“Na’ayenɛ, Pekɛ A Nini”

NƆDƐ’ƐSA Elisa la a tuntuna n boi Dotan. Tiŋa wa boi la bũ’ɔ poan ti zɔya kaɛ ka. Ba yuun mɛ la lalesi kaɛ tiŋa la ti la gu’ura ka. Daarɛ deyima bulika asubaa ti Elisa tuntuna la isige yese yiŋa ge nyɛ sɛla ti dabeem kɛ̃ en! Siria soogɛpa n tari paŋa n yuun wa’an yu’uŋɔ la na, la ba yiiri, la zaberɛ toto. Ba yuun kaɛ tiŋa la mum mɛ. Soogɛpa wa yuun wa’an ti ba nyɔkɛ la Yehowa nɔdɛ’ɛsa Elisa. Dabeem n yuun kɛ̃ tuntuna la ti a zɔ ta yele Elisa ti ba boi la dɛŋa poan.

Dɛŋa yuun tabelɛ paɛ Elisa mɛ. Yuuma n tole, Yehowa yuun yele Eliya ti a kumesɛ Elisa, la wan eŋɛ se’em ti a ta’an soe tuna Eliya tuuma la. Buraasi siyi wa yuun laɣum tuna mɛ Naba Ahab, Pɔɣenaba Yezebel, la ba bia Ahazia saŋa. Nɛreba wa yuun yaɛ Yehowa nɔdɛ’ɛseba mɛ ge bɔta ti ba ku ba. Eliya la Elisa n yuun laɣum kena ti bugum toto yuun wa’ana dekɛ Eliya keŋɛ. Kusebego kãtɛ n yuun dekɛ Eliya keŋɛ. Daanse’ere Elisa yuun ka le nyɛ Eliya ge a yuun kelum tuna la tunse’a ti Eliya kumesɛ en ti a tuna la. Elisa n yuun boi Yehowa “nɔtɔgɔheba la” nɛŋan ti ba yese Baal pu’usegɔ Israel tiŋa poan.—2 Na. 2:15.

Yehowa yuun bo Elisa la paŋa ti a tum yelekiresi zo’e zo’e. Yelekiresi wa ayima dela Elisa n yuun tibɛ Naaman n de Siria naba, Ben Hadad soogɛpa nɛŋadaana la. Ben Hadad yuun ka eŋɛ pa’alɛ ti a puurɛ pee ya la Elisa n tibɛ Naaman la ge yuun kelum bɔta ti a zabɛ la Israel. Yehowa yuun ni pa’alɛ Elisa la zɛsɛka ti Ben Hadad maasum ti a ta zabɛ, ti Elisa me yuun ni yele Israel naba la ti ba da keŋɛ bim. Ben Hadad sunsɔa yuun nyie mɛ ti a soke a yamesi la ti a baŋɛ mina n ni yɛta a dindoma eŋa n maasum ti a eŋɛ sɛla. A yamesi la ayima yuun yele en yeti, la dela Yehowa nɔdɛ’ɛsa Elisa n “ne yele Israel naba wa hom gan ho gɔrɔgɔ zuo maahena se’em.” Ben Hadad n yuun baŋɛ ti Elisa boi la Dotan la, a yuun tum la a soogɛpa ti ba ta nyɔkɛ en.

Elisa tuntuna la n yuun deŋɛ nɛŋa nyɛ Siria soogɛpa la. A yuun zɔ keŋɛ la nɔdɛ’ɛsa la zɛ’an ta kaasɛ yeti: “N daana, to wan eŋɛ la wane?” Elisa n nyɛ dabeem n sãɛ a tuntuna la se’em la, a yele en yeti: “Da zɔta dabeem.” A le yele en la sɛla n kpemeseri giila. A yuun yeti: “Sɛba n boe la tomam la gane sɛba n boe la bama la.” Daanse’ere la yuun eŋɛ tuntuna wa la pakerɛ la Elisa n yele sɛla la. La wan eŋɛ la wani ti nɛreba bayi ta’an nyaŋɛ soogɛpa n zo’e wana? Bala la, Elisa yuun zusɛ yeti: “Na’ayenɛ, pekɛ a nini te a nyɛ.”

