Pe lívro de Isaías ikatu ñanekonsola

1, 2. ¿Mbaʼépa Jehová ojapo ñañeñandu vai jave?

ÑAMOĨ chupe peteĩ mitã ovaha ifamíliandi ótro lugárpe ha ohejapa la iñamigokuérape. Upévare haʼe oñeñandu vaieterei ha hasẽ voi, térã ikatu oime pe mitã ojapo raʼe álgo oikuaáva noiporãiha ha ombyasyeterei upéva. Péicha jave, ¿mbaʼépa ojapóta peteĩ sy oporohayhúva? Oañuáta imembýpe, ohendúta chupe ha heʼíta pe mitãme: “Rohayhueterei che memby”.

² La Bíbliape Jehová oñekompara peteĩ sy oporokonsolakuaávare. Haʼe heʼi ijehe: “Peteĩ sy okonsolaháicha imembýpe, péicha che asegíta pokonsola” (Is. 66:13). Jehová ningo ñanderayhueteve ñande túa térã ñande sýgui ha Iñeʼẽ la Biblia rupive Jehová omeʼẽ ñandéve konsuélo ha pe fuérsa ñaikotevẽva ñañeñandu jave yvýre térã jasufri jave (Is. 49:15; Rom. 15:4).

3. ¿Mbaʼépa jahecháta ko artíkulope?

³ Jehová heʼi ñandéve heta mbaʼe ñanekonsoláva pe lívro de Isaíaspe (Is. 40:1). Ñandejára ojevale vaʼekue Isaíasre oskrivi hag̃ua ko lívro pórke okonsolase ipuévlo oikóvape Judápe, upérõ haʼekuéra oreko vaʼekue heta provléma. Koʼág̃a avei la situasión ijetuʼu ha ñaikotevẽ konsuélo (2 Tim. 3:1). Upévare ko artíkulope ñaanalisáta unos kuánto téxto bíblico oĩva Isaíaspe ñanembopyʼaguapy ha ñanemombaretétava koʼã kásope: 1) Okambia jave derrepentete ñane situasión, 2) ñañeñandu jave kulpávle ha 3) omano jave ñandehegui peteĩ jahayhúva.

ÑANE SITUASIÓN OKAMBIÁRAMO DERREPENTETE

4. ¿Mbaʼéichapa ikatu ñañeñandu okambiáramo ñane situasión ñaimoʼãʼỹve jave?

⁴ Ñane situasión ikatu hína okambia ñaimoʼãʼỹve jave (Ecl. 9:11; 1 Cor. 7:31). Upeichaháguinte ikatu ñanderasy, jareko provléma ekonómiko térã oĩ provléma ñande paíspe. Ikatu oime avei jaservi Jehovápe peteĩ asignasiónpe, péro upéi oñekambia ñandehegui upéva. Péicha jave normál la jakyhyje ha jajepyʼapy, ikatu voi ñañeporandu: “¿Mbaʼéiko la ajapótava?”. Peteĩ ermáno hérava Joseph oservi kuri Betélpe 17 áñore, péro upéi ojejerure chupe osẽ hag̃ua oservi de prekursór. Haʼe heʼi: “Che heta áñore aservi vaʼekue Betélpe ha upévare ijetuʼueterei vaʼekue chendive asẽrõ guare. Ndaikuaái kuri mbaʼépa la ajapótava ni moõ gotyo ládopa ajapíta”. Oimérõ derrepentete okambia la ñane situasión, ¿mbaʼépa Jehová opromete ñandéve pe lívro de Isaías rupive?

5. Jahechaháicha Isaías 42:​16-pe, ¿mbaʼépa Jehová opromete ojapotaha ñanderehehápe? (Ehecha pe taʼanga).

⁵ (Elee Isaías 42:16). Sapyʼánte ikatu ñañeñandu peteĩ siégoicha oguatáva hína peteĩ tape ndoikuaáivare. Péro Jehová opromete péicha jave ñandegiataha, ha heʼi omohesakãtaha pe lugár iñypytũva. Ko téxtope ojepuru koʼã palávra: ‘siégo’, ‘tape ndojekuaáiva’, ‘lugár iñypytũva’ ha “tape ivaíva”. Legálmente oiko jave peteĩ mbaʼe nañahaʼarõietéva péicha lénto ñañeimahina ñane situasión. Ikatu ñañeñandu jaguatarõguáicha peteĩ kaʼaguýre ndaikatuihápe jahecha la oĩva ñane renonderãme. Péro Jehová opromete ñandéve toiko la oikóva haʼe ñandegiataha ha núnka nañanderejareimoʼãiha. Haʼetéramo jepe jahasáva hína peteĩ lugár iñypytũhárupi, Jehová oñakaramáta ñande póre ha ñandegueraháta ikatu hag̃uáicha ifasilve ñandéve jahasa upérupi. ¿Mbaʼéichapa Jehová ojapo upéva? Upearã omeʼẽ ñandéve konsého iporãva Iñeʼẽ ha iñorganisasión rupive (Sal. 119:105; Is. 30:21). Avei haʼe ojevale umi ermáno ha ermánare ñanepytyvõ hag̃ua. Ndajaikuaaporãiramo jepe mbaʼépa oikóta ñandehegui, ikatu ñaĩ segúro Jehová siémpre ñandegiataha pórke haʼe ñanderayhu ha ontende la ñañandúva (Is. 41:10; 1 Ped. 5:​6, 7).

