Koʼẽrõitéma opáta pe violénsia ha jaikóta trankilomi

¡Ajépa igustoite vaʼerã la ikatúramo jaiko trankilomi! Umi governantekuéra ningo ymaite guive oñehaʼãva opa hag̃ua umi gérra ikatu hag̃uáicha ojeiko porã. Sapyʼánte irresultádo porã la ojapóva hikuái, ha ojeiko trankílo peteĩ tiémpore. Péro lastimósamente upéi la hénte oñepyrũ jeýma oiko vaipa. ¿Seráiko algúna ves opáta umi gérra ha jaikóta trankilomi? ¡Si! Ha jaikuaa hag̃ua mbaʼéichapa oikóta upéva jahechamíta mbaʼépa koʼẽrõitéma ojapóta Jesús, ha avei mbaʼe mbaʼépa haʼe ñanemboʼe vaʼekue.

¿Mbaʼépa Jesús ojapóta koʼẽrõite?

La Biblia ohechauka mbaʼépa Jesús koʼẽrõitéma ojapóta opa hag̃ua pe violénsia ha jaiko hag̃ua trankílo.

• “Oñembohérata chupe [...] Prínsipe de Paz. Igoviérno siémpre okakuaáta, ha pe pyʼaguapy núnka ndopamoʼãi” (Isaías 9:6, 7). Ág̃a ou vove Ñandejára Rréino, Jesús ogovernáta ko múndo tuichakuére. Upépe haʼe oñenkargáta opaite hag̃ua pe violénsia ha hasypeve jaikóta trankilomi oparupiete.

• “Umi imboriahúva ningo ojerure asy ajúda, ha haʼe katuete osalváta chupekuéra. Avei oipytyvõta [...] umi ndorekóivape avave odefende vaʼerã chupekuéra” (Salmo 72:12-14). Ág̃a Jesús ñanegoverna vove, haʼe ojapóta hustísia. Upépe opaitéta umi gérra, pe violénsia ha enteroite mbaʼe ñanembosufríva.

• “Umi tetã ndohupimoʼãvéima ijespáda ótro tetã kóntrape, ha noñemboʼemoʼãvéima chupekuéra mbaʼéichapa oñorairõ vaʼerã” (Isaías 2:4). Jesús goviérno poguýpe enterovetéva ñaaprendéta jajogueraha porã hag̃ua ñande rapichakuérandi. Upe tiémpope noñemboʼemoʼãvéima avavépe mbaʼéichapa oñorairõ vaʼerã ni operhudika vaʼerã hapichápe.

Eikuaaséramo mbaʼéichapa Jesús ojapóta koʼã mbaʼe ha mbaʼéichapa nde avei ikatu edisfruta umíva, ehechamína pe vidéo ¿Mbaʼépa hína Ñandejára Rréino?

¿Mbaʼépa Jesús omboʼe vaʼekue?

Umi mbaʼe Jesús omboʼe vaʼekue ningo koʼág̃a peve oipytyvõ hetaiterei héntepe ojogueraha porã hag̃ua hapichakuérandi. Pe Sermón del Mónte ifamosoitévape, Jesús omboʼe vaʼekue heta mbaʼe ñanepytyvõva ikatu hag̃uáicha jajogueraha porã enterovéndi. Jahechamína unos kuánto konsého haʼe omeʼẽ vaʼekue.

• “Ovyʼa umi oñehaʼãva oĩ hag̃ua pyʼaguapy” (Mateo 5:9). Jesús ndeʼíri vaʼekue ndajaikovaírinte vaʼerãha ñande rapichakuérandi, síno ñanemokyreʼỹ vaʼekue ñañehaʼãmbaite hag̃ua enterovéva ojogueraha porã hag̃ua.

• “Tereho eiko porã raẽ ne ermánondi, upéi ae eju emeʼẽ ne ofrénda” (Mateo 5:23, 24). Jesús ñanemokyreʼỹ vaʼekue pyaʼe ñasolusiona hag̃ua umi provléma jarekóva ótrondi. Ha omboʼe vaʼekue ndajajapóiramo upéva, ndaikatumoʼãiha ñaime porã Ñandejárandi.

• “Anive pehusga pende rapichápe, ha Ñandejára napendehusgamoʼãi avei” (Mateo 7:1). Jesús heʼi vaʼekue ndovaleiha jaiko jahusga ñande rapichápe ni ñaneexihenteterei hendivekuéra. Upéva ningo provlémamante ogueru. Jaiko rangue jaheka defékto ñande rapicháre, Jesús ñanemokyreʼỹ vaʼekue jasegi hag̃ua ñañoperdona (Lucas 6:37).

Ko múndo tuichakuére oĩ hetaiterei persóna osegíva hína umi konsého Jesús omeʼẽ vaʼekue. Ha jepe algúno oiko umi lugár oĩháme heta violénsia ha umi hénte oiko vaipahápe, haʼekuéra oaprende mbaʼéichapa trankílo porãnte ikatu osolusiona umi provléma orekóva ótrondi. Avei oaprende hikuái operdona vaʼerãha hapichakuérape, ha ohayhu vaʼerãha inklusíve umi otrata vaívape chupekuéra.

Eikuaaséramo mbaʼéichapa umi mbaʼe Jesús omboʼe vaʼekue oipytyvõma hetápe oiko hag̃ua trankílo, eleemína pe artíkulo “Ikatu ñandepyʼaguapy oĩramo jepe gérra”.