Jajapysaka porãkena Jehová ñanemboʼe jave

1, 2. a) ¿Mbaʼépa Jehová ojapo koʼág̃arupi ñanderehehápe? (Salmo 23:​1, 2, 5). b) ¿Mbaʼépa jahecháta ko artíkulope?

KOʼÁG̃ARUPI Jehová omeʼẽ ñandéve hetaiterei mbaʼe jaikuaa hag̃ua la haʼe ñanemboʼeséva la Biblia rupive. Legálmente ikatu jaʼe avei David heʼi haguéicha, peteĩ purahéipe haʼe heʼi vaʼekue: “Jehová hína che Pastór. Mbaʼevete asy ndofaltamoʼãi chéve” (elee Salmo 23:​1, 2, 5).

² ¿Mbaʼéichapa Jehová ñanemboʼe? Por ehémplo umi rreunión rupive. Upépe ñahendu jepi umi mbaʼe jaikuaámava voi, péro ñande tekotevẽ ñanemanduʼa jey umi mbaʼére oiméramo jepe jaservíma Jehovápe heta tiémpore ha jaikuaa porã la Biblia heʼíva (2 Ped. 1:12). Péro, ¿ijetuʼúpa ndéve rejapysaka porã la ojeʼévare rreunionhápe reikuaa porãrõ pe informasión? Oimérõ péicha, ko artíkulo ideprovechoitereíta ndéve. Jahecháta mbaʼérepa tekotevẽ jajapysaka porã rreunionhápe ha mbaʼéichapa umi oporomboʼéva ikatu oipytyvõ ótrope ifasilve hag̃ua chupekuéra oñekonsentra. Avei jahecháta algúno konsého ñanepytyvõtava jajapysaka porãve hag̃ua. Péro primero jahechamína mávapa legálmente la oñeʼẽva hína ñandéve rreunionhápe.

JEHOVÁ HÍNA LA OÑEʼẼVA ÑANDÉVE

3. ¿Mbaʼéichapa Jehová oñeʼẽ ñandéve, ha mbaʼéichapa isiervokuéra ohechauka oipuru porãha Ñandejára Ñeʼẽ?

³ Jehová oñeʼẽ ñandéve la Biblia rupive (2 Tim. 3:​16, 17). Jesús oikuaa porã vaʼekue upéva, ha upévare oipuru porã vaʼekue Ñandejára Ñeʼẽ. Upéicha rupi algúno ohendúva chupe oporandu voi: “¿Mbaʼéicha rupi piko ko kuimbaʼe oikuaa porãiterei Ñandejára Ñeʼẽ? Chupe ningo avave nombostudiái” (Juan 7:15). Umi hénte ipyʼaporãva odisfruta vaʼekue ohendu jave Jesús omboʼeha Ñandejára Ñeʼẽ. Avei apóstol Pablo, Apolos ha hetave kristiáno síglo primeropegua oipuru meme vaʼekue Ñandejára Ñeʼẽ omboʼe hag̃ua ótrope (Hech. 17:​2, 3; 18:​24, 28). Ñande testígo de Jehová jaikuaa ojepuruha la Biblia ojeprepara hag̃ua umi informasión oĩva umi artíkulope, Broadcástingpe^®, voskéhope ha videokuérape. Por ehémplo umi hénte ohóva por primera ves rreunionhápe oñesorprende jepi ohechávo mbaʼeichaitépa jaipuru la Biblia upépe. Umi omboʼéva rreunionhápe oipuru meme la Biblia, ha ndahaʼéi oleénteva la heʼíva upépe, síno oexplika enterovépe mbaʼéichapa ikatu ojapo la Biblia heʼíva (Luc. 24:32).

4. ¿Mbaʼéichapa ojepuru jepi umi palávra “ñahendu” ha “jajapysaka”?

⁴ La Bíbliape ojepuru jepi umi palávra “ñahendu” ha “jajapysaka” ojeʼe hag̃ua ñaneñeʼẽrenduha algúnope. Jehová oñeʼẽ ñandéve Iñeʼẽ rupive umi rreunionhápe, péicha ñantendeve mbaʼépa hína ivolunta ha ifasilve ñandéve ñaneñeʼẽrendu hag̃ua chupe. Jehová ningo ovyʼaiterei ohechávo jajapysaka porãha la haʼe heʼívare ha jajapoha la ñaaprendéva (Prov. 27:11).