6. Derrepentete oikóramo peteĩ kámbio, ¿mbaʼéguipa ikatu ñaĩ segúro?

⁶ Párrafo 4-pe ñañeʼẽ kuri ermáno Joseph rehe. Haʼe ha hembireko osẽ rire Betélgui oñandu mbaʼéichapa Jehová okuida hesekuéra mborayhúpe. Haʼe heʼi: “Okambiárõ guare la ore situasión, roñandu mbaʼeichaitépa Jehová oremokunuʼũ. Haʼe ojevale umi ermáno ikalidaitévare okuida hag̃ua orerehe, Jehová nombofaltái oréve ore remikotevẽ ha orekonsola itiempoitépe. Koʼag̃aite peve haʼe osegi ojapo upéva”. Jaikuaa ikatuha oiko peteĩ mbaʼe nañahaʼarõietéva. Péicha jave pe situasión ikatu hína ñandesuperaite voi, péro aníkena ñanderesarái Jehová omeʼẽtaha ñandéve pe fuérsa ñaikotevẽva ha osegitaha ñandegia (Is. 54:10; 58:11). Ermáno Joseph upe rire heʼive: “Iporãiterei ningo la heʼíva peteĩ purahéi osẽ vaʼekue pe Broadcástingpe, upépe heʼi: ‘Ikatúrõ jepe ivaive ndacheresaráiri nacheañoiha’.a Jahechaháicha, heta vése umi mbaʼe ndoikói jakalkula haguéicha. Péro peteĩ mbaʼe ikatu jaaseguraite, Jehová oĩta ñande ykére jaha jahahápe, haʼe núnka nañanderejamoʼãi ñaneaño peteĩ”.

ÑAÑEÑANDÚRAMO KULPÁVLE LA JAJAPO VAʼEKUÉRE

7. ¿Mbaʼéichapa oñeñandu jepi umi anteve opeka vaʼekue?

⁷ Oimérõ japeka raʼe, katuete ñamombeʼúma umi ansiánope la jajapóva ha haʼekuéra ñanepytyvõ mborayhúpe. Upe guive ñande ñañehaʼã anivéma hag̃ua jajapo la mísma kósa (Prov. 28:13; Sant. 5:​14-16; 1 Juan 1:9). Ñañarrepenti rire Jehová ñaneperdona, péro ikatu oime ñañeñandu gueteri kulpávle. Oiméne ñapensa voi: “¿Sera piko añete la Jehová cheperdonáma la ajapo vaʼekuére?” (2 Cor. 2:7). Ikatúnte voi ñañeñandu péicha, pórke ndahaʼéi la ifasilpáva ñanderesarái umi mbaʼe vai jajapo vaʼekuégui ha ikatu voi heta tiémpore ñañembyasy. Por ehémplo rréi David heʼi vaʼekue Jehovápe: “Che ningo apeka ne kóntrape, upévare ndaikatúi aiko pyʼaguapýpe. Chekangypa ha nameʼẽvéima” (Sal. 38:​3, 8). Oimérõ nde avei reñeñandu hína upéicha umi mbaʼe rejapo vaʼekuére, pe lívro de Isaías tuicha nekonsoláta.

8, 9. ¿Mbaʼeichaite pevépa Jehová ñaneperdona? (Isaías 1:18).

⁸ (Elee Isaías 1:18). Koʼápe Jehová oipuru peteĩ ehémplo ohechauka hag̃ua mbaʼeichaite pevépa ñaneperdona. Haʼe heʼi: “Pende pekadokuéra pytãramo jepe tuguýicha, opytáta morotĩ asy pe niéveicha”. Jaikuaa ningo ijetuʼuetereiha jaipeʼa hag̃ua peteĩ máncha pytãitéva ñande aógui, pórke upe kolór imbareteterei. Upéicha avei umi ñande pekadokuéra ojogua upe mánchape, péro Jehová oasegura ñandéve ñaneperdona rire ndopytamoʼãiha ñanderehe ni umi máncha rapykuere jaikove aja pukukue.

