31 ISRAEL TIŊA PUGELA LA
Pugela N Dekɛ Sukpe’ene Tɔɣɛ Naayinɛ Yele
TO KA mi pugela wa yu’urɛ ge to mi la ninmu’urɛ yele n yuun eŋɛ a vom poan. A yuun dela pugela n kɛ̃’ɛri Israel, se’em ma’a ti Yehoram dɛna naba la. Naba wa, la a nɛreba yuun eŋɛ la kpenkpasi la Yehowa ti A nyaa basɛ ti Siriadoma kena zabera la ba, fãara ba lɔɣɔrɔ ge me ni dekɛ nɛreba la basɛba ti ba dɛna yamesi. Daarɛ deyima ti Siriadoma la nyɔkɛ pugela wa tari en keŋɛ Siria.
Dabeem yuun ta’an tara pugela wa paa! A deodoma la me suure yuun ta’an sa’am ti ba fabela a yele. A yuun nyaa dela Naaman n de soogɛpa nɛŋadaana la yameŋa. Naaman yuun dekɛ en bo la a pɔɣa ti a tuna bɔ’ɔra en. Pugela wa yuun tiregɛ mɛ ta’an kɛ̃’ɛra zɛkana wa poan. Daanse’ere, a yuun baŋɛ ti nɛresɛba n boi Naaman yire la suure n sa’am. Naaman yuun tari la bãyaalega. A yuun dela kunkone. Bã’a la yuun ta’an basɛ ti nɛra inya eŋɛ nɔra ge ti saŋa ase’a, la ni ka tara tibegɔ.
La boi bim ti a yuun kɛ̃’ɛri mɛ la nɛresɛba n ka pu’useri Yehowa ge a yuun tari giile bɔ’ɔra ba mɛ ge me tara sukpe’ene
Pugela wa yuun fabeli la nɛreba yele. A yuun mi ti Naaman dela Israeldoma dima ge la yuun daam en mɛ la sɛla n paɛ Naaman, la a pɔɣa la. Pugela wa yuun mi ti Naaman wan ta’an nyɛ tibegɔ. Daanse’ere pugela wa dɔɣereba yuun ta’an yele en Yehowa n basɛ ti a nɔdɛ’ɛsa Elisa tum yelekiresi se’a. Ge a yuun ka mi nyaa Elisa tabelɛ tibɛ nɛra n de kunkone. Hali la bala za’a, pugela wa yuun tari sakerɛ ti Yehowa Naayinɛ wan bo a nɔdɛ’ɛsa la paŋa ti a ta’an tibɛ Naaman.
Pugela wa yuun ta’an ti’isa nyaa a tɔɣɛ Yehowa yele bo ba bii a da tɔɣɛ. A yuun mi ti yele ta’an paɛ en a san tɔɣɛ Yehowa yele. Naaman yuun kaaberi la Siria baɣerɛ n de Arimon. Naaman me yuun ni naɛ la Siria naba keŋɛ Arimon pu’usegɔ yire la poan ta kaabɛ. La ani wuu Siriadoma la yuun bisɛ ti baɣerɛ wa n basɛ ti saa niira. Pugela wa yuun ka mi lan wan ana Naaman se’em a san tɔɣɛ Yehowa Naayinɛ yɛla bo en. A san yele Naaman ti Yehowa wan ta’an tibɛ en, a sunsɔa ta’an nyie, se’ere n sɔi la Naaman yinɛ la ka tabelɛ eŋɛ bala. Pugela wa yuun zusɛ la Yehowa ti a bo en sukpe’ene. A yuun nyaa yele Naaman pɔɣa yeti: “Mam daana han keŋɛ ne nɔtɔgɔha la n boe Samaria teŋan la zen’an, a wan tebɛ ne a iŋsagaŋɔ!”
Pugela wa n tɔɣɛ sɛla Baabule la poan za’a n bala ge bala n yuun basɛ ti Naaman nyɛ tibegɔ. Pugela wa n yuun tɔɣɛ bo Naaman pɔɣa ba’asɛ la, Naaman yuun yele la a tiŋa la naba, Ben Hadad sɛla ti pugela la yele la. Siria naba yuun gulesɛ la gɔŋɔ bo Naaman ti a tari ta bo Israel Naba Yehoram. Gɔŋɔ la poan, Ben Hadad yuun yele Yehoram ti a tibɛ Naaman.
Naaman n yuun keŋɛ ti a ta tibɛ amea la, a yidoma, la a yamesi yuun guri la sɛla n wan eŋɛ. Yelemɛŋɛrɛ, pugela wa yuun kɔ’ɔn zusera la Yehowa ge bɛlena en ti a eŋɛ pa’alɛ Naaman ti Eŋa n sirum de yelemɛŋɛrɛ Naayinɛ la. Daanse’ere, dabesa zo’e zo’e bii bakwai zo’e zo’e pooren ti Naaman yuun ta lebe na. Ti’isɛ bisɛ a yidoma, la a yamesi puurɛ n yuun pee se’em, ban yuun nyɛ ti a bã’a la basɛ mɛ la! A inya la n yuun sa’am la, nyaa ani la filam ge nyɛsegɛ wuu bia inya la.
