ zaberɛ lɔɣɔrɔ zabɛ la ba. Kɔ’ɔn pɔsɛ sankaŋa yɛ’ɛsa, Nehemia la a nɛreba la pusuka yuun zãli la ba zaberɛ lɔɣɔrɔ gu’ura tiŋa la ge ti sɛba n gee la mɛta lalesi la. Ge dataasi la yuun ka basɛ.
Ba yuun basɛ ti buraa n de pumpɔreŋɔ nɔdɛ’ɛsa tiregɛ ti a pã’asɛ Nehemia. A yuun yeti Nehemia boi la dɛŋa poan, bala la a keŋɛ pu’usegɔ yire la poan ta suɣɛ. Ge Naayinɛ Lɔɔ la yuun ka bo yɔ’ɔ ti nɛra kɛ̃ pu’usegɔ yire la poan san daɣena a dela malemadaana. Bala la, Nehemia yuun zaɣesɛ mɛ. A yuun yeti: “Boraa n ane wo mam wa wan sakɛ zɔ?” A yuun kɔ’ɔn tuna mɛ, se’ere n sɔi la a yuun mi ti a iti la sɛla ti Yehowa bɔta ge ti Yehowa me soŋera ba. Dabesa 52 pooren ti ba yuun mɛ lalesi la ba’asɛ. Vi n yuun kɛ̃ ba dataasi la.
Nehemia yuun le nara ti a tara la sukpe’ene ta’an soŋɛ a nɛreba la ti ba pu’usa Yehowa soŋa soŋa. Makerɛ, a yuun wum ti buntateba la ni dekɛ la ba ligeri pemese nasedoma ge ni basɛ ti ba yɔ dɔɣelega. Bala la, a yuun dekɛ la sukpe’ene yele ba ti bala ka ani soŋa. Pooren, a yuun baŋɛ ti nɛreba la basɛba yuun di la pɔɣesɛba n ka pu’useri Yehowa. Bala la, a yuun dekɛ la sukpe’ene kaɣɛ ba ge yele ba ti ba galum la Naayinɛ lɔɔ la.
Saŋa kayima, nɛreba la n yuun baŋɛ ti ba ka nam Yehowa nɔɔrɛ la, ba suure n yuun sa’am ge Nehemia yuun buɣelɛ la ba suure. A yuun yele ba yeti: “Na’ayenɛ popeelom n de [ya] paŋa.” Nehemia yuun mi ti lalesi la ta’an gu nɛreba la. Ge a yuun boti la a basɛ ti ba baŋɛ ti sɛla n wan basɛ ti ba sirum nyɛ gu’a dela ban wan pu’usa Yehowa ge tara pupeelum la. Ta paɛ zina, pupeelum buna wa n buɣeli Yehowa yamesi suure ge basɛ ti ba tara sukpe’ene.
Kaalɛ Baabule zɛ’ɛsi wa:
Sɔsɛ ya sokere wa:
Nehemia yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Nehemia yuun tuni la bem tuunɛ bɔ’ɔra naba la? (w10-E 7/1 9 ¶5-7) Bisɛ foote A
National Museum of Iran, Tehran, Iran/Bridgeman Images
Foote A: Foote la n boi dangoone la poan la pa’alɛ la se’em n bo’ori Darius Bunpaŋa la daam. Darius Bunpaŋa la dela Artasaset sɔyaaba
2. Salum poyɔɔsi la yuun boi ba to’ore la wani la Tekoa nɛrezureba la? (Ne. 3:5, 12; w19.10-E 23 ¶11)
3. Sodeni poan ti sɛba n yuun zɛɛri tuuma lɔɣɔrɔ la tara “nu’yeŋɔ tona mea tooma la, ge zanla zaberɛ lɔkɔ nu’o koyema la” poan? (Ne. 4:17, 18; w06-E 2/1 9 ¶1) Bisɛ foote B
Foote B
4. Beni n sɔi ti Nehemia suure yuun sa’am la Yudadoma la kɔma n yuun ka ta’an tɔɣera Hebru yetɔɣum la? (Ne. 13:23-27; w16.10-E 14 ¶4)
Ti’isɛ Hon Wan Dekɛ Tum Tuuma Se’em
Keendoma wan tɔɣesa Nehemia la wani ta’an . . .
dekɛ bamea delum Yehowa? (Ne. 1:4-11; 4:14; 13:1-3)
naɛ la mabiisi tuna? (Ne. 4:15, 21-23)
ma’ɛ bamea kɛlesa mabiisi? (Ne. 5:1-7) Bisɛ foote D
Foote D
Nehemia yele la soŋɛ to la wani ti to baŋɛ ti to san dekɛ yɛla ase’a basɛ ta’an tuna zo’e zo’e bɔ’ɔra Yehowa, a wan kã bo to?
Ho wan eŋɛ la wani ta’an tɔɣesa Nehemia sukpe’ene la?
Ti’isɛ Taɣesɛ Yehowa Yele
Nehemia yele wa pa’alɛ mam ti Yehowa ani la wani?
Nehemia yele wa makɛ la Yehowa puti’irɛ la wani?
Yehowa san ta isige Nehemia kum poan, mam wan soke en la bem?
Zamesɛ Yɛla Pa’asɛ
Nehemia yele la basɛ ti to baŋɛ ti zusega tari paŋa la wani?
“God Answered His Prayer” (“Bible Study Activities” n boi jw.org)
Vidiyo wa poan, bisɛ Nehemia n yuun eŋɛ pa’alɛ ti a tari sukpe’ene se’em, nɛreba n yuun tiregeri ti ba gu tuunɛ la.
Nehemia: ‘Yehowa Pupeelum N De Ho Paŋa’—Bɔberɛ I—Ase’a (5:22)