“Non vou ter medo”

1. Que máis podemos aprender da Biblia sobre o valor?

CHEGADOS ó final deste libro, hai algo máis que se poida dicir do valor? Por suposto! En primeiro lugar, pensa que na Biblia se fala moito máis sobre este asunto tan importante do que podemos analizar nun só libro. En segundo lugar, é importante destacar o que temos que facer para beneficiarnos completamente das leccións que contén a Biblia sobre o valor.

2. Que outros servos fieis de Deus demostraron valor?

² Ocórreseche algún outro personaxe da Biblia que demostrase valor á parte dos que xa analizamos? É posible que penses nos extraordinarios profetas das Escrituras Hebreas coma Isaías, Xeremías, Ezequiel, Xonás ou Malaquías. Seguramente tiveron que sufrir algunhas das cousas que Paulo describiu no capítulo 11 de Hebreos. Alí dixo que algúns “foron postos a proba con burlas e lategazos, e incluso máis que iso, con cadeas e prisións”. Tamén escribiu que outros pasaron necesidade e dificultades e foron maltratados. Algúns mesmo foron executados (Heb. 11:36, 37). Aínda así, puxéronse con valor de parte de Xehová.

3, 4. Como axudaron dúas mulleres das que non sabemos o nome a salvar o rei David nun momento moi perigoso?

³ Na Biblia tamén aparecen moitas persoas que demostraron valor e das que non se di o seu nome. Pensa por exemplo en dúas mulleres da época do rei David. Estas foron ó seu auxilio cando o seu propio fillo Abxalom, un home cruel e egoísta, intentou derrocar a seu pai, obrigando a David a fuxir de Xerusalén. O rei pediulle a Sadoc, un sacerdote valente, que volvese á cidade e quedase alí para indagar o que Abxalom tramaba facer. Así o fixo e cando Sadoc reuniu a información que necesitaba, enviou unha criada para que llo contase a David. Non sabemos o nome desta criada pero si sabemos que foi moi valente. Ela arriscou a súa vida para contarlle a dous amigos de David o que Sadoc lle dixera. Cando estes ían levarlle a mensaxe a David, un rapaz viunos e foillo contar a Abxalom. Ó darse conta, saíron correndo e escondéronse nun pozo. A muller do propietario, de quen tampouco sabemos o nome, cubriuno rapidamente e botou gran encima. Cando chegaron os homes de Abxalom buscando os dous mensaxeiros, enganounos e mandounos a outro sitio. Estas dúas mulleres valentes axudaron a protexer o rei que Xehová escollera! (2 Sam. 15:23-37; 17:8-22).

⁴ O certo é que a Biblia está chea de exemplos de valor. Homes e mulleres —coñecidos e anónimos, ricos e pobres, prominentes e comúns— puxéronse con valentía do lado de Xehová. As súas historias poden axudarnos na actualidade.

A importancia da oración

5-7. De onde sacou Paulo o valor que necesitaba para enfrontarse á forte oposición?

⁵ Como podemos imitar os homes e mulleres valentes que aparecen na Biblia? Temos que entender que non eran valentes por natureza. Tampouco tiveron éxito ó servir a Xehová grazas ás súas propias forzas. Había algo máis implicado. Que máis se necesitaba?

⁶ Acórdate do apóstolo Paulo. En Filipos, el e Silas foron atacados por unha multitude que lles quitou a roupa, os golpeou repetidamente con varas e os meteu na prisión, onde lles prenderon os pés nun cepo (Feit. 16:12, 19-24). Despois de ser liberado, tiña Paulo medo de seguir predicando? Iso sería o normal, pero Paulo tiña unha responsabilidade que lle dera Xehová. A cidade de Tesalónica sería o seu seguinte destino. De onde sacou a forza e o valor que necesitaba?

⁷ Máis tarde escribiu: “Como sabedes, en Filipos sufrimos e maltratáronnos. Pero, grazas ó noso Deus, armámonos de valor para anunciarvos as boas noticias de Deus a pesar de ter moita oposición” (1 Tes. 2:2). Paulo sabía que necesitaría valor para facer o que Deus lle pedira, pero de onde o quitaría? Tería algún tipo de forza especial no seu interior que o facía ser valente? Non, el tivo valor “grazas ó noso Deus”. Por iso pediulle humildemente a Xehová que lle dese o valor que necesitaba, e Xehová respondeulle.