⁹ Ñanemanduʼamína rréi David rehe. Jaikuaaháicha haʼe hekovai ha oporojuka vaʼekue. Péro Jehová operdona chupe ha tiémpo rire heʼi vaʼekue David iñeʼẽrendu hague ipyʼaite guive (2 Sam. 11:​3, 4, 14, 15; 12:13; 1 Rey. 9:​4, 5). Jehová oñeʼẽrõ guare rréi David rehe, naimanduʼái hese umi mbaʼe vai ojapo vaʼekuére, síno heʼi haʼe ifiél hague. Ñande kásope avei Jehová mborayhúpe ñaneperdona ñañarrepentíramo, ha ñanepytyvõ jaha hag̃ua hese tenonde gotyo konsiénsia potĩ reheve. ¿Mbaʼe ótra kósapa avei heʼi pe lívro de Isaías ikatúva ñanekonsola jasegírõ ñañeñandu kulpávle?

10. ¿Mbaʼépa Jehová opromete ñandéve Isaías 38:​17-pe?

¹⁰ (Elee Isaías 38:17 ha pe nóta). Ko versíkulope heʼi Jehová ‘omomboha entéro umi ñande pekadokuéra henondégui’, upéva ikatu avei ojetradusi Jehová ‘omomboha hapykue gotyo ñande pekadokuéra’. Ko téxto ohechauka peteĩ persóna oñarrepentíramo, Jehová ojagarraha la ipekadokuéra ha omomboha hapykue gotyo anivéma hag̃ua ohecha umi pekádo ni imanduʼa umívare. Peteĩ lívro heʼi ko téxto ikatuha avei ojetradusi péicha: “Nde reperdona cherembiapo vaikue ha opyta voi núnka ndoikoiramoguáicha mbaʼeve”. Upévare Jehová ñaneperdonáma guive, chupe g̃uarã japyta ku núnka ndajapekairõguáicha. Haʼe ni núnka ndoikomoʼãi ñandekastiga la ñande pekádore, pórke haʼe naimanduʼavéima voi la jajapo vaʼekuére. Jehová opromete ñandéve: “Che cheresaráita nde pekadokuéragui” (Is. 43:25). ¡Ajépa upéva tuichaite ñanekonsola ha opoko ñanderehe! Ñapensamíntena, Jehová ningo pe Hués Ijojahaʼỹva ha ni haʼe ndoikóiramo ohekýi ñandéve la jajapo vaʼekue, ¿mbaʼére piko ñande jasegíta ñanemanduʼa umi mbaʼe vai jajapo vaʼekuére?

11. Tahaʼe haʼéva la jajapo vaʼekue, ¿mbaʼépa hína la iñimportantevéva Jehovápe g̃uarã? (Ehecha pe taʼanga).

¹¹ Peichahágui ñañeñandu jeýramo kulpávle, ñanemanduʼákena la Jehová oprometévare ñandéve, haʼe ñaneperdona jave hesaraietéma voi la jajapo vaʼekuégui. Oimérõ japeka raʼe ndoikomoʼãi otĩ ñandereheve ni ndopytamoʼãi ipyʼaro jajapoháicha jepi ñande ótra persónare (Is. 57:16). Ñañarrepentíma guive, Jehovápe g̃uarã naiñimportantevéima la jajapo vaʼekue yma, síno haʼe oreko enkuénta la jajapóva koʼág̃a ha amo gotyove (Is. 55:7). Ñande jaservi hína peteĩ Dios oporohayhu ha oporoperdonakuaávape. ¡Ajépa ningo iporãite upéva! Upéicharõ, la oiko vaʼekue yma topytántema tapykue gotyo ikatu hag̃uáicha koʼág̃a revyʼa ha redisfruta umi vendisión oúva amo gotyove.

OMANÓRAMO PETEĨ JAHAYHÚVA

12. ¿Mbaʼéichapa ikatu ñañeñandu omanóramo ñandehegui peteĩ jahayhúva?

