Umi konsého bíblico ohekomboʼe ñane konsiénsia

1, 2. a) ¿Mbaʼe rregálopa oñemeʼẽ vaʼekue Adán ha Évape? b) ¿Mbaʼéichapa Adán ha Eva ohechauka vaʼerãmoʼã oagradeseha upe rregálo?

EPENSAMÍNA ko mbaʼére. Umi animál ningo ndaikatúi opensa ojapo hag̃ua álgo, síno ojapóntema hikuái. Umi mákina avei ndaikatúi odesidi ijehegui reíntema la ojapótava, péro ñande umáno ñanediferenteterei. Ñandéve ningo oñemeʼẽ vaʼekue peteĩ rregálo espesiál ha entéro umi kristiáno omombaʼeterei upe rregálo. ¿Mbaʼépa hína upéva? Ñande ikatu jadesidi ñandejeheguiete mbaʼépa jajapóta. La Biblia heʼi Ñandejára ojapo hague Adánpe ijoguaháramo (Gén. 1:​26, 27). Upévare Jehová okreárõ guare Adán ha Évape omeʼẽ chupekuéra oportunida odesidi hag̃ua ijehegui heta mbaʼe.

² Jehová nomeʼẽi kuri Adán ha Évape hetaiterei léi. Upéva rangue heʼínte kuri chupekuéra okuida hag̃ua ko yvýre ha ifamília heta hag̃ua. Avei Jehová heʼi kuri chupekuéra orrespeta vaʼerãha hikuái pe derécho haʼe orekóva heʼi hag̃ua mbaʼépa ndovaléi ojejapo (Gén. 1:28; 2:​16, 17). La Jehová ojerure vaʼekue chupekuéra ningo ndahasyiete, upévare Adán ha Eva iñeʼẽrendúnte vaʼerãmoʼã kuri. Péicha ohechaukáta kuri hikuái ohayhuha Jehovápe ha oipotaha haʼe ovyʼa hesevekuéra. Avei haʼekuéra iñeʼẽrendúrire, ohechaukáta kuri oagradeseha Jehovápe opa mbaʼe ojapo vaʼekuére ha avei opermiti haguére chupekuéra odesidi ijeheguiete heta mbaʼe (Prov. 23:15).

3. ¿Mbaʼéichapa Adán ha Eva oipuru vaʼekue pe liverta orekóva odesidi hag̃ua?

³ La Biblia ohechauka Adán ha Eva ndoipuruporãi hague pe liverta orekóva odesidi hag̃ua. Upéva rangue haʼekuéra odesidi naiñeʼẽrendumoʼãiha Jehovápe. Adán ha Eva ohayhuve rangue Jehovápe, opensaiterei ijehe (Gén. 3:​1-7). Ñande koʼag̃aite peve jasufri haʼekuéra odesidi vai haguére (Rom. 5:12).

4. a) Ohechaukaháicha Gálatas 6:​5, ¿mbaʼépa enterovéva jajapo vaʼerã? b) ¿Mbaʼe rregálorepa ñañeʼẽta ko artíkulope?

⁴ Koʼág̃arupi ijetuʼueterei ñandéve heta mbaʼe, pórke káda día oĩ umi mbaʼe tekotevẽva jadesidi ha ñañerresponsavilisa vaʼerã upe kárgare (elee Gálatas 6:5). Oĩ umi mbaʼe ifásilva jadesidi hag̃ua, péro oĩ avei ótra kósa hasyvéva. ¿Mbaʼéichapa ikatu ñambovyʼa Jehovápe umi mbaʼe jadesidíva rupive? Primeroite voi ñarrekonose vaʼerã ñaikotevẽha Jehová ñanepytyvõ (Prov. 16:3; Jer. 10:23). Por ehémplo Jesús perfékto vaʼekue, péro lomímonte oikuaa vaʼekue oikotevẽha Ñandejárare (Heb. 5:7). Ha ñande katu umáno imperfékto, upévare koʼytevéntema ñaikotevẽ Ñandejára ñandegia. Péro Jehová omeʼẽ ñandéve ótro rregálo iporãitereíva ñanepytyvõva jadesidi porã hag̃ua, upéva hína ñane konsiénsia ha ko artíkulope ñañeʼẽta upévare.