8. Como podemos imitar o exemplo de Paulo para ter máis valor?

⁸ Ti podes facer o mesmo que Paulo. Non te preocupes se no teu interior non atopas algún tipo de forza especial que te faga ser valente. Máis ben acude a Xehová en oración e pídelle que che conceda o valor que necesites en cada situación (Feit. 4:29).

9. Por que necesitamos pedirlle ó noso Pai que nos dea máis fe?

⁹ Tamén lle podes pedir a teu Pai unha calidade que está estreitamente relacionada: a fe. A fe é parte do froito do espírito santo de Xehová (Gál. 5:22, 23). Tamén é parte da armadura espiritual que necesitamos tódolos cristiáns (Ef. 6:16). A fe cristiá é tan poderosa que a Biblia di que nos permite “vencer o mundo” (1 Xoán 5:4). A túa fe en Xehová é a mellor base para que teñas valor. Cando tes confianza absoluta en que Xehová che axudará cando o necesites, daraste conta de que o teu valor será cada vez máis forte. Por iso, tódolos cristiáns temos boas razóns para pedir o mesmo que os apóstolos de Xesús: “Dános máis fe” (Luc. 17:5).

“Sede valentes!”

10, 11. Por que destacou Paulo a importancia do valor cando lles escribiu ós cristiáns hebreos?

¹⁰ Cando Paulo lles escribiu ós cristiáns hebreos de Xerusalén e os seus arredores, sabía que moi pronto afrontarían tempos moi difíciles. Xesús profetizara a terrible destrución da cidade, e ese momento estábase achegando a gran velocidade (Luc. 19:41-44; 21:20-24). Que lles dixo Paulo para axudarlles a ser valentes? Repasemos as súas palabras, das que xa falamos na introdución deste libro. Recordoulles a amorosa promesa de Xehová: “Nunca te deixarei e nunca te abandonarei”. Que efecto pode que tivese esta promesa neles? Paulo continuou: “Podemos dicir cheos de confianza: ‘Xehová é o meu axudante. Non vou ter medo. Que me poden facer as persoas?’” (Heb. 13:5, 6).

¹¹ Aínda que a Biblia non dá detalles sobre a destrución de Xerusalén do ano 70, podemos estar seguros de que os cristiáns fieis da cidade seguiron o consello inspirado de Paulo. Conseguiron o valor necesario para seguir as instrucións de Xesús e escaparon ás montañas xusto no momento exacto (Luc. 21:20, 21).

12. a) Como podes ser ti valente cando pases por tempos duros? b) Como demostraron algúns homes e mulleres un valor sobresaínte nestes últimos días, e que estás decidido a facer ti? (Mira o recadro “Imita o seu valor”).

¹² Xehová tamén pode axudarche da mesma maneira a ti cando pases por tempos duros, tanto agora coma no futuro (Ezeq. 38:1, 2, 10-12; Mat. 24:21). Recorda sempre que Xehová prometeu protexernos (Ezeq. 38:19-23; 2 Tes. 3:3). Nunca abandonará aqueles que o aman e teñen fe nel. O que Xehová lle dixo a Xosué tamén che aplica a ti: podes ser “rexo e coraxudo”! (Xos. 1:7, 9, 18). Ten sempre presentes as sentidas palabras que Xesús lles dixo ós seus seguidores: “Sede valentes!”. Xesús prometeu darche o espírito santo do seu Pai, e podes estar seguro de que cumprirá a súa palabra. O espírito santo potenciará o teu valor para que poidas aguantar calquera proba que se che poña por diante (Xoán 14:26; 15:26, 27; 16:33). Poderás dicir cheo de confianza: “Non vou ter medo”!

13. Que te impulsa a seguir sendo valente hoxe en día?

¹³ Imaxina o día no que toda a Terra estará en paz e a alegría que sentiremos cando volvamos ver que resucitan aqueles que estaban na memoria de Xehová. Imaxina o que será coñecer os homes e mulleres valentes dos que falamos neste libro e a moitos outros! Pensas que algún deles se arrepentirá de escoller servir a Xehová no vello mundo de Satán, aínda que esa decisión valente lles costase a vida? Claro que non! E que hai de ti? Mentres traballas con eles para transformar a Terra nun paraíso, arrepentiraste de ser valente e mostrarlle amor a Xehová durante estes últimos días? Abofé que non! Por iso toma a determinación de seguir mostrando valor ata o final. Esa será unha decisión da que estarás orgulloso por toda a eternidade!