¿MBAʼÉREPA JAJAPYSAKA PORÃ VAʼERÃ RREUNIONHÁPE?

5. ¿Mbaʼépa jajapose jahayhu rupi Jehovápe? (Juan 4:​23, 24; 1 Juan 5:3).

⁵ Jajapysaka porã rreunionhápe jahayhu rupi Jehovápe (Mat. 22:37). Amáske ñaaprende mbaʼeichaguápa Jehová, jahayhuvéntema chupe. Ha jahayhuve rupi Jehovápe, jajapysaka porãse la haʼe heʼívare ñandéve Iñeʼẽ rupive, ñaneñeʼẽrenduse ha jaadorase chupe haʼe oipotaháicha (elee Juan 4:​23, 24; 1 Juan 5:3).

6. ¿Mbaʼépa ñanemboʼe Jehová rreunionhápe?

⁶ Jajapysaka porã rreunionhápe jahayhu rupi ñande rapichápe (Mat. 22:39). Umi rreunionhápe Jehová ñanemboʼe mbaʼéichapa ikatu ñaipytyvõ ñane ermanokuérape ha umi ndoservírivape gueteri chupe. Por ehémplo pe folléto Pe oporohayhúva omboʼe umi héntepe ñanemboʼe mbaʼe kualidápa tekotevẽ jahechauka predikasiónpe, ha umi rreunión éntre semanaguápe ñaaprende mbaʼéichapa ikatu jasegi umi konsého oĩva pe follétope. ¿Ijetuʼúpa ndéve reñepyrũ hag̃ua reñeʼẽ la héntendi? Oimérõ upéicha, ñañatende porãkena mbaʼéichapa umi ermáno ha ermána ojapo umi asignasión pe rreunión héravape Ñamboʼe porãve hag̃ua.

7. ¿Mbaʼérepa jasegi vaʼerã jajapysaka Jehová heʼívare?

⁷ Jajapysaka porã rreunionhápe jaikose rupi vyʼápe ha pára siémpre. Jehová heʼi haguéicha yma isiervokuérape, ñande avei ñaneñeʼẽrendu vaʼerã chupe jaikoséramo vyʼápe ha pára siémpre (Deut. 32:​44-47). Ñañatende porãvo umi rreunionhápe ñanekyreʼỹvéta jasegi hag̃ua ñahaʼarõ ha ñaaguanta og̃uahẽ meve pe múndo pyahu (Rom. 8:25). Ñaĩma ningo umi ára pahápe, upévare koʼytevéntema jajapysaka porã vaʼerã la Jehová heʼívare ha ñanerembiapo heta vaʼerã iservísiope (Mat. 24:​42-44; Apoc. 1:3).

ÑAIPYTYVÕKENA ÓTROPE OJAPYSAKA PORÃ HAG̃UA RREUNIONHÁPE

8. ¿Mbaʼérepa umi ermáno ojapóva diskúrso osegi vaʼerã omehora oporomboʼe lája?

⁸ Entéro umi ermáno oporomboʼéva platafórmape, koʼýte umi ojapóva diskúrso, tekotevẽ osegi omehora oporomboʼe lája. Peteĩ ermáno oprepara porãramo la idiskúrso ha oipuru meméramo la Biblia, tuichaiterei ikatu oipytyvõ umi ndahaʼéivape Testígo oaprende hag̃ua umi mbaʼe iñimportánteva oĩva la Bíbliape. Avei umichagua diskúrso omohesakãve umi ermánope la Biblia heʼíva ha omokyreʼỹ chupekuéra ojapo hag̃ua la oaprendéva. Nde erekóramo párte rreunionhápe, nemanduʼákena mbaʼeichaite pevépa la eréva ikatu opoko umi nerendúvare. Upéicharõ oimérõ nde ereko asignasión rreuniónpe eñatende porãmína umi konsého ñaanalisátavare koʼág̃a. Jaikuaa koʼã konsého koʼýte oipytyvõtaha umi orekóvape diskúrso, péro avei ideprovéchota entéro umi orekóvape oimehaichagua asignasión umi rreunión aja (2 Tim. 4:2; Tito 1:9).

9. ¿Mbaʼérepa umi diskúrso isentído ha ifásil vaʼerã oñentende hag̃ua?