¿MBAʼÉPA HÍNA ÑANE KONSIÉNSIA?

5. a) ¿Mbaʼépa hína ñane konsiénsia? b) ¿Mbaʼéichapa ikatu ñanepytyvõ ñane konsiénsia? (Romanos 2:​14, 15).

⁵ Jehová ñandeapórõ guare omeʼẽ enterovévape peteĩ konsiénsia ñanepytyvõva jaikuaa hag̃ua mbaʼépa oĩ porã ha mbaʼépa oĩ vai. Oĩ umi hénte ndoikuaáiva Ñandejára léi péro lomímonte haʼekuéra oreko peteĩ konsiénsia (2 Cor. 4:​2, nóta). Ñane konsiénsia ojogua peteĩ hués ikatúvape ñanedefende térã ñanekondena umi mbaʼe ñapensáva ha jajapóvare (elee Romanos 2:​14, 15). Ñane konsiénsia ikatu ñandeavisa ani hag̃ua jajapo peteĩ mbaʼe jaikuaáva oĩ vaiha (1 Sam. 26:​8-11). Térã ikatu avei ñanemomýi jajapo hag̃ua umi mbaʼe iporãva. Jaikuaa ñande ikatuha jadesidi ñandejeheguiete, péro upéva ndeʼiséi entéro mbaʼe jadesidíva ogustataha katuete Jehovápe. Upearã ñaikotevẽ ñane konsiénsiare heʼi hag̃ua ñandéve mbaʼépa iporã ha mbaʼépa ivai.

6. ¿Mbaʼépa ikatu sapyʼánte oiko ñane konsiénsiare?

⁶ Péro oĩ hína peteĩ provléma, ñane konsiénsia sapyʼánte ikatu hína nombaʼapoporãi. Ñande ningo ndahaʼéi perfékto ha ñane konsiénsia upéichante avei. Ñande kultúra, jakakuaa lája térã umi deséo vai jarekóva ikatu hína noipytyvõi ñane konsiénsiape ofunsiona porã hag̃ua. La Biblia heʼi ñane konsiénsia ikatuha ‘ikangy’, ‘ikyʼa’, térã “iperepa oñemarkaramoguáicha iérro akúpe” (1 Cor. 8:12; Tito 1:15; 1 Tim. 4:2). Peichagua konsiénsia ndaikatuvéima ñanepytyvõ jadesidi porã hag̃ua, haʼete peteĩ valánsa tekotevẽva ojearregla ikatu hag̃uáicha ijexákto jey. Upéicharõ tekotevẽ ñañehaʼãmbaite ñahekomboʼe ñane konsiénsia ikatu hag̃uáicha ombaʼapo porã (1 Ped. 3:16). ¿Mbaʼéichapa ikatu jajapo upéva?

¿MBAʼÉICHAPA IKATU ÑAHEKOMBOʼE ÑANE KONSIÉNSIA?

7, 8. a) ¿Mbaʼépa ñanepytyvõta ñahekomboʼe hag̃ua ñane konsiénsia? b) ¿Mbaʼéichapa umi konsého térã prinsípio bíblico ñanepytyvõ? Emombeʼu peteĩ ehémplo. (Ehecha pe taʼanga).

⁷ ¿Mbaʼéichapa ikatu ñahekomboʼe ñane konsiénsia? Upearã jalee meme vaʼerã la Biblia ha ñaaprende vaʼerã mbaʼépa Jehovápe g̃uarã oĩ vai ha oĩ porã, jastudiáramo Ñandejára léi ñantendevéta haʼe opensa lája. Péro jahecháma haguéicha pe ótro artíkulope, umi léi oipytyvõ jepi algúna situasiónpente. Upévare tekotevẽ jaheka umi konsého térã prinsípio bíblico pórke umíva ñanepytyvõta ñantende hag̃ua la Jehová oñandúva ha opensáva hetave mbaʼére (Is. 55:9).

