Ko Karekea Riki Ataakin Iehova?

1. Tera ara iango ngkana ti iaiangoa ana atatai Iehova, wanawanana, ao ana mwakuri?

KO A TIA n iaiangoa batin ana atatai Iehova, wanawanana ae korakora ao ana mwakuri aika kamimi? Ti bon rangi ni mangori ngkana ti iaiangoa aron ara tia Karikiriki. Ko bae ni boraoi n iango ma te abotoro Bauro ngke korea ae kangai: “Ai batira kaubwain te Atua ma wanawanana ao ana atatai! Ai kangaangara ataakin ana motikitaeka, ao ai kangaangara kuneakini kawaina!”—IRom 11:33, 34.

2. Baikara bwaai ni kakoaua ae oti iai bwa ti kona n ataa Iehova?

² E ngae ngke ti aki kona n atai bwaai ni kabane ibukin Iehova, ma ti kona ni kinaa bwa te aekakira ngaia. E taekina aei te Uea ae Tawita nakon natina are Toromon: “Ataa Atuan tamam ao tooro irouna ma te nano ae tabwanin raoi . . . Ngkana ko ukoukoria, ao ane e na kariaia bwa ko na kunea.” (1Rong. 28:9) N aron ana kauring te abotoro Ioane nakoia Kristian n tienture ake imwina, ti riai ni karekea “te ataibwai bwa ti aonga ni karekea te atatai ibukin Teuare koaua.” (1Ioa. 5:20) E taekinna Iesu ae kona n reke ataakin Iehova iroun “ane e kukurei te Nati ni kaotia nakoina.”—Mat. 11:27.

3. Tera ae ti na rinanona n te kaongora aei?

³ Aomata ni kabane ake a tia ni katabui maiuia nakon Iehova a tia n atai baika bati ibukina. Ma ti aki kona ni katoka karekean ‘ataakin’ Iehova. (Ioa. 17:3; nora te study note.) Ti kona n reiakini baika bati aika kakukureia ao arora ni kakorakoraa onimakinana iroura. Ti na maroroakin titiraki aika tenua aika ti riai n iaiangoi n aki ongeia bwa ai maanra ngaira ni beku iroun Iehova: Tera ae nanonaki raoi ni karekean ataakin Iehova? Bukin tera ngkai ti riai n teimatoa ni karekea riki ataakina? Ti na kangaa ni karekea riki ataakina?

TERA AE NANONAKI RAOI NI KAREKEAN ATAAKIN IEHOVA?

4. Tera ae irekereke ma karekean ataakin Iehova?

⁴ Ti ataa te bae irekereke ma ataakin Iehova n te baere taekinna ibukia I-Iutaia ake a oki man te taenikai. E berita ni kangai Iehova: “N na angania te nano bwa a na ataai ae boni ngai Iehova.” (Ier. 24:7) Ni koauana naake a oki mai Baburon a kaman atai koaua tabeua ibukin Iehova. Ma karekean ataakin Iehova irouia e bon irekereke iai nanoia, n ikotaki naba ma aia namakin ao bukini karaoani bwaai irouia. E taekinaki n aron aei n te boki teuana: “Bon iai te kaokoro i marenani karekean ataakin te Atua ao ataan te Atua. Ai aron raoi te kaokoro i marenani warekan karakinan te tangira ao ae ko a tangira.” E bati riki te koaua ae ti riai n ataia ibukin Iehova nakon tii ataakin ae iai arana ao te Atua ngaia. Ti bon riai n ataa raoi te Aomata are arana anne.

5. Tera reireiara mairoun te Uea ae Iotia ni kaineti ma ae nanonaki raoi ni karekean ataakin Iehova?

⁵ Ngkai ti a karekea riki ataakin Iehova ti a ataia bwa tera ae kukurei iai ao ae e aki kukurei iai. Ibukini kamatataana riki, iangoa ana katoto te Uea ae Iotia. E taekinaki ae kangai n te Baibara: “N ana ka-8 n ririki n tautaeka, ngke bon te teei naba ngaia, ao e a moana ukoukoran Atuan Tawita are ana bakatibu.” (2Rong. 34:3) Ma e bati riki ae e karaoia Iotia nakon tii reiakinan Ana Taeka te Atua. E karaoa ae e boraoi ma reiakinana. E taekina Iotia Iehova rinanon te burabeti are Ieremia bwa “e kateimatoa te kaetitaeka ae riai ma te raoiroi” n arona ni kamanoia ake a karawawataaki ao ni maiu ni kainnano. E reitia ni kangai Iehova: “Tiaki ngaia anne ae e nanonaki n ataakiu?”—Ier. 22:15, 16.

