Aservíma Jehovápe 70 áñorupi Cúbape

Upe tiémpope trankiloite ojeiko vaʼekue pe puévlope. Ore hentekuéra oiko vaʼekue ag̃ui orehegui, umíva apytépe ore tiokuéra ha avuelokuéra. Ore roguerekopaite la roʼumi vaʼerã ha rovyʼaiterei voi upe lugárpe.

Che arekópe 5 áñorupi, che tuakuéra oñepyrũ ostudia la Biblia Walton Jones ndive. Walton ikyreʼỹeterei vaʼekue opredika hag̃ua, por ehémplo og̃uahẽ hag̃ua ore puévlope oguatámi voi 10 órarupi. Haʼe ou jave, heta che hentekuéra oñembyatými vaʼekue che avuelokuéra rógape ha oñemongeta hikuái la Bíbliare heta órare voi. Che túa ha che sy, tio Pedro ha tia Ela, omombaʼeterei voi umi mbaʼe oaprendéva la Bíbliagui. Upévare pyaʼe voi ojevautisa ha oikóma chuguikuéra testígo de Jehová. Tia Ela orekóma koʼág̃a 100 áñorupi ha oservi gueteri de prekursóra Cúbape.

Upe tiémpope Testigokuéra ikatu vaʼekue oservi Jehovápe lívremente Cúbape. Umi hénte orekuaa porãiterei vaʼekue, pórke ropredika ogahárupi ha ore kartérape katu henyhẽte umi puvlikasión bíblica. ¡Hetaite piko roguatámi ropredika hag̃ua! Koʼág̃a chepyʼarory chemanduʼávo upe tiémpore, upérõ chemitã ha vyʼápe aservi Jehovápe pe situasión iporãha tiémpope. Péro upéi oúta hína kuri umi situasión ijetuʼúva (2 Tim. 4:2).

OG̃UAHẼ UMI TIÉMPO IJETUʼÚVA

Arekópe 5 áñorupi, che túa ha che tio oho peteĩ asambléape. Upearã oviaha hikuái ótra párte pe íslape, péro oiko peteĩ mbaʼe ambyasyetereíva. Mokõivévape ojagarra fiebre tifoidea, pórke pe y hoʼu vaʼekue hikuái oĩ kuri kontaminádo. Haʼekuéra ou jeýrõ guare ógape, che tiógui hoʼapaite la iñakãrangue pe mbaʼasy káusare péro ojesalva, papa katu omanomi anga. Upérõ haʼe oreko 32 áñonte.

Papa omano rire, che sy odesidi rova hag̃ua peteĩ iñermáno rógape, oikóva pe puévlo héravape Lombillo. Upévare rohejapámante umi ore hentekuérape, umíva apytépe ore avuelokuéra rohayhuetévape. Upéicharõ jepe ore rosegi roservi Jehovápe en família.

Pe 26 de agosto de 1957-pe arekópe 10 áño ajevautisa peteĩ tahamárpe, oĩva Lombillo ypýpe. Upérõ ni nañeimahinái 2 áño mboyve okambiaitetaha la situasión Cúbape ha ijetuʼutaha ore testígo de Jehovándi. Áño 1959-pe oñepuʼã pe goviérno kóntrape ha ojupi peteĩ goviérno komunísta.

Pe goviérno pyahu omombaʼeterei pe servísio militár. Upéva ipohyieterei Testigokuérape g̃uarã, pórke jaiko jaikohápe ndajajapói pe servísio militár ni ndajaikéi polítikape. Upéicha rupi pe goviérno oñepyrũ oipeʼa orehegui mbeguekatúpe pe liverta roguereko vaʼekue heta tiémpore roadora hag̃ua Jehovápe. Upéi katu ojeproivipaitéma voi orehegui ropredika ha roñembyaty. Hetaiterei ermánope avei ojegueraha kárselpe. Algúnope pyʼỹinte oñembyepoti térã noñemeʼẽi chupekuéra hembiʼurã. Avése katu oñemeʼẽ chupekuéra tembiʼu orekóva tuguy, ha ñande jaikuaa porã la Biblia oproiviha upéva.

