Tara Bɔkerɛ Ta’an Kɔ’ɛ Ho Puti’irɛ Soŋa

1-2. To san tara bɔkerɛ, la vuurɛ dela bem ge la me wan soŋɛ to la wani?

NƐRA tabelɛ eŋɛ ho sɛla ti la ana wuu a zeem ho mɛ? Nɛra tabelɛ siisum yele bo ho bii eŋɛ sɛla ti la daam hɔ? Bii yele tabelɛ paɛ hɔ ti la basɛ ti dabeem tara hɔ? Yele aŋa taaba san tabelɛ paɛ hɔ, ho wan bɔkɛ ti la daɣɛ naana ti ho tɔɣɛ bii eŋɛ sɛla n nari bɔnkaŋa taaba poan. Ge yelesonɛ la dela, Baabule la pa’alɛ ti to san tara bɔkerɛ la wan soŋɛ tɔ bɔnkaŋa taaba poan.

² To san tara bɔkerɛ to ni ka kɔ’ɛ to puti’irɛ doose la yelese’a ti to nyɛta ma’a ge to ni bɔta la to ti’isɛ baŋɛ yele la soŋa. Makerɛ, to ni bɔta la to bɔkɛ sɛla n sɔi ti sɛla eŋɛ bii sɛla n sɔi ti daanse’ere nɛra eŋɛ eŋa n eŋɛ sɛla la. To san tara bɔkerɛ, la wan soŋɛ tɔ ti to tara yɛm. Makerɛ, bɔkerɛ wan soŋɛ tɔ ti to ‘tana to nɔɔrɛ tara’ ge me mina se’em ma’a ti la nara ti to ‘ana siim.’ (Mag. 10:19; Ym. 4:4) La wan soŋɛ tɔ ti to dita sugeri bɔ’ɔra nɛreba ge me kan ita sunsɔa kalam kalam. Bɔkerɛ wan le soŋɛ tɔ ti to sakɛ to’e ka’aŋɔ. (Mag. 19:20) To san tara bɔkerɛ, la ni basɛ ti Yehowa puurɛ pee mɛ. Ge daɣɛ bala ma’a, la ni basɛ ti to vom ana la soŋa ge me soŋɛ nɛreba. To san tara bɔkerɛ ge ti yele puɣum daam to la se’em me, to kan ba’ɛ eŋɛ sunsɔa ta eŋɛ sɛla n ka nari. Basɛ ya ti to sɔsɛ ya yɛla atã Baabule la poan n pa’alɛ ti to san tara bɔkerɛ, la wan soŋɛ tɔ ti to siregera tomea, dekɛ tomea delum Yehowa ge kan ita sunsɔa kalam kalam.

SIREGERA HOMEA GE DA ZƐKERA HOMEA

3. Ani n de Naaman?

³ To san bɔta ti to ta’an ita sɛla n ani soŋa, la nari ti to siregera tomea. (1 Pe. 5:5) To san tara bɔkerɛ, la wan soŋɛ tɔ ti to ta’an eŋɛ bala. Wani wani? Geele Naaman yele la bisɛ. A yuun boi la Siria tiŋa n ka zaaɛ la Israel. Naaman yuun dela nɛrezure, eŋa n yuun de Siria soogɛpa la nɛŋadaana. Ge a yuun ŋma la konkom ti a inya kɔ’ɔn sa’am.—2 Na. 5:1.

4. Naaman yuun eŋɛ la bem pa’alɛ ti a tari bɔkerɛ?

⁴ Naaman pɔɣa yuun tari la Israel pugela ti a dɛna a pɔsɔɔ. Pugela wa yuun yele Naaman pɔɣa ti nɔdɛ’ɛsa boi Israel n wan ta’an tibɛ a sira bã’a la. (2 Na. 5:​2, 3) Naaman yuun ta’an ti’isɛ ti, ‘bia wa n de pɔsɔɔ ge ze’ele tomam dindoma tiŋa wa wan ta’an pa’alɛ mam la bem ti la soŋɛ mam?’ Ge Naaman yuun ka ti’isɛ bala. Naaman yuun ka zɛkɛ amea ge a yuun tuɣum sirege la amea doose bia la n yele sɛla la. Naaman yuun zusɛ la sore Siria naba zɛ’an ti a keŋɛ Israel ta tibɛ amea.—2 Na. 5:​4, 5.

