E Koaua ae te Atua E Kamanena te Ewarutin ni Karikii Iai Baika Maiu Aika Kakaokoro?

Ana kaeka te Baibara

E aki. E kamataataa te Baibara bwa e karikiia aomata te Atua n ikotaki naba ma aroka ao maan “n aekaia nako.”a (Karikani Bwaai 1:12, 21, 25, 27; Te Kaotioti 4:11) E taekinna bwa a riki aomata nako mairoun Atam ao Ewa, ake ara moani karo. (Karikani Bwaai 3:20; 4:1) Akea n te Baibara taekan ae e kabongana te ewarutin te Atua ni karikii iai baika maiu n aekaia nako, ae te iango ae e araranaki n tabetai bwa te theistic evolution. Ma bon akea naba te rongorongo n te Baibara ae kauntabaa aia kukune taan rabakau, are e noraki iai bwa iai te kaokoro i marenaia maan tabeua ake a kaaina te utu ni man ae tii teuana.b

• E koaua bwa e kabongana te ewarutin te Atua?

• E boraoi te ewarutin ma te Baibara?

• Tera aroia aroka ma maan ake a kona ni bitaki bwa a aonga ni maiu n aia otabwanin?

E koaua bwa e kabongana te ewarutin te Atua?

Te taeka ae “theistic evolution” ae taekan ae e kabongana te Atua te ewarutin, e irekereke ma koaua aika bati aika kakaokoro. Ni kaineti ma te Encyclopædia Britannica, ao te taeka anne e boutokaa te iango are “a kai kamwaitaki riki maan aika korakora nakoia maan aika mamaara, bon te waaki teuana are e kabongana naba te Atua ibukini kairani baika maiu n te aonnaba.”

E kona naba n irekereke ma iango aikai:

• A riki baika maiu ni kabane mairouia bakatibu ake a maiu ngkoangkoa.

• E kona ni bitaki te aeka ni maiu teuana nakon te aeka ni maiu teuana ae rangi ni kaokoro, ae te iango ae kona n aranaki n tabetai bwa te macroevolution.

• Bon te Atua ae kariaia rikini baikai.

E boraoi te ewarutin ma te Baibara?

Te iango ae te Atua e kabongana te ewarutin, e kaotaki iai bwa e aki eti raoi rongorongon te karikibwai are ni Karikani Bwaai. Ma Iesu e taekina te rongorongo are ni Karikani Bwaai bwa bon rongorongon rimoa ae koaua. (Karikani Bwaai 1:​26, 27; 2:​18-24; Mataio 19:​4-6) E taku te Baibara bwa imwain rokon Iesu i aon te aba ao e a kamani maiu i karawa ma te Atua ao ni buoka te Atua ni karikii ‘bwaai ni kabane.’ (Ioane 1:⁠3) Ngaia are te iango ae te Atua e kabongana te ewarutin ni karikii iai baika maiu n aekaia nako, e boni kauntaba ma ana reirei te Baibara.

Tera aroia aroka ma maan ake a kona ni bitaki bwa a aonga ni maiu n aia otabwanin?

E aki kabwarabwaraa te Baibara bwa mwaitira aron te bibitaki ae kona n riki nakon te bwai teuana ae maiu. E aki naba kauntabaa te koaua ae a kona maan ao aroka ake e karikii te Atua ni kakaokoro aekaia nako, ke ni bitaki bwa a aonga ni maiu n aia otabwanin ae boou. E ngae ngke a iangoia tabeman bwa anne te ewarutin, ma bon akea te bwai teuana ae maiu ae boou ae manga riki.