Umi omendáva oñoamigoite vaʼerã

1. ¿Mbaʼérepa ikatu jaʼe umi amígo ikalidáva haʼeha peteĩ rregálo Jehová omeʼẽva ñandéve?

UMI amígo ikalidáva haʼe peteĩ rregálo Jehová omeʼẽva ñandéve (Sant. 1:17). Haʼekuéra ohayhu Jehovápe ha ñanderayhu ñandéve. Avei ovyʼa ñanendive ñande javyʼa jave, ñanekonsola ñañeñandu vai jave ha isinséro ñanendive tekotevẽramo omeʼẽ ñandéve konsého. Haʼekuéra siémpre oĩ ñande ykére ñaikotevẽ jave, ha ikatu jajerovia hesekuéra. Koʼãichagua amígo legálmente “ñanemokorasõ rory” (Prov. 27:9).

2. ¿Mbaʼérepa umi omendáva oñoamigoite vaʼerã? (Mateo 19:6).

² Umi omendáva ovyʼa hag̃ua imatrimóniope, iména térã hembireko ndahaʼéi vaʼerã sólamente iñamígo, síno haʼe vaʼerã pe mehór amígo orekóva. Ha iñimportanteterei oreko hikuái enkuénta ke la ohupyty hag̃ua upéva, tekotevẽtaha mokõivéva omoĩ ipárte. Haʼekuéra ndokuidáiramo ojuehe, ikatu hína ou oñeñandu haʼeño, ndovyʼavéi, ha ikatu voi ipochy oñondive. Péro osegíramo oñemoag̃ui ojuehe, oikóta chuguikuéra oñoamigoite, ha orekóta hikuái pe amista iporãvéva ikatúva oreko oñondive mokõi persóna ko múndope (elee Mateo 19:6). Ko artíkulope jahecháta mbaʼépa ojapo vaʼerã umi omendáva oiko hag̃ua chuguikuéra oñoamigoite. Péro jahecha mboyve upéva, ñaanalisamína mbaʼépa ikatu ojapo umi ermáno ha ermána oĩva soltéro oiporavo porã hag̃ua iñirũrã.

¿MBAʼÉICHAPA IKATU EIPORAVO PORÃ NE IRŨRÃ?

3, 4. ¿Mbaʼépa ikatu ogia peteĩ ermáno térã ermánape oelehi porã hag̃ua iñirũrã? (Proverbios 18:22).

³ Jadesidi mboyve álgo iñimportánteva, siémpre tekotevẽ japytaʼimi ha ñapensa mbaʼépa oikóta jadesidíramo upéva. Koʼãichagua desisión ningo ikatu okambiaite la ñande rekove, ha upévare iñimportánte ñaanalisa porã la jajapótava.

⁴ Peteĩ kristiáno omendaséva oelehíta hína mávapa haʼéta iñamígo térã iñamíga para tóda la vída. Ha upéva haʼe peteĩva umi desisión iñimportantevéva. Jehová ningo okrea vaʼekue pe matrimónio, upévare iporãitereíta jahekáramo igía jadesidi porã hag̃ua ko kásope. Haʼe oipota umi ermáno otopa hembirekorã ikalidáva, ha oipota avei umi ermána otopa la imenarã ikalidáva. Ha Jehová siémpre oikuaa mbaʼépa la iporãvéva ñandéve g̃uarã (elee Proverbios 18:22; Is. 48:​17, 18). Upéicharõ, la Biblia ikatu hína ogia umi ermáno ha ermánape oelehi porã hag̃ua iména térã hembirekorã.

5. ¿Mbaʼérepa umi omendaséva oelehi vaʼerã iñirũrã Jehová siervokuéra ojevautisáva apytépe?

⁵ Jajevautisávo oikóma ñandehegui Ñandejára amígo (Sal. 25:14). Upévare oiméramo remendase, reheka vaʼerã ne ména térã ne rembirekorã Jehová amigokuéra apytépe (1 Cor. 7:39). Rejapóramo upéicha rehechaukáta hína rerrespetaha Jehová heʼíva, ha ikatúta ere ne ména térã ne rembirekóre haʼeha peteĩ rregálo Jehová omeʼẽ vaʼekue ndéve (Prov. 19:14). Upéicha rejehekýita avei heta provléma orekóvagui umi omendáva peteĩ ndahaʼéivare Jehová siérvo (2 Cor. 6:14). Aníkena repensa iporãha rejegusta peteĩ ndahaʼéivare Testígo, ndaipórigui ermanokuéra apytépe ni peteĩ ndegustáva ne irũrã. Ha naiporãmoʼãiete avei repensáramo ikatuha ejegusta peteĩ persónare reimoʼãgui upéi haʼe oñepyrũtaha avei oservi Jehovápe.