5. Naaman n yuun keŋɛ Israel la, bem n yuun eŋɛ?

⁵ Naaman yuun keŋɛ la Israel Naba Yehoram zɛ’an ti ba ta tibɛ en. Ge Yehoram yuun ti’isɛ ti Siria naba eeri la zaberɛ la en. Elisa n yuun wum bala la, a yuun yele Yehoram ti a basɛ ti Naaman wa’an a zɛ’an na. (2 Na. 5:​6-9) Ge yɛla yuun ka eŋɛ wuu Naaman n ti’isɛ se’em la. Elisa yuun puɣum ka yese a yire keŋɛ ta seke Naaman bii a tɔɣɛ bo en. Ge Elisa yuun tuɣum tum la nɛra ti a ta yele Naaman eŋa n nari ti a eŋɛ sɛla ta’an nyɛ tibegɔ.—2 Na. 5:10.

6. (a) Bem n yuun ta’an basɛ ti Naaman zɛkɛ amea ka bɔta ti a doose ban pa’alɛ en sɛla la? (b) Naaman yamesi la yuun eŋɛ la wani pa’alɛ ti ba tari bɔkerɛ ge bem n yuun ze’ele bim na? (2 Nadoma 5:​13, 14)

⁶ Naaman puurɛ yuun ka pee la ban yele en ti a eŋɛ sɛla la. A ‘sunsɔa n yuun nyie’ ti a ŋmɛregɛ la “sunsunyiim yɛ’ɛha.” (2 Na. 5:​11, 12) Beni n sɔi? Daanse’ere, a yuun bisɛ ti eŋa n de soogɛpa nɛŋadaana ge ti ba eŋɛ en se’em la, ba ka bo en gilema. Leyɛ’ɛsa, Naaman yuun ta’an bisɛ ti Elisa n tɔɣɛ sɛla la pa’alɛ ti a zeem Siriadoma mɛ. La yeen dɛna se’em, Naaman yuun kɔ’ɛ a puti’irɛ ti a basɛ tibegɔ la ge lebe kule. Ge a yamesi la yuun tari la bɔkerɛ. Ba yuun belum en ti a malum ti’isɛ yele la soŋa. Naaman yuun basɛ a zɛkɛ n mea la mɛ ge sirege amea doose Elisa n yele en sɛla la, ti a bã’a la nyaa basɛ.—Kaalɛ 2 Nadoma 5:​13, 14.

7. To wan ta’an zamesɛ la bem Naaman yele la poan? (Magaha 22:4) (Bisɛ fɔɔra la.)

⁷ To wan ta’an zamesɛ la bem yele wa poan? Ton nyɛti yɛla se’em la ta’an kan dɛna bala, bala n sɔi ti la nara ti to ni ti’isɛ soŋa ge nyaa eŋɛ sɛla. To san ka kɔ’ɛ to puti’irɛ doose la, lan ani to se’em ma’a, bala n wan pa’alɛ ti to tari bɔkerɛ. To san tara bɔkerɛ, la wan basɛ ti to siregera tomea. Se’em n siregeri amea ni sakɛ ti a ka mi sɛla woo. To ni ɛɛra nɛreba soŋerɛ mɛ ge se’em ti to kɔ’ɔn ɛɛra a soŋerɛ gana dela Yehowa. Naaman yuun nan ka mi Yehowa soŋa ge a yuun sirege la amea ge kelese Israel bipugela la, amea yamesi, la Elisa n de Yehowa nɔdɛ’ɛsa la. Naaman yuun ka basɛ ti a puti’irɛ kɔ’ɔn bɔna ban eŋɛ en sɛla ti la daam en la poan. Bala zuo la, a yuun kɔ’ɛ la a puti’irɛ soŋa ti la soŋɛ en. La nari ti to ni ti’isɛ soŋa ge nyaa tɔɣɛ bii eŋɛ sɛla. Makerɛ, nɛra ta’an dekɛ Baabule la ka’am tɔ ti to puurɛ ka pee. La san dɛna bala, la nari ti to ma’ɛ tomea ti’isɛ bisɛ nyaa ton wan lebese se’em la pa’alɛ ti to zɛkeri la tomea bii to siregeri la tomea.—Kaalɛ Magaha 22:4.