6. N aron ae oti n Taian Areru 9:10, tera aron rotakira ni karekean ataakin Iehova?

⁶ Wareka Taian Areru 9:10. Ngkana ti a karekea riki ataakin Iehova, ti a onimakinna riki. E kakoauaaki raoi anne iroun te abotoro Bauro. N ana kabanea n tai ni kabureaki tabeua te tai imwaini matena ao e korea aei: “I aki maamaa iai bwa I ataa Teuare I onimakinna.” (2Tim. 1:12) E kairaki Bauro mani baike reiakin ao n rinanoi ni maiuna bwa e na onimakina raoi te Atua. E kabwarabwaraaki te kibu aei ni kangai n te study note: “E kakoauaa raoi Bauro ae e na bon uringa arona ni kakaonimaki ni koaua Iehova ni karokoa ‘te bong’ are E na kautia iai.”

BUKIN TERA NGKAI TI RIAI N TEIMATOA NI KAREKEA RIKI ATAAKIN IEHOVA?

7. Tera ae kona n riki imwin ara beku iroun Iehova i nanon ririki aika bati?

⁷ Ni waakinakon te tai, ti a aki rangi ni kakorakoraira ni karekea ataakin Iehova n aron are ngke ti moan reiakina taekana. Bukin tera? Ngkana ti wareka te Baibara i bon iroura ke ni wareware ma taari n tain te taromauri n te ekaretia, ao ti aki toki n iangoia bwa tera manenani baike ti reiakin nakoira ao nakoia tabeman. Ti kaungaaki n te Koroboki ae Tabu bwa ti na karaoa anne. (2Tim. 3:16, 17) Ma a boni kaotaki naba n te Baibara baika kakawaki ibukin te tia Koreia. (TaiAre. 25:8-10) Ti aki riai n tii iangoa kakabwaiaara ao kakabwaiaaia tabemwaang n te rongorongo man te Baibara aei ma ti riai naba ni kangai, ‘Tera reireiau man aei ibukin Iehova ae te Atua?’a

8. Tera aron rotakin ara iraorao ma Iehova ngkana ti a karekea riki ataakina? (Taian Areru 73:24-28)

⁸ Ngkai ti a karekea riki ataakin Iehova, e nang rikirake ni korakora riki ara iraorao ma ngaia. N te katoto, tera am namakin ibukin Iehova imwini karaoan am wareware n te Baibara ni katoabong, matakuakinan te kanakobwanaa are katoa namwakaina, ke kaean te runga ke te bwabwaro? Ti aki toki n namakinna ae ti a kaaniaki riki ma Tamara are i karawa. Bukin tera? Ibukina bwa ti a reiakini riki baika bati ibukina. E a kairira anne bwa ti na karaoiroia ao ni kaitaua. Titeboo ara namakin ma te tia areru are e kananoa ana iango i aon aron Iehova n tabeakinna ao n taekina aei: “Bon te bwaa te Atua ae I kona n onimakinna ma nanou ni kabane, ao tibwangau n aki toki.” (Wareka Taian Areru 73:24-28) Ngkana ti kakorakoraira ni karekea riki ataakin Iehova, e a rikirake riki iai ara kakaitau ngkai e riki bwa raoraora.

9. E na tera aron rotakin ara motinnano ngkana ti ‘mutiakina’ Iehova? Kabwarabwaraa.

⁹ Ngkana ti ‘mutiakina’ Iehova n ururingani baike ti a tia n reiakinna ibukina ao n iaiangoan aron rotakina n ara mwakuri, e na buokira ni karaoi motinnano aika raraoi. (TaeRab. 3:5, 6) Ibukini kamatataana: A bati taari ake a kawakina taamneini buuia i aon aia taibora, n aia bwauti, ke n aia tareboon. A kona iai ni buokaki n iaiangoa buuia, ni karaoi motinnano aika a na kukurei iai buuia, ao n aki karaoi mwakuri ake a na uruaki iai nanoia buuia. N aron anne, ngkana ti kabatiaa ara tai n iaiangoa Iehova, ti na boni karaoi naba motinnano aika a kakukureia.—TaiAre. 19:13, 14.

