Aia Titiraki Taani Wareware . . .

A katoki aoraki n te kakai Ana Tia Kakoaua Iehova?

▪ Ni kaekaana ae uarereke, a bon aki. A tuai mani katoki aoraki n te kakai Ana Tia Kakoaua Iehova. N aron Iesu, a kakoauaa bwa tabeia ae kakawaki bon tataekinan te rongorongo ae raoiroi ibukin Ana Tautaeka n Uea te Atua. A kakoauaa naba bwa a kinaaki Kristian ni koaua n te bwai teuana riki ae moan te kakawaki, ma tiaki n te katoki aoraki n te kakai.

Ni koauana, e rangi ni manena ibukira ni kabane aron Iesu Kristo ni katoki aoraki ma te nanoanga n te moan tienture C.E. Rinanon aei e katauraoa te bwai ni kakoaua Iesu bwa a na kakororaoaki taeka aikai i aan Ana Tautaeka n Uea te Atua are e na Uea iai: “Ane maeka iai e na aki kangai, I aoraki.”​—Itaia 33:24, BG.

Ma tera ae riki ni boong aikai? A taku taani katoki aoraki n te kakai n Aaro ake aongkoa Kristian ngaiia, n ikotaki naba ma Aaro tabeua ake tiaki Kristian bwa a kona ni katoki aoraki n te kakai. Ma e kamatoaa ana kauring Iesu nakoia ake a taku bwa a “karaoi kakai aika bati” n arana ni kangai: “I bon aki kinaingkami naba teutana! Naako mairou, ngkami aika taani kakaraoa ae buakaka.” (Mataio 7:22, 23) E koaua ngkanne bwa aaro ni katoki aoraki ake aongkoa a karaoaki n te kakai, boni kanikinaean ana tangira ao ana kakabwaia te Atua?

Iangoa ae taekinaki n te Baibara ibukin aron Iesu ni katoki aoraki. Ni kabotauan ana rongorongo te Baibara ma aroia taani katoki aoraki n te kakai ni boong aikai, ti a kona ni kai motikia mai nanora bwa mairoun te Atua katoki aoraki n te kakai ni boong aikai ke tiaki.

E tuai mani karaoa te katoki aoraki Iesu ibukin anaakin nanoia taan rimwina ke aomata aika bati ake a ongora. Ni kaitaraan anne, e katoki aoraki Iesu n taai aika bati n aki noraki irouia aomata. A bati taai ake e tuangia ake e katoki aorakia bwa a na aki kaongongo.​—Ruka 5:13, 14.

Akea te tai ae e kabooaki iai Iesu ibukini karaoan ana kakai. (Mataio 10:8) E totokanikai ni katoaa te tai are e katoki aoraki iai. A kamarurungaki raoi aoraki ni kabane ake a kawaria, ao e aki boto tokin aorakia i aoni korakoran aia onimaki n tatabemania nako. (Ruka 6:19; Ioane 5:5-9, 13) E boni kautiia naba maate Iesu!​—Ruka 7:11-17; 8:40-56; Ioane 11:38-44.

E ngae ngke e karaoi kakai akanne Iesu, ma te bwai are e kaatuua riki n ana mwakuri ni minita, bon tiaki bobotakia aomata ake a rairaki nakoina rinanon rotakin nanoia ni karaoani kakai. Ma ana mwakuri ae moan te kakawaki irouna, bon tataekinan te rongorongo ae raoiroi ibukin Ana Tautaeka n Uea te Atua. E baireiia taan rimwina Iesu bwa a na riki bwa taani karekeia taan rimwina ake a na reireinia aomata taekan te kantaninga ibukini karekean te maiu ae kororaoi i aan Ana Tautaeka n Uea te Atua.​—Mataio 28:19, 20.

Ni koauana, iai taan rimwin Iesu tabeman n te moan tienture ake a a anganaki bwaintituaraoi aika okoro ibukin te katoki aoraki, ma a na mauna baikai. (1 I-Korinto 12:29, 30; 13:8, 13) A kinaaki Kristian ni koaua ni boong aikai, man aia itangitangiri ae kaan i marenaia are a a kukurei iai n anga ngaiia ibukia aomata, ma tiaki mani mwakuri ni katoki aoraki. (Ioane 13:35) E aki karikirakea te itangitangiri are a na katiteuanaaki iai utu ni Kristian ni koaua man reeti ni kabane ao rikiaia aomata, te katoki aoraki n te kakai ni boong aikai.

Ma iai te botaki ni Kristian ae a katiteuanaaki n te tangira ae kaan n te aro are a a rawa n iowawa i marenaia ke nakon temanna riki, e ngae naba ngkana iai aia buaka aomata ae te kabanea ni korakora. Antai nakanne? Bon Ana Tia Kakoaua Iehova. A kinaaki ni katobibia te aonnaba n aroia ni kaotiota te tangira are e kaotiotia Kristo. Bon te kakai katiteuanaakia aomata aika kakaokoro aia reeti, abaia, kateia, ao rikiaia, ma e tii kona n reke aei man ana kakabwaia te taamnei ae raoiroi mairoun te Atua. E aera ko aki ira aia botaki teuana bwa ko aonga ni kakoauaa?

[Taamnei n iteraniba 28]

A karekea boutokaaia mairoun te Atua taani katoki aoraki n te kakai ni boong aikai (ae kaotaki n te angaatai)?