¹² Ñañembyasyeterei ningo ha ñandejopy asy omano jave peteĩ jahayhúva ha ikatu voi japyta péicha heta tiémpore. Sapyʼánte ikatu voi ñandepochy Jehovándi. Por ehémplo peteĩ ermáno hérava Michael omombeʼu omano hague chugui itúa ha isy peteĩ inséndiope. Haʼe heʼi: “Yvýre apyta ha chepochy Jehovándi. Aikuaa che tuakuéra nomanói hague ikáusare, péro mbaʼére la oheja oiko upéva”. Oimérõ nde reñeñandu hína péicha, ¿mbaʼe konsuélo ha esperánsapa omeʼẽ ndéve Jehová?

13. ¿Mbaʼépa opromete Jehová Isaías 25:​8-pe?

¹³ (Elee Isaías 25:8). Jehová opromete ‘ohunditaha pe ñemano opa ára g̃uarã’. Ñañeimahinamíntena ndaiporivéi vove omanóva, upéva heʼise ndajaikomoʼãveimaha ñañembyasy omano haguére peteĩ ñane hénte térã ñane amígo (Is. 35:10). Núnka mas nañanerasẽmoʼãvéima jahechávo peteĩ jahayhuetévape peteĩ kahónpe térã oñeñotỹvo chupe. Upéva rangue ñandepyʼaguapýta jaikuaágui umi jahayhúva oĩtaha siémpre ñanendive ha hesãitaha hikuái. Ko promésa ndahaʼéi ku oĩva ñane akãmente, síno oikóta katuete pórke Jehová hína pe oprometéva ha haʼe añoite ikatu okumpli upéva (Apoc. 21:​4, 5).

14. ¿Mbaʼéichapa reñeñandu epensávo pe rresurreksiónre? (Isaías 26:19). (Ehecha pe taʼanga).

¹⁴ (Elee Isaías 26:19). Jehová ndahaʼéi ku ohundítanteva pe ñemano, síno avei omoingove jeýta umi omano vaʼekuépe. Oñeʼẽvo umi omano vaʼekuére Jehová heʼi voi: “Umi teʼongue chembaʼéva opuʼã jeýta”. Jahechaháicha Jehová voi heʼi haʼe oñenkargaha hesekuéra pórke umi omanóva imbaʼe hína. Ñandejára ndahesaráiri chuguikuéra ha itiempoitépe omoingove jeýta umi omano vaʼekuépe. Pe ysapy omopuʼã umi plánta ipirupa vaʼekuépe, péicha avei Jehová omopuʼãta umi omano vaʼekuépe pórke haʼe ningo pe omeʼẽva la vída. ¡Ñapensamíntena mbaʼeichaitépa javyʼáta jahecha jey vove umi ñane hénte ha amigokuéra omano vaʼekuépe! (ekompara Marcos 5:42 heʼívare).

15. ¿Mbaʼéichapa ñanepytyvõ ñapensáramo pe rresurreksiónre?

¹⁵ Jajerovia haguére pe rresurreksiónre ndeʼiséi nañañembyasyveimaha omano haguére peteĩ jahayhúva. Péro tuicha ñanekonsola jaikuaa haguére Jehová ndahesarairiha chuguikuéra. Péicha opensa vaʼekue Michael, pe ermáno ñañeʼẽ vaʼekuére. Haʼe heʼi: “Isaías 26:19 rupive antende Jehová oikuaa porãitereiha che túa ha che sýpe ha ohayhuha chupekuéra. Haʼe imanduʼáta che tuakuérare omoingove jey peve chupekuéra itiempoitépe, upéva chemombarete ha chekonsola”. Iporãitereíta koʼág̃ama voi ñañeimahinárõ pe moménto jahecha jeytahápe upe ñane hénte térã ñane amígo omano vaʼekuépe. Péicha jagueropuʼaka porãvéta la ñañandúva omano haguére ñandehegui peteĩ jahayhúva.

16. ¿Mbaʼe téxtopa nepytyvõ vaʼekue rehasárõ guare peteĩ situasión ijetuʼúva?

¹⁶ Jahecháma unos kuánto téxto oĩva Isaíaspe ikatúva ñanekonsola koʼã kásope: Okambia jave derrepentete ñane situasión, ñañeñandúrõ kulpávle térã omanóramo ñandehegui peteĩ jahayhúva. Jaagradeseterei ningo Jehovápe ñanekonsola ha ñanembopyʼaguapy haguére Iñeʼẽ rupive (Sal. 94:19). ¿Oĩpa peteĩ téxto bíblico nekonsola vaʼekue peteĩ situasión ijetuʼúvape? Eñehaʼãkena eaprende de memória upe téxto térã eskrivi peteĩ kuatiaʼíre, ha emoĩ peteĩ lugár pyʼỹi rehechatahápe. Katuete ningo ñande Ru yvagapegua nekonsoláta Iñeʼẽ rupive.