Makɛ bisɛ pugela wa n yuun ma’ɛ amea se’em kelese sɛla woo n eŋɛ la. A yuun baŋɛ ti, Elisa to’e Naaman soŋa mɛ ge pa’alɛ Naaman ti a eŋɛ sɛla ge Naaman sunsɔa yuun nyie mɛ la Elisa n yele en sɛla la. Ti Naaman yamesi belum en ti a doose Elisa n pa’alɛ en sɛla la. Naaman yuun bɔkɛ ti la nari ti a sirege amea ge eŋɛ bala. Se’em ma’a ti Naaman yuun muse Yordan Kolaa la poan sugumnɔɔrɛ buyopɔi la, a bã’a la yuun basɛ mɛ. Ge sɛla n yuun basɛ ti pugela wa puurɛ pee paa dela Naaman n yuun eŋɛ sɛla, se’em ma’a ti a bã’a la basɛ la. Naaman yuun nyaa naɛ la en mɛ ti ba laɣum pu’usa Yehowa Naayinɛ!
Pugela wa n yuun dekɛ sukpe’ene tɔɣɛ Naayinɛ, la a nɔdɛ’ɛsa la yele la n yuun basɛ ti yelesonɛ wa eŋɛ. Yelemɛŋɛrɛ la dela to ka mi a yu’urɛ ge Yehowa mi. To san tɔɣesa a sukpe’ene la ge me tara sakerɛ, to wan ta nyɛ en tinpaalega la poan, Yehowa san ta isige en kum poan. Ti’isɛ bisɛ to puurɛ n wan ta pee se’em ti to seke en, baŋɛ a yu’urɛ ge ti a tɔɣɛ a vom yɛla zo’e zo’e bo to!
Kaalɛ Baabule zɛ’ɛsi wa:
Sɔsɛ ya sokere wa:
Israel tiŋa pugela la yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Daanse’ere, beni n sɔi ti Siriadoma la n yuun iti yelese’a la yuun basɛ ti pugela la paleŋa ɛ̃ɣera la ba? (w96-E 5/15 8 ¶3) Bisɛ foote A
Courtesy of Musée du Louvre, Paris
Foote A: Diimi Siria baɣerɛ. Daanse’ere Arimon baɣerɛ la n bala
2. Kunkom bã’a wan ta’an sa’am nɛra inya la wani? (it-E “Leprosy” ¶3-5)
3. Beni n sɔi ti Elisa yuun zaɣesɛ Naaman bo’olum la? (w05-E 8/1 9 ¶2)
4. Beni n sɔi ti Elisa yuun sakɛ ti Yehowa wan di sugeri bo Naaman, hali la eŋa n ni ku’ure Arimon baɣerɛ la nɛŋan la? (2 Na. 5:18, 19; w05-E 8/1 9 ¶3) Bisɛ foote B
Foote B
Ti’isɛ Hon Wan Dekɛ Tum Tuuma Se’em
Naaman yuun dela Siria soogɛpa la n yuun zaberi la Israel la nɛŋadaana ge Yehowa yuun kelum tibɛ en mɛ. Bala pa’alɛ hɔ Yehowa n ka gãseri nɛreba se’em la wani? La me pa’alɛ hɔ Eŋa n zoti nɛreba nimbũ’ɔ se’em la wani? Bisɛ foote D
Foote D
Israel tiŋa pugela la makesonɛ la wan soŋɛ ho la wani dabeem san tara hɔ ti ho di sɛɛra bo nɛreba?
Ho wan eŋɛ la wani ta’an tɔɣesa Israel tiŋa pugela la sukpe’ene la?
Ti’isɛ Taɣesɛ Yehowa Yele
Israel tiŋa pugela la yele wa pa’alɛ mam ti Yehowa ani la wani?
Israel tiŋa pugela la yele wa makɛ la Yehowa puti’irɛ la wani?
Yehowa san ta isige Israel tiŋa pugela wa kum poan, mam wan soke en la bem?a
Zamesɛ Yɛla Pa’asɛ
Israel tiŋa pugela la yu’urɛ n ka boi Baabule la poan la pa’alɛ ti a yele ka pakɛ Yehowa me yoi?
“Why Are Some Bible Characters Left Unnamed?” (w13-E 8/1 10)
Zamesɛ baŋɛ bunbilipaalesi n wan ta’an tara sukpe’ene se’em wuu Israel tiŋa pugela la.
a Pugela wa yuun san zo’e la kutɛ ge nyaa ki, a wan ta isige dɛna la pɔɣekutɛ.