¿Mbaʼéichapa ñanepytyvõ umi grúpo de predikasión?

1, 2. ¿Mbaʼépa opensa unos kuánto ermáno umi grúpo de predikasiónre?

¿NEMANDUʼÁPA oikórõ guare ndehegui peteĩ puvlikadór ha reñepyrũ repredika pe notísia porã? Oiméne revyʼaite raʼe upe díape. Upe día guive nde reĩ peteĩ grúpo tuichávape omombaʼeguasúva Jehová réra (Sal. 148:​1, 2, 12, 13). Péro avei reñepyrũne reime peteĩ grúpo michĩvévape, upéva hína pe grúpo de predikasión oĩva kongregasiónpe. Umi grúpo de predikasión ndive ñande ñakumpli pe traváho oñemeʼẽva ñandéve ñamombeʼu hag̃ua umi notísia porã oñeʼẽva Ñandejára Rréinore “oparupiete ko yvy ape ári” (Mat. 24:14).

² Umi kongregasiónpe oĩ jepi umi grúpo de predikasión. ¿Mbaʼépa nde repensa umi grúpore? Peteĩ ermána hérava Wendya heʼi: “Che grúpo de predikasión hetáma chepytyvõ. Umi ermáno chepytyvõ apredika ha aporomboʼe porãve hag̃ua, amoĩ hag̃ua méta ha ahupyty hag̃ua umíva, hiʼarive areko heta amígo ikalidaitereíva”. Peteĩ ermáno hérava Rich heʼi: “Che aservi de superintendénte che grúpope ha upéva tuichaiterei mbaʼe chéve g̃uarã. Peteĩ ermáno térã ermána ningo ikatu oipytyvõ peteĩ persónape ojevautisa hag̃ua, péro upe superintendénte de grúpo oreko pe oportunida porãite oipytyvõvo upe persónape osegi hag̃ua oprogresa”. Peteĩ ermána hérava Dinah heʼi: “Che avyʼaiterei aĩ haguére peteĩ grúpo de predikasiónpe, umi ermáno ha ermána oĩva che grúpope che familiaite voi”.

3. ¿Mbaʼépa jahecháta ko artíkulope?

³ Ko artíkulope ñañeʼẽta umi rresponsavilida orekóvare pe superintendénte de grúpo ha pe superintendénte auxiliár ha mbaʼéichapa okuida hikuái umi ermáno oĩvare igrúpope. Upéi ñaanalisáta mbaʼéichapa káda uno ikatu ñaipytyvõ ñande grúpo de predikasiónpe, ha último jahecháta mbaʼeichaitépa umi grúpo de predikasión ideprovécho ñandéve.

PE SUPERINTENDÉNTE DE GRÚPO HA PE AUXILIÁR

4. a) ¿Mbaʼe rresponsavilida iñimportántevapa oreko pe superintendénte de grúpo? b) ¿Mbaʼe konséhopa ikatu osegi umi superintendénte de grúpo oñangareko porã hag̃ua umi ermánore? (Ehecha pe rrekuádro “Konsého pe superintendénte de grúpope g̃uarã”).

⁴ ¿Mávapa hína pe superintendénte de grúpo? Upe ermáno hína peteĩ ansiáno oipytyvõva umi ótro ermáno oĩva igrúpope osegi hag̃ua oñemoag̃ui Jehováre ha avei opredika ha oporomboʼekuaave hag̃ua. Pe kuérpo de ansiáno onombra pe ermánope oservi hag̃ua de superintendénte de grúpo.b ¿Mbaʼéichapa haʼe okumpli irresponsavilida igrúpope? Primeroite voi, haʼe ohechauka oñeinteresaha káda ermáno oĩvare igrúpope (Prov. 27:23). Pe superintendénte oikuaa porã umi ermáno oĩvape hendive igrúpope ha siémpre oñeʼẽ hendivekuéra oikuaa hag̃ua mbaʼéichapa oĩ hikuái. Péicha haʼe oipytyvõ umi ermánope osegi hag̃ua ojerovia mbarete, omokyreʼỹ chupekuéra oimérõ ojepyʼapy térã oñedeprimi, ha ojapo hesehapekuéra heta mbaʼe ideprovéchova (Prov. 12:25; Is. 32:2; Sant. 2:​15-17). Segundo, haʼe omokyreʼỹ umi ermáno ha ermána oĩvape igrúpope osẽ meme hag̃ua opredika. Pe superintendénte púntape voi osẽ opredika kyreʼỹme, koʼýte fin de semanakue. Avei pyʼỹinte oñehaʼã opredika káda puvlikadór igrupopeguándi, péicha omokyreʼỹ ha oipytyvõ chupekuéra opredika ha oporomboʼekuaave hag̃ua. Pe superintendénte de grúpo sapyʼapyʼánte nosẽmoʼãirõ, ojasegura ikatu hag̃uáicha pe superintendénte auxiliár térã ótro ermáno ikatupyrýva osẽ opredika pe grúpondi. Tercero, haʼe oipytyvõ umi ermáno ojevautisávape oreko hag̃ua hetave rresponsavilida kongregasiónpe (1 Tim. 3:1). Pe superintendénte ofelisita umi ermánope umi mbaʼe porã ojapóvare. Avei ojevale la Bíbliare omeʼẽ hag̃ua konsého ha ombokatupyry meme umi ermánope okumpli hag̃ua umi rrekisíto oñekotevẽva oservi hag̃ua de siérvo ministeriál ha ansiáno. Jahechaháicha iñimportanteterei ningo pe traváho ojapóva umi superintendénte de grúpo. Upévare pe kuérpo de ansiáno ohecha máva mávapa okumpli porãvéta ijapyteguikuéra upe rresponsavilida oservi hag̃ua de superintendénte de grúpo.