Bilam bilam ti Yehowa lebese en. A yuun basɛ ti tuntuna la nyɛ la malesi n kaɛ ba mum. Malesi wa yuun zo’e mɛ ge tara paŋa gana soogɛpa la. Baabule la yeti: “Zɔya la zan’an perɛ mɛ la yiiri la i toroto n de bugum nya kae Elisa”!

Siria soogɛpa la yuun ka nyɛ Yehowa malesi la. Ba yuun kɛ̃ la tiŋa la poan ti ba nyɔkɛ Elisa. Bala la, Elisa yuun zusɛ Yehowa ti a basɛ ti ba fɔ. Bala ka pa’alɛ ti Yehowa yuun sirum basɛ ti ba lebege la fɔɔsi ge ba yuun ka ta’an bɔkɛ sɛla ti ba nyɛta la. Elisa yuun yele ba yeti, a wan tari ba keŋɛ tiŋa la poan ta pa’alɛ ba burasɛka ti ba ɛɛra la. A yuun tari ba keŋɛ la mɛɛla 10 ta paɛ Samaria ge nyaa yele Yehowa ti a basɛ ti ba le nyɛta. Ban yuun nyaa nyɛti la, ba yuun baŋɛ ti ba boi la Samaria. Israel naba la yuun boti la a ku ba. Ge Elisa yuun yele naba la ti a zɔ ba nimbũ’ɔ ge bo ba sɛla ti ba di ge basɛ ti ba lebe Siria. Baabule la yeti: “Yehe bilam, [Siriadoma] wa ka le wa’ana gbirige Israel teŋa.”

Nɔdɛ’ɛsa la n yuun tari sakerɛ la zuo, a yuun mi ti malesi la boi mɛ. Eŋa n yuun tum yuuma zo’e zo’e bo Yehowa se’em la yuun basɛ ti a mina ti Yehowa la a malesi la kɔ’ɔn bɔna mɛ ge me bɔta ti ba soŋɛ Naayinɛ yamesi n tari yelemɛŋerɛ. Elisa n yuun mi wana wa la yuun basɛ ti a tara la sukpe’ene. Tomam me wan ta’an tara sukpe’ene bala.

Kaalɛ Baabule zɛ’ɛsi wa:

• 2 Nadoma 6:​8-23

Sɔsɛ ya sokere wa:

Elisa yuun eŋɛ la wani pa’alɛ ti a tari sukpe’ene?

1. 2. Beni n sɔi ti Elisa yuun ɛɛra Eliya paŋa la “sugumnɔɔren boyi”? (2 Na. 2:9; w03-E 11/1 31)

   Lebese

2. 3. Beni n sɔi ti to wan ta’an yeti Yehowa yuun ka basɛ ti Siriadoma la sirum fɔ? (it-E “Blindness” ¶6)

   Lebese

3. 4. Bem tuuma ti nɔdɛ’ɛsa Elisa yuun tum? (it-E “Elisha” ¶27-28)

   Lebese

Ti’isɛ Hon Wan Dekɛ Tum Tuuma Se’em

• Ton mi ti malesi la boi mɛ la to la basɛ ti to tara sukpe’ene la wani? Bisɛ foote B

  Lebese

  

• Keendoma wan ta’an tɔɣesa Elisa n yuun kpemese a tuntuna la giila se’em la, la wani?

  Lebese

• Ho wan eŋɛ la wani ta’an tɔɣesa Elisa sukpe’ene la?

  Lebese

Ti’isɛ Taɣesɛ Yehowa Yele

• Elisa yele wa pa’alɛ mam ti Yehowa ani la wani?

  Lebese

• Elisa yele wa makɛ la Yehowa puti’irɛ la wani?

  Lebese

• Yehowa san ta isige Elisa kum poan, mam wan soke en la bem?

  Lebese

Zamesɛ Yɛla Pa’asɛ

Mabiisi ti ba nan bo ba tuunɛ tansugere la poan wan ta’an zamesɛ la bem Elisa zɛ’an?

Tara Gilema Bɔ’ɔra Sɛba N Kumesɛ La (4:48)

Bisɛ hon wan ta’an le zamesɛ sɛla Elisa yele la poan.

“Elisha Saw Fiery Chariots—Do You?” (w13-E 8/15 28-30)