Tera ae E Taekinna te Baibara Ibukin Taren te Ran ae Itiaki ni Kabutaa te Aonnaba?
Ti bane ni kainnanoa te ran ae itiaki ibukini maiura. E kauring n taekinna te tia Koroboki ni Kabuta n te UN ae António Guterres, bwa “ti a kaaitara ma karuanikain taren te ran ibukin rikirakeni kainnanoakina ni kabutaa te aonnaba.” Birion ma birion mwaitiia aomata ni katobibia te aonnaba ake e a kangaanga irouia reken te ran ni moi ae itiaki.
Strdel/AFP via Getty Images
E na boni kona n tau te ran ibukira ni kabane? Ke ti na teimatoa ni kaaitara ma taren te ran? Tera ae e taekinna te Baibara?
Ana berita te Baibara ibukin te ran
E taekinna te Baibara bwa n te tai teuana ao e nang aki manga tare te ran. Ni koauana, e nang taonako te ran ae itiaki ao ae boou.
“A na koburake raan n te rereua, ao karaanga n te rereua ae aoraoi. E na riki te tabo ae mwauteretere imwin te kabuebue bwa te nei ni maunei, ao te tano ae bwatakataka bwa taiani koburake n ran.”—Itaia 35:6, 7.
Bukin tera ngkai ti kona ni kakoauaa ana berita te Baibara anne? Iangoa ana taeka te Baibara ni kaineti ma te anga teuana ni karaoan ara buraneti aei.
Ana taeka te Baibara ibukin te aonnaba ao aroni kawaini butin te ran
“E aki [karaoa te aonnaba te Atua] bwa e na matebuaka, ma e karaoia bwa e na maekanaki.”—Itaia 45:18.
Kioina ngkai e karika te aonnaba te Atua ma te konabwai n tararuaa aron te maiu, e kabobonga raoi bwa e aonga ni kakatauraoa te ran ae itiaki.
“E katikiirake timtim n ran [te Atua], ao a bitaki man te buane nakon te karau, ao taian nang a kabwaroa, ao a kabwakaa i aon te botannaomata.”—Iobi 36:27, 28.
Ni kamatataana, e katereaki n te kibu aei aron te Atua ni kanakoraoa kawaini butin te ran n te aonnaba ma rekena n akea tutukana. E atikakirake te buane mai aon te aba ao mai taari, e bitaki nakon te ran, ao e bwaro bwa te karau ae itiaki ao ae boou ibukia aomata ma maan.—Te Minita 1:7; Amota 5:8.
“N na anganingkami te karau n taia aika riai, ao e na uaa aon te aba, ao a na anga uaaia arokan te tawaana.”—Nakoaia Ibonga 26:4.
E berita te Atua bwa e na kakabwaiaia I-Iteraera ngkoa aika taan ununiki, ni kabatiai uaan arokaia n arona ni kakatauraoa te ran. E ataia bwa e kainnanoaki te karau n taina ae riai ibukin rereken te amwarake man te ununiki.
Te bwai are e karaoia te Atua nakoia I-Iteraera ngkoa, e na waekoa ni karaoia ibukin te aonnaba ae bwanin. (Itaia 30:23) Ma iai taabo aika bati n te aonnaba aika a taonaki ngkai n rikiraken te kangaanga ma taren te ran, ao bukina teuana bwa e karako bwabwakan te karau iai. Tera riki ae e taekinna te Baibara ibukini katokan te kangaanga ma taren te ran n taai aikai?
Aron tokin te kangaanga ma taren te ran
E katerea te Baibara bwa e na katoki kangaanga te Atua rinanon ana Tautaeka n Uea, ake a rotabuaka ara buraneti n ikotaki ma taren te ran n taai aikai. (Mataio 6:9, 10) Ana Tautaeka n Uea te Atua, bon te tautaeka mai karawa are e na tautaekana te aonnaba. (Taniera 2:44; Te Kaotioti 11:15) Irarikin anne, Ana Tautaeka n Uea te Atua, e nang karaoi baika a aki kona ni karaoi aia tautaeka nako aomata ae kamaunaan oin rikin te kangaanga ni kaineti ma taren te ran.