10. Tera ae ti riai ni karaoia ngkai ti a reiakina taekan Iehova?

¹⁰ Ti karaoaki ni katotongan Iehova, ike ti a kona iai ni kaotiotii aroarona. (KBwaai 1:26) Ao ngkana ti kabatiaa ara tai n reiakin aroaron Iehova, ti na ataa riki iai arora ni kakairi irouna. A kabuakakaaki iroun Iesu taani koroboki ma Baritaio ibukina bwa a kabwaka ni kaotiotii aroaron te Atua. E ngae ngke a iaiangoi raoi booto n reirei ake e aanaki iai te Tua, ma a “kaaki taekani baike a kakawaki riki n te Tua, n aron te motikitaeka ae riai, te nanoanga, ao te onimaki.” (Mat. 23:23) Ti aki riai ni katotongia mataniwi n Aaro akanne, ma ti bia kabanea ara konaa n ota n aroaron Iehova aika kaotaki n ana tua ao n ana boto n reirei. Karaoan aei e na buokira ni kaotiotii aroaro akanne.—1Ioa. 4:8, 11.

TI NA KANGAA NI KAREKEA RIKI ATAAKIN IEHOVA?

11. Ko kangaa ni moani karekea ataakin Iehova?

¹¹ Antai ae e moan taekina nakoim taekan Iehova? Tao ko kaikawaaki irouia am karo aika Kristian. A bae n taekin nakoim rongorongo man te Baibara aika kaota aroaron te Atua ao a reireiniko aroarona aika kaotaki mani baike e karikii. Ke tao ko reirei n te Baibara ma temanna Ana Tia Kakoaua Iehova. E buokiko am tia reirei n te Baibara rinanon te boki n reirei ae Ko Kona ni Kukurei n Aki Toki! bwa ko na atai rongorongo man te Baibara aika kaotaki iai aroaron Iehova aika anainano, ao n reiakinna naba man te karikibwai.b (Neem. 8:8; Mwa. 14:17) Ti na maroroakin ngkai arora aika ti na teimatoa iai n reiakina taekan Iehova.

12-13. Tera reireiara ibukin Iehova mani warekan te Baibara? Taekina te katoto. (Ieremia 39:15-18) (Nora naba te taamnei ni moan te maekatin.)

¹² Te moan, ti kona n reiakina riki taekan Iehova mani warekan ao reiakinan ana Taeka. Tabeua kanoan te Baibara a bon taekin raoi aroaron te Atua. (TeOti. 34:6, 7) Ma n angiin te tai e oti iai rongorongoia aomata ao aia motinnano ake a karaoi. Ngkana ko wareki rongorongo akanne, iangoia bwa tera reireiam mai iai ibukin Iehova.

¹³ Iangoa te katoto aei. Ngkana ko wareka Ieremia 38:6-13, ko nora iai taekan te I-Itiobia ae Ebetamereka are buoka te burabeti ae Ieremia. Akea te nanououa bwa ko kai nori itera ake ko kona ni kakairi iai iroun Ebetamereka n arona n anga ngaia, n ninikoria, ao n tangiriia tarina n te onimaki. Ko nori naba aroaron Iehova aika kaotaraeaki n te rongorongo aei? (Wareka Ieremia 39:15-18.) N te katoto, tera te kibu ae oti iai aroaron Iehova ae te kakaitau? Te raoiroi? Te aki inanonano? Baikara riki aroaron Iehova aika ko nori n te rongorongo aei? Ngkana ko wareka te rongorongo teuana n Ana Taeka te Atua, nori iai aroaron Iehova aika kaotaki ao imwina kaitaua ao n neboia ibukin aroarona akanne.

14. Tera ae ti na karaoia bwa ti aonga ni kakabwaiaaki mani matakuakinan te karikibwai?

¹⁴ Te kauoua, ti kona n reiakina riki ae bati ibukin Iehova mani kananoan ara iango i aon ana karikibwai. (TaiAre. 145:9, 10) Ni koauana e aki tau tii matakuakinan te karikibwai. A tia tabeman ni kamatebwaia te karikibwai i nanoni maiuia ma a kabwaka n nori aroaron te Atua ao ni kakoauaa ae bon iai ngaia! E korea taekan te Atua te abotoro Bauro bwa “a teretere raoi aroarona aika aki nonoraki ni moa mani moani karikan te aonnaba ni karokoa ngkai, ibukina bwa a noraki ni baika karikaki.” (IRom 1:20) Te rairai teuana ibukin te kibu aei e taekinaki iai bwa ti kona n nori aroaron te Atua ibukina bwa a “noraki . . . ngkana ko iangoraoi.” Ngaia are ti riai n iaiangoi raoi baike ti nori bwa ti aonga n atai aroaron ara tia Karikiriki.