⁸ Ñañeimahinamína peteĩ persóna oguataha ohóvo peteĩ desiértore, ndaiporihárupi tape ni señál ohechaukáva chupe moõpa oĩ. Péicha jave pe persóna ikatu ojegia pe kuarahýre ha umi estréllare oikuaa hag̃ua moõrupipa oho vaʼerã. Péro oikovéta ningo orekórõ peteĩ mápa ohechaukáva chupe mbaʼe mbaʼépa otopáta ohóvo pe tapére. Pe mápa rupive pe persóna oikuaáta oho porãpa hína, térãpa ohóma hína ótro ládo. Péicha lénto ningo la ñane situasión. Enterovéva ñambovyʼase Jehovápe ha la Biblia peteĩ mápaicha ohechauka ñandéve pe tape porã ikatu hag̃uáicha Jehová ñandeguerohory. Jaaprovecha porãrõ umi konsého térã prinsípio bíblico ikatu ñaĩ segúro jahataha pe tape porãre ikatu hag̃uáicha ñambovyʼa Jehovápe.

9. Ohechaukaháicha Romanos 9:​1, ¿mbaʼépa avei ñanepytyvõta ñahekomboʼe porã hag̃ua ñane konsiénsia?

⁹ Ñahekomboʼe porã hag̃ua ñane konsiénsia ñaikotevẽ Ñandejára espíritu sántore (elee Romanos 9:1). Ñandejára espíritu ñanepytyvõta ñantende hag̃ua la Jehová opensáva heta mbaʼére. Avei ikatu omeʼẽ ñandéve pe podér ha pe deséo jajapo hag̃ua umi mbaʼe ogustáva Jehovápe (Filip. 2:13). ¿Péro mbaʼépa jajapo vaʼerã Jehová omeʼẽ hag̃ua ñandéve ijespíritu sánto?

10. ¿Mbaʼépa jajapo vaʼerã jarresivi hag̃ua pe espíritu sánto? (Lucas 11:​10, 13).

¹⁰ Jajerurékena Jehovápe ijespíritu sánto (elee Lucas 11:​10, 13). Aníkena jaduda Jehová omeʼẽsetereiha voi ñandéve ijespíritu sánto (Juan 3:34). Haʼe siémpre omeʼẽ pojerápe ijespíritu sánto umi iñeʼẽrendúvape chupe (Prov. 1:23; Sant. 1:5). ¿Péro mbaʼe ótra kósapa jajapo vaʼerã ñahekomboʼe hag̃ua ñane konsiénsia?

11. a) ¿Mbaʼépa la iñimportanteve vaʼerã ñandéve g̃uarã? b) ¿Mbaʼérepa jajasegura vaʼerã ombaʼapo porãpa hína ñane konsiénsia?

¹¹ Siémprekena jajapo umi mbaʼe ogustáva Jehovápe (Prov. 8:​34, 35). Upéva ningo la iñimportanteve vaʼerã ñandéve g̃uarã. Ñahekomboʼe porãta ñane konsiénsia siémpre ñañehaʼãramo jajapo la Jehovápe ogustáva. Ñane konsiénsia ombaʼapo porãta ñapensárõ Jehová opensaháicha ha jarekórõ enkuénta la haʼe oñandúva. Jaikuaa ñande rekove ijetuʼuetereiha koʼág̃arupi, upévare koʼýte ñane konsiénsia ombaʼapo porã vaʼerã. Pyʼỹinte oñepresenta ñandéve umi situasión tekotevẽhápe jadesidi álgo, péro la Bíbliape ndaipóri peteĩ léi heʼíva derechoite mbaʼépa jajapo vaʼerã. Por ehémplo tekotevẽ jadesidi mbaʼéichapa jajedivertíta, mbaʼe traváhopa jajagarráta, mbaʼeichagua estúdiopa jasegíta ha máva mávarepa jajeheʼáta. Koʼãichagua situasiónpe, ¿mbaʼéichapa ikatu ñaĩ segúro la jadesidíva oĩ porãha Jehovápe g̃uarã? (2 Cor. 1:12).