6, 7. ¿Mbaʼe mbaʼépa ikatu oñeporandu umi ojegustáva?

⁶ Jaikuaaháicha, ndahaʼéi ku entéro umi ojevautisáva oikoitetaha ne ména térã ne rembirekorã. Upévare, oiméramo ndegusta hína peteĩ persóna, epensamína koʼã pregúnta iñimportantetévare: “¿Mbaʼéichapa otrata ihentekuérape? ¿Imbaʼerechakuaa ha irrespetuósopa? ¿Máva mávapepa oiporavo iñamigorã? ¿Mbaʼéichapa orreaksiona oĩ jave opensáva diferénte chugui? ¿Oñemohatã piko haʼe heʼívapente? ¿Térãpa naiprovlémai oasepta hag̃ua ótro suherénsia ndohóima guive la Biblia kóntrape? ¿Mbaʼépa opensa pe plátare?”.a

⁷ Ikatu avei repensa koʼã pregúntare: “¿Ohechaukámapa pe persóna chegustáva ohayhuetereiha Jehovápe? ¿Oñehaʼãmbaitépa hína oreko hag̃ua pe ‘kondúkta pyahu’? ¿Chepytyvõtapa aservi porãve hag̃ua Jehovápe? ¿Roguerekópa la mísma méta Jehová servísiope? ¿Ikatútapa oiko chugui che mehór amígo térã amíga?” (Col. 3:​9, 10). Oimérõ nde haʼe peteĩ ermána, ¿ikatútapa pe ermánogui oiko ne amigoite ha omoakã porã pende rogapy? (1 Cor. 11:3). Oiméramo nde haʼe peteĩ ermáno, ¿ikatútapa pe ermána nderrespeta la Biblia heʼiháicha neimperféktoramo jepe? Jaikuaaháicha eikotevẽtamante tiémpo ekontesta hag̃ua koʼã pregúnta, upévare eñehaʼãkena eikuaa porã pe persóna ndegustávape edesidi mboyve remendátapa hese.

8, 9. ¿Mbaʼépa ikatu oipytyvõ umi oĩvape de nóvio odesidi porã hag̃ua? (Ehecha pe taʼanga).

⁸ Peime aja de nóvio, ifasilvéta ndéve edesidi porã hag̃ua eñehaʼãramo eikuaa porã pe persónape. Rehupyty hag̃ua upéva tuicha ideprovéchota ndéve la opensáva hese umi ótro. Ikatu voi eporandu mbaʼépa opensa hese umi ermáno ha ermanakuéra oĩva ikongregasiónpe. Por ehémplo, ¿heʼípa hese hikuái iñumílde, iñamávle, ha noñemohatãiha haʼe heʼívape? Peteĩ ermána hérava Sara, oikóva Guayana Francésape, omenda vaʼekue peteĩ ermáno héravare Daniel. Sara heʼi: “Che aaverigua vaʼekue mbaʼépa opensa Daniel rehe umi oikuaáva chupe. Umíva apytépe ikompañéro de prekursorádo, peteĩ ansiáno ikongregasionpegua, umi amígo orekuaa porãva mokõivévape, ha avei umi ermána oĩva ikongregasiónpe”. Oikoitéta avei ikatúramo eñemongeta porã ne nóvio térã ne nóviandi ha eporandu chupe oĩpa álgo yma guare térã koʼag̃agua tekotevẽva reikuaa. ¿Mbaʼérepa? Pórke ndereikuaáiramo umi mbaʼe koʼág̃a, ikatu hína amo gotyove tuicha pendeperhudika pene matrimóniope.

⁹ Oiméramo oĩ álgo isériova nembodudáva hína, térã umi ne amígo isinsérova heʼi ndéve ohechakuaaha algún pelígro, aníkena epensa koʼã mbaʼe vyroreiha. ¿Mbaʼérepa? Pórke koʼã mbaʼe nepytyvõta edesidi hag̃ua iporãtapa remenda hese térãpa nahániri.b Koʼág̃a jahechamíta mbaʼéichapa la Biblia ikatu oipytyvõ umi ermáno ha ermána omendámavape.