Ijetuʼuetereíramo jepe la situasión, rosegi roñembyaty roadora hag̃ua Jehovápe (Heb. 10:25). Avése rojapo umi asambléa peteĩ gránhape térã ótro lugárpe. Una vuéltape, chemanduʼa peteĩ ermáno oipuruka hague peteĩ gránha orekohápe ijovechakuéra ojejapo hag̃ua pe asambléa. Ndaipóri kuri tiémpo romopotĩ hag̃ua upe lugár ni roguenohẽ hag̃ua upégui umi ovecha. Péro upéva ndaorejokói roreko hag̃ua la ore asambléa. Roimembaite oñondive la ovechakuéra: Ore Jehová ovechakuéra ha avei umi ovecha oikóva upépe (Miq. 2:12).

Romombaʼeterei vaʼekue rohechávo umi ermáno oñehaʼãha omoĩ hag̃ua oréve la roikotevẽva romombarete hag̃ua ore jerovia. Por ehémplo oĩ ermáno ograváva kasétpe umi asambléa ha umíva upéi oñemosarambi oparupiete Cúbape. Avése mokõi ermánopente oñeasigna oprepara hag̃ua umi diskúrso, upéi ikatu hag̃uáicha opresenta ha ograva hikuái. Umi gravasión ojejapo rupi ñemiháme, heta vése oñehendu umi gállo osapukáirõ ha diferénte kláse de rruído ñanembopukáva. Peichahágui pe lugár de asambléape ndaipóriramo elektrisida, peteĩ ermáno opedalea kontinuadoite peteĩ visikléta oĩva konektádo peteĩ mákina oprodusívare elektrisida. Péicha ikatu oñembopu pe ekípo de gravasión oñehendu hag̃ua pe prográma ojegrava vaʼekue. Upe tiémpope ndaikatúi vaʼekue roiko lívremente, ni ndoroguerekopái umi puvlikasión orekóva umi ermanokuéra oikóva ótro paíspe. Upéicharõ jepe, núnka ndofaltái oréve pe roikotevẽva romombarete hag̃ua ore jerovia. Lomímonte heta rovyʼa vaʼekue roservívo Jehovápe oñondivepa (Neh. 8:10).

OIKO CHEHEGUI PREKURSÓR, MÉNA HA TÚA

Akumplívo 18 áño, añepyrũ che prekursorádo rregulár peteĩ puévlo héravape Florida. Ohasa rire un áñorupi, añenombra aservi hag̃ua de prekursór espesiál peteĩ siuda héravape Camagüey, péva haʼe hína pe departaménto kapitál. Upe lugárpe aikuaami peteĩ ermána iporãitereívape. Ko ermána héra Emilia, haʼe la iválle hína Santiago de Cuba. Roñemoĩ de nóvio ha un áño mboyve ja romendáma katu.

Añepyrũ ambaʼapo de tiémpo kompléto peteĩ fávrika de asúkarpe, péva peteĩ fávrika orekóva pe goviérno. Upérõ Emíliandi ndaikatúi kuri roservi de prekursór, péro rojapose la ikatumíva Jehová servísiope. Upévare añepyrũ ambaʼapo las 3 de la mañána guive ha aha hese las 11 de la mañána peve. Ndahaʼéi la igustopáva chéve apuʼã voieterei, péro ajapo rupi upéicha, ikatu vaʼekue asẽ meme apredika ha siémpre aha umi rreuniónpe Emíliandi.

Año 1969-pe onase la che raʼy ypykue hérava Gustavo. Upe riremínte añeinvita aservi hag̃ua de superintendénte de sirkuíto. Upe tiémpope Cúbape normál vaʼekue la peteĩ superintendénte de sirkuíto oreko família. Péicha roñepyrũ vaʼekue peteĩ époka iporãitereíva, hetaiterei rombaʼapo ha rovyʼa roservi aja upe asignasiónpe. Emilia ha che romombaʼeterei pe priviléhio, pórke roreko pe oportunida roipytyvõvo ore ermanokuérape. Roservi aja pe sirkuítope onase umi ótro ore família: Mokõi mitãkuimbaʼe hérava Obed ha Abner, ha unos áño haguépe onase peteĩ mitãkuña hérava Mahely.

Ajepyʼamongetávo pe tiémpo rohasa vaʼekuére sirkuítope avyʼaiterei, pórke ahecha mbaʼeichaitépa Jehová ovendesi isiervokuéra oĩvape Cúbape. Ha oréve avei orepytyvõ romboʼe hag̃ua ore famíliape ohayhu hag̃ua chupe ipyʼaite guive. Koʼág̃a amombeʼusemi peẽme umi situasión rohasa vaʼekue Emíliandi roservi aja pe sirkuítope.