⁹ Eprepara vaʼerã la nde diskúrso isentído ha oñentende hag̃uáicha. Nde diskúrso ijetuʼúramo oñentende hag̃ua, umi nerendúva ikatu ojedistrae. Upévare katuete reipotáta la nde diskúrso ifásil oñentende hag̃ua, ¿mbaʼépa ikatu nepytyvõ upearã? 1) Oñepyrũre nde diskúrso ikatúma ere mbaʼe mbaʼépa hína umi mbaʼe iñimportantevéva remyesakãtava. 2) Eexplikákena ehóvo umi idéa peteĩteĩ, ha epausákena eñeʼẽ mboyve ótra idéa iñimportántevare, péicha umi nerendúva opilláta reñeʼẽtamaha ótra kósare. 3) Opakuévo la nde diskúrso emensiona jey umi mbaʼe remyesakã vaʼekue.

10. ¿Mbaʼérepa pe diskursántepe voi ogusta vaʼerã pe téma oñeʼẽtavare?

¹⁰ Ndéve voi ndegusta vaʼerã pe informasión remyesakãtava. Peteĩ téma ñandegustaiterei jave ñañeʼẽseterei voi upévare ha umi ñanerendúva ohechakuaa upéva (Prov. 2:​4, 5; Hech. 4:20). Upearã ejepyʼamongetákena umi téxto bíblico ha pe informasión emyesakãtavare, péicha katuete retopáta algúna idéa ndegustaitereítava. Peteĩ ermáno oikóva Estados Unídospe orekóva mas de 70 áño ndahesaráiri peteĩ diskúrso ohendu vaʼekuégui imitãrõ guare. Haʼe heʼi: “Koʼág̃a peve chemanduʼáiti mbaʼéichapa pe ermáno oremokyreʼỹ rojepyʼamongeta porã hag̃ua la Bíbliare. Haʼe oexplika porã mbaʼéichapa ikatu rojapo upéva ha ojekuaa vaʼekue oĩha segúro la heʼívare, pe diskúrso chemarkaite vaʼekue voi. Upe guive akambiaite alee lája che Biblia ha avei añemoag̃uive Jehováre”.

11. ¿Mbaʼépa rejapo vaʼerã nde diskúrso ideprovécho hag̃ua umi nerendúvape? (1 Timoteo 4:​13-16).

¹¹ Epensa umi nerendúva oikotevẽvare ha emeʼẽ umi konsého ideprovéchotava chupekuéra. Eñeʼẽnte rangue heta informasiónre, umi ermáno oñandu vaʼerã pe diskúrso haʼeha chupekuéra g̃uarãite. Upearã ikatu reipuru la Biblia eporomokyreʼỹ hag̃ua ha emeʼẽ hag̃ua umi konsého ideprovéchotava umi ermánope isituasiónpe. Por ehémplo apóstol Pablo omeʼẽ vaʼekue Timotéope umi konsého oikotevẽva, haʼe heʼi chupe mbaʼépa ikatu ojapo osegi hag̃ua oñemoag̃ui Jehováre oipytyvõ aja umi ermánope Éfesope (elee 1 Timoteo 4:​13-16). Upévare epensákena umi nerendúvare ha pe diskúrso aja ehechauka porã mbaʼépa ikatu ojapo hikuái ideprovécho hag̃ua chupekuéra pe informasión.

12. ¿Mbaʼérepa pe diskursánte oñehaʼã vaʼerã oñeʼẽ ku oñemongetarõguáicha peteĩ persónandi?

¹² Epraktika nde diskúrso en vos álta upéi rejapo hag̃ua ku reñemongetaramoguáicha nde rapichándi. Eiko rangue reskrivipaite la nde diskúrso ha upéi elee, eñehaʼãna eñeʼẽ ku reñemongetarõguáicha peteĩ persónandi. Péicha ifasilvéta umi nerendúvape ojapysaka porã hag̃ua nderehe ha ontende porãvéta pe informasión. Pe folléto hérava Jalee ha ñamboʼe porãve hag̃ua heʼi: “Ndahasýi vaʼerã oñentende hag̃ua umi mbaʼe eréva ha reñeʼẽ vaʼerã reñemongetarõguáicha ótrondi. Avei reñeʼẽ vaʼerã nde pyʼaite guive”. Reñehaʼãramo eñeʼẽ ne korasõ mbytete guive, igústota la nde diskúrso ha umi nerendúva oñatende porãta nderehe ha ikyreʼỹta voi hikuái ojapo hag̃ua la oaprendéva.

