Os fillos son unha “herdanza do Señor”

EN QUE pensas cando escoitas a palabra herdanza? Pode que en cartos, nunha propiedade ou nunha reliquia valiosa que che deixou un familiar. Así que unha herdanza é algo de gran valor que seguro que queres coidar moi ben.

A Biblia di que os fillos son unha “herdanza do Señor” (Sal. 127:3). Está claro que os pais cristiáns ven os seus fillos coma un regalo moi valioso que lles deu o seu Pai celestial e queren facer todo o posible por coidalos para que estean ben física, emocional e espiritualmente.

Pero tristemente, algúns pais non ven os seus fillos coma un regalo de Deus (Is. 49:15; 2 Tim. 3:1-3). Outros realmente queren coidar deles, pero cústalles facelo por diferentes desafíos. Cales son algúns deles? Que espera Xehová dos pais? E como poden os pais cristiáns criar os seus fillos para que teñan unha vida feliz?

OS DESAFÍOS

A presión da familia e doutras persoas. Nalgunhas partes do mundo os pais que teñen moitos fillos son máis respectados na súa comunidade. Por iso, algunhas parellas pensan que deben ter máis fillos dos que realmente poden coidar por cumprir coas expectativas da súa familia e dos veciños.
A preocupación polo futuro. En países onde a taxa de mortalidade é elevada pola desnutrición, as enfermidades e os servizos médicos limitados, algunhas parellas teñen moitos fillos para asegurarse de que polo menos algúns deles cheguen a ser adultos. Outros fano quizais para que alguén coide deles na vellez, sobre todo nos países onde non hai axudas para os maiores.
Planificación familiar. Hai lugares onde as parellas apenas poden acceder a métodos anticonceptivos. Outros teñen medo ós efectos secundarios dos produtos de baixa calidade que teñen á súa disposición. E hai quen non pode compralos porque son moi caros.a

QUE ESPERA XEHOVÁ DOS PAIS?

Unha familia desfrutando de estar xuntos nun parque. O pai escoita con atención a súa filla adolescente. Mentres, a nai xoga á pelota co seu fillo máis novo. — Pasade tempo con cada un dos vosos fillos.

Dádelles ós vosos fillos o que necesitan. Xehová confíalles ós pais a responsabilidade de darlles ós seus fillos menores o que necesitan en sentido material. Espera que estean dispostos a traballar duro para darlles comida, roupa e un lugar onde vivir a tódolos seus fillos. Ademais tamén lles pide que os eduquen. Así que os pais cristiáns non mandan simplemente os seus fillos a internados. Máis ben, asegúranse de que os seus fillos vivan con eles ata que crezan para que poidan aprender as habilidades necesarias do día a día. Tamén pasan tempo con cada un deles para que se sintan seguros, protexidos e queridos. Pero Deus, que é razoable, non espera que os pais sexan ricos. De feito, el escolleu uns pais moi traballadores pero pobres para que criasen o seu querido Fillo (Mat. 13:55, 56; Luc. 2:24).

Principio bíblico: “Porque se alguén non mantén os seus, e sobre todo os membros da súa familia, rechazou a fe e é peor que unha persoa sen fe” (1 Tim. 5:8).

Xehová entende que os pais quizais necesiten axuda a medida que se van facendo maiores. De feito, unha maneira na que os fillos poden honrar os seus pais é asegurándose de que reciban a axuda necesaria (Éx. 20:12; 1 Tim. 5:4). Pero a Deus encántalle ver como os pais pensan primeiro en como coidarán dos seus fillos en vez de en como os seus fillos coidarán deles (2 Cor. 12:14).

Ensínalles sobre Xehová. Os pais cristiáns tamén teñen a responsabilidade de axudarlles ós seus fillos a amar a Xehová e de ensinarlles como adoralo. Para el isto é o máis importante que os pais lles poden ensinar ós fillos (Deut. 6:6, 7).

Principio bíblico: “[Seguide criando os vosos fillos] de acordo coa disciplina e os consellos de Xehová” (Ef. 6:4).

XEHOVÁ QUERE AXUDARVOS

Unha parella falando na súa casa. A Biblia está aberta sobre a mesa que hai diante deles. — Planeade con antelación cantos nenos vos gustaría ter.

Planificade o voso futuro. Se estades pensando en ter fillos, analizade ben as vosas circunstancias. Por exemplo, tedes os medios para alimentar, vestir e educar a varios nenos? Se non, falade sobre cantos fillos ides ter para poder coidar de todos eles tal e como Xehová espera que o fagades. Por suposto, el entende que non se pode planificar todo nesta vida (Ecl. 9:11). Pero bendicirá tódolos vosos esforzos por ser uns bos pais.

Principio bíblico: “Os planos do dilixente dan boa renda, pero quen anda ás présas anda ás perdas” (Prov. 21:5).

“Se algún de vós quere construír unha torre, quen non se senta antes a calcular os gastos para ver se ten abondo para terminala?” (Luc. 14:28).

Poñede a Xehová primeiro na vosa familia. Facede que a adoración a Xehová sexa unha prioridade para vós. Se xa tedes nenos, dedicade tempo a ensinarlles a cada un deles a amar a Xehová. Axudádelles a prestar atención e a aprender nas reunións de congregación. Asegurádevos de facer a adoración en familia tódalas semanas. Ensinádelles a predicar. Non lles carguedes as vosas responsabilidades como pais ós vosos fillos maiores ou a outros familiares. Hai que dedicar tempo e esforzo para axudarlles ós fillos a amar a Xehová, pero merece moito a pena.