5. ¿Mbaʼe ijetuʼúvapa ombohovái umi superintendénte de grúpo?

⁵ Ndahaʼéi ningo la ifasilpáva pe traváho ojapóva umi superintendénte de grúpo. Por ehémplo peteĩ ansiáno hérava Jorge oĩva Alemániape oservi de superintendénte de grúpo, péro avei haʼe oreko hetave rresponsavilida kongregasiónpe. Jorge heʼi: “Ndahaʼeiete sonséra pe traváho ojapóva pe superintendénte de grúpo, pórke hiʼarive oreko hetave ótra rresponsavilida kongregasiónpe. Chéko añehaʼã añeʼẽ enterove umi ermáno oĩvandi che grúpope, péro ijetuʼu chéve upéva”. Jahechamína avei la omombeʼúva ermáno Abel, haʼe oreko 70 áño ha oservi de ansiáno Ugándape. Haʼe heʼi: “Ore kongregasiónpe saʼieterei oĩ la ansiáno ha siérvo ministeriál, upéicha rupi hetaiterei ermáno oĩ káda grúpo de predikasiónpe. Chéve chegusta vaʼerãmoʼã la ikatu rire ambaʼapo pyʼỹive káda puvlikadórndi amokyreʼỹ hag̃ua chupekuéra, péro hasy lénto chéve upéva”. Avei peteĩ ansiáno hérava Obed oikóva Surinámpe heʼi: “Che avyʼaiterei ambokatupyry jave ótrope, péro upéva hoʼu avei la ne tiémpo ha ne mbaretekue. Hiʼarive sapyʼánte ndahaʼéi la jahecháva pyaʼeterei la rresultádo, ha cherembiapoiterei rupi, pyʼỹinte voi cheresarái ambokatupyry vaʼerãha ótrope”. Jahechaháicha, umi superintendénte de grúpo ombohovái koʼãichagua situasión ijetuʼúva ha hetave voi, ¿péro mbaʼépa oipytyvõta chupekuéra?

6. ¿Mbaʼérepa iporã umi grúpo de predikasión michĩnteramo?

⁶ Ikatúma guive umi grúpo de predikasión michĩnte vaʼerã. Péicha umi superintendénte de grúpo ikatu oikuaa porã umi ermáno igrupopeguápe ha oipytyvõ chupekuéra siémpre ojerovia hag̃ua Jehováre. ¿Péro mbaʼépa oikóta oĩramo saʼi ansiáno pe kongregasiónpe? Pe kuérpo de ansiáno ikatu hína oelehi peteĩ siérvo ministeriálpe oñatende hag̃ua peteĩ grúpore un tiémpore, pórke umi grúpo de predikasión tuichaitereíramo, amo ipahápe pe superintendénte ndaikatumoʼãi oñatende porã igrúpore. Umi grúpo michĩramo, umi superintendénte de grúpo ikatúta okuida porãve káda ermánore, pórke upéva hína pe traváho iñimportantevéva haʼe orekóva.

7. Umi kongregasión saʼihápe umi ansiáno, ¿mbaʼépa ikatu ojapo umi superintendénte de grúpo oñeñatende porã hag̃ua umi ermáno igrupopeguáre? (1 Pedro 5:2). (Ehecha pe taʼanga).