12. ¿Mbaʼéichapa jaikuaáta ñandegia porãpa hína ñane konsiénsia? (Efesios 5:10).

¹² Jajepyʼamongetákena la jaleévare Ñandejára Ñeʼẽme (Sal. 49:3). Jalee jave la Biblia jahekákena umi konsého ñanepytyvõtava ñantende hag̃ua mbaʼéichapa Jehová opensa (elee Efesios 5:10). Upéicha jahechakuaáta ñanepytyvõpa hína ñane konsiénsia jadesidi porã hag̃ua ñasolusionáta jave peteĩ provléma (Prov. 2:​4-9, 11-13). Oiméramo tekotevẽ jakorrehi ñane konsiénsia, koʼã prinsípio térã konsého bíblico ñanepytyvõta. Péicha ikatúta jajapo umi mbaʼe ogustáva Jehovápe (Heb. 5:14).

13. ¿Mbaʼépa ndovaléi jajapo? Emombeʼu peteĩ ehémplo.

¹³ Aníkena jadesidi peteĩ mbaʼe ha upéi ae jahecha mbaʼépa Jehová opensa. Ñande ningo ndajajoguaséi umi israelita opyta vaʼekuépe oiko Judápe oñehundi rire Jerusalén áño 607-pe. Haʼekuéra heʼi vaʼekue Jeremíaspe: “Nde Jára Jehová tomombeʼu oréve mbaʼe tapérupipa roho vaʼerã ha mbaʼépa rojapo vaʼerã” (Jer. 42:​3-6). Péro legálmente umi israelita odesidíma vaʼekue mbaʼépa la ojapótava hikuái, upévare Jehová heʼírõ guare chupekuéra la ojapo vaʼerã, haʼekuéra naiñeʼẽrendúi ha ojapo jeýnte la odesidíma vaʼekue. Upéicha rupi hetaiterei mbaʼe vai oiko (Jer. 42:​19-22; 43:​1, 2, 4). Upéicharõ jadesidi mboyve peteĩ mbaʼe, jaheka vaʼerã mbaʼe konsého bíblicopa ohechauka ñandéve la Jehová opensáva ha upéi jajapo la ogustáva chupe.

14. ¿Mbaʼérepa jajegia vaʼerã umi konsého bíblicore jadesidíta jave?

¹⁴ Jajegiákena umi konsého bíblicore jadesidíta jave (Mat. 7:​24-29; Sant. 1:​23-25). Jajegiáramo umi konsého bíblicore jadesidíta jave peteĩ mbaʼe, jaheja hína pe espíritu sánto ñandegia. Jajapóramo upéva, Jehová osegíta omeʼẽ ñandéve ijespíritu (Hech. 5:32). Péro nañapenáiramo pe gía omeʼẽvare ñandéve pe espíritu sánto térã jaháramo ikóntrape, ikatu hína ‘ñamoñembyasy Ñandejára espíritu sánto’ (Efes. 4:30; Is. 63:10; Hech. 7:51). Upévare ikatu voi hína Jehová nomeʼẽvéi ñandéve ijespíritu (Sal. 51:11; 1 Tes. 5:19). Upéva oiko sapyʼárõ, ivaietereíta la ñane situasión pórke ñande ñaikotevẽ pe podér omeʼẽva ñandéve pe espíritu sánto ñanembarete hag̃ua (Efes. 3:16).

¿MBAʼÉICHAPA JATOPÁTA UMI KONSÉHO BÍBLICO ÑANEPYTYVÕTAVA?

15, 16. a) ¿Mbaʼéichapa ikatu jatopa umi konsého bíblico ñaikotevẽva peteĩ situasiónpe g̃uarã? b) ¿Mbaʼéichapa umi konsého bíblico ikatu oipytyvõ peteĩ estudiántepe anivéma hag̃ua opita?