Principio bíblico: “Nada me alegra máis que escoitar que os meus fillos seguen andando no camiño da verdade” (3 Xoán 4).b

Confiade en Xehová. Sen importar se estades pensando en ter fillos ou se xa os tedes, podedes estar seguros de que as expectativas de Xehová son máis importantes que as das persoas da vosa zona.

Serie de imaxes: 1. Uns pais sentados xuntos durante unha reunión de congregación. O fillo levanta a man para comentar. 2. Unha familia predicando xunta. O pai vai coa filla adolescente mentres a nai vai cos outros dous fillos máis novos. — Ensinarlles ós nenos como adorar e agradar a Xehová require tempo e esforzo.

Se decidides limitar o número de fillos que teredes, confiade en que Xehová coidará de vós cando sexades maiores. Resistide a presión de ver os vosos fillos coma un “plan de xubilación”. Non pensedes que ninguén coidará de vós. Xehová prometeu facelo, e el sempre cumpre as súas promesas (Xos. 23:14).

Principio bíblico: “Confía en Xehová con todo o teu corazón e non te apoies no teu propio entendemento. Tómao en conta en tódolos teus camiños, e el fará rectas as túas sendas” (Prov. 3:5, 6, TNM).

“Fun mozo e agora vou vello, e nunca vin un xusto abandonado, nin os seus fillos pedindo pan” (Sal. 37:25).

“Seguide buscando primeiro o Reino e a xustiza de Deus, e recibiredes tódalas cousas que necesitades” (Mat. 6:33).

Os fillos son un regalo moi valioso que Xehová lles confiou ós pais. Que contento debe estar ó ver como os matrimonios cristiáns coidan deles tal e como el espera. Eles coidan con cariño dos nenos tanto física, emocional como espiritualmente. Ademais, planifican o tamaño da súa familia e demostran que son fieis ó poñer os requisitos de Xehová por encima dos da súa cultura. Así lles demostran ós fillos que son un regalo moi valioso para eles, unha “herdanza do Señor”.

Non se arrepinten

Cústalles ós pais decidir cantos fillos terán? Isto é algo que se preguntan os pais en moitas partes do mundo onde os problemas económicos son habituais. Fíxate no que din sobre este tema uns cabezas de familia fieis dalgúns deses países.

Tivestes presión para ter unha familia grande?

“Si, incluso dalgúns da congregación. Un matrimonio díxonos: ‘Por que tedes só un fillo? Aquí en África, se tes un fillo é coma se non tiveses ningún. E se tes dous, é coma se tiveses só un’. Esperaban que tivésemos máis fillos incluso despois de nacer o segundo, unha nena” (Jeremías).

Tivestes problemas na vosa vida por non ter unha familia grande?

“Non, en realidade todo o contrario. Grazas a que escollemos ter unha familia pequena, miña muller e eu puidemos cubrir mellor as nosas necesidades materiais e sobre todo as espirituais. Eu crecín nunha familia numerosa e vin os problemas que tiveron meus pais para que recibísemos educación e para manternos a todos” (Jeremías).

Que pensan os vosos fillos do que decidistes?

“Os nosos dous fillos están contentos porque non teñen tantos problemas coma outros nenos que teñen moitos irmáns, pois seus pais a miúdo non poden atendelos ben” (Filipe).

“Os nosos fillos estaban felices porque se sentían protexidos e coidados nun fogar cariñoso. Invitabamos moitas veces a irmáns e irmás que querían moito a Xehová e que nos animaron a poñernos metas. Agora vemos nos nosos fillos os bos resultados deses esforzos” (Carlos).

Beneficiouvos dalgún xeito manter a vosa familia pequena?

“Puidemos coidar mellor das necesidades materiais da nosa familia. Hai tres anos perdín un traballo onde me pagaban ben. Levamos mellor ese cambio nas nosas circunstancias porque eramos unha familia pequena e non necesitabamos moito para manternos” (Jeremías).

“A nosa decisión permitiunos coidar dos nosos fillos tanto en sentido material como espiritual. Puidemos servir noutros lugares onde se necesitaban máis publicadores. Ademais, foinos máis fácil pasar tempo con cada un dos nenos e coidalos. Todos serven a Xehová e teñen metas espirituais” (Lenadi).

Que vos gustaría dicirlles a outros pais?

“Eu vivín as palabras do Salmo 34:10b [TNM], que di: ‘Ós que buscan a Xehová non lles faltará nada bo’” (Rafael).

a Cada matrimonio é o que decide cantos fillos terá, cando os terá e se usará algún método anticonceptivo que non sexa abortivo. Ninguén debería xulgalos polas súas decisións persoais (Rom. 14:4, 10-13). Ademais, os matrimonios cristiáns deben ter en conta o consello de 1 Corintios 7:3-5 á hora de tomar estas decisións.

b Neste versículo os “fillos” eran algúns discípulos ós que Xoán lles ensinou a verdade. Pero os pais senten o mesmo polo fillos que serven a Xehová.