⁷ Oimérõ nde hína peteĩ superintendénte de grúpo ha ne kongregasiónpe oĩ saʼi ansiáno, eñehaʼãmbaitékena embokatupyry nde auxiliárpe, péicha haʼe oñangareko porãta avei Ñandejára ovechakuérare (elee 1 Pedro 5:2). Upearã ikatu enkarga nde auxiliárpe algúno traváho pe grúpope. Por ehémplo sapyʼánte ikatu eheja chupe tojapo pe aty predikasionrã ha toorganisa pe grúpope upe díape. Peñemboʼéke oñondive ha pehecha mbaʼéichapa oho hese umi puvlikadór pende grupopegua. Pyʼỹintekena ejerure nde auxiliárpe tanemoirũ umi visíta de pastorépe. Pejapo mboyve pe visíta, emombeʼu chupe mbaʼéichapa mokõivéva ikatu pemokyreʼỹ pe ermáno pevisitátavape. Opa rire pe visíta efelisita pe auxiliárpe umi mbaʼe porã ojapo vaʼekuére ha ere chupe umi mbaʼe ikatuhápe omehora. Péicha rembokatupyrýramo nde auxiliárpe, kon el tiémpo haʼe ikatúta avei oservi de superintendénte de grúpo (2 Tim. 2:2). Avei ikatu rejerure umi ermáno ha ermána ijerovia mbaretévape tombokatupyry umi ótro oĩvape nde grúpope. Por ehémplo umi prekursór ha umi ermáno iñexperiensiavéva ikatu opredika umi puvlikadór ipyahúvandi ha umi orekóvandi saʼive experiénsia. Umi ermáno ha ermána iñexperiénsiava ikatu ombokatupyry umi ótrope oñepyrũ hag̃ua oñeʼẽ la héntendi, ojapo hag̃ua rrevisíta ha kúrso bíblico. Jahechamína koʼág̃a mbohapy mbaʼe enterovetéva ikatúva jajapo ñaipytyvõ hag̃ua ñande grúpo de predikasiónpe.

¿MBAʼÉICHAPA IKATU ÑAIPYTYVÕ ÑANDE GRÚPO DE PREDIKASIÓNPE?

8. ¿Mbaʼéichapa ikatu ñaipytyvõ ñande grúpo de predikasiónpe? (Romanos 1:12).

⁸ Ñasẽkena japredika ñande grúpondi. Japredikáramo umi ermáno ha ermána ñande grupopeguándi ikatúta ñañomokyreʼỹ joa (elee Romanos 1:12). Avei saʼive ñanenerviósota ñañeʼẽta jave umi héntendi ha ñañeñandúta seguromie japredikáta jave algúno lugár rupi. Por ehémplo oimérõ nde traváho káusare pyʼỹinte ndaikatúi repredika nde grúpondi, etanteána eñeʼẽ ne patróndi, jahecha ndaikatúipa rekambia nde orário. Ikatu hína reñesorprende ha omeʼẽ ndéve permíso embaʼapo hag̃ua ótra órape (Neh. 2:​4-6). Ikatu oime nderasykatu ha ndeedáma ha upévare ijetuʼu ndéve reñembyaty hag̃ua nde grúpondi en persóna. Oimérõ upéicha, eñeʼẽna ne superintendénte de grúpondi. Haʼe ikatu nepytyvõ reñekonekta hag̃ua nde grúpondi por Zoom ha avei repredika hag̃ua por teléfono térã por kárta algúno ermanokuéra nde grupopeguándi. Péro ikatu oime upéva ndahaʼéi nde káso pórke nemitã ha neresãi. Upéicharõ jepe ikatu hína lomímonte ijetuʼu ndéve resẽ meme hag̃ua nde grúpondi. Oimérõ upéicha, káda semána ikatu reñeʼẽ de antemáno voi peteĩ ermáno térã ermána nde grupopeguándi resẽ hag̃ua repredika hendive. Provávlemente tekotevẽ hína rehecha mbaʼépa la iñimportantevéva ndéve g̃uarã ha mbaʼéichapa ikatu reipuru porãve ne tiémpo (Rom. 12:11; Col. 4:5). Ñañehaʼãmbaitérõ ñasẽ meme japredika ñande grúpondi, jahecháta ovaleha la péna la jajapóva. Upévare ñañemboʼékena Jehovápe, pórke haʼe ikatu omeʼẽ ñandéve ‘pe deséo ha pe podér jajapo hag̃ua entéro mbaʼe chupe ogustáva’ (Filip. 2:13).