DI’ISA SUURE GE DA ITA SUNSƆA

8. Bem n ta’an basɛ ti la kpe’em bo to ti to di’ise suure?

⁸ Saŋa ase’a, yele ta’an ni eŋɛ ti la basɛ ti to sunsɔa nyie. Ge to san ma’ɛ tomea ti’isɛ yele la soŋa ge nyaa tɔɣɛ bii eŋɛ sɛla, la wan soŋɛ tɔ ti to ta’an di’ise suure. La ni daɣɛ naana ti to di’ise suure, yele yele wuu nɛra san tɔɣɛ tɔ bii eŋɛ to sɛla n ka ani soŋa. (Ep. 4:26) Yele n yuun eŋɛ ti la kpe’em bo David la Abigail ge ba yuun kelum eŋɛ pa’alɛ ti ba tari la bɔkerɛ.

9. Nabal yuun eŋɛ David la bem?

⁹ Geele yele wa bisɛ. Saul zuo ti David la a nɛreba la yuun zɔ ta suɣɛ Paran pɔɣentia poan. (1 Sa. 25:1) Se’em ma’a ti ba yuun bɔna bim la, ba yuun laɣum soŋɛ mɛ te’ele Nabal dusi la a dunkeema. (1 Sa. 25:​15, 16) Se’em ma’a ti Nabal tuntuneba yuun kɛ’ɛra a piisi kɔberɔ la, David yuun tum la a nɛreba ti ba ta bisɛ Nabal ge yele en ti a eŋɛ dia bo ba. (1 Sa. 25:​6-8) Nabal yuun puɣum ka eŋɛ sɛla pa’alɛ ti a puurɛ pee ya la David la a nɛreba la n soŋɛ en se’em la. A yuun tɔɣɛ ba la yetɔɣepɔ̃’ɔsa, hali tu David la a nɛreba la.—1 Sa. 25:​10, 11.

10. David la Abigail yuun eŋɛ la bem pa’alɛ ti ba tari bɔkerɛ? (1 Samuel 25:​32, 33) (Bisɛ foote la.)

¹⁰ Hon yuun san de ni David, la wan ana hon la wani? To bɔkɛ sɛla n sɔi ti David sunsɔa yuun ba’ɛ nyie la. Nabal n yuun eŋɛ en sɛla la yuun basɛ ti a sunsɔa ba’ɛ nyie mɛ ti a bɔta ti a ku en. (1 Sa. 25:​13, 21, 22) Hali David yuun boi la sore ye’a ti a ta ku Nabal ge ti Nabal pɔɣa Abigail yuun ta gu en sore. Beni n sɔi ti Abigail yuun eŋɛ bala? Abigail yuun bɔkɛ ti David sunsɔa n yeen nyie ge a dela nɛresoŋa. Bala la, a yuun boti la a soŋɛ en ti a di’ise suure ge ta’an kɔ’ɛ a puti’irɛ soŋa. A yuun tari la dia zo’e zo’e ta bo David ge me tɔɣɛ yɛm yetɔɣum bo en. (1 Sa. 25:​18, 23-31) David yuun eŋɛ pa’alɛ ti a tari yɛm mɛ sɛla n sɔi la, a yuun kelese Abigail mɛ ge bɔkɛ ti sɛla ti a yele la pa’alɛ la Yehowa me n geele yele la se’em. Bala yuun basɛ ti David di’ise la suure ge ka tum be’em.—Kaalɛ 1 Samuel 25:​32, 33.