15. Tera ae e a tia ni buoka Patrick ni karekea riki ataakin Iehova, ao ko na kangaa ni karaoa naba anne? (Nora naba te taamnei.)

¹⁵ Angiina i buakora a maeka ni kaawa aika e a karako iai te karikibwai ae kona n noraki. Ngkana aei ae riki nakoim, ko kona ni karekei naba reireiam man te karikibwai? Iangoa Patrick ae maeka i Brazzaville ae kaawan teuana te Republic of the Congo ae rangi ni bubura. E taekina aei teuaei: “I kataia ni matakuakina te karikibwai man au bwaranta mai eta. I a bon nonori naba maan aika bingingi ao mannikiba aika uarereke aika a iangoa rekeni kanaia ke nneia ni maeka. N te taina I matakuakin mannikiba ni karaoi ngaoia. A kamanenai baike a kunei man te kaawa ibukini karaoani ngaoia ae a na mwengaraoi iai bunia.” Ma tiaki tii anne ae karaoia Patrick, bwa e iaiangoa naba te tia Karikiriki. E taku: “I a ataia ae e rangi n tabeakini Iehova mweraoia ana karikibwai, e ngae ngke baika uarereke. E karauaki iai nanou bwa e bon tabeakinai naba ao ni karekei baika I kainnanoi.”

16. Tera ae buoka Maria are tinan Iesu ni karekea riki ataakin Iehova, ao ti na kangaa ni kakairi irouna? (Nora naba te taamnei.)

¹⁶ Te anga ae te katenua ae ti kona iai ni karekea riki ataakin Iehova boni mani kananoan ara iango i aoni baika riki ni maiura. Anne ae e karaoia Maria are tinan Iesu. E a kaman ataa raoi Iehova ao e “akoaki iroun te Atua.” (Ruka 1:30) Ma imwina e anganaki mwiokoana ae kakawaki ae e na riki bwa tinan Natin te Atua. E kakorakoraaki Maria iroun Iehova ao e karaua nanona rinanon te anera ae Kabiriera ao ana koraki Maria ae Eritabeta. E kananoa ana iango neiei imwina n te bae riki nakoina ae kaotaraeaki iai taekan Iehova, mwaakana, ana nanoanga, arona n aki inanonano ao arona n tabeakinia akana mangori. (Ruka 1:46-55) N aroni Maria ni kakaitau n ana ibuobuoki te Atua, ti kakaitau naba n ana ibuobuoki Iehova are anganira “n te tai are ti kainnanoia iai.” (Ebera 4:16) N taai ake ko buokaki iai ao titirakiniko aei: ‘Tera reireiau n aei ibukin Iehova? Baikara aroaron Iehova aika kaotaraeaki n te bae riki aei?’

TI NA AKI KATOKA REIAKINANA

17-18. Bukin tera ngkai ti aki riai ni katoka reiakinan taekan Iehova?

¹⁷ Iangoia bwa mwaitira riki baika ti na reiakin ibukin Iehova n te aonnaba ae boou. Ti nang anganaki nira ni boki aika boou aika kaotaki iai ana kaetieti ibukira. (TeKao. 20:12) Ti nang reiakin riki baika bati man te karikibwai. (Ita. 11:6-9) Ti nang karikirakea riki ataakin Tamara ngkana ti a nori baika boou n ikotaki ma kautakia aika tangiraki iroura, ao namakinan ae ti a tabe ni kororaoi ni katoabong.

¹⁸ Ti aki kona ni katoka karekean ataakin Iehova. E boni maiu n aki totoki, ngaia are “e aki kona ni baireaki ana ataibwai.” (TaiAre. 90:2; 147:5) Ti “aki kona . . . n atai raoi ana mwakuri nako te Atua ae koaua ake e karaoi.” (TeMin. 3:11) Mangaia are n aki ongeia bwa ai maanra ngaira i nanon te koaua, ti bia teimatoa n reiakina riki taekan Tamara ae tatangira.