9. ¿Mbaʼépa ikatu jajapo enterovévante oñeñandu porã hag̃ua ñande grúpope? (Romanos 12:13).

⁹ Japororresivi porã ha ñanembaʼeporãkena. Enterove ningo oñeñandu porãta ñande grúpope ‘siémpre japororresivi porãrõ ha ñanembaʼeporãrõ’ umi ermánondi (elee Romanos 12:13). Por ehémplo ikatu jaofrese ñande róga jajapo hag̃ua upépe pe aty predikasionrã. Oĩ kongregasión opreparáva jepi tembiʼumi okomparti hag̃ua pe ermáno oúvandi ótro ládogui ojapo hag̃ua pe diskúrso. Péicha jave oñeasigna jepi por túrno umi grúpope oprepara hag̃ua álgo. Sapyʼánte pe diskursánte ndaikatúiramo jepe opyta okomparti, lomímonte umi oĩva upe grúpope oñembyaty oñondivepa okomparti hag̃ua. Peteĩ prekursóra espesiál hérava Sara heʼi: “Ainvita jave ótrope che rógape, che ajepyʼapy rasa voi. Upévare añehaʼã ajapo álgo isensillomívante ha ndaikói añekosina tuichaiterei. Péicha ifasilve chéve aikuaa porãve hag̃ua umi chevisitávape”. Ñañehaʼãramo enterovévante oñeñandu porã hag̃ua ñande grúpope, ñañemoag̃uivéta Jehováre ha ñane ermanokuérare (Neh. 8:10; Hech. 20:35).

10. ¿Mbaʼépa ikatu jajapo japredika ha ñamboʼe porãve hag̃ua? (Proverbios 1:5; 27:17). (Ehecha pe taʼanga).

¹⁰ Ñañehaʼãkena japredika ha ñamboʼe porãve hag̃ua. Amáske ñandekatupyry japredika ha ñamboʼe hag̃ua, vyʼápe jahaséta japredika ñande grúpondi. ¿Oĩpa algúna kósa ñamehoraséva? Ikatu ñande voi jajerure tañanepytyvõ peteĩ prekursórpe térã peteĩ ermáno iñexperiénsiavape oĩva ñande grúpope (elee Proverbios 1:5; 27:17). Iporãta avei ñamombeʼúramo la jahupytyséva ñane superintendénte de grúpope, pórke haʼe ikatu avei hína ñanepytyvõ. Peteĩ ermána hiʼotĩva hérava Heather ojerure vaʼekue ótrope oipytyvõ hag̃ua chupe. Haʼe heʼi: “Ajerure vaʼekue peteĩ prekursórape chepytyvõ hag̃ua ajapo hag̃ua rrevisíta. Pe ermána chetrata porã ha ivuenaiterei, haʼe pyʼỹinte osẽ opredika chendive ha chepytyvõ amoñepyrũ hag̃ua peteĩ kúrso bíblico. Koʼág̃a igustoiterei jey chéve apredika ha aporomboʼe, upévare avyʼaiterei ajerure haguére ajúda ótrope”. Legálmente hetaiterei mbaʼe ikatu jajapo ñaipytyvõ hag̃ua ñane grúpo de predikasiónpe.

¿MBAʼÉICHAPA ÑANEPYTYVÕ ÑANDE GRÚPO DE PREDIKASIÓN?

11, 12. ¿Mbaʼéichapa ñanevenefisia ñande grúpo de predikasión? Emombeʼu peteĩ ehémplo.

¹¹ Ñanepytyvõ ani hag̃ua ñañemomombyry Jehovágui. Jahechamína mbaʼéichapa ñañevenefisia ñaĩ haguére peteĩ grúpo de predikasiónpe. Jehová ningo ohayhueterei umi viúdape, umi ityreʼỹva ha ijedávape. Upévare ojevale umi grúpo de predikasiónre oñeñatende porã hag̃ua hesekuéra ha oñemokyreʼỹ hag̃ua chupekuéra (1 Tes. 2:8; Sant. 1:27). Pe grúpo ñanepytyvõ japredika ha ñamboʼe porãve hag̃ua heta hendáicha. Avei oñembokatupyry umi ermáno omoĩvape ehémplo porã ikatu hag̃uáicha oreko hetave rresponsavilida kongregasiónpe (1 Tim. 3:10).

