Boni Mairoun Te Atua Te Taetae N Taetae Aika Kakaokoro?
E TAKU Devon: “I a bon aki ota. A tara ni mwaiti aika a karekea te taamnei ae raoiroi ni katoa wiki n au aro ao n taetae n taetae aika kakaokoro n te kakai. Tabeman mai buakoia a boni maiuakin aroaro ni maiu aika a aki riai. I nanon te tai anne, I kataia ni maiuakini kaetieti man te Baibara. Ma ngkana I kakorakoraai n tataroa te bwaintangira ae te taamnei, ao I bon tuai mani karekea. E kanga n riki anne?”
E kaakaea te taromauri ae aron anne Gabriel, ike a taraa ni karekea iai te taamnei ae raoiroi aomata ao n taetae n taetae aika kakaokoro. E kabwarabwaraa riki ni kangai: “I tabennanoia bwa I nanon au tai n tataro ao a kamangaongaoai n tatakarua tabeman n aia taetaenikawai are ti a kaai n aki ota iai. Bon akea ae buokaki man te taetaenikawai aei. Tiaki bwa e riai n ibuobuoki n aanga tabeua te bwaintangira ae taamnein te Atua?”
E ueke te titiraki aei mani baika a rinanona Devon ao Gabriel, E koaua bwa boni mairoun te Atua te taetae n taetae aika kakaokoro n aron ae a kakamanena Aaro tabeua ni boong aikai? Ibukini kaekaan te titiraki anne, e na rangi n ibuobuoki riki neneran te bwaintangira ae te taetaenikawai n te kakai irouia Kristian n te moan tienture.
A “Taetae n Taetae Aika Kakaokoro”
N te Baibara ao ti wareka iai taekaia tabeman mwaane ao aine ake anganaki te mwaaka bwa a na taetae n taetae aika kakaokoro ake a bon tuai man reiakinna. E moan riki aei ni bongini Bentekota 33 C.E., tabeua te wiki imwini maten Iesu Kristo. N te bong anne, “a a kaonaki n te taamnei ae raoiroi ao a a taetae n taetae aika kakaokoro” taan rimwini Kristo aika 120 mwaitiia i Ierutarem. A mimi taan roko man aaba aika ianena n “tatabemania nako ibukina bwa a ongo n oin aia taetae.”—Mwakuri 1:15; 2:1-6.
E taekinaki n te Baibara bwa a karekea te konabwai ae kamimi aei tabeman taani rimwin Iesu ake rimoa. N te katoto, e kairaki te abotoro Bauro n te kakai rinanon te taamnei ae raoiroi bwa e na kona n taetae n taetae aika bati aika kakaokoro. (Mwakuri 19:6; 1 I-Korinto 12:10, 28; 14:18) Ma e riai n iai manenan te bwaintangira mairoun te Atua rinanon te taamnei ae raoiroi. Mangaia are tera manenan te taetae n taetae aika kakaokoro ae ibuobuoki n taai ake e koreaki iai te Baibara?
Te Taetae n Taetae Aika Kakaokoro Boni Kanikinaean Ana Boutoka te Atua
Ngke e koroboki Bauro nakoia Kristian n te kaawa ae Korinto ake tabeman i buakoia a kona n taetae n taetae aika kakaokoro, ao e kabwarabwaraa bwa “te taetae n taetae aika kakaokoro bon te mwakuri ae kamimi, . . . ibukia ake a aki onimaki.” (1 I-Korinto 14:22) Ngaia are n reitaki ma aia konabwai tabemwaang n te kakai ao te mwaaka ni kona n taetae n taetae aika kakaokoro bon te bwai ni kakoaua nakoia taani mataku, bwa e a tia ni karekea akoana ao boutokaana mairoun te Atua te ekaretia ni Kristian ae boou. Ai aron te mwaake ae te kainikoto i nanon te kawai bwaintangira aika taiani kakai ake a riai taan ukoukora te koaua ni kakaaeia iai ana aomata te Atua ake a rineaki.
Ni koauana, e aki taekinaki n te Baibara ae a taetae n taetae aika kakaokoro are a tuai n reiakinna moa Iesu ke burabeti mai imwain aia tai Kristian. E kaotaki bwa iai riki bukina tabeua ngkai a anganaki taan rimwin Iesu te bwaintangira are te taetae n taetae aika kakaokoro.