PEHASA TIÉMPO OÑONDIVE PEÑEMOAG̃UIVE HAG̃UA OJUEHE

10. ¿Mbaʼérepa iñimportánte umi omendáva ohasa tiémpo oñondive?

¹⁰ Umi omendáva oñemoag̃uive hag̃ua ojuehe, ohasámante vaʼerã tiémpo oñondive hembiapoitereíramo jepe hikuái. Péicha haʼekuéra orekóta la oportunida omombeʼu hag̃ua ojupe mbaʼépa ohasa káda día, mbaʼépa opensa térã oñandu, ohechauka hag̃ua ojoayhuha térã ojediverti hag̃ua oñondive.

11. ¿Mbaʼépa ikatu omomombyry ojuehegui umi omendávape?

¹¹ Umi omendáva haʼéramo oñoamigoite ovyʼaitereivéta hikuái oñondive ke la ojueheʼỹ. Jaikuaaháicha ndaikatumoʼãi oiko hikuái oñondive tódo el tiémpo, péro ohasáramo hikuái hetaiterei tiémpo mombyry ojuehegui, ikatu hína ipeligróso. Por ehémplo, algúno oho ombaʼapo haʼeño ótro paíspe, ha upéicha rupi ohasa heta tiémpo mombyry ifamíliagui. Ikatu ningo añete ogana hetave pláta ojapo rupi upéicha, péro amo ipahápe upéva ikatu ogueru hetaiterei provléma imatrimóniope.

12, 13. a) ¿Mbaʼépa ojapo unos kuánto matrimónio ohasa hag̃ua tiémpo oñondive? (Ehecha pe taʼanga). b) ¿Mbaʼeichaite pevépa iñimportánte ñane ména térã ñane rembireko? (Ehecha pe rrekuádro “Mbaʼeichaite pevépa iñimportánte ne ména térã ne rembireko”).

¹² Jahechamína mbaʼépa ojapo unos kuánto matrimónio siémpre ohasa hag̃ua tiémpo oñondive. Peteĩ ermána hérava Lea oikóva Guámpe heʼi: “Che ménape ha chéve igustoiterei rojapo heta mbaʼe oñondive, ha kási núnka ndorojapói arréglo ni ndoroaseptái invitasión roho hag̃ua rojapo álgo ojueheʼỹ”. Ótra ermána hérava Roxanne oikóva Estados Unídospe heʼi: “Ore ningo hetaiterei roreko rojapo vaʼerã. Upéicha rupi, rohechakuaa oréve ou porãha roplaneáramo mbaʼe moméntopepa rohasáta tiémpo oñondive” (ekompara Amós 3:3 heʼívare). Peteĩ ermáno hérava Damien oikóva Fránciape heʼi: “Ore rohechakuaa iñimportanteha jajadapta ojuehe, ha kon el tiémpo jadisfrutáma voi jajapóvo umi mbaʼe ogustáva ñane irũme” (Mat. 7:12). Ha ótra ermána hérava Katie, oikóva Estados Unídospe, heʼi: “Sapyʼánte roheja voi la ore teléfono ótro ládo pono oredistrae”.

¹³ Péro oĩ peteĩ mbaʼe iñimportantevéva. Umi omendáva ojapo vaʼerã oñondive heta mbaʼe Jehová servísiope. Peteĩ ermána hérava Myriam oikóva Fránciape heʼi: “Pyharevete roleéma oñondive ore Biblia, upéi rokomenta mbaʼépa oregusta la rolee vaʼekuégui, ha mbaʼéichapa ikatu rojapo la roaprendéva. Chegustaiterei ningo upéva”. Upéi Myriam heʼive: “Igustoiterei avei chéve roñemboʼe oñondive, pórke upéicha jave ahechakuaa mbaʼeichaitépa che ména ohayhu Jehovápe”. Ha Katie, pe ermána angete ñañeʼẽ hague heʼi: “Ore rovyʼaiterei rosẽ jave oñondive predikasiónpe, upéva la oregustavéva. Legálmente igustoiterei roñeʼẽ jave ótrope Jehováre, upéva oremoag̃uive ojuehe ha avei siémpre roaprende álgo ipyahúva ojuehegui” (Prov. 27:17).

PESEGÍKENA PEÑEMOAG̃UI OJUEHE IJETUʼU JAVE

14, 15. Umi omendáva iprovlémaramo, ¿mbaʼérepa oñehaʼãmbaite vaʼerã osolusiona umíva? Emombeʼu peteĩ ehémplo.

