Ejedesidíkena ehejaitetaha pe sigarríllo
“Umi persóna ohejáva pe sigarríllo, ikatu kuri okonsegi upéva pórke ojedesidi hikuái núnka mas ndopitamoʼãiha” (Stop Smoking Now! [¡Koʼág̃a guive anivéma epita!]).
OIMÉRAMO nde repoise hína pe sigarríllogui, rejedesidi vaʼerã rehejaitetaha upéva. ¿Péro mbaʼépa nepytyvõta upearã? Vuéno, ikatu por ehémplo epensa mbaʼéichapa ou porãta ndéve rehejáramo pe sigarríllo.
Hembyvéta ndéve nde pláta. Rejoguáramo peteĩ káha de sigarríllo al día repita hag̃ua, haʼetévaicha la nderegastaguasúiva. ¿Péro mboýmapa regastáta rejapóramo upéva un áño aja? Peteĩ kuñakarai hérava Gyanu oikóva Nepálpe heʼi: “Avía sído che hetaiterei agasta hína raʼe pe sigarríllo káusare, ha che ni nañemeʼẽi enkuénta”.
Revyʼavéta. Regina oikóva Sudáfricape heʼi: “Aheja rire pe sigarríllo, tuicha amehora ha avyʼave”. Umi persóna opoíva pe sigarríllogui ningo oñepyrũ oñandu porãve umi mbaʼe hoʼúva ha ohetũva, avei hetiaʼeve ha la ipínta entéro omehora.
Neresãivéta. “Peteĩ persóna ohejáramo pe sigarríllo, tahaʼe haʼéva la ijeda, tuicha voi omehoráta la isalu ha pyaʼeterei voi ojekuaáta la diferénsia” (Centros para el Control y la Prevención de Enfermedades, oĩva Estados Unídospe).
Ejeroviavéta ndejehe. Peteĩ karai hérava Henning oikóva Dinamárcape heʼi: “Che aheja vaʼekue pe sigarríllo pórke ndaikosevéima adepende hese. Añandu kuri pe sigarríllo ipuʼakaha cherehe, ha che añepyrũséma kuri amanda chejehe”.
Ou porãta ne família ha ne amigokuérape. Pe Sociedad Americana contra el Cáncer heʼi: “Peteĩ persóna opitáramo, upéva oafekta avei umi oĩvape ijerére. Oĩ estúdio ohechaukáva káda áño hetaiterei persóna omanoha oreko rupi kánser de pulmón ha provléma ikorasõme, péro ndahaʼéi haʼekuéra opita rupi, síno oĩ rupi ag̃ui umi opitávagui”.
Embovyʼáta Ñandejárape. La Biblia heʼi: “Che ermáno ha che ermanakuéra ahayhuetéva, [...] ñamopotĩ vaʼerã ñande rete” (2 Corintios 7:1). Ha heʼi avei: “Ajerure peẽme che ermanokuéra pemeʼẽ hag̃ua chupe pende rete [...] pemeʼẽrõguáicha peteĩ ofrénda sagráda, Ñandejára oaseptátava” (Romanos 12:1).
Sylvia oikóva Espáñape heʼi: “Che adesidi vaʼekue ahejataha pe sigarríllo aikuaárõ guare Ñandejárape ndogustaiha umi mbaʼe ikatúva ñandeperhudika ha ombyai ñande rete”.
Jahecháma haguéicha, ikatu hag̃uáicha eheja pe sigarríllo tekotevẽ ejedesidiete voi ejapotaha upéva. Péro ndahaʼéi upéva añónte la oñekotevẽva. Tekotevẽ avei umi ne hentekuéra ha ne amigokuéra nepytyvõ. ¿Mbaʼéichapa haʼekuéra ikatu ojapo upéva?