Buokiia Aomata Bwa A na Karekea Ataakin Iehova

1. Tera am namakin ngkana ko nora te rikirake iroun am reirei n te Baibara?

TERA am namakin ngkana e moan ira te taromauri te aomata ae reirei n te Baibara, e anga ana kaeka, e tataekina ana koaua nakoia aomata ao imwina riki e a motikia bwa e na katabua maiuna nakon Iehova ae te Atua? Akea te nanououa bwa ko na rangi ni kukurei! E bon riai ni kamoamoaaki Iehova n rikiraken ara reirei n te Baibara. Ti karaoiroa Iehova n noran ana ibuobuoki nakon temanna ae tabe n ririkirake n te onimaki.—1Kor. 3:5-9; 3Ioa. 3, 4.

2. Tera ae e kantaningaia Iehova ibukia ake a reirei n te Baibara? (1 Timoteo 2:3, 4)

² E kantaningaiia “aeka n aomata nako” te Atua bwa “a na kamaiuaki, ma ni karekea te atatai ae eti ibukin te koaua.” (Wareka 1 Timoteo 2:3, 4.) E tangiriia aomata Iehova bwa a na ataia ao ana kantaninga. (Ier. 9:24) E nanonaki n anne bwa a na karekea aia atatai ae eti. Te moan taetae ae rairaki bwa “te atatai ae eti” e aki tii nanonaki iai karekeani bwaai ni kakoaua iroun te aomata, ma e taekinna te tia rabakau temanna n te Baibara bwa te atatai ae “noraki koauana iroun temanna.” Ngkana e a ataa Iehova ane e reirei n te Baibara, e na boni bitaki maiuna n ana atatai anne. E a kona ni karekea kantaninga ibukin “te maiu are aki toki.”—Ioa. 17:3.

3. Tera ae ti na maroroakinna n te kaongora aei?

³ E kakabwaiaira Iehova n anganira mwiokoara ae buokaia aomata bwa a na karekea ataakina. N te kaongora aei, ti na maroroakin titiraki aikai: Bukin tera ngkai a riai ake a reirei n te Baibara ni karekea raoi ataakin Iehova? Ti na kangaa n reireinia bwa te aekakira raoi Iehova? Ao ti na kangaa ni buokiia bwa a na kaotiotia ni maiuia ae a ataa Iehova?

BUOKA AE REIREI N TE BAIBARA BWA E NA KAREKEA ATAAKIN RAOI IEHOVA

4. Tera ae ti na karaoia ngkana ti kaira te reirei n te Baibara? (Mareko 12:30)

⁴ E taekina Iesu te tua ae te kabanea ni kakannato ae ko na tangira Iehova ma nanom ni kabane, maium ni kabane, am iango ni kabane, ao korakoram ni kabane. (Wareka Mareko 12:30.) E riai te aomata ae reirei n te Baibara n ataa raoi Iehova bwa e aonga n tangiria. Ti tangira ara reirei n te Baibara bwa e na katabua maiuna nakon Iehova, tiaki ibukina bwa e tangirira, ke e tangiriia kaain te ekaretia, ke e tangiri reirei n te Baibara tabeua, ma ibukina bwa e tangira Iehova. Ngaia are tiara ngkana ti kaira te reirei n te Baibara bwa ti na buoka ara reirei bwa e na ataa Iehova ao n tangiria.

5. Tera ae e na kani karaoia am reirei n te Baibara ibukin tangiran Iehova?

⁵ Iai irekereken te tangira ma te ongeaba. Ngkana e a ataa Iehova am reirei n te Baibara ao n tangiria, e na kairaki iai bwa e na ongeaba irouna. E kangai Iesu: “I karaoa nanon te tua are e anganai te Tama, bwa a aonga n ataia kaain te aonnaba ae I tangira te Tama.” (Ioa. 14:31) N aron naba anne, a na kairaki n tangiran Iehova ake a reirei n te Baibara bwa a na ongeaba ao ni kakaonimaki ni koaua nakoina.—1Ioa. 5:3.

