Ko Ataia?

Tera are e nanonna te abotoro Bauro ngke e taekina ‘te mwaka i aon rabwatana ae kanikinaean ae ana toro Iesu ngaia’?​—I-Karatia 6:17.

▪ E kona ni kakaokoro otaia taan ongora n ana taeka Bauro n te moan tienture. N te katoto, n taai ake rimoa ao e kakabonganaaki te biti ae bue ibukini kanikinaeaia taenikai n te buaka, taani kuribwaia te tembora, ao tooro ake a birinako ni karabarabaia. Ngkana e kabonganaaki ibukin aanga aikai ao e a iangoaki te mwaka bwa te bwai ae buakaka.

Ma a aki iangoaki n taai nako kanikina aikai bwa a buakaka iai. A bati aomata rimoa ake a kamanenai baikai bwa kanikinaeaia kaain te baronga ke te Aro teuana. N te katoto, e taekinaki n te boki ae Theological Dictionary of the New Testament, bwa “a katabuia I-Turia nakon atua aika Atata ao Atargatis ni kanikinaeaia n te mwaka i aon tounibaia ke roroaia. . . E kanikinaeaki te tia rimwin Dionysus ni koreani baan te kai ae te ivy i aona.”

A bati taani kanakorongorongo ni boong aikai ake a iangoia bwa e nanoni taiani mwaka Bauro ake irouna imwini mwakuri n iowawa aika tiritiri n taai aika kakaokoro n ana tai ni mwakuri ni mitinare. (2 I-Korinto 11:23-27) Ma tao e nanonna Bauro bwa e kinaaki ae te Kristian ngaia man aroaroni maiuna, ma tiaki n taiani mwaka ake i aona.

A riki kaawa ni kamanomano i aon Iteraera rimoa bwa nneia ni katanaki taani kamwarua?

▪ A kakabonganaaki tembora aika bati n abaia beekan rimoa bwa taabo ni kamanomano ibukia taani kamwarua ke ake a birinako ni karabaia. A kakabonganaaki naba ngkoangkoa aia tabo ni maeka taama ke tiina ma umwantabu n Aaro ake aongkoa Kristian ngaiia ibukin aei naba. Ma e ngae n anne, tuua ake a taui taekani kaawa ni kamanomano i aon Iteraera rimoa, a taraaki raoi iai bwa a na aki riki bwa taabo ni kamanomano ibukia taani kamwarua.

E taekinaki n te Tua Rinanoni Mote bwa e na tii katanaki ni kaawa ni kamanomano te aomata ae tiritiri n te ukinta. (Te Tua-Kaua 19:4, 5) E kona ni birinako nakon te kaawa ni kamanomano ae te kabanea ni kaan nakoina ike e aki kona n rin iai te mwaane ae ana utu ni kaan te aomata are e mate, are e kona n irantangaa te raraa. Imwin taekinan te baere e riki nakoia unimwaane iroun teuare e birinako ni kamanoa, e a uotaki nakon te kaawa ae mwaaka n te aono are e tiritiri iai bwa e na motikaki taekana. E a reke ana tai n te tabo anne ni kaotia bwa e aki bure. A nenera aia iraorao teuare e birinako ni kamanoa ma teuare mate unimwaane, bwa a na ataia bwa iai ngkoa te kairiribai i marenaia naakai ke akea.​—Warekaia Iteraera 35:20-24; Te Tua-Kaua 19:6, 7; Iotua 20:4, 5.

Ngkana e kuneaki n aki bure te tia birinako ni kamanoa, e na oki nakon te kaawa ni kamanomano ao n tiku i nanon oon te kaawa anne. Bon tiaki karabuuti kaawa aikai, bwa e mwakuri iai te aomata are e birinako ni kamanoa n aron te aomata ae bongana ibukia aomata n te kaawa anne. Ngkana e mate te ibonga ae rietata, a a kona ni kitani kaawa ni kamanomano taani birinako ni kamanoia ni kabane n akea te kangaanga nakoia.​—Warekaia Iteraera 35:6, 25-28.

[Mwabe n iteraniba 32]

(Ibukini bitakin taeka, nori booki)

KAAWA NI KAMANOMANO

1 KETETI

2 KORAN

3 KIREATA

4 TEKEM

5 BETERA

6 EBERON

Te Karaanga ae Ioretan