¹⁵ Jaipurúkena umi erramiénta jarekóva jastudia hag̃ua. Jaikuaa hag̃ua mbaʼe konsého bíblicopa ideprovéchota ñandéve tekotevẽ jatopa raẽ umíva Ñandejára Ñeʼẽme. Por ehémplo ikatu oime ereko peteĩ estudiánte de la Biblia opitáva ha nontendéiva mbaʼérepa upéva ivai. Pe estudiánte ikatu oime opensa: “La Biblia ningo ni noñeʼẽi pe jepitáre, ¿mbaʼére upéicharõ jaʼéta ivaiha?”. ¿Mbaʼéichapa ikatu ñaipytyvõ pe estudiántepe otopa hag̃ua umi konsého térã prinsípio bíblico ohechaukáva chupe ndovaleiha japita? Péicha jave ikatu ideprovechoiterei pe erramiénta jastudia hag̃ua hérava Gía oipurúva testígo de Jehová otopa hag̃ua informasión. Ikatu jahechauka ñane estudiántepe upe gía pe párte heʼihápe “Opitáva”. Upéva guýpe heʼi jalee hag̃ua pe artíkulo hérava “¿Mbaʼépa opensa Ñandejára pe sigarríllore?” (ehecha Ñemañaha 1 de junio de 2014). Pe estudiánte oleekuévo ko artíkulo, ¿mbaʼe konsého térã prinsípio bíblicopa otopáta?

¹⁶ Jahechamína 5 prinsípio térã konsého bíblico jatopáva pe artíkulope. 1) Ndovaléi jaiko peteĩ vísio vaiete poguýpe ikatúva ñandejuka (Rom. 6:16). 2) Jajehekyiete vaʼerã opa mbaʼe ikatúvagui ñandeperhudika (2 Cor. 7:1). 3) Jehová oipota jaservi chupe ñande rekove kompletoite reheve (Mat. 22:37). 4) Ndovaléi jajapo mbaʼeve ikatúva ombyai térã operhudika ñande rapichápe (Mat. 22:39; 1 Cor. 10:24). 5) Jehová katuete ñanemombaretéta jajapo hag̃ua la iporãva (Filip. 4:13). Legálmente la Bíbliape noĩri pe palávra sigarríllo térã opitáva, péro umi konsého bíblico oipytyvõta pe estudiántepe ohechakuaa hag̃ua mbaʼépa Jehová opensa upe vísiore.

17. ¿Mbaʼéichapa umi omendátava ikatu otopa umi konsého bíblico oipytyvõtava chupekuéra ikasamientoha díape?

¹⁷ Ñamoĩ chupe peteĩ ermáno ha ermána oĩva de nóvio oplaneaha la ikasamiénto, ¿mbaʼéichapa otopáta hikuái umi konsého bíblico odesidi porã hag̃ua? Upe kásope avei ikatu oipytyvõ chupekuéra pe Gía oipurúva testígo de Jehová. Ikatu oheka hikuái pe párte heʼihápe “Kasamiénto”. Upépe oĩ umi artíkulo oñeʼẽva umi konsého bíblico oipytyvõtavare chupekuéra. Umi omendátava ikatu oreko enkuénta koʼã konsého bíblico: 1) Entéro mbaʼe ojejapóva pe kasamientohápe omombaʼe vaʼerã Jehovápe (1 Cor. 10:​31, 32). 2) Ñañemonde lájare jahechauka vaʼerã jarrespetaha ótrope ha ñaneakãguapyha, ha ndajaipurúi vaʼerã mbaʼeve ijexaherádova (1 Tim. 2:9; 1 Ped. 3:​3, 4). 3) Ndajaikói vaʼerã jajechaukase umi mbaʼe jarekóvare, ojejapoháicha Satanás múndope (Juan 17:14; Sant. 1:27; 1 Juan 2:​15, 16). 4) Oñeplanea porã vaʼerã entéro mbaʼe (1 Cor. 14:40). 5) Umi fiéstape ndovaléi ojefarrea itarovávaicha ni oñemokõ rasa (Gál. 5:21). 6) Oĩ vaʼerã peteĩ enkargádo pe kasamiéntore okontrola hag̃ua la ojejapóva (Juan 2:​8, 9).