Te Bwai ni Mwakuri Ibukini Kabutanakoan te Rongorongo ae Raoiroi
Ni moani waakinan ana mwakuri ni minita Iesu, ao e tuangia taan rimwina bwa a na tataekina te rongorongo ae raoiroi ae taekan Ana Tautaeka n Uea te Atua nakoia tii I-Iutaia. (Mataio 10:6; 15:24) Ibukin anne, a a aikoa bati n uarongorongo taan rimwini Kristo i tinanikun taabo ake a maekanaki irouia I-Iutaia. Ma e waekoa ni bitaki anne.
Teutana te tai imwini matena n 33 C.E., e a tuangia taan rimwina Iesu are e kautaki bwa a na “reireinia aomata mai buakoia botannaomata nako bwa a na riki bwa taan [rimwina].” E tuangia naba taan rimwina bwa a na riki bwa taani kakoaua ibukina “nako tabon aonnaba.” (Mataio 28:19; Mwakuri 1:8) E kainnanoaki kamanenaan taetae aika kakaokoro aika bati nakon tii te taetae n Ebera ibukini karababaan kabutanakoan te rongorongo ae raoiroi.
Ma e ngae n anne, a bati mai buakoia taani rimwini Kristo ake rimoa aika a “uarereke aia reirei ao a aki kakannato.” (Mwakuri 4:13) A kanga ngkanne ni kona n uarongorongo n aaba aika a raroanako ake a kamanenaaki iai taetae aika kakaokoro ae a tuai man ongongo ao aki ataia naba kaaina? A kairaki n te kakai rinanon te taamnei ae raoiroi tabeman mai buakoia taan uarongorongo aika ingainga bwa a na mwaatai n taetae n taetae aika kakaokoro ake a tuai n reiakinna mai mwaina n uarongorongo iai.
Ngaia are iai uoua kantaninga aika kakawaki ibukin te bwaintangira ae te taetae n taetae aika kakaokoro. Te moan, e katauraoa te kanikina bwa kakoauaan ana boutoka te Atua. Te kauoua, bon te bwai ni mwakuri ae uaana ibukini buokaia Kristian n te moan tienture ni kakororaoa mwiokoaia n uarongorongo nakoia aomata aika bati ake a kakaokoro aia taetae. E koaua bwa te taetae n taetae aika kakaokoro aika kakaraoaki n Aaro ni boong aikai, a kakororaoi kantaninga aikai?
Te Taetae n Taetae Aika Kakaokoro ni Boong Aikai—Boni Kanikinaean Ana Boutoka te Atua?
Te tabo raa ae ko na katea iai te kanikina bwa a aonga ni buokaki iai aomata n tatabemania nako n am kaawa? I nanon te auti ae uarereke? Ko na bon aki! Ti tuangaki n rongorongon te bong ae Bentekota bwa a “bati” aomata ake a matakuakina te kanikina are e katauraoaki irouia taan rimwini Kristo, ngke a taetae n taetae aika kakaokoro n te kakai. Ibukin anne, “a a ikotaki riki i buakoia tao teninga aomata” nakon te ekaretia ni Kristian, n te bong anne! (Mwakuri 2:5, 6, 41) E na kanga ngkanne n riki te mwakuri anne bwa te kanikina ibukia aomata aika bati ake tiaki kaain te onimaki, ngkana a taekinna aomata bwa a taetae n taetae aika kakaokoro ma a tii karaoa anne n te umwantabu?
E taekinaki n Ana Taeka te Atua bwa a kauntaba te wene ni bure ao tabeua riki “ana mwakuri te rabwata” ma ana mwakuri te taamnei ae raoiroi. N reitaki ma anne “a na aki rin te koraki ake a kakaraoi baikai n ana tautaeka n uea te Atua.” (I-Karatia 5:17-21) Ngkana ko matakuakinia aomata ake a maiuakina te aroaro ni maiu ae aki riai bwa a taetae n taetae aika kakaokoro, ko na bae n iango ni kangai: ‘Tiaki bwa a kona naba ni mwamwanaa te aba anganakia n tatabemania nako te taamnei ae raoiroi, ngkai a teimatoa ni karaoi mwakuri aika a bobuaka ma Ana Taeka te Atua?’ Ai bon tii te arona naba anne ma katean te kanikina are e kairi bao ni mwamwananga nakon te kawai ae bure.
Te Taetae n Taetae Aika Kakaokoro ni Boong Aikai— Bon te Bwai ni Mwakuri Ibukini Kabutanakoan te Rongorongo ae Raoiroi?
Tera te kantaninga riki teuana ibukin te taetae n taetae aika kakaokoro n te moan tienture? E koaua ae te taetae n taetae aika kakaokoro aika a kakaraoaki n taabo n taromauri, bon te bwai ni mwakuri ibukin tataekinan te rongorongo ae raoiroi nakoia aomata aika kakaokoro aia taetae? Uringia taani mataku i Ierutarem ni bongini Bentekota 33 C.E. ake a roko man aaba aika bati ao a rangi ni mataata n aia taetae n te kakai taan rimwini Kristo. Ni kaitaraan anne, a aki toki n taekin taeka aika a aki kona n ota iai taan ongora te koraki ake a taetae n taetae aika kakaokoro ni boong aikai.