11. To sunsɔa san nyie ti to ma’ɛ tomea ti’isɛ yele la soŋa, bala wan soŋɛ to la wani? (Magaha 19:11)

¹¹ To wan ta’an zamesɛ la bem yele wa poan? Nɛra san eŋɛ to sɛla ti to sunsɔa nyie, la nari ti to ma’ɛ tomea ti’isɛ yele la soŋa, lan wan eŋɛ se’em ti to ta’an di’ise suure ge da eŋɛ sɛla n ka nari. La me nari ti to ti’isɛ bisɛ to yetɔɣum bii to itigɔ n wan ta’an basɛ ti sɛla paɛ tomam bii nɛreba. (Kaalɛ Magaha 19:11.) Abigail n yuun tĩɛ David a itigɔ la n ta’an basɛ ti la ana Yehowa se’em la, David yuun di’ise suure mɛ. Nɛra san eŋɛ ho sɛla ti ho sunsɔa nyie, da eŋɛ sunsɔa pɔsɛ tɔɣera pɔ̃si pɔ̃si. (Yam. 1:19) Tiregɛ zusɛ Yehowa ge ma’ɛ homea ti’isɛ bisɛ Yehowa n geele yele la se’em. Bala wan soŋɛ hɔ ti ho ta’an di’ise suure.

12. Nɛreba basɛba wan ta’an soŋɛ to la wani ti to di’isa suure ge ni kɔ’ɛ to puti’irɛ soŋa?

¹² Yehowa yuun doose la Abigail poan soŋɛ David ti a di’ise suure ge me geele yɛla wuu eŋa n geele de se’em la. A me ta’an doose to mabiisi poan soŋɛ tɔ ti to bɔkɛ eŋa n geele yɛla se’em. Bala la, yele san eŋɛ ti ho sunsɔa nyie, tiregɛ sɔsɛ la mabia n bi vo’osum poan ti a soŋɛ hɔ ti ho bɔkɛ Yehowa puti’irɛ n de se’em yele la poan. (Mag. 12:15; 20:18) Yele me san eŋɛ ho zɔ ti a sunsɔa nyie, ho wan ta’an tɔɣesɛ Abigail n yuun eŋɛ sɛla la? Ho wan ta’an soŋɛ ho zɔ la ti a bɔkɛ Yehowa puti’irɛ n de se’em, yele la poan? Yehowa wan kã bo ho la hon tiregeri ti ho soŋɛ nɛreba ti ba tara bɔkerɛ ge me di’isa suure la.

TARA SUKPE’ENE GE DA ZƆTA DABEEM

13. To san bɔkera yɛla, la wan soŋɛ to la wani dabeem san tara tɔ?

¹³ Saŋa ase’a, yɛla ta’an ni paɛ tɔ ti la basɛ ti dabeem tara tɔ. Dabeem san puɣum tara tɔ ge ti to ni tĩɛ Yehowa n tari paŋa gana sɛla woo se’em la, la wan soŋɛ tɔ ti to ta’an dekɛ tomea delum en. (Ym. 27:1) Hali yele san paɛ tɔ ti la ana wuu to ka tari ŋmɛregerɛ zɛ’an, Yehowa wan soŋɛ tɔ. Yona yele la basɛ ti yele wa niɛ la peelumi. A yuun nɔŋɛ Yehowa mɛ ge dabeem n yuun tari en se’em ma’a ti Yehowa yuun bo en tuunɛ n kpe’em la.

14. Beni n sɔi ti dabeem yuun tara Yona ti a tum tuunse’ere ti Yehowa yuun dekɛ bo en la?

¹⁴ Yehowa yuun bo Yona la tuunkpe’eŋo n de, a keŋɛ ta mɔɔlɛ bo Nineveh nɛreba ti a wan sa’am ba. (Yna. 1:​1, 2) La san de ni hon ti Yehowa bo ho tuunɛ wa, la wan ana ho la wani? Yona yuun san yeti a ze’ele Israel keŋɛ paɛ Nineveh, la yuun wan dekɛ paɛ wuu ŋmarega. Asiriadoma la yuun nɔŋɛ la gbiregere yɛla. Hali ba yuun yi’iri Nineveh tiŋa la “ziim teŋa.” (Nah. 3:​1, 7) Yona yuun zaɣesɛ tuunɛ la mɛ ge zɔ.—Yna. 1:3.