6. E na kangaa ataakin Iehova ni buoka am reirei n te Baibara ngkana e karaoi ana motinnano? Taekina te katoto.

⁶ A kona ni karaoi aia motinnano ma te wanawana naake a reirei n te Baibara ake a ataa raoi Iehova. N te katoto: E aki reiakina aroni kakibaan te wanikiba te bwairati tii man reiakinan taian tua ibukin te kibakiba ke iran te ukeuke. E bon riai naba ni bati ana tai ni kakiba te wanikiba. E na ataa iai aron te wanikiba ni kaaitarai kangaanga aika kakaokoro ao te bae e na karaoia i nanon taai akanne. N aron naba anne, e na karekea ataakin Iehova ane e reirei n te Baibara tiaki tii man ana reirei ma boni man noran naba mwin ana motinnano ake e kabotoi mani booto n reirei man te Baibara. E a rikirake riki iai ana atatai ibukin Iehova ao n nora aron Tamana are i karawa ni buokia, ao e na kairaki n anne nakoni karaoani motinnano aika raoiroi i nanoni maiuna.

7. E kangaa ana atatai Ioteba ibukin Iehova ni buokia ni karaoa ana motinnano ae raoiroi?

⁷ E buokaki Ioteba n ana atatai ibukin Iehova ngke e kaririaki irouni buuni Botiba. Akea te nanououa bwa e a kaman ataa Ioteba rongorongon Atam ao Ewa, ao Aberaam ma Taara mangke e uarereke. (KBwaai 2:24; 20:3, 6) E ataa Ioteba ana iango Iehova ibukin te mare ao te bwaintangira ae te wene n taanga man rongorongo akanne. E karekea raoi ataakin Iehova Ioteba ngaia are e rawa nakon ana kariri buuni Botiba ao n taku nakoina: “N na kangaa ni karaoa te buakaka ae korakora aei ao ni bure nakon te Atua?” (KBwaai 39:7-9) E ataia Ioteba bwa tera ae raoiroi ao ae buakaka n ana taratara Iehova. E ataia bwa tera ae e na nanokawaki iai Atuana. Ibukin anne, e boni karaoa te motinnano ae eti Ioteba. Ngkana ti buokiia ara reirei n te Baibara ni karekea riki ataakin Iehova irouia ao n ataia bwa te aekakira raoi ngaia, ane a na karaoi naba aia motinnano aika a kakukureia.

REIREINNA BWA TE AEKAKIRA RAOI IEHOVA

8. Ko na kangaa ni kamanena te boki ae Ko Kona ni Kukurei n Aki Toki! ni buoka iai ae reirei n te Baibara ni karekea riki ataakin Iehova?

⁸ Ko na kangaa n reireina are reirei n te Baibara bwa te aekakira raoi Iehova? E buoka Iobi Iehova bwa e na reiakina riki ae bati ibukina man tabekan titiraki nakoina aika raka i aon 50! (Iobi 38:1–41:34) Ti kona naba n tabeki titiraki. Titiraki ake n te boki ae Ko Kona ni Kukurei n Aki Toki! a kona ni buoka ane reirei ni karikirakea riki ataakin aroaron Iehova irouna. (Nora te bwaoki ae “Titiraki Aika Ibuobuoki n Ara Angareirei.”) Ngaia are kabonganai titiraki akanne ni buoka iai am reirei ni karekea ataakin Iehova.

9-10. (a) Tera ae a na buokaki iai akana reirei n te Baibara ni karekea aia atatai n aia wareware n te Baibara? (Iakobo 5:11) (b) Kabwarabwaraa bwa e kangaa te rongorongo n te Baibara teuana ni kaota te bae e kukurei iai Iehova ao ae e aki.

⁹ N te moantai are ti waakina iai te reirei n te Baibara, ti a kaungaia naba ara reirei bwa a na moana aia babaire ibukini warekan te Baibara.a Ti na kangaa ni buokiia bwa a na karekei reireiaia man aia wareware? Ti kona n tuangia ae n taai ake a wareka iai te rongorongo teuana n te Baibara, a kona n iangoia bwa e aera Iehova ngkai e karina te rongorongo anne n ana Taeka ao baikara aroarona aika kaotaraeaki iai. Nora aron te tia rimwini Kristo ae Iakobo ni karaoa anne ngke e mwanewea taekan Iobi. E kaatuua ana iango Iakobo tiaki tii i aon aroaron Iobi ae te nanomwaaka, ma bon i aon naba aroaron Iehova ae te akoi ao te nanoanga.—Wareka Iakobo 5:11.