13. ¿Mbaʼérepa umi ojapóva diskúrso ojerure vaʼerã konsého umi ermáno iñexperiénsiavape? (Ehecha pe taʼanga).

¹³ Ejerure konsého peteĩ ermáno iñexperiénsiavape. Upearã ikatu ehechauka pe ermáno iñexperiénsiavape pe voského repreparáva. Upéi eñehaʼã emoinge nde diskúrsope umi konsého haʼe heʼíva ndéve. Avei ejerurekuaa pe ermánope tanerendu epraktika aja ha teʼi ndéve mbaʼépepa ikatu emehora eporomboʼekuaave hag̃ua (Prov. 1:5). Entéronte voi sapyʼánte ndajapillapái nahesakãiha hína la jaʼéva, upévare pe ermáno iñexperiénsiava ikatu nepytyvõ nde diskúrso oñentende porãve hag̃ua ha ifásil hag̃ua umi ermánope ojapo hag̃ua la oaprendéva. Enterovéva ñamboʼe porãseve ikatu hag̃uáicha ideprovécho umi ñanerendúvape umi óro kuʼi oĩva Ñandejára Ñeʼẽme.a

¿MBAʼÉPA ÑANEPYTYVÕTA JAJAPYSAKA PORÃ HAG̃UA?

14. ¿Mbaʼérepa ñamombaʼe vaʼerã Jehová rrekordatoriokuéra? (Salmo 119:​24, 111, 167, nóta heʼíva rrekordatório).

¹⁴ Jajapysaka porãvéta ñamombaʼéramo Jehová rrekordatoriokuéra. Koʼág̃a ningo ‘pe situasión ijetuʼu’, péro Jehová ñanepytyvõ ñaaguanta hag̃ua. Upearã haʼe pyʼỹinte ñanemomanduʼa jey heta mbaʼére (2 Tim. 3:1). Pe oskrivi vaʼekue pe Salmo 119 oagradeseterei Jehovápe omeʼẽ haguére chupe umi rrekordatório, upévare ñahendu jave ojeʼeha peteĩ mbaʼe ojeʼémava heta vése, ñañehaʼãkena ñapensa upe salmísta opensa haguéicha (elee Salmo 119:​24, 111, 167, nóta heʼíva rrekordatório).

15. ¿Mbaʼépa ñanepytyvõta jasegi hag̃ua ñamombaʼe la ojeʼéva rreunionhápe?

¹⁵ Iñimportánte jasegi jaagradese umi enseñánsa jarresivívare rreunionhápe, umíva ningo peteĩ rregálo oúva Jehovágui. Jahechamína mbaʼépa ikatu ñaaprende umi israelita kásogui. Haʼekuéra oĩrõ guare pe desiértope Jehová omeʼẽ vaʼekue chupekuéra pe maná (Éx. 16:​15, 31). Ñepyrũrã umi israelita ovyʼaiterei vaʼekue oñemeʼẽ haguére chupekuéra upéva. Pe maná ningo ou vaʼekue Jehovágui, hiʼarive heterei ha oipytyvõ chupekuéra osegi hag̃ua oikove. Péro un tiémpo rire algúnope ombyajúma pe maná ha ndoʼusevéima hikuái upéva káda día (Núm. 21:5). Koʼág̃a avei umi enseñánsa jarresivíva rreunionhápe ojogua pe aliménto ñanepytyvõvape jajerovia mbarete hag̃ua. Péro legálmente algúna kósa ñahendúva rreunionhápe ñahendúma vaʼekue voi anteve, upéicharamo jepe ni núnka nañapensái vaʼerã umíva naiñimportanteiha. ¿Mbaʼépa ñanepytyvõta upearã? Ñanemanduʼa vaʼerã umi rreunión haʼeha peteĩ rregálo ndaijojaháiva oúva Jehovágui, ha avei iñorganisasión oprepara porãitereiha umi mbaʼe ñaanalisáva rreunionhápe. Nañanderesaráiri vaʼerã avei umi mbaʼe ñaaprendéva ñanepytyvõha jadesidi porã hag̃ua ha jaikove hag̃ua pára siémpre (Prov. 3:​13, 16-18; Juan 17:3).