E teretere bwa e bon rangi ni kaokoro te taetae n taetae aika kakaokoro ni boong aikai ma te bwaintangira ae te taamnei ae raoiroi are a anganaki taan rimwin Iesu ake rimoa. Ni koauana, bon akea te rongorongo ae kona n onimakinaki ibukini karekean te mwaaka n te kakai anne iroun temanna imwini mateia abotoro. E bon aki kamimi aei nakoia taani wareka te Baibara. E taetae ni burabeti te abotoro Bauro ni kaineti ma bwaintangira aika mwakuri ake a karaoaki n te kakai, n reitaki ma te taetae n taetae aika kakaokoro ni kangai: “A na toki.” (1 I-Korinto 13:8) E kanga ngkanne temanna ni kona n ataia bwa antai ae karekea te taamnei ae raoiroi n taai aikai?
Antai Aika A Anga te Kakoaua Ibukini Karekean te Taamnei ae Raoiroi?
E ataia raoi Iesu bwa e na toki te bwaintangira ae te taetae n taetae aika kakaokoro n te tai ae waekoa imwini katean te ekaretia ni Kristian. N te tai ae e aki maan imwaini maten Iesu, ao e taekina te kanikina, ke te mwaake are e na kanikinaeia iai taan rimwina ni koaua. E taku: “Ao ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.” (Ioane 13:35) Ni koauana, e taekinaki n Ana Taeka te Atua n te kibu naba are e taetae ni burabetinaki iai bwa e na bon toki te bwaintangira ae te kakai ni kangai: “Akea kabwakan te tangira.”—1 I-Korinto 13:8.
Te tangira bon te moanibwai ae taekinaki mai buakon ruaia “uaan,” ke ana mwakuri te taamnei ae raoiroi mairoun te Atua. (I-Karatia 5:22, 23) Ngaia are a na boni kaotiota te tangira ni koaua i marenaia te koraki ake iai irouia ni koaua taamnein te Atua ao ana boutoka. Irarikin anne, te katenua ni bwai mai buakon uaan te taamnei bon te rau. Mangaia are aomata ake a karekea te taamnei ae raoiroi ni boong aikai, a na karekea te rau ao n ingainga n rarawa nakoni mwakuri aika te riribai, te nanonnaba ao te tiritiri.
Uringa naba ana taetae ni burabeti Iesu are e mwaneweaki ni Mwakuri 1:8. E taetae ni burabetinna bwa a na karekea te mwaaka taan rimwina bwa a aonga n riki bwa taani kakoaua ibukina “nako tabon aonnaba.” E kaotia naba Iesu bwa e na teimatoa te mwakuri aei “ni karokoa tain tokin te waaki ae ngkai i aon te aba.” (Mataio 28:20) Mangaia are e na teimatoa te mwakuri n uarongorongo ni katobibia te aonnaba bwa kanikinaeaia naake a kairaki ni koaua n te taamnei ae raoiroi.
Tera am iango ngkoe? Koraki n aomata raa ae ko kakoauaa bwa iai irouia te taamnei ae raoiroi ni boong aikai? Antai ake a kaotiota uaan te taamnei, ae moamoa riki te tangira ao te rau, n te aro are a a karawawataaki irouia tautaeka ibukina bwa a rawa ni boutokaa te buaka n te aonnaba? (Itaia 2:4) Antai ake a kakorakoraia n rarawa nakon ana mwakuri te rabwata, n aron te wene ni bure ma ni kamwaawaia taan aki raraoma ni koaua ibukin aroaro akanne, mai buakoia kaain te ekaretia? (1 I-Korinto 5:11-13) Antai ake a tataekina te rongorongo ae raoiroi ibukin Ana Tautaeka n Uea te Atua, bwa bon tii ngaia te kantaninga ibukin te botannaomata ni katobibia te aonnaba?—Mataio 24:14.
A bon aki tabwarabwara n taekinna taani boreetia te maekatin aei, bwa Ana Tia Kakoaua Iehova boni ngaiia ae a boraoi ma aomata ake a kabwarabwaraaki n te Baibara bwa iai irouia te taamnei ae raoiroi. E aera bwa ko aki karekea am itoman ma ngaiia ao ni bon noria bwa a karekea ana boutoka ni koaua te Atua ke a aki?