¹⁰ Ti tangiriia ara reirei bwa a na nori rongorongo n te Baibara aika kaotaki iai bwa tera ae kukurei iai Iehova ao tera ae e aki. N te katoto, e kona ara reirei n nora te taibora ae “Moana Warekan te Baibara” n te boki ae Ko Kona ni Kukurei n Aki Toki! ao e tuangira ae e na wareka karakinan Taniera ngke karenakoaki ni nneia raian. Ti kona ni kaungaa bwa e na kananoa ana iango n titiraki aikai: ‘Bukin tera Iehova ngke e kamaiua Taniera? Tera ae e kukurei iai Iehova ae taekinaki ikai?’ (Tan. 6:10, 22) E boni kona naba n titirakinna aikai: ‘Tera are e riki nakoia mwaane ake a kabuakakaa Taniera? Tera ae e aki kukurei iai Iehova?’ (Tan. 6:4, 5, 24) Ni kabaneana, e kona n iangoi aroaron riki Iehova ake a kakoauaaki man te rongorongo anne.—Tan. 6:26, 27.

11. Ti na kangaa ni buokiia ara reirei bwa a na iangoa aia reirei n te Baibara bwa bon te bwaintangira mairoun Iehova?

¹¹ Ti rangi ni kukurei iroun ara reirei ngkana e kaota ana kakaitau n ana reirei n te Baibara. Ma ti bon riai ni buokia bwa e na ataia ae Nibwani kakabwaiaana akanne bon Iehova ae te tia Reirei ae Moan te Kakannato. (Ita. 30:20, 21) Tao e kona ni kaitauira ara reirei ibukini baike reiakin ao tao ni kamoamoaira ibukin aron ara angareirei. A aki bure kakaitau aika nako man te nano n aron akanne, ma ti riai n anga te kamoamoaaki ao te kakaitau anne nakon Iehova.

BUOKIA BWA E NA MWAKURIA ANA ATATAI

12-13. E na kangaa ataakin Iehova ni buoka ae e reirei n te Baibara ngkana e kangaanga otana n te rongorongo teuana n te Baibara? (Nora naba te taamnei.)

¹² Ngkana ti na kakabwaiaaki raoi man te atatai ae eti, ao ti riai ni kamanenai baika ti a atai. Ma ko na kangaa ni buoka am reirei bwa e na mwakuria ana atatai? Te moan, reireinna bwa e na iaiangoi raoi baike e a atai ibukin Iehova ngkana e wareka te rongorongo teuana n te Baibara ae kangaanga iai otana. N te katoto, ngkana e wareka taekan ana motikitaeka te Atua, e kona n iangoia bwa e aera Iehova ngke e kamaunaia tabeman ao e kamaiuia tabeman. Ko na kangaa ni buoka am reirei bwa e na iangoa aei n te aro ae riai?

¹³ Ko kona ni kaungaa am reirei bwa e na iaiangoi baike e a tia n atai ibukin Iehova. Tera aroni kakawakin te maiu iroun Iehova? (2Bet. 3:9) Tera ae e a tia ni karaoia ibukini kamaiuara e ngae ngke taani bure ngaira? (IEbe. 2:4, 5) E katuuaaeia aomata Iehova ake a bon aki riai ni katuuaaeaki? N te itera are teuana, e kamaiua te aomata ae e bon riai ni katuuaaeaki? (TeOti. 34:6, 7) N tabetai ao e aki kamatataaki raoi n te Baibara rongorongon ana babaire Iehova ae karaoia bwa ti aonga n ota raoi iai. Ma ti bon aki kainnanoi rongorongo akanne. Ti ataa raoi Atuara ao ti kakoauaa ae e boni kakaraoa ae eti.

14. Ko na kangaa ni buoka am reirei ngkana iai ana kangaanga ma kaain te ekaretia temanna?

¹⁴ Iangoa te anga ae te kauoua, are e na kona iai am reirei ni mwakuria ana atatai ibukin Iehova. Tao e a ira te taromauri am reirei, ma iai ana kangaanga ma kaain te ekaretia temanna. Tao iai unna iroun te tari anne. Kaungaa am reirei bwa e na iangoa aron Iehova n iangoiia taari. N te katoto, e kona n titirakinna aei: Tera ae e a tia ni karaoia Iehova ae e kaota iai tangiraia? (Ioa. 3:16) E kakawaki iroun Iehova katiteuanaakia Kristian? (TaiAre. 133:1) Tera ana namakin Iehova ngkana ti kakorakoraira ni kateimatoa te katiteuanaaki anne? (2Kor. 13:11) Buoka am reirei bwa e na ataa aroni kukurein Iehova ngkana ti katuuaa taraakin raoiroia tabemwaang ao tiaki kabwakaia.