¹⁴ Ména ha tembireko iñimperfékto rupi, sapyʼánte ijetuʼútante voi hendivekuéra. La Biblia heʼi voi ‘umi omendáva heta iprovlemataha’ (1 Cor. 7:28). Ko téxtope oñeñeʼẽ umi provléma orekóvarente voi entéro omendáva. Peichagua provléma oñepresenta jave, umi matrimónio ombaʼapo vaʼerã oñondive osolusiona hag̃ua pe provléma ha ani hag̃ua oñemomombyry ojuehegui. ¿Mbaʼérepa?

¹⁵ Ñapensamína ko ehémplore. Peteĩ edifísio iporãva ha iñimportánteva oñepyrũramo oñembyai, la ijára ojapóta la tekotevẽva guive oarregla hag̃ua. Upearã ogastámante vaʼerã hese heta pláta ha heta tiémpo, ikatu voi unos kuánto áñore. Péro, ¿mbaʼérepa ojapóta upéva? Pórke chupe g̃uarã upe edifísio iñimportanteterei. Upéicha avei ñane matrimónio iñimportanteterei ñandéve g̃uarã. Enterovévante voi ningo ñaneprovléma jepi, umi matrimónio ojogueraha porãitereíva jepe sapyʼánte ojoavy avei. Péro ikatuháicha ojearregla pe edifísio oñembyaíva, upéicha avei umi matrimónio iprovlémava ikatu osolusiona umíva. Upéva ningo ogueraháta la itiémpo, ha mokõivéva omoĩmante vaʼerã ipárte. Péro Jehová ohechávo oñehaʼãha hikuái ha osegiha oñondive iprovlémaramo jepe, ovyʼaitereíta hesevekuéra (Mal. 2:16). Upéicha umi omendáva ohechaukáta ojoayhu ha ojorrespetaha, ha avei orrespetaha hikuái Jehovápe, pórke haʼe voi omoñepyrũ vaʼekue pe matrimónio.

16. Ohechaukaháicha 1 Corintios 13:​4-8a, ¿mbaʼépa ikatu oipytyvõ umi matrimónio orekóvape umi provléma isériova? (Ehecha pe taʼanga). (Ehecha pe rrekuádro “¿Mbaʼépa ikatu nepytyvõ emombarete hag̃ua ne amista ne ména térã ne rembirekóndi?”).

¹⁶ Oiméramo neprovléma hína ne matrimóniope, aníkena pyaʼe voi epensa pejeseparávo (1 Cor. 7:​10, 11). Upéva rangue epensamína ko pregúntare: “¿Mbaʼépa ikatu che ajapo roñemoag̃uive hag̃ua ojuehe?”. Estudia mbaʼéichapa heʼi la Biblia ikatuha jahechauka jajoayhuha, ha epensa ikatúpa emehora umi mbaʼe heʼívape 1 Corintios 13:​4-8a (elee). Epensa rangue mbaʼéichapa ikatu ejedeha ne ména térã ne rembirekógui, epensákena mbaʼépa ikatu rejapo pejoayhu jey hag̃ua. Eñekonsentrákena umi mbaʼe nde ikatúvare ejapo peñemoag̃ui jey hag̃ua ojuehe. Iñimportanteterei avei ejerure Jehovápe tandegia, einvestiga la heʼíva umi puvlikasión, umi vidéo, ha ejerure ajúda umi ansiánope térã ótro ermáno ijerovia mbaretévape. La Biblia heʼi umi matrimónio ojoguaha peteĩ ‘pióla mbohapy isãvape’, ha umi mbohapy apytépe Jehová haʼe hína pe iñimportantevéva. Upévare umi omendáva ojapóramo la haʼe oipotáva, imatrimónio imbaretéta (Ecl. 4:12).

17. ¿Mbaʼépa oipytyvõta umi omendasévape ha umi omendámavape ovyʼa hag̃ua?

¹⁷ Jehová oipota entéro isiervokuéra ovyʼa, umíva apytépe umi omendaséva ha umi omendámava. Upéicha rupi oiméramo nde haʼe soltéro térã soltéra ha epensa hína emendávo, eiporavo porãkena la ne irũrã. Oiméramo remendáma, esegíkena ejapo la ikatúva entéro peñemoag̃uive hag̃ua ojuehe. Ha oñepresenta jave umi provléma, ehejákena Jehová tapenepytyvõ pesolusiona hag̃ua umíva. Rejapóramo koʼã mbaʼe, ¡ikatúta “edisfruta nde rekove” ne ména térã ne rembireko rehayhuetévandi! (Ecl. 9:9).