ROSERVI SIRKUÍTOPE OJEPROIVI AJA RREUNIÓN HA PREDIKASIÓN

Ojeproivi rupi Testigokuéra rembiapo, ijetuʼuvéntema kuri umi ermánope oñerreuni ha opredika hag̃ua. Oñembotypaite umi Salón del Reino, ha umi misionérope oñemosẽmba pe paísgui. Hetaiterei mitãrusúpe ojejagarra ha ojegueraha kárselpe, ha pe sukursál oĩva La Habánape oñemboty orehegui.

Pe proivisión káusa, rojapo umi visíta fin de semanakuénte, upévare rovisita káda kongregasión 2 fin de semána. Roho jave rovisita peteĩ kongregasión ndoroguerahái voi mbaʼeve guasu, heta vése roho visikléta árinte voi. Upéicha trankilove roviaha pórke avave nodeskonfiái orerehe. Pe kongregasiónpe ndojejapói voi ni peteĩ anúnsio rohotaha de visíta. Ore rojapo pe visíta ku rohoramog̃uáicha rovisita ore hentekuérape. Añetehápe ndahasyiete voi rojapo hag̃ua upéicha, pórke roĩ jave umi ermánondi haʼete voi roĩva hína en família. Upéicha rupi roñatende vaʼerã avei ani hag̃ua oreresarái maʼerãpa rojapo hína pe visíta de superintendénte (Mar. 10:​29, 30). Siémpre rokuida porã la rojapóva, pórke heta vése umi polisía oresegi ha oporandu oréve heta mbaʼe. Umi ermáno omeʼẽva oréve alohamiénto ojapeligra avei, pórke ikatu voi ojeapresa hikuái ojepillárõ mbaʼépa la rojapóva hína (Rom. 16:4).

Upe tiémpope ore rohecha mbaʼeichaitépa umi ermáno ha ermána ipojera orendive imboriahúramo jepe. La hetave oĩva umi lugárpe haʼe umi ñatiʼũ, haʼete voi hetavéva la héntegui. Péro umi ermáno omeʼẽ oréve pe moskitéro peteĩmi orekóva, ikatu hag̃uáicha roke porãmi pe pyhare. Oĩ umi ermáno omeʼẽva oréve alohamiénto ndorekóiramo jepe mbaʼeve guasu okomparti vaʼerã orendive. Upévare sapyʼánte rogueraha tembiʼu rokomparti hag̃ua hendivekuéra.

Ndaikatúi vaʼekue rogueraha kompletoite ore famíliape rovisita jave umi kongregasión. Upévare rogueraha peteĩnte, ha umi ótro opyta che sy ha che ermána ndive. Rogueraha jave peteĩ mitã michĩva, upéva tuicha oreprotehe. Pórke heta vése umi polisía orrevisapa la ore kosakuéra, péro ore roñongatu ore puvlikasión umi pañál kyʼa apytépe. ¡Upépe ndaipóri polisía oñanimáva opoʼẽ!

Amombaʼeterei la che rembireko ojapóva, hetaiténgo oñehaʼã oñangareko hag̃ua umi mitãre ha oĩ che ykére roservívo de tiémpo kompléto. Chéngo añehaʼãmbaite vaʼekue amohenda porã che tiémpo ambaʼapo hag̃ua pe fávrikape, ha avei aservi hag̃ua de superintendénte de sirkuíto. Upearã avése ambaʼapo dóvle túrno una térã 2 vése por semána areko hag̃ua lívre sábado ha domingo. Péro upéi okambia la che traváho. Chemoĩ hikuái kómo héfe de ekípo, ha ambaʼapo vaʼerã 7 día a la semána. Che ndaikatúi akambia upe orário, péro upéi apilla ajaseguránte vaʼerãha ani hag̃ua ofalta traváho che ekípope fin de semanakue. Péicha avave ndeʼíri mbaʼeve ha ikatu avisita umi kongregasión. Chéverõ g̃uarã la che hefekuéra núnka ndopillái kuri che naiméi hague fin de semanakue.