15. Bem n yuun soŋɛ Yona ti a yuun dekɛ amea delum Yehowa soŋa soŋa? (Yona 2:​6-9)

¹⁵ Yona yuun zom la ɔɔreŋɔ tee ye’a zɛ’an ge ti ba yuun ta nyɔkɛ en basɛ ko’om poan. Yehowa yuun doose la sarɔɔ kirega poan faaɛ en. Yele wa yuun tĩɛ Yona ti Yehowa paŋa la ka tari makerɛ. (Yna. 1:​15, 17) Yona yuun nyɔɣɛ la yɛm yele wa poan. Yona yuun bɔkɛ ti la ka nari ti a zɔta dabeem ti a keŋɛ Nineveh, sɛla n sɔi la Yehowa wan ta’an faaɛ en dɛŋa poan. (Kaalɛ Yona 2:​6-9.) Yehowa n yuun le tum Yona Nineveh la, a yuun nyaa sakɛ mɛ ge keŋɛ. Eŋa n yuun keŋɛ Nineveh ta tɔɣɛ bo nɛreba la, ba yuun sakɛ mɛ ge tee ti Yehowa ka sa’am ba.—Yna. 3:5.

16. Dabeem san tara tɔ, bem n wan ta’an soŋɛ tɔ? (Magaha 29:25) (Bisɛ fɔɔra la.)

¹⁶ To wan ta’an zamesɛ la bem yele wa poan? To kan makɛ bɔta ti to zɔta dabeem la nɛreba, ti bala ta basɛ ti to zaɣesɛ Yehowa nɔɔrɛ. (Kaalɛ Magaha 29:25.) Yona yuun ti’isɛ sɛla n paɛ en la mɛ soŋa ge bɔkɛ ti, la ka nari ti a fabela yelese’a n wan ta’an paɛ en la, sɛla n sɔi la Yehowa wan soŋɛ en. Tomam me san tɛ̃ra Yehowa n tabelɛ soŋɛ tɔ bii te’ele to se’em la, la wan soŋɛ tɔ ti to kan zɔta dabeem. Dabeem yuun tari mabiisi basɛba mɛ ti Yehowa soŋɛ ba ti ba nyaŋɛ ba dabeem la. To san ti’isɛ taɣesɛ ba yele la, la wan soŋɛ tɔ ti to dekɛ tomea delum Yehowa.a (Heb. 13:6) Basɛ ya ti to tara bɔkerɛ ge dekɛ tomea delum Yehowa ta’an soŋɛ nɛreba ti ba me ta’an eŋɛ bala.

KƆ’ƆN TARA BƆKERƐ

17. To wan eŋɛ la wani ta’an bɔkera yɛla soŋa?

¹⁷ Wuu ton zamesɛ se’em la, to san ma’ɛ tomea bɔkɛ yele soŋa, la wan soŋɛ tɔ ti to maala to yɛla soŋa soŋa. To wan eŋɛ la wani ta’an bɔkera yɛla soŋa? Yehowa n de mina n wan ta’an soŋɛ tɔ ti to bɔkera yɛla soŋa soŋa. A doli la Baabule la, la a zilam vo’osum la poan soŋera tɔ ti to bɔkera yɛla. (Ne. 9:20; Ym. 32:8) A bo’ori to la pa’alegɔ n wan soŋɛ tɔ ti to kɔ’ɛ to puti’irɛ soŋa ge me ta’an tara tomea soŋa. (Ym. 119:​97-101) To san ti’isa taɣesa Baabule la n yele sɛla la ge ni zusɛ Yehowa ti a bo to a zilam vo’osum la, la wan soŋɛ tɔ ti to ta’an bɔkera yɛla soŋa. Bala wan soŋɛ tɔ ti to ta’an gɛɛla yɛla wuu Yehowa n geeli yɛla se’em la ge me ta’an ita sɛla ti a bɔta.—Mag. 21:11.

18. Hon lu ho suure ti ho eŋɛ la bem?

¹⁸ Basɛ ya ti to kɔ’ɔn zusera Yehowa ti a soŋɛ tɔ ti to ta’an bɔkera yɛla soŋa. (Ym. 14:2) To san ita bala, to kan makɛ “buregɛ bɔkerɛ sore la poan.” (Mag. 21:16) To kɔ’ɔn lu la to suure ti to wan tiregɛ bɔkera yɛla saŋa woo la bɔŋa woo poan. To san ita bala, to “nyɛte la yɔɔrɔ.”