15-16. (a) E na kangaa ni kakairi iroun Iesu ane e reirei ngkana e a kaaitara ma karaoani motinnano aika kakawaki? (Ioane 8:29) (b) E kangaa Marianne ni buoka ana reirei bwa e na karaoa te motinnano ae raoiroi? (Nora naba te taamnei.)

¹⁵ Ni kabaneana, ko kona ni buoka am reirei n te Baibara bwa e na kamanena ana atatai ibukin Iehova ni karaoi iai ana motinnano. Ko kona ni kairia nakon reirei 35 n te boki ae Ko Kona ni Kukurei n Aki Toki! ae atuna “Arora ni Karaoi Motinnano Aika Raraoi.” Ma tera arom ngkana e teimatoa naba am reirei ni kangaanga irouna karaoan ana motinnano e ngae ngke e a tia n tataro ao ni karaoa ana kakaae? Tao e a aki ataia bwa e nga mai buakoni booto n reirei aika bati ae e na maiuakinna. Ko kona ni buokia bwa e na iaiangoa ana katoto Iesu. E kangaa Iesu ni karaoi ana motinnano? E taku: “I kakaraoi baike a kakukurei [iroun Tamau].” (Wareka Ioane 8:29.) Kaungaa am reirei bwa e na titirakinna ni kangai, ‘Tera au motinnano ae e na kakukureia, ae boto mani mwin au ukeuke ao man te bae I a ataia ibukin Iehova?’ Te motinnano ae kukurei iai Iehova bon te motinnano ae raoiroi.

¹⁶ E kaaitara ma karaoan te motinnano ae kakawaki te aine temanna mai Chile ae e reirei n te Baibara. E kairoroaki irouia ana utu bwa e na butimwaea te mwakuri ae bubura iai boona ma e na rotakibuaka iai ana taromauri. E taekina ae kangai Marianne ae e reirei ma ngaia: “I kaungaa bwa e na iangoia bwa tera ana namakin Iehova n ana motinnano, e na kukurei iai ke e na nanokawaki? I kaungaa naba bwa e na taekina raoi te bae riki nakon Iehova n te tataro ao n nora arona ni kaekaa. E a aki butimwaea te mwakuri arei ao n te tai ae waekoa e a reke ana mwakuri ae e kona iai n irii taromauri.” N oneani mwin are e na tuanga ana reirei te bwai ae e riai ni karaoia, e buoka neierei Marianne bwa e na kananoa ana iango i aon te bae e a kaman ataia ibukin Iehova. N tokin te tai e a kakorakoraaki iai ana iraorao ma Marianne ao bon Iehova naba. E taku Marianne ibukin ana reirei arei: “E a ataia ae e na bon tabeakinira Iehova ngkana ti moanibwaia taromauriana.”

KAKABWAIAAIA NAAKE A KAREKEA RAOI ATAAKIN IEHOVA

17. Tera riki ae ti tangiria ibukia ara reirei n te Baibara irarikin ataakin te koaua irouia?

¹⁷ A bati reirei aika kakawaki ake ti rinanoi n te reirei n te Baibara. A reiakini moan reirei n te Baibara ara reirei, n ikotaki ma aroia maate, te kaboomwi, ao te Tautaeka n Uea. A reiakina aron ara botaki n aroni bobotaki n taromauri, te kaetieti ibukia unimwaane, ao taben te Rabwata n Tautaeka. Ma ti tangiriia ara reirei bwa a na karaoa riki ae bati nakon tii ataakini koaua akanne. Ti tangiriia bwa a na karekea riki ataakin Iehova.

18. Baikara kakabwaia aika katauraoaki ibukia naake a karekea ataakin Iehova?

¹⁸ Ai kakabwaiaakira ngaira ngkai ti reireinia tabeman bwa a na karekea ataakin Iehova! A na boni karekea te kukurei ni maiuia ngkai, naake a karekea riki ataakin Iehova ao n taromauria. (TaiAre. 25:12-15) N te tai ae e na roko, ao a na karekea te maiu ae akea tokina naake a “karekea te atatai ibukin Teuare koaua” ae Iehova. (1Ioa. 5:20) Ma tiaki tii anne. E taekinna te Baibara bwa a ‘ataaki iroun te Atua’ naake a kakorakoraia ni karekea riki ataakin Iehova ao n tangiria. (1Kor. 8:3) Eng, e bon norira te Atua ae Moan te Mwaaka ao e iangoira naba bwa raoraona. Ai tamaroara te kakabwaia ae reke man ataakin te Atua ae tii ngaia ae koaua!