¹² Jahechamína mbaʼéichapa pe grúpo de predikasión oipytyvõ vaʼekue Wéndype, pe ermána ñañeʼẽma vaʼekuére. Haʼe heʼi: “Che túa oñemoĩ mbarete vaʼekue Testigokuérare. Upévare mama ndaikatúi vaʼekue oho meme opredika fin de semanakue pe grúpo de predikasióndi, péro che chepermíso vaʼekue aha hag̃ua. Upe tiémpope peteĩ prekursóra ijedáva oñamigaite vaʼekue cherehe ha heta vése rosẽ ropredika oñondive. Haʼe chemboʼe heta mbaʼe ideprovéchova chéve predikasiónpe ha kongregasiónpe. Avei chemanduʼa pe superintendénte de grúpo heta vése omeʼẽ hague chéve konsého bíblico ideprovéchova chéve koʼag̃aite peve”.

13. ¿Mbaʼe iporãitévapa jatopa ñande grúpo de predikasiónpe? (Ehecha pe taʼanga).

¹³ Ñanepytyvõ jareko hag̃ua amígo ñanderayhúva ha ñanemombaretéva. Ñande jaju jepi ñañamigaite umi ermáno ñande grupopeguáre pórke predikasiónpe ‘ñambaʼapo oñondivepa’ (Filip. 1:27). Oĩ ningo umi ermáno hiʼotĩva ha ndovyʼapáiva heta hénte apytépe. Péro umi grúpo de predikasión michĩ rupi, upépe ifasilve chupekuéra otopa hag̃ua iñamigorã (2 Cor. 6:13). Jaikuaa umi ermáno ñande grupopegua katuete oĩtaha ñande ykére oimérõ ñanderasy, ñañedeprimi térã omano ñandehegui peteĩ jahayhúva (1 Tes. 5:14). Avei amáske hiʼag̃ui pe jehasa asy guasu, koʼýte ñaikotevẽta peichagua amígo verdadéro (Mat. 24:21). Umi ñane provlemakuéra ikatu oime ndopái koʼag̃aite, péro ifasilve ñandéve ñandepuʼaka umívare jareko rupi ñane ermáno ha ermána ñanderayhúva ha ñanepytyvõva (Prov. 17:17).

14. ¿Mbaʼéichapa pe grúpo de predikasión ñanepytyvõ oiko jave peteĩ mbaʼe ivaíva?

¹⁴ Ñanepytyvõ oiko jave peteĩ mbaʼe vai. Jaikuaa ikatuha oiko peteĩ pandémia, desástre naturál, persekusión térã peteĩ provléma ekonómiko tuichaitereíva ñande paíspe. Péicha jave umi superintendénte de grúpo oĩma preparádo ñanepytyvõ hag̃ua. Por ehémplo oiko jave peteĩ desástre, haʼekuéra oñeʼẽta káda família oĩvandi igrúpope ohecha hag̃ua noiméipa oikotevẽ tembiʼu, y, peteĩ lugár oiko hag̃ua, ao térã ohecha chupekuéra peteĩ doktór. Pe superintendénte de grúpo oikuaáre upéva, ohechátama mbaʼéichapa ikatu oipytyvõ upe famíliape. Avei káda superintendénte de grúpo oñeʼẽ pe komite de servísio de la kongregasión ndive, oimérõ igrúpope oĩ umi oikotevẽvétava ajúda koʼãichagua situasiónpe ha ojepreparáma hikuái de antemáno. Ñandepyʼaguapyete ningo jaikuaávo ñande grúpo de predikasión ñanderayhuha ha tuichaiterei ñanepytyvõtaha koʼãichagua situasiónpe.

15. ¿Mbaʼe mbaʼépa jajapo entéro ñaĩva Jehová organisasiónpe?

¹⁵ Jaʼéma haguéicha iñepyrũme, Jehová organisasión tuichaiterei. Yvágape oĩ hetaiterei rasa umi ánhel ifiélva chupe ha ko yvy ape ári ñaĩma mas de 9 millón ñamombaʼeguasúva Jehovápe ha ñanderetavéta jahávo amás día (Zac. 8:23; Apoc. 5:11). Enterovéva jaadoráva Jehovápe ñañomoirũ jaikuaauka hag̃ua umi notísia porã oñeʼẽva Ñandejára Rréinore (Apoc. 14:​6, 7). Upévare jaaprovechapaitékena ñande grúpo de predikasión. Ñande grúpo ñanepytyvõ jajapo hag̃ua peteĩ mbaʼe iñimportantetereíva: Ñamombaʼeguasu Jehovápe ñande pyʼaite guive (Sal. 111:1).