18, 19. a) ¿Mbaʼe ótra erramiéntapa jareko ikatúva ñanepytyvõ? b) Edesidi hag̃ua rehótapa peteĩ fiéstape, ¿mbaʼéichapa ikatu reipuru ko erramiénta retopa hag̃ua umi konsého bíblico? (Ehecha pe rrekuádro “¿Rehechakuaápa la Jehová opensáva koʼã mbaʼére?”).

¹⁸ Oĩ avei ótra erramiénta jastudia hag̃ua hetápema oipytyvõva. Upéva hína pe lívro hérava Téxto bíblico ogiáva kristianokuérape. Ko puvlikasiónpe oñeñeʼẽ heta témare ha avei oñemoĩ umi téxto bíblico oñeʼẽva umi témare. Reheka rire peteĩ téma neinteresáva rehecháta unas kuánta pregúnta ha téxto bíblico nepytyvõtava rentende hag̃ua pe konsého bíblico. Por ehémplo oimérõ peteĩ kristiáno oikuaase ikatúpa oho peteĩ fiéstape, ikatu oike pe párte heʼihápe “Fiésta ha día jagueromanduʼáva”, upéi ikatu ohecha pe párte oĩva iguýpe heʼíva “Fiésta kristianokuéra omboykéva”.

¹⁹ Ehechamína umi mbaʼe oñeanalisáva pe párte heʼihápe: “Oĩ heta fiésta ojegueromanduʼáva umi rrelihión japúpe, ¿mbaʼérepa ñamboykete vaʼerã umichagua fiésta?” (1 Cor. 10:21; 2 Cor. 6:​14-18; Efes. 5:​10, 11). Upéi oñeñeʼẽ ohóvo umichagua fiéstare. Avei retopáta upe párte heʼíva “Umi fiésta patriótika”. Upépe oñemoĩ umi konsého bíblico peteĩ kristiáno tekotevẽva oreko enkuénta odesidi hag̃ua ogueromanduʼátapa la ojapo vaʼekue peteĩ polítiko térã autorida ipaisgua, ogueromanduʼátapa umi fécha istórika de gérra ha opartisipátapa umi akontesimiénto ojejapóvape oñembotuicha hag̃ua peteĩ persóna iñimportántevape. Javyʼaite ningo Jehová organisasión omeʼẽ haguére ñandéve koʼã erramiénta ideprovechoitéva ñahekomboʼe hag̃ua ñane konsiénsia.

JAJASEGURA PORÃKENA ÑAHEKOMBOʼE PORÃHA ÑANE KONSIÉNSIA

20. ¿Mbaʼéichapa ojekuaáta ñahekomboʼe porãha ñane konsiénsia?

²⁰ Ñamombaʼeterei ningo Jehová opermiti haguére ñande jadesidi ñandejeheguiete, péro avei jahechakuaa tekotevẽha ñahekomboʼe porã ñane konsiénsia jadesidi porã hag̃ua. Ñahekomboʼe porãrõ ñane konsiénsia jadesidíta umi mbaʼe ogustáva ha omombaʼéva Jehovápe. Jahecha haguéicha, ñahekomboʼe hag̃ua ñane konsiénsia ñaikotevẽ Jehová espíritu sántore, upévare jasegíkena jajerure chupe ijespíritu sánto ha upéi jaheja tañandegia. Avei umi konsého bíblico ñanepytyvõ ñahekomboʼe hag̃ua ñane konsiénsia. Ñañehaʼãmbaitékena jaaprovecha porã umi rregálo Jehová omeʼẽva ñandéve. Upéicha jahecháta mbaʼéichapa Ñandejára Ñeʼẽ oreko podér ñanepytyvõ hag̃ua (2 Tim. 3:​16, 17; Heb. 4:12).