16. ¿Mbaʼépa ojapo heta ermáno oservímava Jehovápe heta áñore ojapysaka porã hag̃ua rreunionhápe? (Ehecha pe rrekuádro “Ikatúva jajapo jajapysaka porã hag̃ua”).

¹⁶ Jajapysaka porãta jasegíramo koʼã konsého. Algúno ermáno ningo oservíma Jehovápe hetaiterei tiémporema ha lomímonte osegi ojapysaka porã la ojeʼévare rreunionhápe. Jahechamína mbaʼépa la oipytyvõva chupekuéra upearã. Por ehémplo Ashley, oservímava Jehovápe mas de 30 áñore heʼi: “Iñimportanteterei jajeprepara porã. Che ndajepreparaporãirõ ijetuʼu chéve akomenta hag̃ua ha añepyrũ apensa oimeraẽ mbaʼére rreunión aja”. Ermáno József, oservímava Jehovápe 52 áñore heʼi: “Igústo chéve la oñeñeʼẽ jey jave peteĩ téma ikonosídovare pórke péicha ikatu aikuaa la umi ótro opensáva upe mbaʼére ha siémpre ikatu aaprende álgo ipyahúva upévagui. Oimérõ pe diskursánte ndahaʼéi hína la ivaletereíva, ndaikói apensaiterei la oñeʼẽ lájare, síno añehaʼã añekonsentra la haʼe omboʼévare la Bíbliagui”.

17. ¿Mbaʼe mbaʼépa avei ikatu nepytyvõ eñekonsentra hag̃ua rreunionhápe? (Ehecha pe taʼanga).

¹⁷ Jahechamína unas kuánta kósa ikatúva nepytyvõ rejapysaka porã hag̃ua rreunionhápe. 1) Oimérõ reʼu álgo rreunión mboyve, ivevyimínte vaʼerã ani hag̃ua upéi nderopehýi. 2) Eñehaʼãkena eg̃uahẽ voi reheve ha eheka peteĩ lugár eguapy hag̃ua. 3) Emoĩ ne teléfono térã nde távlet nemolestaʼỹ hag̃uáicha, pono ndedistrae rreunión aja. 4) Eñehaʼã epensa mbaʼe rehepa oñeñeʼẽta. 5) Emañákena pe oñeʼẽvare ha ani ejedistrae umi mbaʼe oĩvare nde jerére. 6) Ikatu reanota álgo mbykýva térã ejapo umi divúho isensíllova nemanduʼa hag̃ua umi idéa iñimportántevare. 7) Epensa umi téxto bíblicore ha ehecha mbaʼéichapa umíva oho ojuehe. 8) Eñeporandu: “¿Mbaʼéichapa ko informasión ikatu aipuru aipytyvõ hag̃ua álgienpe kongregasiónpe térã predikasiónpe?” 9) Asambléa mboyve, emaña pe prográmare ha ehecha mbaʼe téma rehepa oñeñeʼẽta upe díape, mbaʼéichapa héra umi diskúrso ha umi téxto bíblico ojepurútava. 10) Oñepyrũre pe prográma eñehaʼã eĩ kirirĩháme, eguapy ha eñatende umi vidéo musikál oñemoĩvare. Péicha reĩtama preparádo erresivi hag̃ua pe enseñánsa oúva Jehovágui.

JASEGÍKENA JAJAPYSAKA JEHOVÁRE

18. ¿Mbaʼérepa jasegi vaʼerã jajapysaka porã rreunionhápe?

¹⁸ Iñimportanteterei jasegi jajapysaka porã Jehováre, pórke péicha jaheja haʼe ñandegia “tape porãre” (Sal. 23:3; 31:3). Ñande ikatu hína ñasẽ ñande raperãgui peteĩ várko osẽháicha hapégui pe yvytu káusare, ha pono oiko upéva ñaikotevẽ Jehová konséhore. Upévare jahecha vaʼerã jajapysaka porãpa hína la Jehová heʼívare ha jajapo umi mbaʼe ñaaprendéva rreunionhápe (Luc. 8:18). Entéro umi ohendúva la Jehová heʼíva ovyʼáta koʼág̃ama voi ha oikovéta pára siémpre (Sal. 119:​2, 14).