Te Kangaanga: Bibitakini kanoan te bong, boni ngaia teuana ae karuanikaia kawaini butin te ran. E a riki iai te mwauteretere ae korakora ma iekakin taabo tabeua n te ran, tao mani korakorani bwakan te karau ke rikiraken iabutin taari.
Katokana: E na manga kaoka nakoraoin te otabwanin Ana Tautaeka n Uea te Atua, bwa e aonga ni manga okira maiuraoina ara buraneti. E a tia ni berita te Atua ni kangai: “Noria! I a kabooui bwaai ni kabane.” (Te Kaotioti 21:5) E nang bati te ran n taabo aika mwauteretere ao n uota te mari nakon taabo ake a aki kona ni maekanaki moa ngkai. (Itaia 41:17-20) E na taua naba aroni butin te ang ma bwaai riki tabeua aika riiriki i aon te aba, Ana Tautaeka n Uea te Atua ae e kairiri iai Iesu Kristo.
Ni menan Iesu i aon te aba, e karaua te angibuaka ae kakamaaku ao anne are e a kaotaki iai bannan te mwaaka ni kairiri are e anganna te Atua. (Mareko 4:39, 41) A nang aki manga noraki kabuanibwai aika karina, i aan ana kairiri Kristo ae te Uea n Ana Tautaeka n Uea te Atua. A nang nora kakukurein te rau ni koaua ao te mweraoi aomata, n aki manga maakui rikini kabuanibwai n aekaia nako.
Te Kangaanga: A kabaarekai karaanga, neei, ao mwanibwa n ran, aomata aika akea aia mwamwannano ma kambwana aika mwangainrang, ao anne are e a kauaataoa te kangaanga n taren te ran ae itiaki.
Katokana: E na kaitiaka te aonnaba te Atua ao ni kaoka itiakin ma raoiroin taiani karaanga, neei, taari, ao te tano. E nang riki te aonnaba bwa te bwaretaiti. E taekina te kario te Baibara ngke e kangai: “E na kakatonga te rereua ma te aba ae mwauteretere, ao e na kimwareirei te rereua ae aoraoi ao e na onrake n te uee ae te taberon.”—Itaia 35:1.
Tera te kantaninga ibukia te koraki ake akea aia mwamwannano nakon te otabwanin ke raoia n aomata? E a tia ni berita te Atua bwa e na “kamaunaia te koraki ake a [tabe ni] kamauna te aonnaba.”—TeKaotioti 11:18, te kabwarabwara mai nano; Taeka N Rabakau 2:21, 22.
Te Kangaanga: A aki kabongana raoi te ran aomata ao ibukin anne, e a riao riki ae bakataeaki nakon are e kona ni karekeaki.
Katokana: Ti kakaitau nakon te Tautaeka n Uea bwa e nang ‘kakororaoa nanon te Atua n te aonnaba,’ ao tiaki nanoia aomata aika bangaomata. (Mataio 6:9, 10) Ana Tautaeka n Uea te Atua, e nang angania aomata ake a mena i aan ana tararua, te reirei ni kataneiai ae moan te tamaroa. “E na boni buta te aonnaba n ataakin Iehova,” e taekina anne Itaia 11:9.a E nang tararuaaki n te aro ae kororaoi ara buraneti ae tikauarerei aio ma bwaina nako aika karikaki, irouia aomata aika iai te atatai anne irouia ao aika a tangira te Atua ma ana karikibwai nako.
Ngkana ko kan ataa riki te bwai ae e na karaoia Ana Tautaeka n Uea te Atua, nora te kaongora ae “Tera ae E na Kakororaoia Ana Tautaeka n Uea te Atua?”
Nora bokin te Baibara ae Itaia, mwakoro 35, ni wareka iai aron oneakin te aonnaba nakon te bwaretaiti.
Mataku n te taamnei ae Bukin Tera Bwa E Karika te Aonnaba te Atua? n reiakina riki taekan ana kantaninga te Atua ibukin te aonnaba ao aomata.
a Iehova bon aran te Atua. (Taian Areru 83:18) Nora te kaongora ae “Antai Iehova?”