OÑEPORANDÚVA JEPI

Gálatas 4:​24-pe oñeñeʼẽ mokõi kompromísore, ¿mbaʼépa hína umíva?

Apóstol Pablo oñeʼẽ vaʼekue Abrahán, Sara ha Agar rehe. Upéi heʼi: “Koʼã mbaʼe orrepresenta umi mbaʼe oikóta vaʼekue. Koʼã mokõi kuña orrepresenta mokõi kompromíso” (Gál. 4:​22-24).

Anteve ñapensa vaʼekue koʼápe oñeñeʼẽha “pe pákto de la léi” ha pe “kompromíso pyahúre”. Péro oñeanalisa porãve rire ko téma, ojehecha tekotevẽha ñakambia la ñantende lája ko téxto. Provávlemente Pablo oñeʼẽ raʼe pe “pákto de la léire” ha pe “kompromíso Jehová ojapo vaʼekuére Abrahán ndive”, ha noñeʼẽi pe “kompromíso pyahúre”. Jahechamína mbaʼe mbaʼérepa ikatu jaʼe upéva.a

Apóstol Pablo oñeʼẽrõ guare pe eskláva Agar rehe omensiona pe Sérro Sinaí (Gál. 4:25). Agar orrepresenta vaʼekue pe “pákto de la léi” ojejapo vaʼekue pe Sérro Sinaípe áño 1513-pe (Éx. 19:​5, 6). Ndaipóri vaʼekue ni peteĩ persóna ikatúva okumplipaite upe léi, upévare upe léi omomanduʼa umi judíope haʼekuéra oĩha esklávoicha pe pekádo poguýpe. Pe pákto de la léi oipytyvõ vaʼekue avei pe puévlo de Israélpe opilla hag̃ua mávapa pe Mesías, pórke haʼe añoite la ikatu vaʼekue okumplipaite upe léi ojavyʼỹre mbaʼevetépe. Pe Mesías omeʼẽ vaʼekue hekove perfékto, péicha oipytyvõ entéro umáno imperféktope ojei hag̃ua pe pekádo ha ñemano poguýgui (Gál. 3:​19, 24, 25). Haʼe okumplipa rire Ñandejára volunta, noñeikotevẽvéima kuri pe léire (Rom. 10:4).

Apóstol Pablo heʼi vaʼekue Agar ha Sara idiferenteha ojuehegui, pórke Sara ‘ndahaʼéi vaʼekue eskláva’ ha avei haʼe imemby “peteĩ promésa rupive” (Gál. 4:23). Upe promésa haʼe kuri pe kompromíso Jehová ojapo vaʼekue Abrahán ndive (Gál. 3:29; 4:​28, 30). Jehová oñeʼẽ vaʼekue pe kompromísore heʼírõ guare Abrahánpe: “Ne familiare rupive avendesíta entéro nasión oĩva pe yvy ape ári, pórke nde neñeʼẽrendu chéve” (Gén. 22:18).

Ko kompromíso Jehová ojapo vaʼekue Abrahán ndive omyesakãve pe promésa Jehová ojapo vaʼekue hardín de Edénpe (Gén. 3:15). Ohechauka pe “familiare” oñepromete vaʼekue oúta hague Abrahán familiarégui. Pablo oexplika vaʼekue Jesucristo haʼeha pe kuña “familiare” iñimportantevéva. Péro ko familiare apytépe oĩ avei umi 144.000 unhído haʼéva “Cristo disípulo”. Haʼekuéra ogovernáta Cristo ndive yvágape (Gál. 3:​16, 29; Apoc. 14:​1-3). ¿Mbaʼépa ojehupytýta la Ñandejára oprometéva rupive Abrahánpe? Umi oaseptáva Jesúspe ha iñeʼẽrendúva chupe orresivíta heta vendisión iporãmba jepéva.

Upéicharõ, ¿mbaʼépa omboʼese vaʼekue Pablo oñeʼẽrõ guare la orrepresentávare umi mokõi kuña? Haʼe ohechauka vaʼekue umi judío itiempopegua osegíramo oñemohatã ojejapo hag̃ua pe léipe heʼíva, opytataha hikuái esklávoramo ha ojoguataha Agárpe. Péro umi judío oaseptáramo Jesucrístope, haʼéva “Abrahán familiare”, opytáta kuri lívre ha ojoguáta Sárape. Haʼekuéra ojeíta kuri pe pekádo ha ñemano poguýgui (Juan 8:​32-34). Pe pákto de la léi ojejapo vaʼekue espesiálmente ogia hag̃ua umi judíope og̃uahẽ meve pe Cristo. Péro haʼekuéra ndoaseptáirõ Jesúspe ohechaukáta kuri nontendeiha maʼerãpa ojejapo vaʼekue pe pákto de la léi.

Umi kongregasión Galaciaguápe oĩ vaʼekue heta kristiáno ndahaʼéiva judío ha upéicha rupi núnka noĩri vaʼekue pe léi poguýpe. Péro oĩ kuri algúno umi kristiáno judío ojopýva umi ndahaʼéivape judío okumpli hag̃ua pe léi omandáva, por ehémplo oñesirkunsida hag̃ua. Upévare Pablo ikártape heʼi vaʼekue naisentidomoʼãiha umi ndahaʼéiva judío oñemoĩramo pe léi poguýpe esklávoicha, pórke haʼekuéra orekóma liverta oasepta rupi Crístope (Gál. 5:​1, 10-14).