ROSEGI ROVYʼA OĨRAMO JEPE UMI KÁMBIO

Peteĩ día áño 1994-pe, umi ermáno odirihíva pe predikasión Cúbape oinvita entéro umi superintendénte de sirkuítope oho hag̃ua peteĩ rreunión espesiálpe La Habánape. Upérõ roĩ vaʼekue éntre 80 superintendénte. ¡Rovyʼaiterei ningo! Hasypeve heta áño rire roĩ oñondive ha rojokuaa. Upe rreuniónpe primerorã oñeñeʼẽ algúno ahúste ojejapótavare pe organisasiónpe. Upéi katu rohendu peteĩ anúnsio tuicha oresorprendéva: Umi ermáno heʼi oréve oplaneaha hikuái omeʼẽvo ore réra umi autoridápe. ¿Mbaʼérepa ojejapóta upéva?

Haʼekuéra omombeʼu oréve oñerreuni hague oikóvo umi funsionário pe goviernopegua ndive, ojehecha hag̃ua mbaʼéichapa Testigokuéra ikatu ojegueraha porãve pe goviérnondi. Umi autorida ojerure peteĩ lísta oĩháme kompletoite umi superintendénte de sirkuíto réra. Enterovete ore roĩ de akuérdo oñemeʼẽ hag̃ua la ore réra, ha upe guive oho porãiterei hese la situasión umi autoridándi.

Kon el tiémpo ikatúma roñerreuni ha ropredika lívremente, péro testígo de Jehová ndahaʼéiti kuri peteĩ rrelihión legál. Upe rire roñentera umi autorida oikuaáma hague algúno superintendénte réra, péro haʼekuéra oipota oñekonfirma chupekuéra umi informasión orekóva hikuái.

Septiembre 1994-pe, oñemeʼẽ oréve permíso roavri jey hag̃ua pe sukursál. Ipahápe ikatu kuri roipuru pe edifísio oñemboty vaʼekue orehegui 20 áño upe mboyve.

Upéi 1996-pe oĩ orerenóiva sukursálgui Emíliape ha chéve oreavisa hag̃ua roñeinvitaha roservi hag̃ua Betélpe. Primerorã tuichaiterei roñesorprende, péro upéi amomanduʼa umi ermánope rorekoha gueteri mokõi ore família ógape orendive, ha rosegi vaʼerãha rokuida hesekuéra. Umi ermáno pyʼaguapýpe porãnte oanalisa la ore situasión, ha upéi okonfirma oréve lomímonte oipotaha roho roservi Betélpe. Ore roasepta upe asignasión, ha rojeprepara rova hag̃ua ore família reheve La Habánape.

Amombeʼu porãta peẽme, ñepyrũrã ndahaʼéi la avyʼapáva Betélpe. Hetaiterei áñongo aĩ de superintendénte, upévare la che korasõ ha che pensamiénto opyta pe territóriope umi ermánondi. Ijetuʼu vaʼekue chéve aha hag̃ua aguapy peteĩ ofisínape. Péro umi ótro betelita ha espesiálmente che rembireko Emilia, chepytyvõ ahecha hag̃ua hendápe porã pe situasión. Upéi kon el tiémpo chepyʼarory jey, ha koʼág̃a avyʼaiterei aservívo Betélpe.

Pyaʼe ohasa el tiémpo, ha koʼág̃a ja naoremitãvéima. Péro rovyʼaiterei ropensávo umi ermáno ha ermána ombaʼapo vaʼekuére orendive hetaite áñore. Orembovyʼavéntema rohechávo umi ore família ha ore nietokuéra oserviha Jehovápe. Roñeñandu voi apóstol Juan oñeñandu haguéicha ijedaite riréma. Haʼe heʼi vaʼekue: “Chéngo avyʼaiterei ahendu jave che raʼykuéra osegiha oiko pe añetegua rapére” (3 Juan 4).

Koʼág̃a ojapóma haimete 30 áño roservi hague Betélpe. Emíliandi ore roñehaʼãmbaite rokumpli hag̃ua ore asignasión ijetuʼúramo jepe oréve, pórke oreedáma ha orerasy. Heta áñorema roservi Jehovápe ha rombohovái algúna kósa ijetuʼúva. Péro rovyʼaiterei ikatu haguére roservi ‘Ñandejára ovyʼávape’, ha rojapóma upéva 70 áñorupi ko ísla de Cúbape (1 Tim. 1:11; Sal. 97:1).